ಲುಮಾಜಾಂಗ್: ಇಂಡೋನೇಷ್ಯಾದ ಸೆಮೆರು ಸ್ಫೋಟಕ್ಕೆ ಇದುವರೆಗೂ ಕನಿಷ್ಠ 13 ಮಂದಿ ಬಲಿಯಾಗಿದ್ದಾರೆ. ನೂರಾರು ಜನರು ಗಾಯಗೊಂಡಿದ್ದಾರೆ. ಸಾವಿನ ಸಂಖ್ಯೆ ಮತ್ತಷ್ಟು ಹೆಚ್ಚುವ ಸಾಧ್ಯತೆ ಇದೆ. ಜ್ವಾಲಾಮುಖಿಯ ನಡುವೆ ಸಿಲುಕಿದ್ದ ಹತ್ತು ಮಂದಿಯನ್ನು ರಕ್ಷಿಸಿ ಬೇರೆಡೆಗೆ ಸ್ಥಳಾಂತರ ಮಾಡಲಾಗಿದೆ ಎಂದು ದೇಶದ ವಿಪತ್ತು ನಿರ್ವಹಣಾ ಸಂಸ್ಥೆ (ಬಿಎನ್ಪಿಬಿ) ತಿಳಿಸಿದೆ. ದ್ವೀಪದ ಅತ್ಯಂತ ಎತ್ತರದ ಪರ್ವತವಾದ ಸೆಮೆರು, ಶನಿವಾರ ಮುಗಿಲೆತ್ತರಕ್ಕೆ ದಟ್ಟನೆಯ ಬೂದಿಯನ್ನು ಹೊರ ಹಾಕಿದೆ. ಪೂರ್ವ ಜಾವಾ ಪ್ರಾಂತ್ಯದ ಸಮೀಪದಲ್ಲಿರುವ ಗ್ರಾಮಗಳ ಮೇಲೆ ಬಿಸಿ ಮೋಡ ಆವರಿಸಿದೆ. ಇದರಿಂದ ಜನರು ಆತಂಕದಿಂದ ದಿಕ್ಕಾಪಾಲಾಗಿ ಓಡಿದ್ದಾರೆ. ಸಮೀಪದ ಲುಮಾಜಂಗ್ ಜಿಲ್ಲೆಯ ಮಲಾಂಗ್ ನಗರದೊಂದಿಗೆ ಎರಡು ಪ್ರದೇಶಗಳನ್ನು ಸಂಪರ್ಕಿಸುವ ಮುಖ್ಯ ಸೇತುವೆಗೆ ಹಾಗೂ ಅನೇಕ ಕಟ್ಟಡಗಳಿಗೆ ಅಗ್ನಿಪರ್ವತ ಸ್ಫೋಟದಿಂದ ಭಾರಿ ಹಾನಿಯಾಗಿದೆ. ಚಿಮ್ಮಿದ್ದರಿಂದ ಇದುವರೆಗೂ 13 ಮಂದಿ ಮೃತಪಟ್ಟಿದ್ದಾರೆ. ಅವರಲ್ಲಿ ಇಬ್ಬರನ್ನು ಗುರುತಿಸಲಾಗಿದೆ. 98 ಮಂದಿ ಗಾಯಗೊಂಡಿದ್ದಾರೆ. ಅವರಲ್ಲಿ ಇಬ್ಬರು ಗರ್ಭಿಣಿಯರು ಸೇರಿದ್ದಾರೆ. ಈವರೆಗೂ 902 ಮಂದಿಯನ್ನು ಸ್ಥಳಾಂತರ ಮಾಡಲಾಗಿದೆ ಎಂದು BNPB ಅಧಿಕಾರಿ ಅಬ್ದುಲ್ ಮುಹಾರಿ ತಿಳಿಸಿದ್ದಾರೆ. ಮರಳು ಗಣಿ ಕಾರ್ಮಿಕರು ಹಲವು ಕಡೆ ಗಣಿಗಳಲ್ಲಿ ಸಿಲುಕಿಕೊಂಡಿದ್ದರು ಎಂದು ಲುಮಾಜಂಗ್ ಅಧಿಕಾರಿ ತೊರಿಖುಲ್ ಹಕ್ ತಿಳಿಸಿದ್ದಾರೆ. ಕನಿಷ್ಠ 35 ಮಂದಿಯನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. 