ಹೊಸದಿಲ್ಲಿ: ತಮಿಳುನಾಡು ಪ್ರೀಮಿಯರ್ ಲೀಗ್ ಮಾಜಿ ಆಟಗಾರ 2021ರ 19 ವಯೋಮಿತಿ ವಿಶ್ವಕಪ್ ಟೂರ್ನಿಯ ಆಸ್ಟ್ರೇಲಿಯಾ ಕಿರಿಯರ ತಂಡಕ್ಕೆ ಆಯ್ಕೆಯಾಗಿದ್ದಾರೆ. ಆ ಮೂಲಕ 18ರ ಪ್ರಾಯದ ಭಾರತೀಯ ಮೂಲದ ಸ್ಪಿನ್ನರ್ ಆಸ್ಟ್ರೇಲಿಯಾ ಕಿರಿಯರ ತಂಡವನ್ನು ಪ್ರತಿನಿಧಿಸಲು ಎದುರು ನೋಡುತ್ತಿದ್ದಾರೆ. ನಿವೇದನ್ ರಾಧಕೃಷ್ಣನ್ ಅವರು ತಮಿಳುನಾಡಿನ ಮೂಲದವರೆಂದು ಸಾಕಷ್ಟು ಮಂದಿಗೆ ಗೊತ್ತಿರಲಿಕ್ಕಿಲ್ಲ. ಇದಕ್ಕೂ ಮುನ್ನ ತಮಿಳುನಾಡು ಕ್ರಿಕೆಟ್ ಅಸೋಸಿಯೇಷನ್ ಟೂರ್ನಿಗಳಲ್ಲಿ ಹಾಗೂ ತಮಿಳುನಾಡು ಪ್ರೀಮಿಯರ್ ಲೀಗ್ ಟೂರ್ನಿಯಲ್ಲಿ ಯುವ ಸ್ಪಿನ್ನರ್ ಆಡಿದ್ದರು. ಅಷ್ಟೇ ಅಲ್ಲದೆ, ಇತ್ತೀಚೆಗೆ ಮುಕ್ತಾಯವಾಗಿದ್ದ 2021ರ ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಯಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡದಲ್ಲಿ ನೆಟ್ ಬೌಲರ್ ಆಗಿಯೂ ರಾಧಕೃಷ್ಣನ್ ಕಾಣಿಸಿಕೊಂಡಿದ್ದರು. ಟ್ಯಾಸ್ಮೆನಿಯಾ ಪರ ನಿವೇದಮ್ ರಾಧಕೃಷ್ಣನ್ ಅವರು ಮೊದಲ ಬಾರಿ ವೃತ್ತಿಪರ ಗುತ್ತಿಗೆಯನ್ನು ಪಡೆದುಕೊಂಡಿದ್ದರು. ಬಲಗೈ ಹಾಗೂ ಎಡಗೈನಲ್ಲಿಯೂ ಸ್ಪಿನ್ ಮಾಡಬಲ್ಲ ಪ್ರಾವಿಣ್ಯತೆ ಹೊಂದಿರುವ ಕಾರಣ ರಾಧಕೃಷ್ಣನ್ ಆಸ್ಟ್ರೇಲಿಯಾದಲ್ಲಿ ತೀವ್ರ ಸಂಚಲನ ಮೂಡಿಸಿದ್ದಾರೆ. ಬ್ಯಾಟ್ಸ್ಮನ್ಗಳಿಗೆ ತಕ್ಕಂತೆ ಎಡಗೈ ಹಾಗೂ ಬಲಗೈನಲ್ಲಿ ಸ್ಪಿನ್ ಮಾಡುವ ಆಯ್ಕೆಯನ್ನು ಅವರು ಹೊಂದಿದ್ದಾರೆ. ಭಾರತೀಯ ಯುವ ಸ್ಪಿನ್ನರ್ನ ಪ್ರತಿಭೆಯನ್ನು