(ವಿಕ ಸಂವಾದ): ಚಾಮುಂಡಿ ಬೆಟ್ಟದಲ್ಲಿ ಯಾವುದೇ ರೀತಿಯ ಹೊಸ ಕಟ್ಟಡ ಮಾಡುವಂಥ ಯೋಜನೆಗಳು ಬೇಡ. 'ಪ್ರಸಾದ' ಯೋಜನೆಯಡಿ ಸರಕಾರ 120 ಕೋಟಿ ರೂ. ನೀಡಿದರೆ, ಅದನ್ನು ಚಾಮುಂಡಿ ಬೆಟ್ಟದ ಪರಿಸರ ಸಂರಕ್ಷಣೆಗೆ ಬಳಸಿಕೊಳ್ಳುವುದು ಒಳಿತು ಎಂದು ಮಾಜಿ ಸಚಿವ, ಚಾಮುಂಡೇಶ್ವರಿ ಕ್ಷೇತ್ರದ ಶಾಸಕ ಸರಕಾರಕ್ಕೆ ಸಲಹೆ ನೀಡಿದರು. 'ಚಾಮುಂಡಿ ಬೆಟ್ಟವನ್ನು ಪರಿಸರದ ದೃಷ್ಟಿಯಿಂದ ಅಭಿವೃದ್ಧಿ ಪಡಿಸಬೇಕಿದೆಯೇ ಹೊರತು ಪ್ರವಾಸೋದ್ಯಮ ದೃಷ್ಟಿಯಿಂದಲ್ಲ. ಇನ್ನು ಮುಂದೆ ಅಲ್ಲಿ ಯಾವುದೇ ರೀತಿಯ ನಿರ್ಮಾಣ ನಡೆಸಬಾರದು. ಬೆಟ್ಟದ ತಪ್ಪಲಿನಲ್ಲಿ ಸರಕಾರಿ ಜಾಗ ಗುರುತಿಸಿ, ಅಲ್ಲಿ ಹೊಸ ಕಟ್ಟಡ, ಮನೆಗಳನ್ನು ನಿರ್ಮಿಸುವುದು ಒಳಿತು. ಈ ನಿಟ್ಟಿನಲ್ಲಿ ಬೆಟ್ಟದ ಗ್ರಾಮ ಪಂಚಾಯಿತಿಯವರೊಂದಿಗೆ ಸಭೆ ನಡೆಸಿ ಸ್ಥಳ ಗುರುತಿಸಲು ಸೂಚಿಸಿದ್ದೇನೆ' ಎಂದು ವಿಕ ಸಂವಾದದಲ್ಲಿ ಹೇಳಿದರು. 'ಪ್ರಸಾದ ಯೋಜನೆಯಡಿ ಬೆಟ್ಟದ ಮೇಲೆ ಅಭಿವೃದ್ಧಿ ಕಾಮಗಾರಿ ಕೈಗೆತ್ತಿಕೊಳ್ಳುವ ಬದಲು ಅಲ್ಲಿನ ಪರಿಸರಕ್ಕೆ ಧಕ್ಕೆಯಾಗದಂತೆ ಸಹಜವಾಗಿಯೇ ಇರುವಂತೆ ಬಿಟ್ಟು, ಕುಸಿದಿರುವ ರಸ್ತೆ ದುರಸ್ತಿಗೊಳಿಸಬೇಕಿದೆ. ಅದೇ ಹಣವನ್ನು ಪರಿಸರ ಅಭಿವೃದ್ಧಿಗೆ ಬಳಸಿಕೊಳ್ಳಲಿ' ಎಂದು ಸಲಹೆ ನೀಡಿದರು. 