41 ಜನರಲ್ಲಿ ಸುಟ್ಟ ಗಾಯಗಳಾಗಿವೆ ಎಂದು ಬಿಎನ್ಪಿಬಿ ತಿಳಿಸಿದೆ. ಕುರಾ ಕೊಬೊಕಾನ್ ಗ್ರಾಮದ ನದಿ ಭಾಗದಲ್ಲಿ ಹುಡುಕಾಟ ಕಾರ್ಯಾಚರಣೆ ಮುಂದುವರಿದಿದೆ. ಏಳು ಮಂದಿ ನಿವಾಸಿಗಳು ಹಾಗೂ ಕೆಲವು ಮರಳು ಗಣಿ ಕೆಲಸಗಾರರು ನಾಪತ್ತೆಯಾಗಿದ್ದಾರೆ. ಸೆಮೆರು 3,600 ಮೀಟರ್ಗೂ (12,000 ಅಡಿ) ಅಧಿಕ ಎತ್ತರವಿದೆ. ಇಂಡೋನೇಷ್ಯಾದ ಸಕ್ರಿಯ 130 ಅಗ್ನಿಪರ್ವತಗಳಲ್ಲಿ ಇದೂ ಒಂದು. ಜನವರಿಯಲ್ಲಿ ಕೂಡ ಇದು ಸ್ಫೋಟಗೊಂಡಿತ್ತು. ಆದರೆ ಯಾವುದೇ ಅಪಾಯ ಸಂಭವಿಸಿರಲಿಲ್ಲ. ಆದರೆ ಶನಿವಾರ ಈ ಅಗ್ನಿಪರ್ವತ 12 ಕಿಮಿಗೂ (7.5 ಮೈಲು) ಎತ್ತರಕ್ಕೆ ಬೂದಿಯನ್ನು ನಿರಂತರವಾಗಿ ಕಾರಿದೆ. ಜತೆಗೆ ಅನಿಲ ಹಾಗೂ ಲಾವಾರಸವನ್ನು ತನ್ನ ಕೆಳಗಿನ ಭಾಗಗಳಲ್ಲಿ ಹರಿಸಿದೆ. ಅನೇಕ ಗ್ರಾಮಗಳು ಬೂದಿಯಿಂದ ಮುಚ್ಚಿಹೋಗಿವೆ. ಕೆಲವು ದಿನಗಳ ನಿರಂತರ ಮಳೆ ಹಾಗೂ ಗುಡುಗಿನ ಬಳಿಕ ಅಗ್ನಿಪರ್ವತ ಸ್ಫೋಟಗೊಂಡಿದೆ. ಶನಿವಾರ ಕನಿಷ್ಠ ಎರಡು ಬಾರಿ ಅನಿಲ ಹಾಗೂ 800 ಮೀಟರ್ಗಳಷ್ಟು ದೂರ ಸಾಗಿ ಸಮೀಪದ ನದಿ ನೀರಿಗೆ ಸೇರಿಕೊಂಡಿದೆ. ಈ ರಾಕ್ಷಸ ಅಗ್ನಿಪರ್ವತದಿಂದ ಐದು ಕಿಮೀ ದೂರದ ಅಂತರ ಕಾಪಾಡಿಕೊಳ್ಳುವಂತೆ ಸೂಚಿಸಲಾಗಿದೆ. ಸೆಮೆರುದಿಂದ ಸುಮಾರು ಎರಡು ಸಾವಿರ ಕಿಮೀ ದೂರದಲ್ಲಿರುವ ಹಲ್ಮಹೆರಾದ ಉತ್ತರ ಭಾಗದಲ್ಲಿ ಭಾನುವಾರ ರಿಕ್ಟರ್ ಪಾಮನದಲ್ಲಿ 6 ತೀವ್ರತೆಯ ಭೂಕಂಪ ಸಂಭವಿಸಿದೆ.
from India & World News in Kannada | VK Polls https://ift.tt/3ryvsda
