ಹೊಸದಿಲ್ಲಿ: ದೇಶದಲ್ಲಿ ಕೊರೊನಾ ನಿರೋಧಕ ಲಸಿಕೆ ಅಭಿಯಾನದಲ್ಲಿ ಮಹತ್ವದ ಪಾತ್ರವಹಿಸುತ್ತಿರುವ ಲಸಿಕಾ ಉತ್ಪಾದಕ ಕಂಪನಿ ಪುಣೆಯ ಸೀರಂ ಇನ್ಸ್ಟಿಟ್ಯೂಟ್ ಆಫ್‌ ಇಂಡಿಯಾ (ಎಸ್‌ಐಐ) ಮುಖ್ಯಸ್ಥ ಅದಾರ್‌ ಪೂನಾವಾಲಾ ಅವರಿಗೆ ಕೇಂದ್ರ ಸರಕಾರ 'ವೈ' ಶ್ರೇಣಿಯ ಭದ್ರತೆ ಒದಗಿಸಿದೆ. ಆಸ್ಟ್ರಾಜೆನೆಕಾ ಮತ್ತು ಆಕ್ಸ್‌ಫರ್ಡ್‌ ವಿವಿ ಸಂಶೋಧಿಸಿದ ಕೋವಿಶೀಲ್ಡ್‌ ಸೇರಿ ಹಲವು ಫಾರ್ಮಾ ಕಂಪನಿಗಳ ಲಸಿಕೆ ಉತ್ಪಾದನೆ ಹೆಚ್ಚಿಸುವ ಒತ್ತಡ ಎಸ್‌ಐಐ ಮೇಲಿದೆ. ಇದರ ಜತೆಗೆ ಕಂಪನಿ ವಹಿವಾಟೂ ಏರಿಕೆಯಾಗಿದೆ. ಅವರಿಗೆ ಎದುರಾಗಬಹುದಾದ ಅಪಾಯಗಳನ್ನು ಅರಿತು ವೈ ಕೆಟಗರಿಯ ಭದ್ರತೆ ಒದಗಿಸಲಾಗಿದೆ ಎಂದು ಗೃಹ ಸಚಿವಾಲಯ ಆದೇಶ ಹೊರಡಿಸಿದೆ. ಇಬ್ಬರು ಕಮಾಂಡೊಗಳು ಮತ್ತು ಒಬ್ಬ ಪೊಲೀಸ್‌ ಅಧಿಕಾರಿ ಸೇರಿ 11 ಸಿಬ್ಬಂದಿ ಅವರಿಗೆ ಭದ್ರತೆ ಒದಗಿಸಲಿದ್ದಾರೆ. ಅಡ್ಡ ಪರಿಣಾಮ ಅತ್ಯಲ್ಪ ಸೋಂಕು ನಿವಾರಣೆ ಖಚಿತ! ಹೊಸದಿಲ್ಲಿ: ಆಸ್ಟ್ರಾಜೆನೆಕಾ-ಆಕ್ಸ್‌ಫರ್ಡ್‌ ಸಂಶೋಧನೆಯ ಕೋವಿಶೀಲ್ಡ್‌ ಹಾಗೂ ಫೈಜರ್‌ ಕಂಪನಿಯ ಲಸಿಕೆ ಪಡೆದ ನಾಲ್ವರಲ್ಲಿ ಒಬ್ಬರಿಗೆ ಮಾತ್ರ ಲಘುವಾದ ಅಡ್ಡಪರಿಣಾಮಗಳು ಬಾಧಿಸುತ್ತಿವೆ. ಅವೆಲ್ಲವೂ 2-3 ದಿನಗಳು ಮಾತ್ರ ಇರುತ್ತವೆ. ಕೊರೊನಾ ವಿರುದ್ಧ ಹೋರಾಡಲು ಲಸಿಕೆಗಳು ಪರಿಣಾಮಕಾರಿಯಾಗಿವೆ ಎಂದು ಲ್ಯಾನ್‌ಸೆಟ್‌ ಇನ್‌ಫೆಕ್ಷಿಯಸ್‌ ಡಿಸೀಸಸ್‌ ಜರ್ನಲ್‌ನಲ್ಲಿ ಪ್ರಕಟಗೊಂಡ ಅಧ್ಯಯನ ವರದಿ ತಿಳಿಸಿದೆ. ಆ್ಯಪ್‌ ಮೂಲಕ ಸಂಗ್ರಹಿಸಿದ ದತ್ತಾಂಶಗಳನ್ನು