ಅಹ್ಮದಾಬಾದ್‌: ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಕೇವಲ 42 ಎಸೆತಗಳಿಗೆ ಅಜೇಯ 75 ರನ್ ಸಿಡಿಸಿದ ಎಬಿ ಡಿವಿಲಿಯರ್ಸ್ ತಂಡದ ಒಂದು ರನ್ ರೋಚಕ ಗೆಲುವಿನಲ್ಲಿ ಮಹತ್ತರ ಪಾತ್ರವಹಿಸಿದ್ದಾರೆ. ಆ ಮೂಲಕ ಆರ್‌ಸಿಬಿ ಅಭಿಮಾನಿಗಳ ಆರಾಧ್ಯ ದೈವರಾದ ಎಬಿಡಿ ಪಂದ್ಯ ಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು. ಪಂದ್ಯದ ಬಳಿಕ ಅವರನ್ನು ಇಂದಿನ ಈ ಇನಿಂಗ್ಸ್‌ನಲ್ಲಿ ನಿಮ್ಮ ನೆಚ್ಚಿನ ಶಾಟ್‌ ಯಾವುದು ಎಂದು ಕೇಳಲಾಯಿತು. ಇದಕ್ಕೆ ಉತ್ತರಿಸಿದ ಅವರು ತಮ್ಮದೇ ದೇಶದವರಾದ ಕಗಿಸೊ ರಬಾಡ ಅವರಿಗೆ ಡೀಪ್‌ ಮಿಡ್‌ವಿಕೆಟ್‌ನಲ್ಲಿ ಸಿಡಿಸಿದ ಸಿಕ್ಸರ್‌ ನನ್ನ ಫೇವರಿಟ್‌. ಈ ಶಾಟ್‌ ನನಗೆ ಇನಿಂಗ್ಸ್‌ನಲ್ಲಿ ವಿಶ್ವಾಸವನ್ನು ಹೆಚ್ಚಿಸಿತು ಎಂದು ತಿಳಿಸಿದರು. ರಾಯಲ್‌ ಚಾಲೆಂಜರ್ಸ್ ಬೆಂಗಳೂರು ತಂಡದ ಅತ್ಯಂತ ಮೌಲ್ಯಯುತ ಬ್ಯಾಟ್ಸ್ಮನ್ ಹಾಗೂ ನಂಬಿಕಸ್ಥ ಆಟಗಾರ ಎಬಿ ಡಿವಿಲಿಯರ್ಸ್ ಐಪಿಎಲ್‌ ಟೂರ್ನಿಯಲ್ಲಿ 25ನೇ ಪಂದ್ಯ ಶ್ರೇಷ್ಠ ಪ್ರಶಸ್ತಿಗೆ ಭಾಜನರಾಗಿದ್ದು ವಿಶೇಷವಾಗಿತ್ತು. ಆ ಮೂಲಕ ಐಪಿಎಲ್‌ ಟೂರ್ನಿಯಲ್ಲಿ ಅತಿ ಹೆಚ್ಚು ಬಾರಿ 'ಮ್ಯಾನ್‌ ಆಫ್ ದಿನ ಮ್ಯಾಚ್‌' ಗೆದ್ದ ಮೊದಲ ಬ್ಯಾಟ್ಸ್ಮನ್ ಎಂಬ ದಾಖಲೆಯನ್ನು ಡಿವಿಲಿಯರ್ಸ್ ಮಾಡಿದರು. ಎಬಿ ಡಿವಿಲಿಯರ್ಸ್ ಅವರ ವಿಶೇಷ ಬ್ಯಾಟಿಂಗ್‌ ನೆರವಿನಿಂದ ರಾಯಲ್‌ ಚಾಲೆಂಜರ್ಸ್ ಬೆಂಗಳೂರು ತನ್ನ ಪಾಲಿನ 20 ಓವರ್‌ಗಳಿಗೆ 171 ರನ್ ಗಳಿಸಲು ಸಾಧ್ಯವಾಗಿತ್ತು. ಅಲ್ಲದೆ, ಎಬಿ ಡಿವಿಲಿಯರ್ಸ್ ಇದೇ ಇನಿಂಗ್ಸ್‌ನಲ್ಲಿ ಐಪಿಎಲ್‌ 5,000 ರನ್‌ಗಳನ್ನು ಪೂರೈಸಿದರು. ಆ ಮೂಲಕ ಶ್ರೀಮಂತ ಫ್ರಾಂಚೈಸಿ ಲೀಗ್‌ನಲ್ಲಿ ಈ ಸಾಧನೆ ಮಾಡಿದ ಎರಡನೇ ಬ್ಯಾಟ್ಸ್ಮನ್ ಎಂಬ ಕೀರ್ತಿಗೆ ಎಬಿಡಿ ಭಾಜನರಾದರು. ಪಂದ್ಯದ ಬಳಿಕ ಪೋಸ್ಟ್‌ ಮ್ಯಾಚ್‌ ಪ್ರಸೆಂಟೇಷನ್‌ನಲ್ಲಿ ಮಾತನಾಡಿದ ಎಬಿಡಿ, "ಮಾರ್ಕಸ್‌ ಸ್ಟೋಯ್ನಿಸ್‌ ಅವರ ಬೌಲಿಂಗ್‌ನಲ್ಲಿ ಎಕ್ಸ್‌ಟ್ರಾ ಕವರ್ಸ್‌ನಲ್ಲಿ ಹೊಡೆದ ಶಾಟ್‌ ನನ್ನ ಅತ್ಯುತ್ತಮ ಹೊಡೆತಗಳಲ್ಲಿ ಒಂದಾಗಿದೆ. ಜೊತೆಗೆ ನಮ್ಮ ದೇಶದವರಾದ ಕಗಿಸೊ ರಬಾಡ ಅವರಿಗೆ ಡೀಪ್‌ ಮಿಡ್‌ವಿಕೆಟ್‌ನಲ್ಲಿ ಸಿಡಿಸಿದ ಸಿಕ್ಸರ್‌ ನನ್ನ ನೆಚ್ಚಿನ ಶಾಟ್‌ ಆಗಿದೆ," ಎಂದರು. ಕಳೆದ ಮೂರು ವರ್ಷಗಳ ಹಿಂದೆ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ವಿದಾಯ ಹೇಳಿದ್ದ ಎಬಿ ಡಿವಿಲಿಯರ್ಸ್, ರಾಯಲ್‌ ಚಾಲೆಂಜರ್ಸ್ ಬೆಂಗಳೂರು ತಂಡದಲ್ಲಿ ಬ್ಯಾಟ್ಸ್ಮನ್ ಹಾಗೂ ವಿಕೆಟ್‌ ಕೀಪರ್‌ ಆಗಿ ಎರಡು ಜವಾಬ್ದಾರಿಗಳನ್ನು ಅಚ್ಚುಕಟ್ಟಾಗಿ ನಿರ್ವಹಿಸುತ್ತಿದ್ದಾರೆ. ಅಲ್ಲದೆ, ಸ್ಟಂಪ್‌ಗಳ ಹಿಂದೆ ನನ್ನನ್ನು ಹೆಚ್ಚು ಮಾತನಾಡುವ ಹಾಗೆ ಮಾಡಿದ್ದು ಯುಜ್ವೇಂದ್ರ ಚಹಲ್‌ ಎಂದು ಮಿಸ್ಟರ್‌ 360 ಡಿಗ್ರಿ ಖ್ಯಾತಿಯ ಆಟಗಾರ ಹೇಳಿಕೊಂಡಿದ್ದಾರೆ. "ಸ್ಟಂಪ್‌ಗಳ ಹಿಂದೆ ಹೆಚ್ಚಾಗಿ ಮಾತನಾಡಲು ನನ್ನನ್ನು ನಾನು ಹೆಚ್ಚು ಪ್ರೇರೇಪಿಸುತ್ತಿದ್ದೆ. ಇದನ್ನು ಸಕಾರವಾಗಿಸುವಲ್ಲಿ ನೆರವಾದ ಯುಜ್ವೇಂದ್ರ ಚಹಲ್‌ಗೆ ಧನ್ಯವಾದ ಹೇಳಲು ಬಯಸುತ್ತೇನೆ," ಎಂದು ಹೇಳಿದರು. