ಬೆಂಗಳೂರು: ಫೋನ್ ಮೂಲಕ ಐದು ಕೆಜಿ ನೀಡುತ್ತಿದ್ದ ಉಚಿತ ಅಕ್ಕಿಯನ್ನು ಕಡಿತಗೊಳಿಸಿದ್ದಕ್ಕೆ ಪ್ರಶ್ನೆ ಮಾಡಿದ್ದ ರೈತರೊಬ್ಬರಿಗೆ ನೀವು ಸಾಯುವುದೇ ಒಳ್ಳೆಯದು ಎಂದಿದ್ದ ಆಹಾರ ಸಚಿವ ವಿರುದ್ಧ ರಾಜ್ಯ ಯುವ ಕಾಂಗ್ರೆಸ್‌ ಅಧ್ಯಕ್ಷ ಕಿಡಿಕಾರಿದ್ದಾರೆ. ಈ ಕುರಿತು ತಮ್ಮ ಅಧಿಕೃತ ಟ್ವಿಟ್ಟರ್‌ ಖಾತೆಯಲ್ಲಿ ಉಮೇಶ್ ಕತ್ತಿ ವಿರುದ್ಧ ಟ್ವೀಟ್‌ ಮಾಡಿರುವ ರಕ್ಷಾ ರಾಮಯ್ಯ, ‘ಉಮೇಶ್ ಕತ್ತಿಯವರೇ, ನಾಲಿಗೆ ಇದೆ ಎಂದು ಹರಿಬಿಡಬೇಡಿ. ನೀವು ಮನುಷ್ಯ ರೂಪದಲ್ಲಿದ್ದೀರಿ ಹೊರತು ಮನುಷ್ಯರಾಗಿ ಬದುಕುತ್ತಿಲ್ಲ. ನೀವು ಬಿಜೆಪಿಯವರಲ್ಲವೆ ಅನ್ನವನ್ನು ಬಿಟ್ಟು ಬೇರೆ ಏನಾದರೂ ತಿನ್ನುತ್ತಿರಬೇಕು, ಅದಕ್ಕೆ ಅನ್ನದ ಬೆಲೆ ತಿಳಿದಿಲ್ಲ ಎನಿಸುತ್ತಿದೆ. ಬಡವರ್ಯಾಕೆ ಸಾಯಬೇಕು ? ಬಡವರ ರಕ್ತ ಹೀರುವ ತಿಗಣೆಗಳು ಸಾಯಬೇಕು.’ ಎಂದು ಕಟುವಾಗಿ ಟೀಕಿಸಿದ್ದಾರೆ. ಆಹಾರ ಸಚಿವ ಉಮೇಶ್ ಕತ್ತಿಗೆ ರೈತರೊಬ್ಬರು ಫೋನ್ ಕರೆ ಮಾಡಿ ಐದು ಕೆಜಿ ನೀಡುತ್ತಿದ್ದ ಉಚಿತ ಅಕ್ಕಿಯನ್ನು ಕಡಿತಗೊಳಿಸಿದ್ದಕ್ಕೆ ಪ್ರಶ್ನೆ ಮಾಡಿದ್ದರು. ಲಾಕ್‌ಡೌನ್ ದುಡಿಮೆ ಇಲ್ಲ ಇಂತಹ ಸಂದರ್ಭದಲ್ಲಿ ಅಕ್ಕಿ ಕೊಡುವುದನ್ನು ಕಡಿತ ಮಾಡಿದರೆ ನಾವು ಬದುಕಬೇಕಾ ಸತ್ತು ಹೋಗಬೇಕಾ ಎಂದು ಪ್ರಶ್ನಿಸಿದ್ದರು. ಈ ಸಂದರ್ಭದಲ್ಲಿ ಇದಕ್ಕೆ ಉತ್ತರಿಸಿದ್ದ ಸಚಿವ ಉಮೇಶ್ ಕತ್ತಿ ಸತ್ತು ಹೋಗುವುದೇ ಒಳ್ಳೆಯದು ಎಂದಿದ್ದರು. ಉಮೇಶ್ ಕತ್ತಿ ನೀಡಿದ್ದ ಈ ಹೇಳಿಕೆ ರಾಜ್ಯಾದ್ಯಂತ ಭಾರೀ ಮಟ್ಟದಲ್ಲಿ ಚರ್ಚೆಯಾಗಿತ್ತು. ಅಲ್ಲದೇ ಕತ್ತಿ ವಿರುದ್ಧ ಜನಾಕ್ರೋಶವೂ ವ್ಯಕ್ತವಾಗಿತ್ತು. ತಮ್ಮ ಹೇಳಿಕೆ ವಿವಾದವಾಗುತ್ತಿದ್ದಂತೆ ಬಳಿಕ ಉಮೇಶ್ ಕತ್ತಿ ವಿಷಾದವನ್ನೂ ವ್ಯಕ್ತಪಡಿಸಿದ್ದರು.
from India & World News in Kannada | VK Polls https://ift.tt/330aJRT
