ಬೆಂಗಳೂರು: ವಿರಾಟ್‌ ಕೊಹ್ಲಿ ಸಾರಥ್ಯದ ಪ್ರದರ್ಶನವನ್ನು ಮುಕ್ತಕಂಠದಿಂದ ಶ್ಲಾಘಿಸಿರುವ ತಂಡದ ಮಾಜಿ ನಾಯಕ ಹಾಗೂ ಜನಪ್ರಿಯ ಕ್ರಿಕೆಟ್ ಕಾಮೆಂಟೇಟರ್‌ , ಇಂದು ಟೀಮ್ ಇಂಡಿಯಾ ಎಲ್ಲರ ಅಚ್ಚುಮೆಚ್ಚಿನ ತಂಡವಾಗಿದೆ ಎಂದಿದ್ದಾರೆ. ಟೆಸ್ಟ್‌ ಕ್ರಿಕೆಟ್‌ನ ವಿಶ್ವಕಪ್‌ ಎಂದೇ ಮಹತ್ವ ಪಡೆದುಕೊಂಡಿರುವ ಚೊಚ್ಚಲ ಆವೃತ್ತಿಯ ಐಸಿಸಿ ಟೆಸ್ಟ್‌ ವಿಶ್ವ ಚಾಂಪಿಯನ್‌ಷಿಪ್‌ ಟೂರ್ನಿಯ ಫೈನಲ್ ಪಂದ್ಯದಲ್ಲಿ ಭಾರತ ತಂಡ ನ್ಯೂಜಿಲೆಂಡ್ ವಿರುದ್ಧ ಪೈಪೋಟಿ ನಡೆಸಲಿದ್ದು, ಈ ಪಂದ್ಯ ಜೂನ್ 18-22ರವರೆಗೆ ಸೌತ್‌ಹ್ಯಾಂಪ್ಟನ್‌ನ ರೋಸ್‌ಬೌಲ್‌ ಕ್ರೀಡಾಂಗಣದಲ್ಲಿ ನಡೆಯಲಿದೆ. ಈ ಮಹತ್ವದ ಪಂದ್ಯದ ಬಳಿಕ ವಿರಾಟ್‌ ಕೊಹ್ಲಿ ಬಳ ಇಂಗ್ಲೆಂಡ್‌ನಲ್ಲೇ ಉಳಿಯಲಿದ್ದು, ಆಗಸ್ಟ್‌ 4ರಂದು ಆರಂಭವಾಗಲಿರುವ ಆತಿಥೇಯರ ವಿರುದ್ಧದ ಬರೋಬ್ಬರಿ 5 ಪಂದ್ಯಗಳ ಟೆಸ್ಟ್‌ ಸರಣಿಯಲ್ಲಿ ಕಾದಾಟ ನಡೆಸಲಿದೆ. ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಟೀಮ್ ಇಂಡಿಯಾ ಅಮೋಘ ಪ್ರದರ್ಶನ ನೀಡುತ್ತಿದ್ದು, ಕಳೆದ 5 ವರ್ಷಗಳಲ್ಲಿ ನಂ.1 ಸ್ಥಾನ ಕಾಯ್ದುಕೊಂಡು ಬಂದಿದೆ. ಆಸ್ಟ್ರೇಲಿಯಾ ತಂಡವನ್ನು ಅವರದ್ದೇ ನೆಲದಲ್ಲಿ ಸತತ ಎರಡು ಬಾರಿ ಟೆಸ್ಟ್‌ ಸರಣಿಯಲ್ಲಿ ಸೋಲುಣಿಸಿರುವ ಭಾರತ ತಂಡ, ಇತ್ತೀಚೆಗೆ ತವರು ನೆಲದಲ್ಲಿ ಇಂಗ್ಲೆಂಡ್ ತಂಡವನ್ನು 3-1 ಅಂತರದಲ್ಲಿ ಬಗ್ಗುಬಡಿದು ಇದೀಗ ನ್ಯೂಜಿಲೆಂಡ್ ವಿರುದ್ಧದ ಫೈನಲ್ ಪಂದ್ಯಕ್ಕೆ ಅಣಿಯಾಗಿದೆ. ಇದೀಗ ಎಲ್ಲರ ಗಮನ ಭಾರತ-ನ್ಯೂಜಿಲೆಂಡ್ ನಡುವಣ ವಿಶ್ವ ಚಾಂಪಿಯನ್‌ಷಿಪ್‌ ಫೈನಲ್ ಕಡೆಗಿದ್ದು, ಈ ಸಂದರ್ಭದಲ್ಲಿ ಟೀಮ್ ಇಂಡಿಯಾ ಸಾಧನೆಯನ್ನು ಗುಣಗಾನ ಮಾಡಿರುವ ರಮೀಝ್ ರಾಜಾ, ಭಾರತದ ನಾಯಕ ಕೊಹ್ಲಿ ಅವರ ಆಕ್ರಮಣಕಾರಿ ಆಟದ ರೀತಿಯನ್ನು ಮೆಚ್ಚಿಕೊಂಡಿದ್ದಾರೆ. ಅಷ್ಟೇ ಅಲ್ಲದೆ ಇದನ್ನು ಪಾಕಿಸ್ತಾನ ತಂಡದ ಮಾಜಿ ನಾಯಕ ಇಮ್ರಾನ್ ಖಾನ್‌ ಅವರ ಆಟಕ್ಕೆ ಹೋಲಿಕೆ ಮಾಡಿದ್ದಾರೆ. "ಟೀಮ್ ಇಂಡಿಯಾ ಇಂದು ಅದ್ಭುತ ತಂಡವಾಗಿ ಬೆಳೆದು ನಿಂತಿದೆ. ವಿರಾಟ್‌ ಕೊಹ್ಲಿ ನಾಯಕತ್ವದಲ್ಲಿ ಆಕ್ರಮಣಕಾರಿ ಆಟವಿದ್ದು, ನಿಯಂತ್ರಿತ ಹುಚ್ಚುತನವನ್ನೂ ಕಾಣಬಹುದಾಗಿದೆ. ಆಕ್ರಮಣಕಾರಿ ಆಟದ ಮೂಲಕ ಎಲ್ಲಾ ಒತ್ತಡಗಳನ್ನು ನಿಭಾಯಿಸಿ ಇಂದು ಭಾರತ ತಂಡ ಅದ್ಭುತ ಆಟವಾಡುತ್ತಿದೆ," ಎಂದು ರಮೀಝ್ ಹೇಳಿದ್ದಾರೆ. "ಇಮ್ರಾನ್ ಖಾನ್‌ ಸಾರಥ್ಯದಲ್ಲಿ ಪಾಕಿಸ್ತಾನ ತಂಡ ಆಗ ಏನು ಮಾಡುತ್ತಿತ್ತು, ಅದನ್ನು ಭಾರತ ತಂಡ ಈಗ ಮಾಡುತ್ತಿದೆ. ಈ ಬಗ್ಗೆ ನನಗೆ ಬಹಳಾ ಸಂತಸವಿದೆ. ಇದಕ್ಕೂ ಮುನ್ನ ಭಾರತ ತಂಡದಲ್ಲಿ 2-3 ಕೊರತೆಗಳು ಕಾಣಿಸುತ್ತಿತ್ತು. ಈ ಕೊರತೆಯನ್ನು ಎರಡು ದಶಕ ಕಾಲ ಅನುಭವಿಸಿದೆ ಎನ್ನಬಹುದು. ಆದರೆ ಕಳೆದ ಒಂದು ದಶಕದಲ್ಲಿ ಭಾರತ ತಂಡ ಪ್ರದರ್ಶನ ಸಂಪೂರ್ಣ ಬದಲಾಗಿದೆ. ಎಲ್ಲರ ನೆಚ್ಚಿನ ತಂಡವಾಗಿ ಇಂದು ಬೆಳೆದು ನಿಂತಿದೆ," ಎಂದು ಇಂಡಿಯಾ ನ್ಯೂಸ್‌ಗೆ ನೀಡಿರುವ ಸಂದರ್ಶನದಲ್ಲಿ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ. "ನೀವು ವಿದೇಶಿ ಪಿಚ್‌ಗಳಲ್ಲಿ ಗೆಲ್ಲದ ಹೊರತಾಗಿ ಅಧಿಕಾರಯುತ ಸ್ಥಾನ ಹಿಡಿಯಲು ಸಾಧ್ಯವಿಲ್ಲ. ಭಾರತ ತಂಡ ತನ್ನ 'ಬಿ' ತಂಡದೊಂದಿಗೆ ಆಸ್ಟ್ರೇಲಿಯಾ ಪ್ರವಾಸದಲ್ಲಿ ನಡೆಸಿದ ಹೋರಾಟ ನಾವೆಲ್ಲರೂ ಕಂಡಿದ್ದೇವೆ," ಎಂದಿದ್ದಾರೆ. ಇನ್ನು ನ್ಯೂಜಿಲೆಂಡ್ ವಿರುದ್ಧದ ಮುಂಬರುವ ವಿಶ್ವ ಚಾಂಪಿಯನ್‌ಷಿಪ್‌ ಫೈನಲ್ ಪಂದ್ಯದ ಬಗ್ಗೆ ಮಾತನಾಡಿದ ರಮೀಝ್, ನ್ಯೂಜಿಲೆಂಡ್ ತಂಡಕ್ಕಿಂತಲೂ ಭಾರತ ತಂಡದಲ್ಲಿ ಪ್ರತಿಭೆಗಳು ಹೆಚ್ಚಿದ್ದು ಸೂಕ್ತ ಯೋಜನೆಯೊಂದಿಗೆ ಈ ಪಂದ್ಯಕ್ಕೆ ಕೊಹ್ಲಿ ಬಳಗ ಮುಂದಾಗಲಿದೆ ಎಂದಿದ್ದಾರೆ. "ಅಲ್ಲಿನ ಪರಿಸ್ಥಿತಿಗಳಿಗೆ ಭಾರತ ತಂಡ ಬೇಗ ಹೊಂದಿಕೊಂಡರೆ ಲಾಭವಿದೆ. ಏಕೆಂದರೆ ನ್ಯೂಜಿಲೆಂಡ್ ತಂಡ ಈಗಾಗಗಲೇ ಅಲ್ಲಿ ಬೀಡು ಬಿಟ್ಟಿಯಾಗಿದೆ. ಒಟ್ಟಾರೆ ಹೇಳುವುದಾದರೆ ಭಾರತ ತಂಡದಲ್ಲಿ ಅಪಾರ ಪ್ರತಿಭೆ ಇದೆ. ನ್ಯೂಜಿಲೆಂಡ್ ಕೇವಲ ಒಂದು ಗೇಮ್ ಪ್ಲಾನ್ ಮೂಲಕ ಮಾತ್ರ ಆಡುತ್ತದೆ. ಅದು ವಿಫಲವಾದರೆ ಸೋಲು ಖಚಿತ. ಭಾರತ ತಂಡದಲ್ಲಿ ಗೇಮ್ ಪ್ಲಾನ್ ಜೊತೆಗೆ ಆಟಗಾರರ ಸಾಮರ್ಥ್ಯದ ಮೇಲೂ ವಿಶ್ವಾಸ ಇಡಲಾಗುತ್ತದೆ. ಒಮ್ಮೊಮ್ಮೆ ಗೇಮ್ ಪ್ಲಾನ್ ಕೈಕೊಟ್ಟರೂ ಸ್ವಾಭಾವಿಕ ಆಟ ಕೈಹಿಡಿಯುತ್ತದೆ," ಎಂದು ರಮೀಝ್ ಅಭಿಪ್ರಾಯ ಪಟ್ಟಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/34OHmmN
