ಹ್ಯಾಮಿಲ್ಟನ್: ಟೀಮ್ ಇಂಡಿಯಾ ನಾಯಕ ರನ್ ಮಷೀನ್ ಎಂಬುದು ಎಲ್ಲರಿಗೂ ತಿಳಿದ ವಿಚಾರ, ಆದರೆ ಅವರು ತಮ್ಮ ಚುರುಕಿನ ಕ್ಷೇತ್ರರಕ್ಷಣೆ ಮೂಲಕವೂ ತಂಡಕ್ಕೆ ಮೇಲುಗೈ ತಂದುಕೊಡಬಲ್ಲ ಅದ್ಭುತ ಫೀಲ್ಡರ್ ಎಂಬುದು ಮತ್ತೊಮ್ಮೆ ಸಾಬೀತಾಗಿದೆ. ನ್ಯೂಜಿಲೆಂಡ್ ವಿರುದ್ಧದ ಟಿ20 ಸರಣಿಯ ನಾಲ್ಕನೇ ಪಂದ್ಯದಲ್ಲೂ ಕೊಹ್ಲಿ ಅದ್ಭುತ ರನ್ಔಟ್ ಮೂಲಕ ಅರ್ಧಶತಕ ಬಾರಿಸಿ ಆತಿಥೇಯರಿಗೆ ಆಸರೆಯಾಗಿದ್ದ ಟಿಮ್ ಸೀಫರ್ಟ್ ಅವರನ್ನು ರನ್ಔಟ್ ಮಾಡಿ ಪಂದ್ಯದ ದಿಕ್ಕನ್ನು ಬದಲಾಯಿಸಿಬಿಟ್ಟಿದ್ದರು. ಇದೀಗ ಹ್ಯಾಮಿಲ್ಟನ್ನಲ್ಲಿ ಬುಧವಾರ ನಡೆದ ಏಕದಿನ ಸರಣಿಯ ಮೊದಲ ಪಂದ್ಯದಲ್ಲೂ ಅಂಥದ್ದೇ ಅದ್ಭುತ ಫೀಲ್ಡಿಂಗ್ ಮೂಲಕ ನ್ಯೂಜಿಲೆಂಡ್ ಪರ 82 ಎಸೆತಗಳಲ್ಲಿ 78 ರನ್ಗಳನ್ನು ಬಾರಿಸಿ ಆಸರೆಯಾಗಿ ನಿಂತಿದ್ದ ಎಡಗೈ ಆರಂಭಿಕ ಬ್ಯಾಟ್ಸ್ಮನ್ ಹೆನ್ರಿ ನಿಕೋಲ್ಸ್ ಅವರನ್ನು ರನ್ ಔಟ್ ಮಾಡಿದರು. ಪಂದ್ಯದಲ್ಲಿ 348 ರನ್ಗಳ ಗುರಿ ಬೆನ್ನತ್ತಿದ್ದ ನ್ಯೂಜಿಲೆಂಡ್ ತಂಡ 28 ಓವರ್ಗಳ ಅಂತ್ಯಕ್ಕೆ 2 ವಿಕೆಟ್ ನಷ್ಟದಲ್ಲಿ 164 ರನ್ಗಳನ್ನು ಗಳಿಸಿ ಸುಸ್ಥಿತಿಯಲ್ಲಿತ್ತು. ಈ ಹಂತದಲ್ಲಿ ಕಮ್ಬ್ಯಾಕ್ ಮಾಡಲು ಭಾರತಕ್ಕೆ ವಿಕೆಟ್ನ ಅನಿವಾರ್ಯವಿತ್ತು. ಆದ್ದರಿಂದಲೇ ಕೊಹ್ಲಿ ತನ್ನ ಬೆಸ್ಟ್ ಬೌಲರ್ ಜಸ್ಪ್ರೀತ್ ಬುಮ್ರಾ ಅವರಿಗೆ 29ನೇ ಓವರ್ ಎಸೆಯಲು ನೀಡಿದ್ದರು. ಚಿರತೆಯಂತೆ ನುಗ್ಗಿದ ಕಿಂಗ್ ಕೊಹ್ಲಿ ಬುಮ್ರಾಗೆ 29ನೇ ಓವರ್ನ 2ನೇ ಎಸೆತದಲ್ಲಿ ಸ್ಟ್ರೈಕ್ನಲ್ಲಿದ್ದ ರಾಸ್ ಟೇಲರ್ ಅದ್ಭುತ ಸಿಕ್ಸರ್ ಬಾರಿಸಿದ್ದರು, ಆದರೆ, 3ನೇ ಎಸೆತದಲ್ಲಿ ಕ್ರೀಸ್ ಬಳಿಯೇ ಕುಟುಕಿ ಒಂದು ರನ್ ಕದಿಯುವ ಪ್ರಯತ್ನ ನಡೆಸಿದಾಗ ನಾನ್ಸ್ಟ್ರೈಕ್ನಿಂದ ಸ್ಟ್ರೈಕ್ ಕಡೆಗೆ ನುಗ್ಗುತ್ತಿದ್ದ ನಿಕೋಲ್ಸ್ ಅವರನ್ನು ಕೊಹ್ಲಿ ರನ್ಔಟ್ ಮಾಡಿದರು. ಕವರ್ಸ್ ವಿಭಾಗದಲ್ಲಿ ಫೀಲ್ಡ್ ಮಾಡುತ್ತಿದ್ದ ಕೊಹ್ಲಿ ಚಿರತೆಯಂತೆ ವೇಗವಾಗಿ ಮುನ್ನುಗ್ಗಿಬಂದು ಗಾಳಿಯಲ್ಲಿ ಹಾರುತ್ತ ಚೆಂಡನ್ನು ವಿಕೆಟ್ಗೆ ಹೊಡೆದರು. ಹೆನ್ರಿ ನಿಕೋಲ್ಸ್ ಅಪಾಯವನ್ನು ಅರಿದು ಡೈವ್ ಹೊಡೆದು ಕ್ರೀಸ್ ದಾಟುವ ಯತ್ನ ನಡೆಸಿದರಾದರೂ ಕೊಹ್ಲಿಯ ಮಿಂಚಿನ ವೇಗಕ್ಕೆ ತಲೆ ಬಾಗಲೇ ಬೇಕಾಯಿತು. ನಿಕೋಲ್ಸ್ ವಿಕೆಟ್ ಪತನದ ಬಳಿಕ ನ್ಯೂಜಿಲೆಂಡ್ ತಂಡದ ರನ್ ಗತಿಯ ವೇಗಕ್ಕೂ ಬ್ರೇಕ್ ಬಿದ್ದಿತು. ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಭಾರತ ತಂಡ ಶ್ರೇಯಸ್ ಅಯ್ಯರ್ (103) ಅವರ ಶತಕ ಮತ್ತು ಕೆಲ್ ರಾಹುಲ್ (ಅಜೇಯ 88) ಅವರ ಅರ್ಧಶತಕದ ಬಲದಿಂದ ನಿಗದಿತ 50 ಓವರ್ಗಳಲ್ಲಿ 4 ವಿಕೆಟ್ಗೆ 347 ರನ್ಗಳ ಬೃಹತ್ ಮೊತ್ತವನ್ನು ದಾಖಲಿಸಿತು. ಕ್ಯಾಪ್ಟನ್ ವಿರಾಟ್ ಕೊಹ್ಲಿ ಕೂಡ 63 ಎಸೆತಗಳಲ್ಲಿ 51 ರನ್ಗಳ ಉಪಯುಕ್ತ ಕಾಣಿಕೆ ನೀಡಿದರು. ಕೊಹ್ಲಿ ಹೊಡೆದ ಅದ್ಭುತ ರನ್ನ್ಔಟ್ನ ವಿಡಿಯೋ ಈ ಟ್ವೀಟ್ನಲ್ಲಿ ವೀಕ್ಷಿಸಬಹುದಾಗಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/371g5Mp
