ವೆಲ್ಲಿಂಗ್ಟನ್: ನ್ಯೂಜಿಲೆಂಡ್ ವಿರುದ್ಧದ ಟೆಸ್ಟ್ ಸರಣಿಯ ಪ್ರಥಮ ಪಂದ್ಯದಲ್ಲಿ ಭಾರತ ತಂಡದ ಬ್ಯಾಟಿಂಗ್ ವೈಫಲ್ಯ ಮುಂದುವರಿದಿದ್ದು, ಎರಡನೇ ಇನಿಂಗ್ಸ್ನಲ್ಲಿ ಯುವ ಓಪನರ್ ಕೇವಲ 14 ರನ್ಗಳಿಸಲಷ್ಟೇ ಶಕ್ತರಾದರು. ಸರಣಿಯಲ್ಲಿ ಭಾರತ ತಂಡ ಅನನುಭವಿ ಆರಂಭಿಕರೊಂದಿಗೆ ಆತಿಥೇಯ ಕಿವೀಸ್ ಪಡೆಯ ಸವಾಲು ಎದುರಾಗಲು ಮುಂದಾಗಿದೆ. ಪರಿಣಾಮ ಎರಡೂ ಇನಿಂಗ್ಸ್ಗಳಲ್ಲಿ ಯುವ ಆಟಗಾರರು ಟೀಮ್ ಇಂಡಿಯಾಗೆ ಉತ್ತಮ ಆರಂಭ ಒದಗಿಸುವಲ್ಲಿ ವಿಫಲರಾಗಿದ್ದಾರೆ. 21 ವರ್ಷದ ಬಲಗೈ ಬ್ಯಾಟ್ಸ್ಮನ್ ಪೃಥ್ವಿ ಶಾ, ಭಾನುವಾರ ಭಾರತ ತಂಡದ ಎರಡನೇ ಇನಿಂಗ್ಸ್ನಲ್ಲಿ 2 ಫೋರ್ಗಳೊಂದಿಗೆ ಒಂದೊಳ್ಳೆ ಇನಿಂಗ್ಸ್ ಆಡುವ ಸುಳಿವನ್ನು ನೀಡಿದ್ದರು. ಆದರೆ, ಪೃಥ್ವಿ ವಿಕೆಟ್ ಪಡೆಯಲು ಅದ್ಭುತ ರಣತಂತ್ರ ರಚಿಸಿದ ನ್ಯೂಜಿಲೆಂಡ್ ಟಾಮ್ ಲೇಥಮ್ ಪಡೆದ ಅದ್ಭುತ ಕ್ಯಾಚ್ನೊಂದಿಗೆ ಯಶಸ್ಸನ್ನೂ ಪಡೆಯುತು. ಆಫ್ಸ್ಟಂಪ್ ಮೇಲಿನ ಎಸೆತಗಳನ್ನು ಅತ್ಯುತ್ತಮವಾಗಿ ಆಡುತ್ತಿದ್ದ ಪೃಥ್ವಿ, 29 ಎಸೆತಗಳಲ್ಲಿ 14 ರನ್ಗಳಿಸಿದ್ದರು. ಈ ಸಂದರ್ಭದಲ್ಲಿ ಬೌಲಿಂಗ್ ದಾಳಿ ನಡೆಸುತ್ತಿದ್ದ ಬೌಲ್ಟ್, ಕಿವೀಸ್ ಪಡೆಯ ಶ್ರೇಷ್ಠ ಫೀಲ್ಡರ್ಗಳಲ್ಲಿ ಒಬ್ಬರಾದ ಟಾಮ್ ಲೇಥಮ್ ಅವರನ್ನು ಬ್ಯಾಕ್ವರ್ಡ್ ಸ್ಕ್ವೇರ್ ಲೆಗ್ನಲ್ಲಿ ನಿಲ್ಲಿಸಿದ್ದರು. ಎಲ್ಲ ಎಸೆತಗಳನ್ನು ಆಫ್ ಸ್ಟಂಪ್ನಲ್ಲಿಟ್ಟು ಒಂದು ಎಸೆತವನ್ನು ಲೆಗ್ಸ್ಟಂಪ್ ಮೇಲೆ ಬರುವಂತೆ ನೀಡಿದ ಬೌಲ್ಟ್, ಯಶಸ್ಸು