ಗುರುತಿಸಿದ ಕ್ರಿಕೆಟ್ ಆಸ್ಟ್ರೇಲಿಯಾ ಮುಂಬರುವ 19 ವಯೋಮಿತಿ ವಿಶ್ವಕಪ್ ಟೂರ್ನಿಗೆ ತಮ್ಮ ತಂಡದಲ್ಲಿ ಅವಕಾಶ ಕಲ್ಪಿಸಿದೆ. ಹಾಗಾಗಿ ಮುಂಬರುವ ಕಿರಿಯರ ವಿಶ್ವಕಪ್ ಟೂರ್ನಿಯಲ್ಲಿ ತಮಿಳುನಾಡು ಮೂಲದ ಸ್ಪಿನ್ನರ್ ತಮ್ಮ ಎರಡೂ ಕೈಗಳಿಂದ ಬೌಲ್ ಮಾಡುವ ಮೂಲಕ ಎಲ್ಲರ ಗಮನ ಸೆಳೆಯಲಿದ್ದಾರೆ. ಎಡಗೈ ಹಾಗೂ ಬಲಗೈ ಎರಡೂ ಕೈಗಳಿಂದ ಸ್ಪಿನ್ ಮಾಡುವ ಕೌಶಲದ ಬಗ್ಗೆ ಈ ವರ್ಷಾರಂಭದಲ್ಲಿ ಇಎಸ್ಪಿಎನ್ ಕ್ರಿಕ್ಇನ್ಪೊ ಜೊತೆ ಮಾತನಾಡಿದ್ದ ರಾಧಕೃಷ್ಣನ್, "ಟಿವಿಯಲ್ಲಿ ನೋಡಿದ ಹಾಗೆ ಅಥವಾ ಚೆನ್ನೈ ಲೀಗ್ ಟೂರ್ನಿಗಳಲ್ಲಿ ಎರಡೂ ಕೈಗಳಿಂದ ಬೌಲ್ ಮಾಡುವವರು ಯಾರೂ ನನಗೆ ಕಾಣಿಸಿರಲಿಲ್ಲ. ಈ ಹಿಂದೆಯೂ ಇಂಥಾ ಬೌಲರ್ಗಳ ಬಗ್ಗೆ ನಾನು ಕೇಳಿರಲಿಲ್ಲ. ಈ ಕಾರಣದಿಂದಾಗಿ ನಾನು ಏಕೆ ಈ ರೀತಿ ಬೌಲ್ ಮಾಡಬಾರದು ಎಂದು ಅಂದುಕೊಂಡಿದ್ದೆ," ಎಂದರು. "ವೈಫಲ್ಯದ ಬಗ್ಗೆ ನನಗೆ ಭಯವೇ ಇಲ್ಲ. ಅಷ್ಟೇ ಅಲ್ಲದೆ ನನ್ನ ಬಗ್ಗೆ ಜನರು ಏನು ಯೋಚಿಸುತ್ತಾರೆಂಬ ಬಗ್ಗೆಯೂ ನಾನು ತಲೆ ಕೆಡಿಸಿಕೊಳ್ಳುವವನಲ್ಲ. ವೈಫಲ್ಯದ ಬಗ್ಗೆಯೂ ನನಗೆ ಚಿಂತೆ ಇಲ್ಲ. ಈ ರೀತಿಯ ನಿಯಂತ್ರಣಗಳಿಗೆ ಒಳಗಾದರೆ ಸಾಧನೆ ಮಾಡಲು ಸಾಧ್ಯವೇ?" ಎಂದು ಯುವ ಸ್ಪಿನ್ನರ್ ಪ್ರಶ್ನಿಸಿದ್ದರು. ಕಳೆದ 2019ರಲ್ಲಿಯೇ ರಾಧಕೃಷ್ಣನ್ ಪಾಕಿಸ್ತಾನ ವಿರುದ್ಧ 16 ವಯೋಮಿತಿ ಆಸ್ಟ್ರೇಲಿಯಾ ತಂಡದಲ್ಲಿ ಆಡಿದ್ದರು. ಈ ಐದು ಪಂದ್ಯಗಳ ಸರಣಿಯಲ್ಲಿ ಬ್ಯಾಟಿಂಗ್ ಹಾಗೂ ಬೌಲಿಂಗ್ ಮೂಲಕ ನಿವೇದನ್ ಎಲ್ಲರ ಗಮನ ಸೆಳೆದಿದ್ದರು. ಈ ಸರಣಿಯಲ್ಲಿ ಅವರು 172 ರನ್ ಹಾಗೂ ಎಂಟು ವಿಕೆಟ್ಗಳನ್ನು ತಮ್ಮ ಖಾತೆಗೆ ಹಾಕಿಕೊಂಡಿದ್ದರು. ಆರ್ ಅಶ್ವಿನ್ ಜೊತೆ ಡ್ರೆಸ್ಸಿಂಗ್ ರೂಂ ಶೇರ್ ಮಾಡಿದ್ದ ರಾಧಕೃಷ್ಣನ್ ತಮಿಳುನಾಡು ಪ್ರೀಮಿಯರ್ ಲೀಗ್ ಹಾಗೂ ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಯ ಡೆಲ್ಲಿ ಕ್ಯಾಪಿಟಲ್ಸ್ ಕ್ಯಾಂಪ್ನಲ್ಲಿದ್ದಾಗ ರಾಧಕೃಷ್ಣನ್ ಅವರು ಆರ್ ಅಶ್ವಿನ್ ಅವರ ಜೊತೆ ಡ್ರೆಸ್ಸಿಂಗ್ ಕೊಠಡಿ ಹಂಚಿಕೊಂಡಿದ್ದರು. ಅಷ್ಟೇ ಅಲ್ಲದೆ, ಟಿಎನ್ಪಿಎಲ್ ಟೂರ್ನಿಯಲ್ಲಿ ಸುಬ್ರಮಣಿಯನ್ ಬದ್ರಿನಾಥ್ ಅವರಿಗೆ ಡ್ರಿಂಕ್ಸ್ ನೀಡಿದ್ದ ಬಗ್ಗೆಯೂ ಹೇಳಿಕೊಂಡಿದ್ದರು. 2021ರ 19 ವಯೋಮಿತಿ ವಿಶ್ವಕಪ್ ಟೂರ್ನಿಯಲ್ಲಿ ನಿವೇದನ್ ರಾಧಕೃಷ್ಣನ್ ಅವರು ಆಸ್ಟ್ರೇಲಿಯಾ ಪರ ಹೇಗೆ ಆಡಲಿದ್ದಾರೆಂಬುದು ತೀವ್ರ ಕುತೂಹಲ ಕೆರಳಿಸಿದೆ. ಆಸ್ಟ್ರೇಲಿಯಾ 19ರ ವಯೋಮಿತಿ ತಂಡದ ಆಟಗಾರರನ್ನು ಈ ಕೆಳಕಂಡಂತೆ ನೀಡಲಾಗಿದೆ. ಆಸ್ಟ್ರೇಲಿಯಾ 19ರ ವಯೋಮಿತಿ ತಂಡ: ಹರ್ಕಿರತ್ ಬಜ್ವಾ, ಏಡೆನ್ ಕಹಿಲ್, ಕೂಪರ್ ಕೊನೊಲ್ಲಿ, ಜೊಶುವಾ ಗಾರ್ನರ್, ಐಸ್ಯಾಕ್ ಹಿಗ್ಗಿನ್ಸ್, ಕ್ಯಾಂಪ್ಬೆಲ್ ಕೆಲ್ಲವೇ, ಕಾರಿ ಮಿಲ್ಲರ್, ಜ್ಯಾಕ್ ನಿಸ್ಬೆಟ್, ನಿವೇದನ್ ರಾಧಕೃಷ್ಣನ್, ವಿಲಿಯಮ್ ಸ್ಯಾಲ್ಸ್ಮನ್, ಲ್ಯಾಚ್ಲನ್ ಶಾ, ಜ್ಯಾಕ್ಸನ್ ಸಿನ್ಫಿಲ್ಡ್, ಟೊಬಿಯಾಸ್ ಸ್ನೆಲ್, ಟಾಮ್ ವಿಟ್ನೀ, ಟೀಗ್ ವಿಲ್ಲೀ
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3s7aIcF
