ಬೆಂಗಳೂರು: ನಿತ್ಯ ವ್ಯಾಪಾರನೂ ಇಲ್ಲ, ದುಡ್ಡು ಕೊಟ್ಟ ತಂದ ತರಕಾರಿ ಮೂಟೆಗಳು ಖಾಲಿಯಾಗ್ತಿಲ್ಲ, ಹೆಚ್ಚಿನ ದಿನಗಳ ಕಾಲ ಇಡುವ ಹಾಗೂ ಇಲ್ಲ. ಹೀಗಾದರೆ ನಮ್ಮ ಬದುಕು ಸಾಗುವುದು ಹೇಗೆ? ಇದು ಬೀದಿ ಬದಿ ವ್ಯಾಪಾರಿಗಳ ಪ್ರಶ್ನೆ. ಹೌದು ಕೋವಿಡ್‌ ಲಾಕ್ಡೌನ್ ಇವರ ಬದುಕನ್ನು ಕಸಿದುಕೊಳ್ಳುತ್ತಿದೆ. ತೀವ್ರ ಸ್ವರೂಪದಲ್ಲಿ ಹರಡುತ್ತಿರುವ ಕೋವಿಡ್‌ ನಿಯಂತ್ರಣ ಮಾಡಲು ಲಾಕ್ಡೌನ್ ಜಾರಿಗೊಳಿಸಲಾಗಿದೆ. ಸದ್ಯದ ಸ್ಥಿತಿಗೆ ಲಾಕ್ಡೌನ್ ಅನಿವಾರ್ಯ ಎಂದು ತಜ್ಞರು ಹೇಳುತ್ತಾರೆ. ಆದರೆ ಇದರಿಂದ ಜನಸಾಮಾನ್ಯರಿಗೆ ಗಾಯದ ಮೇಲೆ ಬರೆ ಎಂಬಂತ್ತಾಗಿದೆ. ಬೆಂಗಳೂರಿನ ಯಶವಂತಪುರ ಮಾರ್ಕೆಟ್, ಕೆ.ಆರ್‌ ಮಾರ್ಕೆಟ್ ಸೇರಿದಂತೆ ಇತರ ಸಣ್ಣಪುಟ್ಟ ಮಾರ್ಕೆಟ್‌ಗಳಲ್ಲಿ ಬೆಳಗ್ಗೆ 6 ಗಂಟೆಯಿಂದ 10 ಗಂಟೆಯ ವರೆಗೆ ವ್ಯಾಪಾರಕ್ಕೆ ಅವಕಾಶ ನೀಡಲಾಗಿದೆ. ಉಳಿದಂತೆ ಇತರ ಅಂಗಡಿ ಮುಂಗಟ್ಟುಗಳು ಬಂದ್ ಆಗಿವೆ. ಬೆಳಗ್ಗೆ ತರಕಾರಿ, ಹಣ್ಣು ಹಂಪಲುಗಳನ್ನು ಮಾಕುಕಟ್ಟೆಯಲ್ಲೂ, ಬೀದಿ ಬದಿಯಲ್ಲಿ ಇವರು ಮಾರಾಟ ಮಾಡುತ್ತಾರೆ. ಆದರೆ 10 ಗಂಟೆ ಆಗುತ್ತಿದ್ದಂತೆ ಇವೆಲ್ಲವನ್ನೂ ಮತ್ತೆ ಮೂಟೆ ಕಟ್ಟಿ ತೆಗೆದುಕೊಂಡು ಹೋಗಬೇಕು. ಒಂದಿಷ್ಟು ಬೆಳಗ್ಗೆ ವ್ಯಾಪಾರ ಆಗುತ್ತದೆ. ಆದರೆ ಹೆಚ್ಚಿನ ಪ್ರಮಾಣದ ತರಕಾರಿ ಹಣ್ಣು ಹಂಪಲು ಹಾಗೆ ಉಳಿಯುತ್ತಿದೆ. ಸದ್ಯದ ವಾತಾವರಣದ ಬಿಸಿಯಲ್ಲಿ ಇದನ್ನು ಹೆಚ್ಚಿನ ಅವಧಿಗಳ ಕಾಲ ಇಡಲು ಸಾಧ್ಯವಿಲ್ಲ. ಇದರಿಂದ ಸೊಪ್ಪು ತರಕಾರಿ ವ್ಯಾಪಾರಸ್ಥರು ಸಾಕಷ್ಟು ನಷ್ಟವನ್ನು ಅನುಭವಿಸುತ್ತಿದ್ದಾರೆ. ಸದ್ಯದ ಪರಿಸ್ಥಿತಿಯಿಂದಾಗಿ ನಮಗೆ ಊಟಕ್ಕೆ ಗತಿಯಿಲ್ಲ, ಮನೆ ಬಾಡಿಗೆ ಕಟ್ಟಿಲ್ಲ ಹೀಗೆ ಮುಂದುವರಿದರೆ ನಮ್ಮ ಸ್ಥಿತಿ ಹೇಗೆ ಎಂದು ಪ್ರಶ್ನಿಸುತ್ತಾರೆ ವ್ಯಾಪಾರಸ್ಥರು. 