ಚೆನ್ನೈ: ಮುಂಬೈ ಇಂಡಿಯನ್ಸ್ ವಿರುದ್ಧ ಪ್ರಸಕ್ತ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್ ಲೀಗ್ ಪಂದ್ಯದಲ್ಲಿ ಅದ್ಭುತ ಬೌಲಿಂಗ್ ಮಾಡಿದ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಹಿರಿಯ ಸ್ಪಿನ್ನರ್ ಪಂದ್ಯ ಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು. ಕಳೆದ ಎರಡು ಪಂದ್ಯಗಳಿಂದ ಹೊರಗುಳಿದಿದ್ದ ಅಮಿತ್ ಮಿಶ್ರಾ, ವೇಗಿ ಲುಕ್ಮನ್ ಮೇರಿವಾಲ ಅವರ ಸ್ಥಾನದಲ್ಲಿ ಮಂಗಳವಾರ ಕಣಕ್ಕೆ ಇಳಿದರು. ಅದರಂತೆ ಸಿಕ್ಕ ಅವಕಾಶವನ್ನು ಸಂಪೂರ್ಣವಾಗಿ ಸದುಪಯೋಗಪಡಿಸಿಕೊಂಡರು. ಮುಂಬೈ ಇಂಡಿಯನ್ಸ್ ನಾಯಕ ರೋಹಿತ್ ಶರ್ಮಾ(44) ಅವರನ್ನು9ನೇ ಓವರ್ನಲ್ಲಿ ಔಟ್ ಮಾಡಿದರು. ಅದೇ ಓವರ್ನಲ್ಲಿ ಅಪಾಯಕಾರಿ ಬ್ಯಾಟ್ಸ್ಮನ್ ಹಾರ್ದಿಕ್ ಪಾಂಡ್ಯ ಅವರನ್ನು ಶೂನ್ಯಕ್ಕೆ ಪೆವಿಲಿಯನ್ ಹಾದಿ ತೋರಿಸಿದರು. ಅಷ್ಟೇ ಅಲ್ಲದೆ, ಹಿರಿಯ ಲೆಗ್ ಸ್ಪಿನ್ನರ್ 12ನೇ ಓವರ್ನಲ್ಲಿ ಸ್ಪೋಟಕ ಬ್ಯಾಟ್ಸ್ಮನ್ ಕೈರೊನ್ ಪೊಲಾರ್ಡ್ ಅವರನ್ನು ಕೇವಲ 2 ರನ್ ಗಳಿಗೆ ಔಟ್ ಮಾಡಿದರೆ, 18ನೇ ಓವರ್ನಲ್ಲಿ ಇಶಾನ್ ಕಿಶನ್ ಅವರ ವಿಕೆಟ್ ಪಡೆದಿದ್ದರು. ನಾಲ್ಕು ಓವರ್ ಬೌಲಿಂಗ್ ಮಾಡಿದ್ದ ಅಮಿತ್ ಇಶ್ರಾ 24 ರನ್ ನೀಡಿ ನಾಲ್ಕು ವಿಕೆಟ್ಗಳನ್ನು ತಮ್ಮ ಖಾತೆಗೆ ಹಾಕಿಕೊಂಡರು.ಆ ಮೂಲಕ ಮುಂಬೈ ಇಂಡಿಯನ್ಸ್ ತನ್ನ ಪಾಲಿನ 20 ಓವರ್ಗಳಿಗೆ 8 ವಿಕೆಟ್ ಕಳೆದುಕೊಂಡು 137 ರನ್ ಗಳಿಗೆ ಸೀಮಿತವಾಯಿತು. ಆ ಮೂಲಕ ಡೆಲ್ಲಿಗೆ 138 ರನ್ ಸಾಧಾರಣ ಗುರಿ ನೀಡಿತು. ಮುಂಬೈ ಇನಿಂಗ್ಸ್ ಬಳಿಕ ಮಾತನಾಡಿದ ಅಮಿತ್ ಮಿಶ್ರಾ, ಹಾಲಿ ಚಾಂಪಿಯನ್ಸ್ ಮುಂಬೈ ಇಂಡಿಯನ್ಸ್ ವಿರುದ್ಧ ತಾವು