ಕೆಜಿಎಫ್‌: ನಿರಂತರವಾಗಿ ಮಳೆ ಸುರಿಯುತ್ತಿದ್ದ ಸಮಯದಲ್ಲಿ ದಿಢೀರನೇ ಕೆಜಿ ಒಂದಕ್ಕೆ 100 ರೂಪಾಯಿ ತಲುಪಿದ್ದ ಟೊಮೇಟೊ ಬೆಲೆ ಈ ವಾರ ಕುಸಿದಿದೆ. ನಗರದ ಎಂ.ಜಿ ಮಾರುಕಟ್ಟೆಯಲ್ಲಿ ಉತ್ತಮ ಗುಣಮಟ್ಟದ ಟೊಮೇಟೊ ರೂ.60 ಕ್ಕೆ ಸಿಗುತ್ತಿದೆ, ತಳ್ಳುವ ಗಾಡಿಗಳಲ್ಲಿ 50ರಿಂದ 55 ರವರೆಗೆ ಬೆಲೆಯಿದೆ. ಮಳೆ ಕಡಿಮೆಯಾಗಿರುವುದರಿಂದ ಟೊಮೇಟೊ ಬೆಳೆಯೂ ಕಡಿಮೆಯಾಗಿದೆ. ಇದೇ ಪರಿಸ್ಥಿತಿ ಮುಂದುವರಿದರೆ ಮುಂದಿನ ವಾರ ಧಾರಣೆ ಇನ್ನಷ್ಟು ಕುಸಿಯಲಿದೆ ಎನ್ನುತ್ತಾರೆ ವ್ಯಾಪಾರಿಗಳು,. ಮಳೆ ನಿಲ್ಲುವ ಲಕ್ಷಣ ಕಾಣದಿದ್ದರೂ, ನಗರದಲ್ಲಿ ಚಳಿ ಆರಂಭವಾಗಿದೆ. ಮಾರುಕಟ್ಟೆಗೆ ಸೊನೆ ಅವರೆಕಾಯಿ, ತೊಗರಿ ಕಾಯಿ ಬರುವುದಕ್ಕೆ ಆರಂಭವಾಗಿದ್ದು, ಗ್ರಾಹಕರಿಂದ ಬೇಡಿಕೆ ಸೃಷ್ಟಿಯಾಗಿದೆ. ಅವರೆಕಾಯಿ ಕೆಜಿಗೆ ರೂ.40 ರಿಂದ 50ರ ವರೆಗೆ ಬೆಲೆ ಇದೆ, ತೊಗರಿಕಾಯಿ ಒಂದು ಕೆಜಿಗೆ ರೂ.60ಕ್ಕೆ ಮಾರಾಟವಾಗುತ್ತಿದೆ. ಸೊನೆ ಅವರೆಗೆ ಬೇಡಿಕೆ ಹೆಚ್ಚು: ತೊಗರಿ ಕಾಯಿ ಸೀಸನ್‌ ಈಗಷ್ಟೇ ಆರಂಭವಾ ಗಿದೆ. ಹಾಗಾಗಿ ರೂ.60 ಇದೆ. ಮಾರು ಕಟ್ಟೆಗೆ ಹೆಚ್ಚಿನ ಪ್ರಮಾಣದಲ್ಲಿ ಆವಕವಾದಾಗ ಬೆಲೆ ಇನ್ನಷ್ಟು ಇಳಿಯಲಿದೆ ಎಂದು ಎಂ.ಜಿ.ಮಾರುಕಟ್ಟೆ ವ್ಯಾಪಾರಿ ತಂಗವೇಲು ತಿಳಿಸಿದರು. ಉಳಿದ ತರಕಾರಿಗಳ ಪೈಕಿ ದಪ್ಪ ಮೆಣಸಿನಕಾಯಿ, ಗೆಡ್ಡೆಕೋಸು ದುಬಾರಿಯಾಗಿದೆ. ಗೆಡ್ಡೆಕೋಸಿಗೆ ಕೆಜಿ.