ಅಯ್ಯೊ, ಪಾರ್ಕ್? ಉದ್ಯಾನವನ? ಅದನ್ನೇನು ನೋಡುವುದು? ಎಂದು ಮೂಗು ಮುರಿಯದಿರಿ. 3453 ಎಕರೆ ಜಮೀನಿನ ವಿಸ್ತಾರದಲ್ಲಿ, ಸಾರಟೋಗ ಹಾಗೊ ಸ್ಕೈಲೈನ್ ಬೂಲೆವಾರ್ಡ್ ಮಧ್ಯೆ, ಸಾಂಟಾ ಕ್ರೂಚಿ ಪರ್ವತ ಶ್ರೇಣಿಯ ಮಧ್ಯೆ ಇರುವ ಈ ತಾಣ ಅತ್ಯಂತ ಮನಮೋಹಕ. ರೆಡ್ವುಡ್ ಹಾಗೂ ಓಕ್ ಮರಗಳ ಕಾಡಿನ ಮಧ್ಯೆ ಇರುವ ಈ ಜಾಗಕ್ಕೆ ಎಂಟ್ರಿ ಫ಼ೀಸ್ 6 ಡಾಲರ್, ಪ್ರತಿ ಕಾರಿಗೆ. ಪಾರ್ಕಿಂಗ್ ಹತ್ತಿರವೇ ಇರುವ ದೊಡ್ಡ ಲಾನ್. ಅಲ್ಲಿ ಪಿಕಿನಿಕ್ , ಫೋಟೊ ಶೂಟ್, ಪಾರ್ಟಿ ಇತ್ಯಾದಿ ಮಾಡಲು ಯಥೇಚ್ಚವಾಗಿ ಜಾಗವಿದೆ. ಹಸಿರು ಹುಲ್ಲು ಗಾವಲು ಕಣ್ಣು ಹಾಯಿಸದಷ್ಟು ದೂರದ ತನಕ ಹರಡಿದೆ. ಮಧ್ಯೆ ಮಧ್ಯೆ ಪಿಕ್ನಿಕ್ ಟೇಬಲ್ಗಳು, ಕೂರಲು ಬೆಂಚುಗಳು, ಬಾರ್ಬೆಕ್ಯೂ/ ತಂದೂರಿ ಅಡಿಗೆ ಮಾಡಿಕೊಳ್ಳಲು ಒಲೆಗಳು, ನೀರಿನ ತಾಣಗಳು, ಹೆಜ್ಜೆ ಹೆಜ್ಜೆಗೆ, ಟಿಶ್ಯೂ, ನೀರು, ಸೋಪು ಇರುವ ಸುಸಜ್ಜಿತ ಟಾಯ್ಲೆಟ್ಗಳು. ಎಲ್ಲವೂ ಚೊಕ್ಕ, ಶುಭ್ರ. ದೊಡ್ಡ ದೊಡ್ಡ ಮರಗಳ ನಡುವೆ ಇರುವ ಈ ಜಾಗದಲ್ಲಿ ಆರಾಮವಾಗಿ ಕೂತು ಇಡೀ ದಿನ ಕಳೆಯಬಹುದು. ಪಿಕ್ನಿಕ್ ಮುಗಿಸಿ ಇಲ್ಲಿರುವ 22 ಮೈಲುಗಳ ಟ್ರೇಲ್ಗಳಲ್ಲಿ ಹೈಕ್ ಮಾಡುತ್ತಾ ಸಮಯ ಕಳೆಯಬಹುದು. ಸುಮಾರು ಹತ್ತೊಂಬತ್ತು ಟ್ರೇಲ್ ಇರುವ ಇಲ್ಲಿ ಸುಲಭ, ಮಾಧ್ಯಮ ಹಾಗೂ ಕಷ್ಟಕರವಾದ ಹೈಕ್ ಗಳಿವೆ. ಟ್ರೇಲ್ ಎಂದರೆ ಕಾಡಿನ ಮಧ್ಯೆ ಮಾಡಿರುವ ಒಳದಾರಿ. ಹೈಕರ್ಗಳು ಸುಲಭವಾಗಿ ನಡೆಯಲು ಮಾಡಿರುವಂತಹ ಮಾರ್ಗ. ಕೆಲವು ಇಡೀ ದಿನ ಮಾಡಬಹುದಾದ ಹೈಕ್ ಗಳು, ಕೆಲವು ಚಿಕ್ಕವು, ಒಂದು ಗಂಟೆಗಲ ಒಳಗೆ ಮುಗಿಸಬಹುದು. ಇದರ ಬಗ್ಗೆ ಮೊದಲೇ ತಿಳಿದುಕೊಂಡು, ನಿಮಗೆ ಪ್ರಶಸ್ತವಾದುದನ್ನು ಆರಿಸಿಕೊಳ್ಳಬಹುದು. ಇಲ್ಲಿರುವ ಯೂತ್ ಸೈನ್ಸ್ ಇನ್ಸ್ಟಿಟ್ಯೂಟ್ ವಿಜ್ಞಾನ ಹಾಗೂ ಪ್ರಕೃತಿಯ ವಿಸ್ಮಯಗಳ ಮ್ಯೂಸಿಯಮ್. ಜಾನ್ ನಿಕೋಲಸ್ ಟ್ರೇಲ್ ಶುರುವಾಗುವ ತಾಣದಲ್ಲಿ ಲೇಕ್ ರಾಂಚ್ ರಿಸರ್ವ್ ವಾರಿಯರ್ ಒಂದು ದೊಡ್ಡ ಕೆರೆ ಸುತ್ತ ಮುತ್ತ ಶಾಂತ ವಾತಾವರಣ ನಿಮ್ಮನ್ನು ಸೆಳೆಯುತ್ತದೆ. ಹಾ, ಸಿಲಿಕೋನ್ ವ್ಯಾಲಿಯ ಏಕ ಮಾತ್ರ ಶೇಕ್ಸ್ ಪಿಯರ್ ನಾಟಕ ಕಂಪನಿಯ ಶೋಗಳು ನಡೆಯುವ ಏಕೈಕ ಸ್ಥಳ ಇದು. ಎಲ್ಲದಕ್ಕಿಂತ ಹೆಚ್ಚಾಗಿ, ಬದುಕಲ್ಲಿ ಲವಲವಿಕೆ ಬೇಕೆನಿಸಿದಾಗ ಇಲ್ಲಿಯ ಕ್ಯಾಂಪಿಂಗ್ ಏರಿಯಾ ಬುಕ್ ಮಾಡಿ, ನಿಮ್ಮ ಟೆಂಟ್, ಅಡುಗೆ ಸಮಾನು, ಬೀಯರ್,ಕುರುಕುಲು ತಿಂಡಿಗಳೊಡನೆ ನಿಮಗಿಷ್ಟ ಬಂದಷ್ಟು ದಿನ ಕ್ಯಾಂಪ್ ಮಾಡಿ. ಟಾಯ್ಲೆಟ್, ಕುಡಿಯುವ ನೀರು, ಜಾಸ್ತಿ ಜನ ಬಂದರೆ ಇರುವ ದೊಡ್ಡ ಜಾಗಗಳು ನಿಮ್ಮನ್ನು ರೀಬೂಟ್ ಮಾಡುತ್ತದೆ! ನಿಮ್ಮ ನಾಯಿ, ಬೆಕ್ಕುಗಳನ್ನೂ ಕರೆದೊಯ್ಯಬಹುದು. ರೆಕ್ರಿಯೇಶನ್ ವೆಹಿಕಲ್ಗಳು, ಅಂದರೆ ಸಕಲ ಸೌಲಭ್ಯಗಳು ಇರುವ , ಅದರಲ್ಲೇ ವಾಸ ಮಾಡುವಂತಹ ಟ್ರೇಲರ್ಗಳು ಬಾಡಿಗೆಗೆ ತೆಗೆದುಕೊಂಡು, ಇಲ್ಲಿ ಪಾರ್ಕ್ ಕೂಡ ಮಾಡಬಹುದು. ನಿಮ್ಮ ಮಕ್ಕಳ ಹುಟ್ಟಿದ ಹಬ್ಬಗಳನ್ನೂ ಸಹ ಇಲ್ಲಿ ಪಿಕ್ನಿಕ್ ತರಹ, ಅಥವಾ ಕ್ಯಾಂಪಿಂಗ್ ಮಾಡಿ ಆಚರಿಸಬಹುದು. ಇಲ್ಲಿಯ ಕೆಲವು ನಿಯಮಗಳನ್ನು ಗಮನದಲ್ಲಿ ಇಟ್ಟುಕೊಂಡು ಪ್ಲಾನ್ ಮಾಡಿ. ಕಸ ಹಾಕುವುದು, ಎಲ್ಲೆಂದರಲ್ಲಿ ಬೆಂಕಿ ಹತ್ತಿಸಿ ಅಡುಗೆ ಮಾಡುವುದು, ಕ್ಯಾಂಪಿಂಗ್ ಸೈಟ್ಗಳ ನಿಯಮ ಪಾಲಿಸುವುದು ಇತ್ಯಾದಿಗಳ ಬಗ್ಗೆ ಕಾಳಜಿ ಇದ್ದರೆ, ನಿಮಗೂ, ನಿಮ್ಮ ಪರಿವಾರದವರಿಗೂ ರಿಲಾಕ್ಸ್ ಮಾಡಲು ಉತ್ತಮ ಜಾಗವಿದು!
from India & World News in Kannada | VK Polls https://ift.tt/3sEeGWV