ರೂಪಿಸಿದ್ದ ಯೋಜನೆಯನ್ನು ಬಹಿರಂಗಪಡಿಸಿದರು. "ನಾನು ಯಾವಾಗಲೂ ವಿಕೆಟ್ಗಳ ಬಗ್ಗೆ ಚಿಂತೆ ಮಾಡುತ್ತೇನೆ. ಸ್ವಲ್ಪ ಚೆಂಡಿನ ಮೇಲೆ ಹಿಡಿತವಿದ್ದ ಕಾರಣ ಸರಿಯಾಗ ಜಾಗದಲ್ಲಿ ಬೌಲಿಂಗ್ ಮಾಡುತ್ತಿದ್ದೆ. ಟಿ20 ಕ್ರಿಕೆಟ್ನಲ್ಲಿ ನಾನು ಯಾವಾಗ ಬೌಲಿಂಗ್ ಮಾಡಿದರೂ ವಿಕೆಟ್ ಪಡೆಯುವ ಬಗ್ಗೆ ಚಿಂತಿಸುತ್ತೇನೆ ಹಾಗೂ ಎದುರಾಳಿ ತಂಡವನ್ನು ಒತ್ತಡ ತಳ್ಳಲು ಬಯಸುತ್ತೇನೆ," ಎಂದು ಅಮಿತ್ ಮಿಶ್ರಾ ಹೇಳಿದರು. "ನನ್ನ ಬೌಲಿಂಗ್ ಅನ್ನು ನಾನೆಂದಿಗೂ ಬದಲಾಯಿಸುವುದಿಲ್ಲ. ನನ್ನ ಸಾಮರ್ಥ್ಯಕ್ಕೆ ತಕ್ಕಂತೆ ಬೌಲಿಂಗ್ ಮಾಡುತ್ತೇನೆ. ವೇಗವನ್ನು ಬದಲಾಯಿಸುವ ಬಲದು ನಾನು ವಿಭಿನ್ನ ಎಸೆತಗಳನ್ನು ಹಾಕುವುದರ ಬಗ್ಗೆ ಯೋಚಿಸುತ್ತೇನೆ," ಎಂದರು. "ಹಾರ್ದಿಕ್ ಪಾಂಡ್ಯ ಯಾವಾಗ ಬಂದರೂ ಅವರನ್ನು ಔಟ್ ಮಾಡಲು ಪ್ರಯತ್ನಿಸುತ್ತೇನೆ. ಚೆಂಡನ್ನು ಸ್ವಲ್ಪ ಟಾಸ್ ಮಾಡಿದೆ ಹಾಗೂ ಅವರನ್ನು ಸುಲಭವಾಗಿ ಔಟ್ ಮಾಡಿದೆ. ನಮ್ಮ ಬ್ಯಾಟಿಂಗ್ ವಿಭಾಗ ಚೆನ್ನಾಗಿದ್ದು, ಮುಂಬೈ ನೀಡಿದ್ದ ಗುರಿಯನ್ನು ಮುಟ್ಟುತ್ತೇವೆ. ನನ್ನ ಕೆಲಸ ಇದೀಗ ಮುಗಿದಿದೆ, ಕೋಚ್ ಕೆಲಸ ಇನ್ನು ಆರಂಭವಾಗಲಿದೆ," ಎಂದು ಮಿಶ್ರಾ ಮಾತು ಮುಗಿಸಿದರು. ಅಮಿತ್ ಮಿಶ್ರಾ ಹೇಳಿದ ಹಾಗೆ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಇನ್ನೂ 5 ಎಸೆತಗಳು ಬಾಕಿ ಇರುವಾಗಲೇ ಗೆಲುವಿನ ದಡ ಸೇರಿತು. ಗೆಲುವಿನೊಂದಿಗೆ ರಿಷಭ್ ಪಂತ್ ನಾಯಕತ್ವದ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಪಾಯಿಂಟ್ಸ್ ಟೇಬಲ್ನಲ್ಲಿ ಎರಡನೇ ಸ್ಥಾನಕ್ಕೇರಿತು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3sCd3sO
