ಅಹಮದಾಬಾದ್: ಸಸ್ಯಾಹಾರ ಶ್ರೇಷ್ಠವೋ, ಮಾಂಸಹಾರ ಶ್ರೇಷ್ಠವೋ ಎಂಬ ಅಸಂಬದ್ಧ ಚರ್ಚೆಗಳು ನಡೆಯುತ್ತಿರುವ ಹೊತ್ತಿನಲ್ಲೇ ಆಹಾರ ಸಂಸ್ಕೃತಿಯನ್ನು ನಿಯಂತ್ರಿಸಲು ಮುಂದಾಗಿರುವವರಿಗೆ ಚಾಟಿ ಬೀಸಿದೆ. ‘ಕೆಲವು ಜನರ ಮನಸ್ಸು ಹಾಗೂ ಅಹಂಕಾರ ತಣಿಸಲೆಂದು ಬಹುಸಂಖ್ಯಾತ ಜನರ ಆಹಾರ ಪದ್ಧತಿ ಅಥವಾ ಸೇವನೆ ನಿಯಂತ್ರಿಸುವ ದುಸ್ಸಾಹಸಕ್ಕೆ ಮುಂದಾಗಬೇಡಿ. ರಾತ್ರಿ ಕನಸು ಬಿತ್ತೆಂದು, ಬೆಳಗ್ಗೆ ಜನರು ಕೆಲವು ವಸ್ತುಗಳನ್ನು ಮಾರಾಟ ಮಾಡಬಾರದೆಂದು ಆದೇಶ ಹೊರಡಿಸಲು ಸಾಧ್ಯವಿಲ್ಲ’ ಎಂದು ಗುಜರಾತ್ ಹೈಕೋರ್ಟ್ ಅಹಮದಾಬಾದ್ ನಗರಪಾಲಿಕೆಯನ್ನು ತರಾಟೆಗೆ ತೆಗೆದುಕೊಂಡಿದೆ. 25 ಬೀದಿ ಬದಿ ವ್ಯಾಪಾರಸ್ಥರು ತಮ್ಮ ಮಾಂಸಾಹಾರ ಮಾರಾಟದ ಗಾಡಿಗಳನ್ನು ಪಾಲಿಕೆ ವಶಕ್ಕೆ ಪಡೆದಿರುವ ಕುರಿತು ಗುಜರಾತ್ ಕೋರ್ಟ್ ಮೆಟ್ಟಿಲೇರಿದ್ದರು. ಈ ಪ್ರಕರಣದ ವಿಚಾರಣೆ ನಡೆಸಿದ ನ್ಯಾ. ಬೀರೇನ್ ವೈಷ್ಣವ್ ಅವರಿದ್ದ ನ್ಯಾಯಪೀಠವು, ‘ರಾಜಕೀಯ ಒತ್ತಡದಲ್ಲಿ ಆಹಾರ ಸೇವನೆ ನಿಯಂತ್ರಣಕ್ಕೆ ಪಾಲಿಕೆ ಮುಂದಾಗಬಾರದು. ಆಡಳಿತಾರೂಢ ಪಕ್ಷಕ್ಕೆ ಮೊಟ್ಟೆಗಳ ಸೇವನೆ ಇಷ್ಟವಿಲ್ಲ ಎಂದ ಮಾತ್ರಕ್ಕೆ ಮೊಟ್ಟೆ ಮಾರಾಟ ನಿರ್ಬಂಧಿಸಿ, ಅವುಗಳನ್ನು ವಶಕ್ಕೆ ಪಡೆಯುತ್ತೀರಾ? ನೀವು ಮಾಡುತ್ತಿರುವುದು ಸರಿಯೇ? ನಾನು ನನ್ನ ಮನೆಯ ಹೊರಗಡೆ ಏನನ್ನು ತಿನ್ನಬೇಕು ಎಂದು ನೀವು ನಿರ್ಧರಿಸಲು ಹೇಗೆ ಸಾಧ್ಯ’ ಎಂದು ಖಡಕ್ಕಾಗಿ ಪ್ರಶ್ನಿಸಿದೆ. ಈ ವೇಳೆ ಮಧ್ಯಪ್ರವೇಶಿಸಿದ ಪಾಲಿಕೆ ಪರ ವಕೀಲರು, ‘ಮಾಂಸಾಹಾರ ಮಾರಾಟ ಗಾಡಿಗಳ ವಿರುದ್ಧ ಪಾಲಿಕೆ ಕಾರ್ಯಾಚರಣೆ ನಡೆಸಿಲ್ಲ. ಬದಲಿಗೆ ರಸ್ತೆ ಬದಿ ಸ್ಥಳದ ಅತಿಕ್ರಮಣ, ಫುಟ್ಪಾತ್ಗಳಲ್ಲಿ ಜನರ ಸಂಚಾರಕ್ಕೆ ಅಡ್ಡಿ ವಿರುದ್ಧ ಮಾತ್ರವೇ ಕ್ರಮ ಜರುಗಿಸಲಾಗಿದೆ’ ಎಂದು ಸಮಜಾಯಿಷಿ ನೀಡಿದರು. ಮೊಟ್ಟೆ ರಾಜಕಾರಣ ಮಾಡುವವರು ಕಲಿಯುವರೇ ಪಾಠಕರ್ನಾಟಕದಲ್ಲೂ ಕೂಡ ಶಾಲಾ ಮಕ್ಕಳಿಗೆ ಸರ್ಕಾರ ನೀಡಲು ಉದ್ದೇಶಿಸಿರುವ ಮೊಟ್ಟೆಯನ್ನು ನಿಲ್ಲಿಸಬೇಕೆಂದು ಪ್ರತಿಭಟನೆ ನಡೆಸುತ್ತಿರುವ ಕೆಲವು ಜನರು ಗುಜರಾತ್ ಹೈಕೋರ್ಟ್ ನೀಡಿರುವ ಸಂದೇಶವನ್ನು ಅರ್ಥ ಮಾಡಿಕೊಳ್ಳಬೇಕಿದೆ. ಶಾಲಾ ಮಕ್ಕಳಲ್ಲಿ ಪೌಷ್ಠಿಕಾಂಶ ಬೆಳವಣಿಗೆಯಾಗಲು ಸರ್ಕಾರ ಬಿಸಿಯೂಟದ ಜೊತೆಗೆ ಮೊಟ್ಟೆ ವಿತರಣೆ ಮಾಡಲು ನಿರ್ಧರಿಸಿದೆ. ಆದರೆ ಕೆಲವೊಂದು ಸಂಘಟನೆಗಳು ಮೊಟ್ಟೆ ನೀಡಬಾರದು, ಹೀಗಾದಲ್ಲಿ ಮಕ್ಕಳಲ್ಲಿ ಭೇದಭಾವ ಸೃಷ್ಟಿಸಿದಂತೆ ಆಗುತ್ತದೆ ಎಂಬ ವಾದವನ್ನು ಮಂಡಿಸಿದ್ದರು. ಅಷ್ಟಕ್ಕೂ ಸರ್ಕಾರವೇನೂ ಕಡ್ಡಾಯವಾಗಿ ಎಲ್ಲಾ ಮಕ್ಕಳೂ ಮೊಟ್ಟೆ ತಿನ್ನಲೇಬೇಕೆಂದು ಒತ್ತಾಯಿಸಿಲ್ಲ. ಮೊಟ್ಟೆ ತಿನ್ನದ ಮಕ್ಕಳಿಗೆ ಸಸ್ಯಾಹಾರಿ ಆಹಾರವನ್ನು ನೀಡಲು ಉದ್ದೇಶಿಸಿದೆ. ಇನ್ನೊಂದೆಡೆ ಹೈಸ್ಕೂಲ್ ಮಕ್ಕಳು ಕೂಡ ನಮಗೂ ಮೊಟ್ಟೆ ಬೇಕೆಂದು ಆಗ್ರಹಿಸಿದ್ದಾರೆ. ಹೀಗಿದ್ದರೂ ಬಹುಸಂಖ್ಯಾತ ವಿದ್ಯಾರ್ಥಿಗಳ ಆಹಾರದ ಹಕ್ಕನ್ನು ಕಸಿಯಲು ಮುಂದಾಗಿರುವವರು ಇನ್ನೊಬ್ಬರ ಆಹಾರ ಸಂಸ್ಕೃತಿಯನ್ನು ಗೌರವಿಸುವ ಗುಣವನ್ನು ಬೆಳೆಸಿಕೊಳ್ಳಬೇಕಿದೆ.
from India & World News in Kannada | VK Polls https://ift.tt/3IHDTsQ
