ಅಹ್ಮದಾಬಾದ್‌: ಪ್ರಸಕ್ತ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಟೂರ್ನಿಯ ಸತತ ಎರಡು ಪಂದ್ಯಗಳಲ್ಲಿ ಮೊಟ್ಟ ಮೊದಲ ಎಸೆತದಲ್ಲಿ ಫೋರ್‌ ಬಾರಿಸಿ ಇನಿಂಗ್ಸ್ ಆರಂಭಿಸುವ ಮೂಲಕ ಡೆಲ್ಲಿ ಕ್ಯಾಪಿಟಲ್ಸ್ ಭಾರತ ತಂಡದ ಮಾಜಿ ಓಪನಿಂಗ್‌ ಬ್ಯಾಟ್ಸ್ಮನ್ ವಿರೇಂದ್ರ ಸೆಹ್ವಾಗ್ ಅವರನ್ನು ನೆನಪಿಸಿದರು. ಸನ್‌ರೈಸರ್ಸ್ ಹೈದರಾಬಾದ್‌ ವಿರುದ್ಧ ಕಳೆದ ಪಂದ್ಯದಲ್ಲಿಯೂ ಪೃಥ್ವಿ ಶಾ ಸತತ ಮೂರು ಬೌಂಡರಿಗಳೊಂದಿಗೆ ತಮ್ಮ ಇನಿಂಗ್ಸ್ ಆರಂಭಿಸಿದ್ದರು. ಆದರೆ, ಗುರುವಾರ ಕೋಲ್ಕತಾ ನೈಟ್‌ ರೈಡರ್ಸ್ ವಿರುದ್ಧದ ಪಂದ್ಯದಲ್ಲಿ ಮೊದಲ ಓವರ್‌ನಲ್ಲಿ ಶಿವಂ ಮಾವಿಗೆ ಆರು ಎಸೆತಗಳಿಗೆ ಸತತ ಆರು ಬೌಂಡರಿಗಳನ್ನು ಸಿಡಿಸುವ ಮೂಲಕ ಒಂದು ಹೆಜ್ಜೆ ಮುಂದೆ ಹೋದರು. ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಇತಿಹಾಸದಲ್ಲಿಯೇ ಅಜಿಂಕ್ಯ ರಹಾನೆ ಬಳಿಕ ಈ ಸಾಧನೆ ಮಾಡಿದ ಎರಡನೇ ಬ್ಯಾಟ್ಸ್ಮನ್ ಎಂಬ ಖ್ಯಾತಿಗೆ ಡೆಲ್ಲಿ ಕ್ಯಾಪಿಟಲ್ಸ್ ಆರಂಭಿಕ ಬ್ಯಾಟ್ಸ್ಮನ್ ಪೃಥ್ವಿ ಶಾ ಭಾಜನರಾದರು. ಇನಿಂಗ್ಸ್ ಉದ್ದಕ್ಕೂ ಅದೇ ಲಯವನ್ನು ಮುಂದುವರಿಸಿದ ಪೃಥ್ವಿ ಶಾ ಕೇವಲ 18 ಎಸೆತಗಳಲ್ಲಿ ಪ್ರಸಕ್ತ ಆವೃತ್ತಿಯ ಅತ್ಯಂತ ವೇಗದ ಅರ್ಧಶತಕ ಪೂರೈಸಿದರು. ಅಂತಿಮವಾಗಿ 41 ಎಸೆತಗಳಲ್ಲಿ 82 ರನ್‌ ಗಳಿಸುವ ಮೂಲಕ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ 7 ವಿಕೆಟ್‌ಗಳ ಗೆಲುವಿನಲ್ಲಿ ಮಹತ್ವದ ಪಾತ್ರವಹಿಸಿದರು ಹಾಗೂ ಮ್ಯಾನ್ ಆಫ್‌ ದಿ ಮ್ಯಾಚ್‌ ಸ್ವೀಕರಿಸಿದರು. ಪೃಥ್ವಿ ಶಾ ಸ್ಪೋಟಕ ಬ್ಯಾಟಿಂಗ್ ಬಗ್ಗೆ ಭಾರತ ತಂಡದ ಮಾಜಿ ಆರಂಭಿಕ ಬ್ಯಾಟ್ಸ್ಮನ್ ವಿರೇಂದ್ರ ಸೆಹ್ವಾಗ್ ಮುಕ್ತಕಂಠದಿಂದ ಗುಣಗಾನ ಮಾಡಿದರು. ನನ್ನ ಕ್ರಿಕೆಟ್ ವೃತ್ತಿ ಜೀವನದಲ್ಲಿ ಓಪನಿಂಗ್‌ ಮಾಡಿದ ಎಲ್ಲಾ ಆರು ಎಸೆತಗಳನ್ನು ಹೊಡೆಯಬೇಕು ಎಂದು ಅಂದುಕೊಳ್ಳುತ್ತಿದ್ದೆ. ಆದರೆ, ಕೋಲ್ಕತಾ ನೈಟ್‌ ರೈಡರ್ಸ್ ವಿರುದ್ಧ ಪೃಥ್ವಿ ಶಾ ಆಡಿದ ರೀತಿ ನಾನು ಆಡಿಲ್ಲ ಎಂದು ಹೇಳಿದರು. "ಒವರ್‌ನ ಆರು ಎಸೆತಗಳನ್ನು ಗ್ಯಾಪ್‌ನಲ್ಲಿ ಆರು ಬೌಂಡರಿ ಹೊಡೆಯುವುದು ಸುಲಭವಲ್ಲ. ನನ್ನ ವೃತ್ತಿ ಜೀವನದಲ್ಲಿ ತುಂಬಾ ಸಲ ಓಪನಿಂಗ್‌ ಮಾಡಿದ್ದೇನೆ ಹಾಗೂ ಓವರ್‌ನ ಎಲ್ಲಾ ಎಸೆತಗಳನ್ನು ಹೊಡೆದಿದ್ದೇನೆ ಆದರೆ, 18 ರಿಂದ 20 ರನ್‌ ಮಾತ್ರ ಗಳಿಸಿದ್ದೇನೆ. ಆರು ಎಸೆತಗಳಿಗೆ ಆರು ಬೌಂಡರಿ ಅಥವಾ ಆರು ಸಿಕ್ಸರ್‌ ಸತತವಾಗಿ ಹೊಡೆದಿಲ್ಲ. ಈ ವಿಷಯದಲ್ಲಿ ಚೆಂಡು ಹಾಗೂ ಬ್ಯಾಟ್‌ ನಡುವೆ ಸಮಯ ಚೆನ್ನಾಗಿ ಇರಬೇಕು ಹಾಗೂ ಗ್ಯಾಪ್‌ಗಳನ್ನು ಪತ್ತೆ ಮಾಡಬೇಕು," ಎಂದು ಸೆಹ್ವಾಗ್ ಕ್ರಿಕ್‌ಬಝ್‌ಗೆ ತಿಳಿಸಿದರು. "ಪೃಥ್ವಿ ಶಾ ಬ್ಯಾಟಿಂಗ್‌ನಲ್ಲಿ ಅದ್ಭುತವಾಗಿದ್ದಾರೆ. ಅವರು ಕ್ರಿಕೆಟ್ ಪಂದ್ಯವನ್ನು ಆಡಲು ಬಂದಂತೆ ನನಗೆ ಕಾಣಿಸಲಿಲ್ಲ ಅಥವಾ 19 ವಯೋಮಿತಿ ತಂಡದ ಸಹ ಆಟಗಾರನಾಗಿದ್ದ ಶಿವಂ ಮಾವಿ ಬೌಲಿಂಗ್‌ ಚೆನ್ನಾಗಿ ತಿಳಿದಿದ್ದ ಕಾರಣ ಅವರಲ್ಲಿ ಅಪಾರವಾದ ವಿಶ್ವಾಸವಿತ್ತು ಎಂದು ಭಾವಿಸುತ್ತೇನೆ. ಆಶಿಸ್‌ ನೆಹ್ರಾಗೆ ಸುಮಾರು ಬಾರಿ ನೆಟ್ಸ್‌ನಲ್ಲಿ ಬ್ಯಾಟಿಂಗ್ ಮಾಡಿದ್ದೇನೆ ಹಾಗೂ ದೇಶಿ ಕ್ರಿಕೆಟ್‌ನಲ್ಲಿ ಆಡಿದ್ದೇನೆ. ಆದರೆ, ಆರು ಎಸೆತಗಳಲ್ಲಿ ಆರು ಬೌಂಡರಿಗಳನ್ನು ಸಿಡಿಸಲು ಸಾಧ್ಯವಾಗಲಿಲ್ಲ. ಅದ್ಭುತವಾದ ಇನಿಂಗ್ಸ್ ಆಡಿದ ಪೃಥ್ವಿ ಶಾಗೆ ಹ್ಯಾಟ್ಸ್ ಆಫ್‌ ಹೇಳಬೇಕು," ಎಂದು ಯುವ ಆಟಗಾರನನ್ನು ವೀರು ಶ್ಲಾಘಿಸಿದರು. ಕಳೆದ ಹಲವು ವರ್ಷಗಳಿಂದ ಏರಿಳಿತಗಳನ್ನು ಕಂಡಿರುವ ಪೃಥ್ವಿ ಶಾ ಶತಕ ಸಿಡಿಸಬೇಕಾಗಿತ್ತು ಎಂಬ ಮಾತನ್ನು ವಿರೇಂದ್ರ ಸೆಹ್ವಾಗ್ ಇದೇ ವೇಳೆ ತಿಳಿಸಿದರು. "ಶತಕ ಸಿಡಿಸಿದ್ದರೆ, ಅವರು ತುಂಬಾ ಉತ್ಸಕರಾಗಿರುತ್ತಿದ್ದರು. ತಮ್ಮ ವೃತ್ತಿ ಜೀವನದ ಕಠಿಣ ಸಮಯದಿಂದ ಈಗಾಗಲೇ ಾವರು ಹೊರ ಬಂದಿದ್ದಾರೆ. ಆದರೆ, ಈಗ ಅವರು ತೋರುತ್ತಿರುವ ಪ್ರದರ್ಶನದಿಂದ ಶತಕಗಳನ್ನು ಸಿಡಿಸಬೇಕು ಹಾಗೂ ಚೇಸಿಂಗ್‌ನಲ್ಲಿ ಅಜೇಯರಾಗಿ ಉಳಿಯಬೇಕು," ಎಂದು ಸೆಹ್ವಾಗ್ ಯುವ ಬ್ಯಾಟ್ಸ್‌ಮನ್‌ಗೆ ಸಲಹೆ ನೀಡಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3nzhl3e