ತಮ್ಮದಾಗಿಸಿಕೊಂಡರು. ನ್ಯೂಜಿಲೆಂಡ್ ತಂಡದ ಈ ತಂತ್ರ ಅರಿಯುವಲ್ಲಿ ವಿಫಲರಾದ ಪೃಥ್ವಿ, ಲೆಗ್ಸ್ಟಂಪ್ ಮೇಲಿದ್ದ ಚೆಂಡನ್ನು ಫ್ಲಿಕ್ ಮೂಲಕ ಬೌಂಡರಿ ಮುಟ್ಟಿಸುವ ಪ್ರಯತ್ನ ಮಾಡಿ ಚೆಂಡನ್ನು ಗಾಳಿಯಲ್ಲಿ ಚಿಮ್ಮುವಂತೆ ಮಾಡಿದ್ದರು. ಈ ಅವಕಾಶವನ್ನು ಕಿಂಚಿತ್ತು ಬಿಟ್ಟುಕೊಡದ ಲೇಥಮ್ ಚಂಗನೆ ಎಗರಿ ಲಬಕ್ಕನೆ ಚೆಂಡನ್ನಿಡಿದುಕೊಂಡರು. ಕಿವೀಸ್ ತೋಡಿದ ಖೆಡ್ಡಕ್ಕೆ ಬಿದ್ದ ನಿರಾಸೆಯಲ್ಲಿ ಪೃಥ್ವಿ ಪೆವಿಲಿಯನ್ ಕಡೆಗೆ ಹೆಜ್ಜೆಯಿಟ್ಟರು. ಬಳಿಕ ಭಾರತ ತಂಡ ಸತತ ವಿಕೆಟ್ಗಳನ್ನು ಕಳೆದುಕೊಂಡು ಮೊದಲ ದಿನದಾಟದ ಅಂತ್ಯಕ್ಕೆ 65 ಓವರ್ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 144 ರನ್ಗಳಿಸಿ ಇನ್ನು 39 ರನ್ಗಳ ಹಿನ್ನೆಯಲ್ಲಿದೆ. ಭಾರತದ ಪರ ಮಯಾಂಕ್ ಅಗರ್ವಾಲ್ (59) ಅರ್ಧಶತಕ ಗಳಿಸಿದ್ದನ್ನು ಬಿಟ್ಟರೆ, ಉಪನಾಯಕ ಅಜಿಂಕ್ಯ ರಹಾನೆ ಅಜೇಯ 25 ರನ್ ಗಳಿಸಿ ಕ್ರೀಸ್ ಕಾಯ್ದುಕೊಂಡಿದ್ದಾರೆ. ದಾಖಲೆ ಬರೆ ಕೈಲ್ ಜೇಮಿಸನ್ ಬೌಲಿಂಗ್ನಲ್ಲಿ ಅಬ್ಬರಿಸಿ 4 ವಿಕೆಟ್ ಉರುಳಿಸುವ ಮೂಲಕ ಮೊದಲ ಇನಿಂಗ್ಸ್ನಲ್ಲಿ ಟೀಮ್ ಇಂಡಿಯಾ ಪತನಕ್ಕೆ ಕಾರಣರಾಗಿದ್ದ, 6.8 ಅಡಿ ಎತ್ತರದ ವೇಗಿ ಕೈಲ್ ಜೇಮಿಸ್ಸನ್ ಬಳಿಕ ಬ್ಯಾಟಿಂಗ್ ಮೂಲಕವೂ ಗಮನ ಸೆಳೆದು ವಿಶೇಷ ದಾಖಲೆ ತಮ್ಮದಾಗಿಸಿಕೊಂಡಿದ್ದಾರೆ. ಭಾನುವಾರ ಬೆಳಗ್ಗೆ ಮೊದಲ ಇನಿಂಗ್ಸ್ ಬ್ಯಾಟಿಂಗ್ ಮುಂದುವರಿಸಿದ್ದ ಕಿವೀಸ್ ಪಡೆ 250ರ ಒಳಗೆ ಆಲ್ಔಟ್ ಆಗುವ ಸಂಕಷ್ಟದಲ್ಲಿತ್ತು. ಆದರೆ, ಟೇಲೆಂಡರ್ಗಳ ಬ್ಯಾಟಿಂಗ್ ಪರಾಕ್ರಮದಿಂದ 350ರ ಗಡಿ ಮುಟ್ಟಲು ಸಾಧ್ಯವಾಗಿ 183 ರನ್ಗಳ ಮುನ್ನಡೆ ಪಡೆಯಿತು. ಎಂಟನೇ ವಿಕೆಟ್ಗೆ ಕಾಲಿನ್ ಡಿ'ಗ್ರ್ಯಾಂಡ್ಹೋಮ್ (43) ಜೊತೆಗೂಡಿ 71 ರನ್ಗಳ ಜೊತೆಯಾಟವಾಡಿದ ಜೇಮಿಸನ್ 45 ಎಸೆತಗಳಲ್ಲಿ 4 ಸಿಕ್ಸರ್ ಮತ್ತು 1 ಫೋರ್ ಒಳಗೊಂಡ 44 ರನ್ಗಳಿಸಿದರು. ಈ ಮೂಲಕ ಪದಾರ್ಪಣೆಯ ಟೆಸ್ಟ್ನಲ್ಲಿ 9ನೇ ಕ್ರಮಾಂಕದಲ್ಲಿ ಬ್ಯಾಟ್ಮಾಡಿ ಗರಿಷ್ಠ ರನ್ ಗಳಿಸಿದ ದಾಖಲೆ ತಮ್ಮದಾಗಿಸಿಕೊಂಡಿದ್ದಾರೆ. ಇದಕ್ಕೂ ಮುನ್ನ 55 ವರ್ಷಗಳ ಹಿಂದೆ ಗ್ರಹಾಮ್ ವಿವಿಯನ್ ಭಾರತ ವಿರುದ್ಧ ಪಂದ್ಯದಲ್ಲಿ 43 ರನ್ ಗಳಿಸಿ ಈ ಸಾಧನೆ ಮಾಡಿದ್ದರು. ಸಂಕ್ಷಿಪ್ತ ಸ್ಕೋರ್ ಭಾರತ: ಮೊದಲ ಇನಿಂಗ್ಸ್ 68.1 ಓವರ್ಗಳಲ್ಲಿ 165/10 ನ್ಯೂಜಿಲೆಂಡ್: ಮೊದಲ ಇನಿಂಗ್ಸ್ 100.2 ಓವರ್ಗಳಲ್ಲಿ 348/10 (ಕೇನ್ ವಿಲಿಯಮ್ಸನ್ 89, ರಾಸ್ ಟೇಲರ್ 44, ಕಾಲಿನ್ ಡಿ'ಗ್ರ್ಯಾಂಡ್ ಹೋಮ್ 43, ಕೈಲ್ ಜೇಮಿಸನ್ 44, ಟ್ರೆಂಟ್ ಬೌಲ್ಟ್ 38; ಇಶಾಂತ್ ಶರ್ಮಾ 68ಕ್ಕೆ 5, ಆರ್. ಅಶ್ವಿನ್ 99ಕ್ಕೆ 3). ಭಾರತ: 2ನೇ ಇನಿಂಗ್ಸ್ 65 ಓವರ್ಗಳಲ್ಲಿ 144/4 (ಮಯಾಂಕ್ ಅಗರ್ವಾಲ್ 58, ಅಜಿಂಕ್ಯ ರಹಾನೆ 25*, ಹನುಮ ವಿಹಾರಿ 15*; ಟ್ರೆಂಟ್ ಬೌಲ್ಟ್ 27ಕ್ಕೆ 3, ಟಿಮ್ ಸೌಥೀ 41ಕ್ಕೆ 1).
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2uqWsQI
