ಮಂಗಳೂರು: ರಾಜ್ಯದಲ್ಲಿ ವೀಕೆಂಡ್ ಕರ್ಫ್ಯೂ ಸೋಮವಾರ ಬೆಳಗ್ಗೆ ಮುಗಿದಿದ್ದು, ಇದರಿಂದ ನಗರ ಸೇರಿದಂತೆ ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಏಕಾಏಕಿ ವಾಹನ, ಜನ ದಟ್ಟಣೆ ಹೆಚ್ಚಾಗಿದೆ. ಸೋಮವಾರ ಬೆಳಗ್ಗೆ 8 ಗಂಟೆಯಿಂದ ನಂತೂರು, ಕಂಕನಾಡಿ, ಪಂಪ್‌ವೆಲ್, ಕೊಟ್ಟಾರ, ಬಿಜೈ, ಕೆಎಸ್‌ರಾವ್ ರಸ್ತೆಯಲ್ಲಿ ವಾಹನ ಓಡಾಟ ಹೆಚ್ಚಿತ್ತು. ಕೆಎಸ್ಸಾರ್ಟಿಸಿ, ಖಾಸಗಿ ಬಸ್‌ಗಳ ಓಡಾಟ ಆರಂಭಿಸಿದ್ದು, ಜನರು ಸಾರ್ವಜನಿಕ ವಾಹನಗಳಲ್ಲಿ ಓಡಾಟ ನಡೆಸುತ್ತಿದ್ದರು. ಬಸ್‌ಗಳಲ್ಲಿ ಸಾಮಾಜಿಕ ಅಂತರ, ಮಾಸ್ಕ್ ಧರಿಸದೆ ಸಂಚರಿಸುತ್ತಿದ್ದ ದೃಶ್ಯಗಳು ಕಂಡು ಬರುತ್ತಿದ್ದವು. ಮುಖ್ಯವಾಗಿ ಮಂಗಳೂರಿನ ಪ್ರಧಾನ ರಸ್ತೆಗಳಲ್ಲಿ ಹೆಚ್ಚಾಗಿತ್ತು. ದ್ವಿಚಕ್ರ, ಕಾರುಗಳಲ್ಲಿ ವಾಹನ ಸವಾರರು ಮಾಸ್ಕ್ ಧರಿಸದೆ ಸಂಚರಿಸುತ್ತಿದ್ದರು. ನಂತೂರಿನಲ್ಲಿ ವಾಹನಗಳು ಹೆಚ್ಚಾದ ಕಾರಣ ಟ್ರಾಫಿಕ್ ಬ್ಲಾಕ್ ಆಗಿದ್ದು, ಪೊಲೀಸರು ನಿಯಂತ್ರಣ ಮಾಡುತ್ತಿದ್ದರು. ಇನ್ನು ರಾಜ್ಯಾದ್ಯಂತ 144ಸೆಕ್ಷನ್ ಮುಂದುವರಿಕೆ ಆಗಿದ್ದರೂ ಮಂಗಳೂರು ನಗರದಲ್ಲಿ ಪೊಲೀಸ್ ತಪಾಸಣೆಯೇ ಇಲ್ಲ. ಇದರಿಂದ ವಾಹನಗಳು, ಅಂಗಡಿ ಮುಂಗಟ್ಟುಗಳು ಯಾರ ಭಯವಿಲ್ಲದೆ ತೆರೆದು ಕೊಂಡಿದ್ದವು. ಜನರೂ ಏನೂ ಆಗಿಲ್ಲವೆಂಬಂತೆ ತಮ್ಮ ದಿನಚರಿಯಲ್ಲಿ ತೊಡಗಿದರು. ನಗರವಾಸಿಗಳಲ್ಲಿ ಆತಂಕ: ಮಂಗಳೂರು ನಗರ ಸೇರಿದಂತೆ ಎಲ್ಲೆಡೆ ಕೋವಿಡ್ ಉತ್ತುಂಗ ಸ್ಥಿತಿಯಲ್ಲಿರುವಾಗಲೇ ಜನರು ಯಾರ ಭಯವಿಲ್ಲದೆ ವರ್ತನೆ ಮಾಡುತ್ತಿರುವುದು ನಗರವಾಸಿಗಳಲ್ಲಿ ಆತಂಕ ಹೆಚ್ಚಿಸಿದೆ. ರಾಜ್ಯ ಸರಕಾರ ಕೂಡಲೇ ಕರ್ಫ್ಯೂ ಆದೇಶ ಮಾಡಬೇಕು ಎಂಬ ಆಗ್ರಹ ವ್ಯಕ್ತವಾಗಿದೆ.
from India & World News in Kannada | VK Polls https://ift.tt/2Pme3Uf