ಅಧ್ಯಯನಕ್ಕೊಳಪಡಿಸಿ ಲಂಡನ್‌ನ ಕಿಂಗ್ಸ್‌ ಕಾಲೇಜಿನ ಸಂಶೋಧಕರ ತಂಡವು ವರದಿ ಸಿದ್ಧಪಡಿಸಿದೆ. ಅಡ್ಡ ಪರಿಣಾಮದ ತೀವ್ರತೆ ಲಸಿಕೆ ಪಡೆದ ಮೊದಲ 24 ಗಂಟೆಯೊಳಗೆ ಹೆಚ್ಚಿದ್ದು, ನಂತರ 2-3 ದಿನಗಳಲ್ಲಿ ಗುಣವಾಗುತ್ತದೆ. ತಲೆನೋವು, ಆಯಾಸ, ಸೌಮ್ಯ ಸ್ವಭಾವದ ಜ್ವರ, ಮೈ ಕೈ ನೋವು ಇತ್ಯಾದಿ ಸಣ್ಣ ಪ್ರಮಾಣದ ಅಡ್ಡ ಪರಿಣಾಮಗಳು ಕಾಣಿಸಿಕೊಳ್ಳಬಹುದು. ಆದರೆ ಲಸಿಕೆ ಪಡೆದವರಲ್ಲಿ ರೋಗನಿರೋಧಕ ಶಕ್ತಿ ಹೆಚ್ಚಿ, ಸೋಂಕಿನ ಅಪಾಯವನ್ನು ದೊಡ್ಡ ಮಟ್ಟದಲ್ಲಿ ತಗ್ಗಿಸಿದೆ ಎಂದು ವರದಿ ಹೇಳಿದೆ. ಫೈಜರ್‌ ಲಸಿಕೆ ಮೊದಲ ಡೋಸ್‌ ಪಡೆದ 12ನೇ ದಿನದಿಂದ 21ನೇ ದಿನದ ಅವಧಿಯಲ್ಲಿ ಶೇ. 58ರಷ್ಟು ಸೋಂಕಿನ ಅಪಾಯ ತಗ್ಗಿದರೆ, ಕೋವಿ ಶೀಲ್ಡ್‌ ಲಸಿಕೆಯಲ್ಲಿ ಈ ಪ್ರಮಾಣ ಶೇ.39ರಷ್ಟಿದೆ. ಫೈಜರ್‌ ಮೊದಲ ಡೋಸ್‌ ಪಡೆದ ಕನಿಷ್ಠ 21 ದಿನಗಳ ನಂತರ ಸೋಂಕಿನ ಅಪಾಯ ಶೇ. 69ರಷ್ಟು ಹಾಗೂ ಕೋವಿಶೀಲ್ಡ್‌ ಮೊದಲ ಡೋಸ್‌ ಪಡೆದ ಕನಿಷ್ಠ 21 ದಿನಗಳ ನಂತರ ಸೋಂಕಿನ ಅಪಾಯ ಶೇ.60 ರಷ್ಟು ತಗ್ಗಿದೆ. ಸದ್ಯದ ಸ್ಥಿತಿಯಲ್ಲಿ ಲಸಿಕೆಗಳು ಬಹುತೇಕ ಯಶಸ್ವಿಯಾಗಿವೆ ಎಂದು ಅಧ್ಯಯನ ವರದಿ ತಿಳಿಸಿದೆ. ಡಿಸೆಂಬರ್‌ 8ರಿಂದ ಮಾರ್ಚ್ 10ರವರೆಗೆ ಈ ಎರಡೂ ಲಸಿಕೆಗಳನ್ನು ಪಡೆದ 6.27 ಲಕ್ಷ ಜನರ ದತ್ತಾಂಶಗಳನ್ನು ವಿಶ್ಲೇಷಿಸಿದ ನಂತರವೇ ಈ ಅಭಿಪ್ರಾಯಕ್ಕೆ ಬರಲಾಗಿದೆ ಎಂದು ವರದಿಯಲ್ಲಿಸ್ಪಷ್ಟಪಡಿಸಲಾಗಿದೆ.
from India & World News in Kannada | VK Polls https://ift.tt/33bCVlb