'ಚಾಮುಂಡಿ ಬೆಟ್ಟಕ್ಕೆ ತನ್ನದೇ ಆದ ಐತಿಹ್ಯ ಇದೆ. ಬೇರೆ ಭಾಗಗಳಲ್ಲಿ ಕೈಗೊಂಡ 'ಅಭಿವೃದ್ಧಿ'ಯನ್ನು ಇಲ್ಲಿ ಅಳವಡಿಸಲಾಗುವುದಿಲ್ಲ. ಬೆಟ್ಟದ ತಪ್ಪಲಿನಿಂದ ಹಿಡಿದು ಮೇಲ್ಬಾಗದವರೆಗೂ ವೈಜ್ಞಾನಿಕವಾಗಿ ತಡೆ ನಿರ್ಮಿಸಬೇಕು. ಇನ್ಮುಂದೆ ಒಂದೇ ಒಂದು ಬಂಡೆಯೂ ಅಲುಗಾಡಬಾರದು, ಯಾವ ರಸ್ತೆಗಳು ದುರಸ್ತಿಗೀಡಾಗಬಾರದು. ಬೆಟ್ಟದಿಂದ ಮಳೆ ನೀರು ಸರಾಗವಾಗಿ ಹೊರಗೆ ಹೋಗುವಂತಹ ವ್ಯವಸ್ಥೆ ಕಲ್ಪಿಸಬೇಕು' ಎಂದು ತಿಳಿಸಿದರು. 'ನಂದಿ ಮಾರ್ಗದ ರಸ್ತೆ ಕುಸಿತಕ್ಕೆ ಹಾದಿ ಪಕ್ಕದ ಚರಂಡಿ ಹಾಗೂ ಮಳೆ ನೀರು ಸೇತುವೆ ಮುಚ್ಚಿರುವುದೇ ಕಾರಣವಾಗಿದೆ. ಇದು ಸರಾಗವಾಗಿ ಹರಿಯದೇ ಮಣ್ಣು, ಕಲ್ಲುಗಳೆಡೆ ನುಗ್ಗಿದ್ದರಿಂದ ಅವುಗಳ ಸಡಿಲವಾಗಿದ್ದರಿಂದ ರಸ್ತೆ ಕುಸಿದಿದೆ' ಎಂದರು. ಪ್ರಸಾದ ಯೋಜನೆಯಡಿ ಮಹಿಷಾಸುರ ವೃತ್ತ ಮತ್ತಷ್ಟು ಆಕರ್ಷಣೀಯ, ದೇಗುಲ ಬಳಿಯ ಉದ್ಯಾನ, ಪ್ರವಾಸಿಗರು ಕುಳಿತುಕೊಳ್ಳಲು ವಿಶೇಷ ವ್ಯವಸ್ಥೆ, ಪೊಲೀಸ್‌ ಕಮಾಂಡಿಂಗ್‌ ಕೇಂದ್ರ, ಪ್ರವೇಶ ದ್ವಾರಗಳ ನಿರ್ಮಾಣ.. ಹೀಗೆ ಹತ್ತಾರು ಕಾಮಗಾರಿಯನ್ನು 'ಪ್ರಸಾದ' ಯೋಜನೆಯಡಿ ಕೈಗೆತ್ತಿಕೊಳ್ಳಲಾಗಿದೆ. 'ಚಾಮುಂಡಿ ಬೆಟ್ಟದ ಅಭಿವೃದ್ಧಿ ಕಾಮಗಾರಿಗೆ ಕೇಂದ್ರದ ಪ್ರಸಾದ ಯೋಜನೆ ಹಾಗೂ ರಾಜ್ಯ ಸರಕಾರದಿಂದಲೂ ಯಾವುದೇ ಅನುದಾನದ ಅವಶ್ಯಕತೆ ಇಲ್ಲ. ಬೆಟ್ಟದ ಪ್ರಾಧಿಕಾರದಲ್ಲಿರುವ ಹಣದಲ್ಲೇ ಶಾಶ್ವತ ಕಾಮಗಾರಿ ಕೈಗೊಳ್ಳಬಹುದು' ಎಂದು ಶಾಸಕ ಜಿ. ಟಿ. ದೇವೇಗೌಡ ಹೇಳಿದ್ದಾರೆ.
from India & World News in Kannada | VK Polls https://ift.tt/3d74ukm
