ಹೊಸದಿಲ್ಲಿ: ಕಳೆದ 2021ರ ಐಸಿಸಿ ಟಿ20 ವಿಶ್ವಕಪ್ ತಂಡದಿಂದ ತನ್ನನ್ನು ಕೈ ಬಿಟ್ಟಿದ್ದ ಬಗ್ಗೆ ಪ್ರತಿಕ್ರಿಯಿಸಿದ , ಕ್ರಿಕೆಟ್ ದಕ್ಷಿಣ ಆಫ್ರಿಕಾದ ನಿರೀಕ್ಷೆಗಳನ್ನು ಪರಿಪೂರ್ಣಗೊಳಿಸುವುದು ತುಂಬಾ ಕಠಿಣವಾಗಿದೆ ಎಂದು ಹೇಳಿಕೊಂಡಿದ್ದಾರೆ. 2011ರಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ್ದ ಫಾಫ್‌ ಡುಪ್ಲೆಸಿಸ್ ಅವರು ಇಲ್ಲಿಯವರೆಗೂ ದಕ್ಷಿಣ ಆಫ್ರಿಕಾ ಪರ ಒಂದೇ ಒಂದು ವಿಶ್ವಕಪ್ ಟೂರ್ನಿಯಿಂದಲೂ ಹೊರಗುಳಿದಿರಲಿಲ್ಲ. ಆದರೆ, ಇತ್ತೀಚೆಗೆ ಮುಕ್ತಾಯವಾಗಿದ್ದ ಟಿ೨೦ ವಿಶ್ವಕಪ್ ಟೂರ್ನಿಯಿಂದ ಅವರು ಅನಿರೀಕ್ಷಿತವಾಗಿ ಹೊರಗುಳಿಯಬೇಕಾಗಿತ್ತು. ಸೀಮಿತ ಓವರ್‌ಗಳ ಸ್ವರೂಪದ ಕ್ರಿಕೆಟ್‌ಗೆ ಹೆಚ್ಚಿನ ಗಮನಹರಿಸುವ ಸಲುವಾಗಿ ಫಾಫ್‌ ಡುಪ್ಲೆಸಿಸ್ ಅವರು ಹಲವು ದಿನಗಳ ಹಿಂದೆ ಟೆಸ್ಟ್ ಕ್ರಿಕೆಟ್‌ಗೆ ವಿದಾಯ ಹೇಳಿದ್ದರು. ಇತ್ತೀಚೆಗೆ ಮುಗಿದಿದ್ದ 2021ರ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ಅವರು ಭಯಾನಕ ಫಾರ್ಮ್‌ನಲ್ಲಿದ್ದರು. ಆ ಮೂಲಕ ಚೆನ್ನೈ ಸೂಪರ್‌ ಕಿಂಗ್ಸ್ ನಾಲ್ಕನೇ ಬಾರಿ ಐಪಿಎಲ್‌ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದರು. ಅದ್ಭುತ ಫಾರ್ಮ್‌ನೊಂದಿಗೆ ಐಸಿಸಿ ಟಿ೨೦ ವಿಶ್ವಕಪ್ ಟೂರ್ನಿ ಆಡಲು ಉತ್ಸುಕರಾಗಿದ್ದ ಫಾಫ್‌ ಡುಪ್ಲೆಸಿಸ್ ಅವರನ್ನು ದಕ್ಷಿಣ ಆಫ್ರಿಕಾ ತಂಡದಿಂದ ಕೈ ಬಿಡಲಾಗಿತ್ತು. ಆ ಮೂಲಕ ಹಿರಿಯ ಬ್ಯಾಟ್ಸ್‌ಮನ್‌ಗೆ ಭಾರಿ ನಿರಾಸೆ ಮೂಡಿಸಿತ್ತು. ಈ ಬಗ್ಗೆ ಇಎಸ್‌ಪಿಎನ್‌ ಕ್ರಿಕ್‌ಇನ್ಪೋ ಜೊತೆ ಪ್ರತಿಕ್ರಿಯಿಸಿದ ಫಾಫ್‌ ಡುಪ್ಲೆಸಿಸ್, ಕ್ರಿಕೆಟ್ ದಕ್ಷಿಣ ಆಫ್ರಿಕಾ ತನ್ನ ಲಭ್ಯತೆಯ ಬಗ್ಗೆ ಕಠಿಣ ನಿಯಮಗಳನ್ನು ಹೊಂದಿದ್ದು, ಸಾಗರೋತ್ತರ ಲೀಗ್‌ಗಳಲ್ಲಿ ಸೀಮಿತ ಸಮಯವನ್ನು ಕಳೆಯಲು ಅವಕಾಶ ಮಾಡಿಕೊಟ್ಟಿದೆ ಎಂದು ಹೇಳಿದ್ದಾರೆ. "ಇದೀಗ ನನ್ನ ಪಯಣ ವಿಭಿನ್ನವಾಗಿದೆ. ಕೊನೆಯ ವರ್ಷ ಇಂಗ್ಲೆಂಡ್‌ ವಿರುದ್ಧ ಆಡಿದ್ದೆ ಹಾಗೂ ಟಿ೨೦ ವಿಶ್ವಕಪ್ ಟೂರ್ನಿ ಆಡುವ ಯೋಜನೆ ಹಾಕಿಕೊಂಡಿದ್ದೆ. ಈ ಬಗ್ಗೆ ಹಲವು ಬಾರಿ ಮಾತುಕತೆ ನಡೆಸಲಾಗಿತ್ತು. ಆದರೆ, ಸಾಗರೋತ್ತರ ಲೀಗ್‌ಗಳಲ್ಲಿ ಆಡಲು ಅವಕಾಶ ನೀಡುವ ವಿಷಯದಲ್ಲಿ ನನ್ನ ಹಾಗೂ ಕ್ರಿಕೆಟ್ ದಕ್ಷಿಣ ಆಫ್ರಿಕಾ ನಡುವೆ ಭಿನ್ನಾಭಿಪ್ರಾಯವಿತ್ತು. ಈ ಕಾರಣದಿಂದಾಗಿ ನಾನು ಟೆಸ್ಟ್ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದೆ," ಎಂದರು. "ಅವರು ನಮಗಾಗಿ ಪ್ರಯತ್ನ ನಡೆಸಿದರು ಆದರೆ ಇದು ಸಕಾರವಾಗಲಿಲ್ಲ. ಎಲ್ಲಾ ಸಮಯದಲ್ಲಿಯೂ ಲಭ್ಯರಾಗುವ ಆಟಗಾರರು ಅವರಿಗೆ ಬೇಕಾಗಿತ್ತು. ಇದು ವಿಶೇಷವಾಗಿ ಸಾಗರೋತ್ತರ ಲೀಗ್‌ಗಳನ್ನು ಆಡುವ ನನ್ನ ಹಾಗೂ ಇಮ್ರಾನ್‌ ತಾಹೀರ್‌ಗೆ ಸವಾಲುದಾಯಕವಾಗಿರುತ್ತದೆ. ಏಕೆಂದರೆ ನಾವು ವಿದೇಶಿ ಲೀಗ್‌ಗಳಲ್ಲಿ ನಾವು ಜಾಸ್ತಿ ತೊಡಗಿರುತ್ತೇವೆ," ಎಂದು ಹೇಳಿದರು. "ನಾವು ಸಾಗರೋತ್ತರ ಲೀಗ್‌ಗಳನ್ನು ಆಡುತ್ತಿರುವ ಹಿನ್ನೆಲೆಯಲ್ಲಿ ದಕ್ಷಿಣ ಆಫ್ರಿಕಾ ತಂಡದಲ್ಲಿ ಸ್ಥಾನ ಪಡೆಯುವುದು ಸವಾಲುದಾಯಕವಾಗಿದೆ. ಆದರೆ ನಾವು ಎಲ್ಲಾ ಪಂದ್ಯಗಳನ್ನು ಆಡಬೇಕೆಂಬುದನ್ನು ಅವರು(ಸಿಎಸ್‌ಎ) ಬಯಸುತ್ತಾರೆ. ಇದು ಅವಾಸ್ತವಿಕ ನಿರೀಕ್ಷೆಯಾಗಿದೆ," ಎಂದು ಫಾಫ್‌ ಡುಪ್ಲೆಸಿಸ್ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಫಾಫ್‌ ಡುಪ್ಲೆಸಿಸ್ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಅತ್ಯುತ್ತಮ ದಾಖಲೆಯನ್ನು ಹೊಂದಿದ್ದಾರೆ. ಅವರು ಆಡಿರುವ 50 ಪಂದ್ಯಗಳಲ್ಲಿ 35.53ರ ಸರಾಸರಿಯಲ್ಲಿ 1528ರನ್‌ ಗಳಿಸಿದ್ದಾರೆ. ಹರಿಣಗಳ ಮಾಜಿ ನಾಯಕ ಟಿ20 ಕ್ರಿಕೆಟ್‌ನಲ್ಲಿಯೂ ಶತಕ ಸಿಡಿಸಿದ ದಾಖಲೆ ಹೊಂದಿದ್ದಾರೆ. ಇದರ ಹೊರತಾಗಿಯೂ ಅವರು 2022ರ ಟಿ20 ವಿಶ್ವಕಪ್ ಟೂರ್ನಿಯಲ್ಲಿ ಕಣಕ್ಕೆ ಇಳಿಯುವುದು ಬಹುತೇಕ ಅನುಮಾನ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3lrULtC
