ಹೊಸದಿಲ್ಲಿ: ಭಾರತ ಕ್ರಿಕೆಟ್ ತಂಡದ ನಾಯಕ 31ನೇ ಹರೆಯಕ್ಕೆ ಕಾಲಿರಿಸಿದ್ದಾರೆ. ಸದ್ಯ ಕ್ರಿಕೆಟ್ನಿಂದ ಬಿಡುವಲ್ಲಿರುವ ವಿರಾಟ್ ಕೊಹ್ಲಿ ಪತ್ನಿ ಜತೆಗೆ ಭೂತಾನ್ನಲ್ಲಿ ಸಂತೋಷದ ದಿನಗಳನ್ನು ಕಳೆಯುತ್ತಿದ್ದಾರೆ. ಬಿಡುವಿಲ್ಲದ ಕ್ರಿಕೆಟ್ನಲ್ಲಿ ಪಾಲ್ಗೊಂಡಿರುವ ವಿರಾಟ್ ಕೊಹ್ಲಿ, ಬಾಂಗ್ಲಾದೇಶ ವಿರುದ್ಧದ ಟ್ವೆಂಟಿ-20 ಸರಣಿಯಿಂದ ವಿರಾಮ ಪಡೆದಿದ್ದರು. ಪ್ರಸ್ತುತ ಜಾಲಿ ಮೂಡ್ನಲ್ಲಿರುವ ವಿರಾಟ್ ಕೊಹ್ಲಿ, ಜನ್ಮದಿನದಂದು ಪತ್ನಿ ಜತೆಗೆ ಚಿತ್ರವನ್ನು ಹಂಚಿದ್ದಾರೆ. ನನ್ನ ಆತ್ಮ ಸಂಗಾತಿ ಜತೆಗೆ ಪವಿತ್ರವಾದ ಸ್ಥಳಕ್ಕೆ (ಭೂತಾನ್) ಭೇಟಿ ಕೊಡಲು ಸಾಧ್ಯವಾಗಿರುವುದು ಆಶೀರ್ವಾದವೇ ಸರಿ! ನಿಮ್ಮೆಲ್ಲರ ಹೃತ್ಪೂರ್ವಕ ಶುಭಾಶಯಗಳಿಗೆ ನನ್ನ ಧನ್ಯವಾದಗಳು ಎಂದು ಟ್ವಿಟರ್ನಲ್ಲಿ ಉಲ್ಲೇಖಿಸಿದ್ದಾರೆ. ಇದಕ್ಕೂ ಮೊದಲು ಜೀವನದ ಪಾಠ ಹಾಗೂ ಪ್ರಯಾಣದ ಬಗ್ಗೆ 15ರ ಹರೆಯದಲ್ಲಿ ತಮಗೆ ತಾವೇ ಬರೆದ ಪತ್ರವನ್ನು ವಿರಾಟ್ ಕೊಹ್ಲಿ ಅಭಿಮಾನಿಗಳ ಜತೆಗೆ ಹಂಚಿಕೊಂಡಿದ್ದರು. ಈ ಎಲ್ಲ ಅಂಶಗಳನ್ನು ತಮ್ಮ ಜೀವನದಲ್ಲಿ ಆಳವಡಿಸಿಕೊಂಡಿರುವ ಓರ್ವ ಪರಿಪೂರ್ಣ ಹಾಗೂ ಯಶಸ್ವಿ ಕ್ರಿಕೆಟಿಗನಾಗಿ ಹೊರಹೊಮ್ಮಿದ್ದಾರೆ. ಈ ಮುನ್ನ ಪತ್ನಿ ಸಹ ವಿರಾಟ್ ಕೊಹ್ಲಿ ಜತೆಗಿನ ಚಿತ್ರವನ್ನು ಹಂಚಿಕೊಂಡಿದ್ದರು. ತನ್ನ ಜೀವನದಲ್ಲಿ 'ಆರದ ದೀಪ' ಎಂಬ ಕ್ಯಾಪ್ಷನ್ ನೀಡಿದ್ದರು. ಏತನ್ಮಧ್ಯೆ ತಮ್ಮ ವಿರುದ್ಧ ಬರುವ ಆರೋಪಗಳಿಗೆ ಸದಾ ಮೌನ ತಾಳುತ್ತಿರುವ ಅನುಷ್ಕಾ ಶರ್ಮಾ ಕೊನೆಗೂ ತಾಳ್ಮೆ ಕಳೆದುಕೊಂಡು ಸಿಡಿದೆದಿದ್ದರು. ವಿಶ್ವಕಪ್ ಟೂರ್ನಿ ವೇಳೆ ಟೀಮ್ ಇಂಡಿಯಾ ಆಯ್ಕೆ ಸಮಿತಿ ಸದಸ್ಯರು ಅನುಷ್ಕಾ ಶರ್ಮಾರಿಗೆ ಟೀ ಸರ್ವ್ ಮಾಡಿದ್ದರು ಎಂದು ಭಾರತ ತಂಡದ ಮಾಜಿ ವಿಕೆಟ್ಕೀಪರ್ ಫರೂಖ್ ಎಂಜಿನೀಯರ್ ಆರೋಪಿಸಿದ್ದರು. ಇದೇ ಅನುಷ್ಕಾ ಖಾರವಾಗಿ ಪ್ರತಿಕ್ರಿಯಿಸಿದ್ದರು. ಸದ್ಯ ವಿರಾಮದಲ್ಲಿರುವ ವಿರಾಟ್ ಕೊಹ್ಲಿ ಬಾಂಗ್ಲಾದೇಶ ವಿರುದ್ಧದ ಟೆಸ್ಟ್ ಸರಣಿಯ ವೇಳೆಗೆ ತಂಡವನ್ನು ಸೇರಿಕೊಳ್ಳಲಿದ್ದಾರೆ. ಹಾಗೆಯೇ ಕೋಲ್ಕತಾದಲ್ಲಿ ನಡೆಯಲಿರುವ ಚೊಚ್ಚಲ ಹೊನಲು ಬೆಳಕಿನ ಟೆಸ್ಟ ಪಂದ್ಯದಲ್ಲಿ ತಂಡವನ್ನು ಮುನ್ನಡೆಸಲಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/33hpO0b
