ಪ್ರಮೋದ ಹರಿಕಾಂತ : ಕೋವಿಡ್‌ ಎರಡನೇ ಅಲೆ ತಡೆಯಲು ರಾಜ್ಯ ಸರಕಾರ ಹೇರಿರುವ 14 ದಿನಗಳ ಕಠಿಣ ಕರ್ಫ್ಯೂದಿಂದ ಆರಂಭವಾಗಿರುವ ಮರು ವಲಸೆಯನ್ನು ಸರಿಯಾಗಿ ನಿರ್ವಹಣೆ ಮಾಡದೆ ಇದ್ದರೆ ಬೆಂಗಳೂರಿನ ಪರಿಸ್ಥಿತಿಯನ್ನು ಉಳಿದ ಜಿಲ್ಲೆಗಳಲ್ಲಿಯೂ ಎದುರಿಸುವ ಅಪಾಯ ಇದೆ. ಬೆಂಗಳೂರು ನಗರ ಈಗಾಗಲೇ ಕೋವಿಡ್‌ ಪ್ರಕರಣಗಳಿಂದ ಸ್ಮಶಾನವಾಗುತ್ತಿದೆ. ಈ ಭೀತಿಯ ಜತೆಗೆ ಕಠಿಣ ಕರ್ಫ್ಯೂ ಹೇರಿಕೆಯಿಂದ ಜನರು ಮತ್ತೆ ಬೆಂಗಳೂರು ಬಿಟ್ಟು ತವರು ಜಿಲ್ಲೆಗಳತ್ತ ಪ್ರಯಾಣ ಬೆಳೆಸಿದ್ದಾರೆ. ಈ ವಲಸೆಯಿಂದ ಸಹಜವಾಗಿಯೇ ಗ್ರಾಮೀಣ ಭಾಗದಲ್ಲಿ ವಿಸ್ತರಣೆಯಾಗುವ ಅಪಾಯ ಹೆಚ್ಚಾಗಿದೆ. ಹೀಗೆ ವಲಸೆ ಬಂದವರಿಗೆ ಕಳೆದ ವರ್ಷದಂತೆ ಕ್ವಾರಂಟೈನ್‌ ಬೇಕೆ ಅಥವಾ ಕ್ವಾರಂಟೈನ್‌ ಯಾವ ರೀತಿ ಇರಬೇಕು ಎನ್ನುವ ಮಾರ್ಗಸೂಚಿಯನ್ನೂ ಸರಕಾರ ತಿಳಿಸಿಲ್ಲ. ಕೋವಿಡ್‌ ಎರಡನೇ ಅಲೆಯಲ್ಲಿ ಸೋಂಕು ಬಹುಪಾಲು ಕುಟುಂಬವನ್ನೇ ಆವರಿಸಿಕೊಳ್ಳುತ್ತಿದೆ. ಆರ್‌ಟಿಪಿಸಿಆರ್‌ನಲ್ಲಿ ಕೋವಿಡ್‌ ನೆಗೆಟಿವ್‌ ವರದಿ ಬಂದರೂ ಕೆಲ ದಿನಗಳ ಬಳಿಕ ಉಸಿರಾಟ ಸಮಸ್ಯೆ ಎದುರಿಸುತ್ತಿರುವ ಕೇಸ್‌ ಕೂಡ ಪತ್ತೆಯಾಗುತ್ತಿವೆ. ಇಂಥ ಸ್ಥಿತಿಯಲ್ಲಿ ಹೋಮ್‌ ಐಸೋಲೇಶನ್‌ ಬಯಸುವವರು ಮನೆಯಲ್ಲಿ ಯಾವ ರೀತಿ ಆರೈಕೆ ಮಾಡಿಕೊಳ್ಳಬೇಕು ಎನ್ನುವ ತಿಳಿವಳಿಕೆ ಕೂಡ ಹೇಳುವವರಿಲ್ಲ. ಕೊರೊನಾ ಎರಡನೇ ಅಲೆಯ ಮೊದಲ ಹೊಡೆತಕ್ಕೆ ಒಳಗಾದ ಮಹಾರಾಷ್ಟ್ರದಲ್ಲಿ ಲಾಕ್‌ಡೌನ್‌ ಹೇರಿದಾಗ ಇದೇ ರೀತಿ ವಲಸೆ ಶುರುವಾಗಿತ್ತು. ಆದರೆ, ಅಲ್ಲಿನ ಸರಕಾರ ಕೈಗಾರಿಕೆಗಳನ್ನು ನಡೆಸಲು ಅವಕಾಶ ಕೊಟ್ಟಿದ್ದರಿಂದ ಒಂದಷ್ಟು ಕಾರ್ಮಿಕರು ಸ್ಥಳ ಬಿಡಲಿಲ್ಲ. ಉತ್ತರ ಪ್ರದೇಶ, ಬಿಹಾರ, ಪಶ್ಚಿಮ ಬಂಗಾಳದ ಕಾರ್ಮಿಕರು ತಮ್ಮ ರಾಜ್ಯದ ಕೋವಿಡ್‌ ಸೋಂಕಿತರ ಸಾವಿನ ಪರಿಸ್ಥಿತಿಗೆ ಹೆದರಿ ಮಹಾರಾಷ್ಟ್ರದಲ್ಲಿಯೇ ಉಳಿದುಕೊಂಡರು. ಕೊಲ್ಲಾಪುರ ಜಿಲ್ಲೆಯೊಂದರಲ್ಲಿಯೇ ಸುಮಾರು 30 ಸಾವಿರ ವಲಸೆ ಕಾರ್ಮಿಕರು ಲಾಕ್‌ಡೌನ್‌ನಲ್ಲಿಯೂ ಉಳಿದುಕೊಂಡಿದ್ದಾರೆ. ಇನ್ನೊಂದೆಡೆ ಮುಂಬಯಿನಲ್ಲಿ ಕೊರೊನಾ ನಿಯಂತ್ರಣ ವ್ಯಾಕ್ಸಿನ್‌ ವಿತರಣೆ ಹೆಚ್ಚಿನ ಪ್ರಮಾಣದಲ್ಲಿ ಮಾಡಿದ್ದರಿಂದ ಮುಂಬಯಿಯಲ್ಲಿ ಕೊರೊನಾ ಸೋಂಕಿತರ ಸಾವಿನ ಪ್ರಮಾಣ ಗಣನೀಯವಾಗಿ ಕಡಿಮೆ ಆಗಿದೆ. ಮುಂಬಯಿನಲ್ಲಿ ಕಳೆದ 76 ದಿನಗಳಲ್ಲಿ ಕೋವಿಡ್‌ ಸೋಂಕಿತರ ಸಾವಿನ ಪ್ರಮಾಣ ಶೇ. 0.4ಕ್ಕೆ ಇಳಿದಿದೆ. ಇದು ಜಗತ್ತಿನಲ್ಲಿಯೇ ಅತಿ ಕಡಿಮೆ ಸಾವಿನ ಪ್ರಮಾಣ ಎಂದು ಮುಂಬಯಿ ಮಹಾನಗರ ಪಾಲಿಕೆ ಹೇಳಿಕೊಂಡಿದೆ. ಆದರೆ, ರಾಜ್ಯದ ಒಟ್ಟಾರೆ ಕೋವಿಡ್‌ ಪಾಸಿಟಿವ್‌ ವರದಿಯಲ್ಲಿ ವ್ಯತ್ಯಾಸ ಆಗಿಲ್ಲ. ಮಹಾರಾಷ್ಟ್ರದಲ್ಲಿ ಏ.1 ರಂದು 43,183 ಪಾಸಿಟಿವ್‌ ಕೇಸ್‌ ಪತ್ತೆಯಾಗಿತ್ತು. ಏ.25ರ ವರದಿ ಪ್ರಕಾರ 66,191 ಪಾಸಿಟಿವ್‌ ದೃಢಪಟ್ಟಿದೆ. ತಪಾಸಣೆ ಹೆಚ್ಚಾಗಿದ್ದರಿಂದಲೂ ಪಾಸಿಟಿವ್‌ ಹೆಚ್ಚು ಪತ್ತೆಯಾಗುತ್ತಿದೆ. ಕ್ವಾರಂಟೈನ್‌ ಆದವರ ಹೊಟ್ಟೆ ಪಾಡೇನು?: ರಾಜ್ಯದಲ್ಲಿ ಏ.26ರ ವರದಿ ಪ್ರಕಾರ 2.81 ಲಕ್ಷ ಕೋವಿಡ್‌ ಸಕ್ರಿಯ ಪ್ರಕರಣಗಳು ಇವೆ. ಅದರಲ್ಲಿ ಬೆಂಗಳೂರು ಹೊರತುಪಡಿಸಿ ಉಳಿದ ಜಿಲ್ಲೆಗಳಲ್ಲಿ ಮುಕ್ಕಾಲು ಭಾಗದಷ್ಟು ಸೋಂಕಿತರು ಹೋಮ್‌ ಐಸೋಲೇಟ್‌ ಆಗಿದ್ದಾರೆ. ಮರು ವಲಸೆ ಆದವರೂ ಕುಟುಂಬದವರೊಂದಿಗೆ ಬೆರೆಯುವ ಮೊದಲು ಕ್ವಾರಂಟೈನ್‌ ಆಗಲು ಬಯಸುವವರಿದ್ದಾರೆ. ಅಲ್ಲದೆ, ಕೋವಿಡ್‌ ಎರಡನೇ ಅಲೆಯಲ್ಲಿ ವ್ಯಕ್ತಿಗಿಂತ ಪೂರ್ತಿ ಕುಟುಂಬಗಳೇ ಸೋಂಕಿಗೆ ಒಳಗಾಗುತ್ತಿವೆ. ಅಂಥ ಕುಟುಂಬಗಳಿಗೆ ಕ್ವಾರಂಟೈನ್‌ ಅವಧಿಯಲ್ಲಿ ಆಹಾರ ಧಾನ್ಯ ಪೂರೈಸುವ ವ್ಯವಸ್ಥೆಯೇ ಇಲ್ಲ. ಮನೆಯಿಂದ ಹೊರ ಬಂದರೆ ಕ್ವಾರಂಟೈನ್‌ ಉಲ್ಲಂಘನೆ ಆಗುತ್ತದೆ. ಮನೆಯೊಳಗೇ ಇದ್ದರೆ ಹಣ ಇದ್ದರೂ ಹೊಟ್ಟೆ ತುಂಬುವುದಿಲ್ಲ. ಹಾಗಾಗಿ ಲಾಕ್‌ಡೌನ್‌ ಹೇರಿದ್ದರೂ ಸೋಂಕಿತರು ಅನಿವಾರ್ಯವಾಗಿ ಜನರೊಂದಿಗೆ ಬೆರೆತು ಅಗತ್ಯ ವಸ್ತುಗಳ ಖರೀದಿಗೆ ಹೋಗಲೇ ಬೇಕಾಗುತ್ತದೆ. ಈ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳದೆ ಇದ್ದರೆ, ಕೋವಿಡ್‌ ಸಂಪರ್ಕ ಕಡಿತ ಮಾಡುವ ಉದ್ದೇಶವೇ ವ್ಯರ್ಥವಾಗಲಿದೆ ಎನ್ನುವ ಅಭಿಪ್ರಾಯ ಇದೆ. ಜಿಲ್ಲೆಗಳು ಸನ್ನದ್ದವಾಗಲಿ: ಎಲ್ಲ ರೀತಿಯ ವೈದ್ಯಕೀಯ ಸೌಲಭ್ಯಗಳು ಇದ್ದಾಗಲೂ ಬೆಂಗಳೂರು ಕೋವಿಡ್‌ ಎರಡನೇ ಅಲೆಗೆ ನಲಗುತ್ತಿದೆ. ಇತರ ಜಿಲ್ಲೆಗಳಲ್ಲಿಯೂ ಸೋಂಕಿನ ಪ್ರಕರಣ ಹೆಚ್ಚಾಗುತ್ತಲೇ ಇದೆ. ಇದುವರೆಗೆ ಜಿಲ್ಲೆಗಳಲ್ಲಿ ಆಸ್ಪತ್ರೆಗಳ ಬೆಡ್‌ ಎಲ್ಲೆಲ್ಲಿ ಖಾಲಿ ಇದೆ ಎಂದು ತಿಳಿದುಕೊಳ್ಳುವ ಸಮರ್ಪಕ ಡಿಜಿಟಲ್‌ ವ್ಯವಸ್ಥೆಗಳೇ ಇಲ್ಲ. ಸಹಾಯವಾಣಿಯನ್ನೇ ನಂಬಿ ಕೆಲಸ ಮಾಡಲಾಗುತ್ತಿದೆ. ಕರೆಗಳು ದಟ್ಟವಾದರೆ ಸಹಾಯವಾಣಿ ಉಪಯೋಗಕ್ಕೆ ಬರುವುದಿಲ್ಲ ಎನ್ನುವುದು ಈಗಾಗಲೇ ಸಾಬೀತಾಗಿದೆ. ವಲಸೆಯಿಂದ ಸೋಂಕು ಹೆಚ್ಚಾದರೆ, ನಿರ್ವಹಣೆಗೆ ಬೇಕಾದ ವ್ಯವಸ್ಥೆಗೆ ಜಿಲ್ಲಾಡಳಿತಗಳು ಈಗಲೇ ಸಿದ್ಧವಾಗಬೇಕು ಎಂದು ಜಿಲ್ಲಾಸ್ಪತ್ರೆ ವೈದ್ಯರೊಬ್ಬರು ತಿಳಿಸಿದರು.
from India & World News in Kannada | VK Polls https://ift.tt/3xuRJJg
