ಪೊಚೆಫ್ಸ್ಟ್ರೂಮ್: ಕ್ರಿಕೆಟ್ ಇರಬಹುದು, ಹಾಕಿ ಇರಬಹುದು, ಇತರ ಯಾವುದೇ ಕ್ರೀಡಾ ಸ್ಪರ್ಧೆ ಆಗಿರಬಹುದು. ಅದು ಭಾರತ ಮತ್ತು ಪಾಕಿಸ್ತಾನ ನಡೆಯುವ ಸ್ಪರ್ಧೆಯಾದರೆ ಅದಕ್ಕೆ ಸಮರ ಕಳೆ. 2008ರ ಮುಂಬಯಿ ಭಯೋತ್ಪಾದಕ ದಾಳಿಯ ನಂತರವಂತೂ ನೆರೆಹೊರೆ ರಾಷ್ಟ್ರಗಳ ನಡುವೆ ಅಕ್ಷರಶ: ಹಾವು-ಮುಂಗುಸಿ ದ್ವೇಷ. ಉಭಯ ದೇಶಗಳ ತಂಡಗಳು ಮೈದಾನದಲ್ಲಿ ಸೆಣಸಾಡುತ್ತಿದ್ದರೆ, ಇತ್ತ ಎರಡೂ ದೇಶಗಳ ಉದ್ದಗಲಕ್ಕೆ ಕಾತರ- ಕುತೂಹಲ ಮಡುಗಟ್ಟಿರುತ್ತದೆ. ಇದೀಗ ಅಂಥದ್ದೇ ಸಮರಕ್ಕಾಗಿ ದಕ್ಷಿಣ ಆಫ್ರಿಕಾಕಾದ ಪೊಚೆಫ್ಸ್ಟ್ರೂಮ್ನ ಸೆನ್ವೆಸ್ ಪಾರ್ಕ್ ಕ್ರೀಡಾಂಗಣ ಸಜ್ಜಾಗಿದೆ. ಮಂಗಳ ವಾರ, 19ರ ವಯೋಮಿತಿಯ ಏಕದಿನ ವಿಶ್ವಕಪ್ನ ಸೆಮಿಫೈನಲ್ನಲ್ಲಿ ಬದ್ಧ ಪ್ರತಿಸ್ಪರ್ಧಿ ರಾಷ್ಟ್ರಗಳ ಕಿರಿಯ ಕ್ರಿಕೆಟಿಗರು ಮುಖಾಮುಖಿ ಯಾಗುತ್ತಿದ್ದಾರೆ. ಕಳೆದ ಆವೃತ್ತಿಯ ಚಾಂಪಿಧಿಯನ್ ಭಾರತ ಈ ಬಾರಿಯೂ ಫೇವರಿಟ್ ಪಟ್ಟದೊಂದಿಗೆ ಅಖಾಡಕ್ಕೆ ಧುಮುಕಿದೆ. ಭಾರತ ತಂಡಕ್ಕೆ ಪ್ರಿಯಂ ಗರ್ಗ್ ನಾಯಕನಾದರೆ, ರೊಹೈಲ್ ನಾಜಿರ್ ಪಾಕ್ ತಂಡದ ಸಾರಥಿ. ಬಲಿಷ್ಠರ ನಡುವೆ ಬಡಿದಾಟ: ಸದ್ಯದ ಫಾರ್ಮ್ ನೋಡಿ ಹೇಳುವುದಾದರೆ ಎರಡೂ ತಂಡಗಳು ಬಲಿಷ್ಠವಾಗಿವೆ. ಭಾರತ ಟೂರ್ನಿ ಆರಂಭಗೊಂಡಂದಿನಿಂದ ಇಲ್ಲಿಯ ತನಕ ಆಡಿದ ನಾಲ್ಕೂ ಪಂದ್ಯಗಳಲ್ಲಿ ಜಯಭೇರಿ ಬಾರಿಸಿ ಸೆಮಿಫೈನಲ್ ಪ್ರವೇಶಿಸಿದೆ. ಪಾಕ್ ತಂಡವೂ ಅಜೇಯ ತಂಡವೆನಿಸಿಕೊಂಡು (ಆಡಿದ 3 ಪಂದ್ಯಗಳ ಪೈಕಿ 2 ಜಯ, 1 ಪಂದ್ಯ ಮಳೆಗೆ ಆಹುತಿ) ಅಂತಿಮ ನಾಲ್ಕರ ಘಟ್ಟಕ್ಕೆ ದಾಂಗುಡಿ ಇಟ್ಟಿದೆ. ಭಾರತ ತಂಡದ ಪಾಲಿಗೆ ಇದು ಸತತ ಮೂರನೇ ಸೆಮಿಫೈನಲ್. ಕಳೆದ ಆವೃತ್ತಿಯ ಸೆಮಿಫೈನಲ್ನಲ್ಲೂ ಭಾರತಕ್ಕೆ ಪಾಕ್ ಎದುರಾಳಿಯಾಗಿತ್ತು. ಆದರೆ, ಆ ಪಂದ್ಯದಲ್ಲಿ ಪಾಕ್ ಪರಾಭವಗೊಂಡಿತ್ತು. ಅಂದು ಶುಬ್ಮನ್ ಗಿಲ್ (102*) ಅವರ ಶತಕದ ನೆರವಿನಿಂದ ಭಾರತ 203 ರನ್ಗಳ ಭಾರಿ ಅಂತರದಿಂದ ಗೆದ್ದಿತ್ತು. ಆ ಸೋಲಿಗೆ ಸೇಡು ತೀರಿಸಿಕೊಳ್ಳುವ ಬಯಕೆ ಇದೀಗ ಪಾಕಿಸ್ತಾನ ತಂಡದ್ದಾಗಿದೆ. ಆದರೆ, ಅದು ಸುತರಾಂ ಸಾಧ್ಯವಿಲ್ಲ ಎನ್ನುವಷ್ಟು ಭರ್ಜರಿ ಫಾಮ್ ರ್ನಲ್ಲಿದೆ ಪ್ರಿಯಂ ಗರ್ಗ್ ಬಳಗ. ಎ ಗುಂಪಿನಲ್ಲಿದ್ದ ಭಾರತ ಕ್ವಾರ್ಟರ್ ಫೈನಲ್ನಲ್ಲಿ ಆಸ್ಪ್ರೇಲಿಯಾಕ್ಕೆ ಸೋಲುಣಿಸಿದ್ದರೆ, ಸಿ ಗುಂಪಿನಲ್ಲಿದ್ದ ಪಾಕಿಸ್ತಾನ ತಂಡ ಅಫಘಾನಿಸ್ತಾನ ತಂಡವನ್ನು ಮಣಿಸಿತ್ತು. ಒಟ್ಟಾರೆಯಾಗಿ ಹೇಳಬೇಕೆಂದರೆ, ಭಾರತದ ವಿರುದ್ಧ ಕಿರಿಯರ ವಿಶ್ವ ಕಪ್ನಲ್ಲಿ ಪಾಕಿಸ್ತಾನವೇ ಮೇಲುಗೈ ಹೊಂದಿದೆ. ಆದರೆ, ಕಳೆದ ವರ್ಷ ಸೆಪ್ಟೆಂಬರ್ನಲ್ಲಿ ನಡೆದ ಏಷ್ಯಾ ಕಪ್ ಟೂರ್ನಿಯಲ್ಲಿ ಭಾರತ ಗೆದ್ದಿತ್ತು. ಆ ಗೆಲುವಿನ ವಿಶ್ವಾಸ ಇದೀಗ ಭಾರತದ ನೆರವಿಗೆ ಬರುವ ಸಾಧ್ಯತೆಗಳಿವೆ. ಜೈಸ್ವಾಲ್ ಆಧಾರಸ್ತಂಭ: ಭಾರತ ತಂಡದಲ್ಲಿ ಮುಂಬಯಿ ತರುಣ ಯಶಸ್ವಿ ಜೈಸ್ವಾಲ್ ಬ್ಯಾಟಿಂಗ್ ವಿಭಾಗದ ‘ಮೇಟಿ’ ಎನಿಸಿಕೊಂಡಿದ್ದಾರೆ. ಕಳೆದ ನಾಲ್ಕು ಪಂದ್ಯಗಳಲ್ಲಿ ಅವರು ಮೂರು ಅರ್ಧಶತಕ ಸಿಡಿಸಿದ್ದಾರೆ. ಕ್ವಾರ್ಟರ್ಫೈನಲ್ನಲ್ಲಿ ಬಲಿಷ್ಠ ಆಸ್ಪ್ರೇಲಿಯಾ ವಿರುದಟಛಿ ಜಯಿಸುವಾಗಲೂ ಅವರ ಅರ್ಧ ಶತಕ ಜೀವಜಲದಂತೆ ಕೆಲಸ ಮಾಡಿತ್ತು. ಅಂದು ಅಥರ್ವ ಅಂಕೊಲೇಕರ್ ಹಾಗೂ ರವಿ ಬಿಷ್ಣೋಯಿ ಜೋಡಿಯ 61 ರನ್ಗಳ ಜತೆಯಾಟ ಕೂಡ ಸ್ಮರಣೀಯ. ಜತೆಗೆ ಬೌಲಿಂಗ್ನಲ್ಲಿ ಕಾರ್ತಿಕ್ ತ್ಯಾಗಿಯ ದಾಳಿಯೂ ಕಳಶಪ್ರಾಯವಾಗಿತ್ತು. 