ಮಂಜುನಾಥ ನಾಗಲೀಕರ್‌ ಬೆಂಗಳೂರು ಬೆಂಗಳೂರು: ಕೋವಿಡ್‌ ಭೀತಿಯ ನಡುವೆಯೂ ಆರೋಗ್ಯ ಇಲಾಖೆಯು ಯೋಜನೆಯಲ್ಲಿ ಶೇ.98ರಷ್ಟು ಗುರಿ ಸಾಧಿಸಿದೆ. ಮಾರಕ ಕಾಯಿಲೆಗಳಿಂದ ದೂರವಿಟ್ಟು ಆರೋಗ್ಯಯುತ ಮಕ್ಕಳಿಗಾಗಿ ಬಿಸಿಜಿ, ಪೋಲಿಯೊ, ಹೆಪಟೈಟಿಸ್‌ ಬಿ, ಪೆಂಟಾವಲೆಂಟ್‌, ರೋಟಾವೈರಸ್‌ ಮುಂತಾದ ಲಸಿಕೆಗಳನ್ನು ಮಕ್ಕಳಿಗೆ ನೀಡಲಾಗುತ್ತದೆ. ಲಾಕ್‌ಡೌನ್‌ ಆರಂಭವಾದಾಗ ಅನಗತ್ಯ ಓಡಾಟಕ್ಕೆ ಕಡಿವಾಣ ಹಾಕಿದ್ದ ಕಾರಣ ಸಾಕಷ್ಟು ಜನರು ಭೀತಿಯಿಂದ ಹೊರಗೆ ಬಂದಿರಲಿಲ್ಲ. ಅಲ್ಲದೆ, ಕೋವಿಡ್‌ನಿಂದ ಪಾರಾಗಿ ಯೋಜನೆ ಜಾರಿಗೊಳಿಸಲು ಅಧಿಕಾರಿಗಳು ಯೋಜನೆ ರೂಪಿಸಿದ್ದರು. ಲಾಕ್‌ಡೌನ್‌ ಆರಂಭದ ಮೊದಲು ಎರಡು-ಮೂರು ತಿಂಗಳು ಮಾತ್ರ ಲಸಿಕೆ ಯೋಜನೆಗೆ ಹಿನ್ನಡೆಯಾಗಿತ್ತು. ನಂತರದ ದಿನಗಳಲ್ಲಿ ಲಸಿಕೆ ಯೋಜನೆಗೆ ಒತ್ತು ಕೊಟ್ಟು ಗುರಿ ತಲುಪುವ ನಿಟ್ಟಿನಲ್ಲಿ ಕೆಲಸ ನಿರ್ವಹಿಸಿದ ಪರಿಣಾಮ ಶೇ.98ರಷ್ಟು ಗುರಿ ಸಾಧಿಸಲಾಗಿದೆ. ಹಾವೇರಿಯಲ್ಲಿ ಶೇ.112ರಷ್ಟು! ಹಾವೇರಿ ಜಿಲ್ಲೆಯಲ್ಲಿ 16,600 ಮಕ್ಕಳಿಗೆ ಲಸಿಕೆ ಗುರಿ ಹೊಂದಲಾಗಿತ್ತು. ಆದರೆ, 18,668 ಮಕ್ಕಳು ಲಸಿಕೆ ಪಡೆದಿದ್ದಾರೆ. ಈ ಮೂಲಕ ಶೇ 112ರಷ್ಟು ಗುರಿ ಸಾಧನೆಯಾಗಿದೆ. ರಾಜ್ಯದ ಅತ್ಯಂತ ಹಿಂದುಳಿದ ಜಿಲ್ಲೆಗಳ ಪೈಕಿ ಒಂದಾಗಿರುವ ಬೀದರ್‌ನಲ್ಲಿ ಲಸಿಕೆ ಯೋಜನೆ ಜಾರಿಯಲ್ಲಿ ಉತ್ತಮ ಸಾಧನೆಯಾಗಿದೆ. 19,707 ಮಕ್ಕಳಿಗೆ ಲಸಿಕೆ ಹಾಕುವ ಗುರಿಯನ್ನು ಮೀರಿ 21,904 ಮಕ್ಕಳಿಗೆ ಲಸಿಕೆ ಹಾಕುವ ಮೂಲಕ ಶೇ.111ರಷ್ಟು ಗುರಿ ಸಾಧಿಸಲಾಗಿದೆ. ಅದೇ ರೀತಿ, ತುಮಕೂರು, ಬಾಗಲಕೋಟೆ ಶೇ.109, ವಿಜಯಪುರ, ದಾವಣಗೆರೆ ಶೇ.105, ಯಾದಗಿರಿ ಶೇ.104, ಧಾರವಾಡ 103, ಮಂಡ್ಯ ಶೇ.101, ಉತ್ತರ ಕನ್ನಡ ಜಿಲ್ಲೆಗಳು ಶೇ.100ರಷ್ಟು ಗುರಿ ಸಾಧಿಸಿವೆ ಎಂದು ಆರೋಗ್ಯ ಇಲಾಖೆ ಇಮ್ಯೂನೈಜೇಷನ್‌ ವಿಭಾಗದ ಉಪ ನಿರ್ದೇಶಕಿ ಡಾ.ಬಿ.ಎನ್‌. ರಜನಿ ತಿಳಿಸಿದರು. ಲಸಿಕೆ ಹಾಕುವ ಗುರಿ ಎಷ್ಟಿತ್ತು?
- 2020 ಏಪ್ರಿಲ್‌ನಿಂದ ಅಕ್ಟೋಬರ್‌ 6,14,173
- ಲಸಿಕೆ ಹಾಕಿದ್ದು ಎಷ್ಟು ಮಕ್ಕಳಿಗೆ? 6,13,399
- ಗುರಿ ಸಾಧನೆ ಎಷ್ಟು? ಶೇ.98
from India & World News in Kannada | VK Polls https://ift.tt/37lXFIq
