ಬೆಂಗಳೂರು: 15 ಕ್ಷೇತ್ರಗಳ ಉಪ ಚುನಾವಣೆ ಮತದಾನ ಪ್ರಕ್ರಿಯೆ ಮೊದಲ 2 ಗಂಟೆಯ ಅವಧಿ ಪೂರ್ಣಗೊಂಡಿದ್ದು, ಯಾವ ಕ್ಷೇತ್ರದಲ್ಲೂ ಶೇ.10ಕ್ಕಿಂತ ಹೆಚ್ಚು ಮತದಾನವಾಗಿಲ್ಲ. ಹೊಸಕೋಟೆಯಲ್ಲಿ ಶೇ.9.1ರಷ್ಟು ಮತದಾನವಾಗಿದ್ದು, ಉಳಿದ ಕ್ಷೇತ್ರಗಳಿಗಿಂತ ಹೆಚ್ಚಿನ ಮತದಾನ ನಡೆದಿದೆ. ಶಿವಾಜಿನಗರದಲ್ಲಿ ಅತ್ಯಂತ ಕಡಿಮೆ ಪ್ರಮಾಣದ ಮತದಾನವಾಗಿದೆ. ಬೆಳಗ್ಗೆ 7 ಗಂಟೆಗೆ ಆರಂಭವಾದ ಮತದಾನ ಪ್ರಕ್ರಿಯೆ 9 ಗಂಟೆ ವೇಳೆಗೆ ಶಿವಾಜಿನಗರ ಕ್ಷೇತ್ರದಲ್ಲಿ ಕೇವಲ ಶೇ.3.04ರಷ್ಟು ಮತದಾನವಾಗಿದೆ. ಚಿಕ್ಕಬಳ್ಳಾಪುರ ಕ್ಷೇತ್ರದಲ್ಲಿ ಶೇ.6.9, ಗೋಕಾಕದಲ್ಲಿ ಶೇ. 6.11, ಅಥಣಿ ಕ್ಷೇತ್ರದಲ್ಲಿ ಶೇ.8.33, ರಾಣೆಬೆನ್ನೂರದಲ್ಲಿ ಶೇ.6.22, ಕಾಗವಾಡ ಕ್ಷೇತ್ರದಲ್ಲಿ ಶೇ.6.94, ಹಿರೇಕೆರೂರ ಕ್ಷೇತ್ರದಲ್ಲಿ ಶೇ.5.59, ಕೆಆರ್ ಪೇಟೆ ಕ್ಷೇತ್ರದಲ್ಲಿ ಶೇ.6.8, ಹುಣಸೂರು ಕ್ಷೇತ್ರದಲ್ಲಿ ಶೇ.6.18, ಕೆಆರ್ ಪುರದಲ್ಲಿ ಶೇ.4.04, ಮಹಾಲಕ್ಷ್ಮಿ ಲೇಔಟ್ ಕ್ಷೇತ್ರದಲ್ಲಿ ಶೇ.8.21, ಯಲ್ಲಾಪುರ ಕ್ಷೇತ್ರದಲ್ಲಿ ಶೇ.7.54, ಯಶವಂತಪುರ ಕ್ಷೇತ್ರದಲ್ಲಿ ಶೇ. 4.94, ವಿಜಯನಗರ ಕ್ಷೇತ್ರದಲ್ಲಿ ಶೇ.6.5, ಶಿವಾಜಿನಗರ ಕ್ಷೇತ್ರದಲ್ಲಿ ಶೇ.3.04 ಮತದಾನವಾಗಿದೆ. ಆರಂಭಿಕ ಮತದಾನ ಟ್ರೆಂಡಿಂಗ್ ಉಪ ಚುನಾವಣೆ ಬಗ್ಗೆ ಜನರ ಆಸಕ್ತಿಗೆ ಹಿಡಿದ ಕೈಗನ್ನಡಿಯಂತೆ ತೋರುತ್ತಿದೆ. ರಾಜಕೀಯ ನಾಯಕರ ಆಟದಿಂದ ಜನ ಬೇಸತ್ತಿದ್ದಾರೆ ಎಂಬುದನ್ನು ಎತ್ತಿ ತೋರಿಸುವಂತಿದೆ. ಬಿಜೆಪಿ ಸರಕಾರದ ಅಳಿವು ಉಳಿವಿನ ಚುನಾವಣೆ ಇದಾಗಿದ್ದು, ಮತದಾರರು ಬಹಳ ಹುರುಪಿನಿಂದ ಪಾಲ್ಗೊಳ್ಳುವ ನಿರೀಕ್ಷೆಯಿತ್ತು. ಮುಂದಿನ ಅವಧಿಯಲ್ಲಿ ಮತದಾನ ಪ್ರಮಾಣ ಹೆಚ್ಚಾಗುತ್ತದೆಯೇ ಎಂಬುದನ್ನು ಕಾದು ನೋಡಬೇಕಿದೆ.
from India & World News in Kannada | VK Polls https://ift.tt/351riMZ