10 ಗಂಟೆಗೆ ಲಾಕ್ಡೌನ್ ಜಾರಿಗೊಳ್ಳುವುದರಿಂದ 9.30 ಗಂಟೆಗೆ ಪೊಲೀಸರು ಅಂಗಡಿಗಳನ್ನು ಮುಚ್ಚಲು ಸೂಚನೆ ನೀಡುತ್ತಾರೆ. ಬೀದಿ ಬದಿ ವ್ಯಾಪಾರಸ್ಥರೂ ಇದರಿಂದ ತರಾತುರಿಯಲ್ಲಿ ಬಂದು ವ್ಯಾಪಾರ ಮಾಡಿಮುಗಿಸಬೇಕಿದೆ. ಲಾಕ್ಡೌನ್ ಬೇಡಪ್ಪಾ ಎನ್ನುತ್ತಾರೆ ಆಟೋ ಚಾಲಕರು ಲಾಕ್ಡೌನ್ ಅನಿವಾರ್ಯ ಕಾರಣಕ್ಕಾಗಿ ಜಾರಿಗೆ ತರಲಾಗಿದೆ ಎಂದು ಸರ್ಕಾರ ಸಮರ್ಥನೆ ಮಾಡುತ್ತಿದ್ದರೂ ಜನರು ಪಡುತ್ತಿರುವ ಪಾಡು ಅಷ್ಟಿಷ್ಟಲ್ಲ. ಕೋವಿಡ್‌ ಕಾರಣಕ್ಕಾಗಿ ಮೊದಲೇ ಬಾಡಿಗೆ ಕಡಿಮೆ ಇದೆ. ಇದೀಗ ಲಾಕ್ಡೌನ್ ಜಾರಿಗೊಂಡ ಪರಿಣಾಮ ಬದುಕು ನಡೆಸೋದೆ ಕಷ್ಟ ಆಗಿದೆ ಎನ್ನುತ್ತಾರೆ ಚಾಮರಾಜಪೇಟೆಯ ಆಟೋ ಚಾಲಕ ರಾಮ ಎಂಬುವವರು. ಕಳೆದ ಬಾರಿಯ ಲಾಕ್‌ಡೌನ್‌ನಿಂದ ಕೆಲವರಿಗೆ ಪರಿಹಾರ ಸಿಕ್ಕಿದೆ. ಆದರೆ ಮತ್ತೆ ಹಲವರಿಗೆ ಪರಿಹಾರ ಸಿಕ್ಕಿಲ್ಲ. ಈ ಬಾರಿ ಸಿಗುವ ಸಾಧ್ಯತೆಯಂತೂ ಇಲ್ಲ. ಇದರಿಂದಾಗಿ ಕೋವಿಡ್‌ ಸೋಂಕು ಒಂದು ಕಡೆ ಮತ್ತೊಂದು ಕಡೆ ಲಾಕ್ಡೌನ್ ಎರಡೂ ನಮ್ಮ ಬದುಕನ್ನು ಕಸಿದುಕೊಳ್ಳುತ್ತಿದೆ ಎಂದು ಅಳಲು ತೋಡಿಕೊಳ್ಳುತ್ತಾರೆ ಅವರು. ಒಟ್ಟಿನಲ್ಲಿ ಕೋವಿಡ್‌ ಲಾಕ್ಡೌನ್ ಸಾಮಾನ್ಯ ವರ್ಗದ ಜನರ ಬದುಕಿನ ಮೇಲೆ ಭಾರೀ ಪರಿಣಾಮ ಬೀರುತ್ತಿದೆ. ವ್ಯಾಪಾರ ವಹಿವಾಟು ಸಂಪೂರ್ಣ ಸ್ಥಬ್ಧವಾಗಿರುವುದರಿಂದ ಜನರು ಸಂಕಷ್ಟ ಅನುಭವಿಸುತ್ತಿದ್ದಾರೆ. ಕೋವಿಡ್‌ ಸೋಂಕಿನ ಜೊತೆಗೆ ಲಾಕ್‌ಡೌನ್‌ಗೂ ಭಯಪಡಬೇಕಾದ ಸ್ಥಿತಿ ನಿರ್ಮಾನವಾಗಿದೆ.
from India & World News in Kannada | VK Polls https://ift.tt/3dZXneF