09: ಭಾರತ ಮತ್ತು ಪಾಕಿಸ್ತಾನ 19ರ ವಯೋಮಿತಿ ಐಸಿಸಿ ವಿಶ್ವ ಕಪ್ನಲ್ಲಿ ಇಲ್ಲಿಯ ತನಕ 9 ಬಾರಿ ಮುಖಾಮುಖಿ ಯಾಗಿವೆ. ಪಾಕಿಸ್ತಾನ 5 ಪಂದ್ಯಗಳನ್ನು ಗೆದ್ದು ಮುನ್ನಡೆಯಲ್ಲಿದೆ. 04: ಭಾರತ ಇದುವರೆಗೆ ನಾಲ್ಕು ಬಾರಿ ವಿಶ್ವ ಕಪ್ ಎತ್ತಿಹಿಡಿದಿದೆ. ಪಾಕಿಸ್ತಾನಕ್ಕೆ ಎರಡು ಬಾರಿ ಟ್ರೋಫಿ ಒಲಿದಿದೆ. ತಂಡಗಳು ಇಂತಿದೆ ಭಾರತ: ಯಶಸ್ವಿ ಜೈಸ್ವಾಲ್, ದಿವ್ಯಾನ್ಷ್ ಸಕ್ಸೇನಾ, ತಿಲಕ್ ವರ್ಮ, ಪ್ರಿಯಂ ಗರ್ಗ್ (ನಾಯಕ), ಧ್ರುವ್ ಜುರೆಲ್ (ವಿಕೆಟ್ಕೀಪರ್), ಸಿದ್ದೇಶ್ ವೀರ್, ಅಥರ್ವ ಅಂಕೊಲೇಕರ್, ರವಿ ಬಿಷ್ಣೋಯಿ, ಸುಶಾಂತ್ ಮಿಶ್ರಾ, ಕಾರ್ತಿಕ್ ತ್ಯಾಗಿ, ಆಕಾಶ್ ಸಿಂಗ್, ವಿದ್ಯಾಧರ್ ಪಾಟೀಲ್, ಶುಭಾಂಗ್ ಹೆಗ್ಡೆ, ಶಾಶ್ವತ್ ರಾವತ್, ಕುಮಾರ್ಕುಶಾಗ್ರ. ಪಾಕಿಸ್ತಾನ: ಹೈದರ್ ಅಲಿ, ಮೊಹಮ್ಮದ್ ಹುರೈರಾ, ರೋಹೈಲ್ ನಾಜಿರ್ (ವಿಕೆಟ್ ಕೀಪರ್/ನಾಯಕ) , ಫಹಾದ್ ಮುನೀರ್, ಕಾಸಿಮ್ ಅಕ್ರಮ್, ಮೊಹಮ್ಮದ್ ಹ್ಯಾರಿಸ್, ಇರ್ಫಾನ್ ಖಾನ್, ಅಬ್ಬಾಸ್ ಅಫ್ರಿದಿ, ತಾಹಿರ್ ಹುಸೈನ್, ಅಮಿರ್ ಅಲಿ, ಮೊಹಮ್ಮದ್ ಆಮೀರ್ ಖಾನ್, ಮೊಹಮ್ಮದ್ ವಾಸಿಮ್ ಜೂನಿಯರ್, ಅಬ್ದುಲ್ ಬಂಗಲ್ಜಾಯಿ, ಮುಹಮ್ಮದ್ ಶೆಹಜಾದ್, ಆರಿಶ್ ಅಲಿ ಖಾನ್.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/37VELr3
