ಪ್ರಮೋದ ಹರಿಕಾಂತ : ಮಾರುಕಟ್ಟೆಯಲ್ಲಿ ಕೃಷಿ ಉತ್ಪನ್ನಗಳಿಗೆ ಭರ್ಜರಿ ಬೇಡಿಕೆ ಇದ್ದಾಗ ನದಿ ಬರಿದಾಗಿ ಬೆಳೆಯಲು ನೀರೇ ಇರಲಿಲ್ಲ. ಈಗ ಬೆಳೆ ಬೆಳೆಯಲು ನದಿಯಲ್ಲಿ ನೀರಿದೆ ಆದರೆ, ಮಾರುಕಟ್ಟೆಯೇ ಇಲ್ಲ! ಇದು ಉತ್ತರ ಕರ್ನಾಟಕದ ರೈತರ ಗೋಳು. ಗೋವಾ, ಮಹಾರಾಷ್ಟ್ರ ನಂಬಿದ್ದ ಬೆಳಗಾವಿ ಭಾಗದ ರೈತರ ಪಾಡಂತೂ ಹೇಳತೀರದು. ಗ್ರಾಹಕರನ್ನು ಕಂಡರೆ ಭಗವಂತನೇ ಎದುರು ಬಂದಂಥ ಆಶಾ ಭಾವನೆಯಿಂದ ನೋಡುವಂತಿದೆ. ರಾಜ್ಯದಲ್ಲಿ 2018ಕ್ಕಿಂತ ಹಿಂದಿನ ನಾಲ್ಕು ವರ್ಷಗಳು ಸತತ ಬರಗಾಲ ಎದುರಾಗಿತ್ತು. ಬೆಳಗಾವಿಯಲ್ಲಿ 2018ರವರೆಗೆ ಪ್ರತೀ ವರ್ಷವೂ ಕೃಷ್ಣಾ ನದಿ ಬತ್ತಿ ಬೆಳೆಗಳಿಗೆ ನೀರಿಲ್ಲದೆ ರೈತರು ಪರದಾಡುತ್ತಿದ್ದರು. ಕಾಂಗ್ರೆಸ್‌ ಸರಕಾರ ಅಧಿಕಾರದಲ್ಲಿದ್ದ ಆ ಸಂದರ್ಭದಲ್ಲಿ ಬೆಳಗಾವಿಯಲ್ಲಿ ಪ್ರತೀ ವರ್ಷವೂ ಬೇಸಿಗೆ ಕಾಲದಲ್ಲಿ ಗೋ ಶಾಲೆ, ಮೇವು ಬ್ಯಾಂಕ್‌, ಟ್ಯಾಂಕರ್‌ ನೀರು ಇಂಥ ಪರಿಹಾರ ಕ್ರಮಗಳ ಮಾತುಗಳೇ ಹೆಚ್ಚಾಗಿದ್ದವು. ಆ ಅವಧಿಯಲ್ಲಿ ರಾಜ್ಯ ಸರಕಾರ ಪ್ರತೀ ವರ್ಷ ಮಹಾರಾಷ್ಟ್ರ ರಾಜ್ಯಕ್ಕೆ ಕೋಟ್ಯಂತರ ರೂ. ಹಣ ನೀಡಿ ಕೃಷ್ಣಾ ನದಿಗೆ ಹಂತ ಹಂತವಾಗಿ ನಾಲ್ಕು ಟಿಎಂಸಿವರೆಗೆ ನೀರು ಬಿಡಿಸಿಕೊಳ್ಳುತ್ತಿತ್ತು. ಆ ನೀರಿನಿಂದ ಕೃಷಿ ಚಟುವಟಿಕೆ ಮಾಡುವುದಿರಲಿ ಕುಡಿಯುವುದಕ್ಕೆ ಬಳಸಿಕೊಳ್ಳುವುದೇ ಮುಖ್ಯ ಉದ್ದೇಶವಾಗುತ್ತಿದ್ದವು. ಹಾಗಾಗಿ ಹಿಂಗಾರು ಹಂಗಾಮು ಬಹುತೇಕ ಬೆಳೆ ಹಾನಿಯಲ್ಲಿಯೇ ಕೊನೆಯಾಗುತ್ತಿದ್ದವು. ಅದಾದ ಬಳಿಕ 2019ರಲ್ಲಿ ಕೃಷ್ಣಾ ನದಿ ಸೇರಿದಂತೆ ವೇದಗಂಗಾ, ದೂದ್‌ಗಂಗಾ, ಮಾರ್ಕಂಡೇಯ ಸೇರಿ ಜಿಲ್ಲೆಯ ಎಲ್ಲ ನದಿಗಳು ಉಕ್ಕಿ ಹರಿದವು. ದೊಡ್ಡ ಪ್ರವಾಹವೇ ಬಂದು ಹೋಗಿತ್ತು. ಮುಂಗಾರು ಬೆಳೆಗಳು ಸರ್ವನಾಶ ಆಗಿ ರೈತರು ಈಗಲೂ ಅದರ ಆಘಾತ ಅನುಭವಿಸುತ್ತಿದ್ದಾರೆ. 2019ರಿಂದ ಕೃಷ್ಣಾ ನದಿಯಲ್ಲಿ ಬಹುತೇಕ ಬೇಸಿಗೆ ಅಂತ್ಯದವರೆಗೂ ನೀರು ಹರಿಯುತ್ತಿದೆ. ಮುಂಗಾರು, ಹಿಂಗಾರು ಬೆಳೆಗೆ ಉತ್ತಮ ನೀರು ಸಿಗುತ್ತಿದೆ. ಬೆಳೆಗಳು ಚೆನ್ನಾಗಿ ಬರುತ್ತಿವೆ. ಆದರೆ, ಕಳೆದ ವರ್ಷ ಬೆಳೆ ಚೆನ್ನಾಗಿ ಬಂದರೂ ಕೊರೊನಾ ಮತ್ತು ಲಾಕ್‌ಡೌನ್‌ನಿಂದ ಮಾರುಕಟ್ಟೆ ಸಿಗದೆ ರೈತರು ಮತ್ತೆ ನಷ್ಟ ಅನುಭವಿಸಿದರು. ಕಬ್ಬು ಬೆಳೆಗಾರರು ಕೂಡ ಕಟಾವು ಸಂದರ್ಭದಲ್ಲಿ ಸಮಸ್ಯೆ ಅನುಭವಿಸಿದ್ದಾರೆ. ಈ ವರ್ಷವೂ ಕೃಷ್ಣಾ ನದಿಯಲ್ಲಿ ನೀರು ಚೆನ್ನಾಗಿದೆ. ಆದರೆ, ಕೊರೊನಾದಿಂದ ಮತ್ತೆ ಬೆಲೆ ಕಳೆದುಕೊಳ್ಳುವ ಆತಂಕ ರೈತರಲ್ಲಿ ಮೂಡಿದೆ. ದೊಡ್ಡ ಮಾರುಕಟ್ಟೆಗಳು ಬಂದ್‌: ಬೆಳಗಾವಿ, ಚಿಕ್ಕೋಡಿ ಭಾಗದಲ್ಲಿ ನೂರಾರು ರೈತರು ಪಪ್ಪಾಯ ಬೆಳೆಯುತ್ತಾರೆ. ದ್ರಾಕ್ಷಿಯನ್ನೂ ಹೆಚ್ಚಾಗಿ ಬೆಳೆಯಲಾಗುತ್ತದೆ. ಎರಡೂ ಬೆಳೆಗೆ ಮಹಾರಾಷ್ಟ್ರ ಮತ್ತು ಗೋವಾ ರಾಜ್ಯದಲ್ಲಿ ಬೇಡಿಕೆ ಇದೆ. ತರಕಾರಿಯೂ ದೊಡ್ಡ ಮಟ್ಟದಲ್ಲಿ ಪೂರೈಕೆಯಾಗುತ್ತದೆ. ಕೊರೊನಾದಿಂದ ಮಹಾರಾಷ್ಟ್ರದ ಮುಂಬಯಿ ಸೇರಿದಂತೆ ಅಲ್ಲಿನ ಎಲ್ಲ ಮಾರುಕಟ್ಟೆಗಳು ಬಹುತೇಕ ಬಂದ್‌ ಆಗಿದೆ. ಸದ್ಯ ಗೋವಾವೊಂದೇ ಉಳಿದಿದೆ. ಪಪ್ಪಾಯ, ದ್ರಾಕ್ಷಿಗೆ ರಾಜ್ಯದಲ್ಲಿ ದೊಡ್ಡ ಮಾರುಕಟ್ಟೆ ಇಲ್ಲದೆ ಇರುವುದರಿಂದ ನಷ್ಟದ ಭೀತಿ ರೈತರನ್ನು ಕಾಡುತ್ತಿದೆ. 'ಕೊರೊನಾಗಿಂತ ಮೊದಲು ಕೃಷಿ ಉತ್ಪನ್ನಗಳಿಗೆ ಬೆಲೆ ಇತ್ತು. ಆದರೆ, ಬೆಳೆ ಬೆಳೆಯಲು ನೀರು ಇರಲಿಲ್ಲ. ಈಗ ನದಿಯಲ್ಲಿ ನೀರು ಚೆನ್ನಾಗಿದೆ. ಬೆಳೆಯೂ ಉತ್ತಮವಾಗಿದೆ. ಬೆಳೆ ಖರೀದಿಸುವವರೇ ಇಲ್ಲ. ಪಪ್ಪಾಯ ಮಹಾರಾಷ್ಟ್ರಕ್ಕೆ ಹೋಗುತ್ತಿದ್ದವು. ಈಗ ನಿಂತು ಹೋಗಿದೆ. ಬೆಳೆ ಕಟಾವು ಮಾಡುವುದಕ್ಕೂ ಅಂದಾಜು ಸಿಗುತ್ತಿಲ್ಲ' ಎನ್ನುತ್ತಾರೆ, ಭರಮನಾಥ ಬೊರಗಾವೆ
from India & World News in Kannada | VK Polls https://ift.tt/3gAK869