ಗೆ ರೂ.80 ಇದೆ, ಕಳೆದ ವಾರ 120 ಇದ್ದ ದಪ್ಪ ಮೆಣಸಿನ ಕಾಯಿ ಬೆಲೆ ಈ ವಾರ 140 ಕ್ಕೆ ಏರಿದೆ. ಉಳಿದಂತೆ ಬೀನ್ಸ್‌ ಬೆಲೆ ರೂ.60 ಇದೆ, ಕ್ಯಾರೆಟ್‌, ಬೀಟ್‌ ರೂಟ್‌, ಬದನೆಕಾಯಿ, ಮೂಲಂಗಿ, ಈರುಳ್ಳಿ ಸೇರಿದಂತೆ ಹಲವು ತರಕಾರಿಗಳ ಬೆಲೆ ರೂ.40 ಇದೆ. ಹಣ್ಣುಗಳ ಪೈಕಿ ಮಾರುಕಟ್ಟೆಯಲ್ಲಿ ಮೂಸಂಬಿ, ಕಿತ್ತಳೆ ಹಣ್ಣುಗಳ ಬೆಲೆ ಕೆ.ಜಿಗೆ ರೂ.10 ಹೆಚ್ಚಾಗಿದೆ, ಹಲವು ವಾರಗಳಿಂದ ಎರಡೂ ಹಣ್ಣುಗಳ ಬೆಲೆ ಕೆ.ಜಿಗೆ ರೂ.60 ಇತ್ತು. ಉಳಿದ ಹಣ್ಣುಗಳ ಬೆಲೆಯಲ್ಲಿ ವ್ಯತ್ಯಾಸವಾಗಿಲ್ಲ, ಸೇಬು ಕೆಜಿಗೆ ರೂ.120 ಇದೆ, ದ್ರಾಕ್ಷಿ ರೂ.120, ಏಲಕ್ಕಿ ಬಾಳೆ ಹಣ್ಣು ರೂ.40, ಪಚ್ಚೆಬಾಳೆ ರೂ.20, ಪಪ್ಪಾಯಿಗೆ ರೂ.25 ಬೆಲೆ ಇದೆ. ಕಾರ್ತಿಕ ಮಾಸ ಹಾಗೂ ಶುಭ ಸಮಾರಂಭಗಳ ಕಾರಣದಿಂದ ಹೂವುಗಳ ಬೇಡಿಕೆ ಮುಂದುವರೆದಿದ್ದು, ಧಾರಣೆ ಮೇಲ್ಮಟ್ಟದಲ್ಲಿಯೇ ಇದೆ. ಕಡೆ ಕಾರ್ತಿಕ ಸೋಮವಾರದ ಅಂಗವಾಗಿ ಭಾನುವಾರ ಬೆಲೆ ಹೆಚ್ಚಿತ್ತು ನಂತರ ಹೂವಿನ ಧಾರಣೆ ಕಡಿಮೆಯಾಗಿದೆ. ಎಂ.ಜಿ. ಮಾರುಕಟ್ಟೆಯಲ್ಲಿ ಕನಕಾಂಬರಕ್ಕೆ ರೂ.1500 ರಿಂದ 1800 ಬೆಲೆ ಇದೆ, ಮರ್ಲೆ ಕಾಕಡ ಹೂವಿಗೆ 400 ರಿಂದ ರೂ.500 ರವರೆಗೆ ಬೆಲೆ ಇದೆ, ಸೇವಂತಿಗೆ, ಚೆಂಡು ಹೂ, ಸುಗಂಧರಾಜ ಹೂವುಗಳು ಹಲವು ವಾರಗಳಿಂದ ಬೇಡಿಕೆ ಉಳಿಸಿಕೊಂಡಿವೆ.
from India & World News in Kannada | VK Polls https://ift.tt/3GatSSN