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಆಡದೇ ಇದ್ದರೂ ಎಬಿ ಡಿವಿಲಿಯರ್ಸ್ ಫ್ರಾಂಚೈಸಿ ಕ್ರಿಕೆಟ್‌ನಲ್ಲಿ ಅತ್ಯುತ್ತಮ ಬ್ಯಾಟ್ಸ್ಮನ್ ಈವರೆಗೂ ಉಳಿದಿದ್ದಾರೆ. ಈ ಆವೃತ್ತಿಯಲ್ಲಿ ಆರ್‌ಸಿಬಿ ಪರ ಅತ್ಯುತ್ತಮ ಪ್ರದರ್ಶನ ತೋರಲು ಫಿಟ್ನೆಸ್‌ ಹೆಚ್ಚಿನ ನೆರವಾಗಿದೆ ಎಂದು ಎಬಿಡಿ ತಿಳಿಸಿದ್ದಾರೆ. "ತಾಜಾತನದೊಂದಿಗೆ ಪ್ರತಿಯೊಂದು ಪಂದ್ಯವನ್ನು ಆಡುವುದು ತುಂಬಾ ಮುಖ್ಯ. ಈ ಬಗ್ಗೆ ನಾನು ಮನೆಯಲ್ಲಿ ತುಂಬಾ ಕೆಲಸ ಮಾಡಿದ್ದೇನೆ ಹಾಗೂ ಹೋಟೆಲ್‌ ರೂಂ ಕ್ವಾರಂಟೈನ್‌ನಲ್ಲಿಯೂ ಇದರ ಬಗ್ಗೆ ಹೆಚ್ಚಿನ ಕಾಳಜಿ ವಹಿಸಿದ್ದೇನೆ. ಆ ಮೂಲಕ ಟೂರ್ನಿಯುದ್ದಕ್ಕೂ ಇದೇ ರೀತಿ ಕಾರ್ಯನಿರ್ವಹಿಸಲು ಎದುರು ನೋಡುತ್ತಿದ್ದೇನೆ," ಎಂದು ಹೇಳಿದರು. "ಕೆಲ ಅನುಭವಿ ಆಟಗಾರರ ಜತೆಗೆ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಇತ್ತೀಚೆಗೆ ಅದ್ಭುತ ಪ್ರದರ್ಶನ ತೋರಿರುವ ಭಾರತೀಯ ಯುವ ಬೌಲರ್‌ಗಳು ನಮ್ಮ ಬಳಿ ಇದ್ದಾರೆ. ಅತ್ಯುತ್ತಮ ವಿಶ್ವಾಸದೊಂದಿಗೆ ಅವರು ಐಪಿಎಲ್‌ ಟೂರ್ನಿಗೆ ಬಂದಿದ್ದಾರೆ. ನಾನು, ವಿರಾಟ್‌ ಕೊಹ್ಲಿ ಹಾಗೂ ಮ್ಯಾಕ್ಸ್‌ವೆಲ್‌ ತಂಡಕ್ಕೆ ಏನು ಮಾಡಬೇಕೋ ಅದನ್ನು ಮಾಡುತ್ತಿದ್ದೇವೆ," ಎಂದು ಡಿವಿಲಿಯರ್ಸ್ ತಿಳಿಸಿದರು. ಆರ್‌ಸಿಬಿ ತಂಡ 2021ರ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ಆಡಿರುವ 6 ಪಂದ್ಯಗಳಲ್ಲಿ 5ರಲ್ಲಿ ಗೆದ್ದು ಪಾಯಿಂಟ್ಸ್‌ ಟೇಬಲ್‌ನಲ್ಲಿ ಅಗ್ರ ಸ್ಥಾನವನ್ನು ಮತ್ತೆ ಅಲಂಕರಿಸಿದೆ. ಶುಕ್ರವಾರ ಪಂಜಾಬ್‌ ಕಿಂಗ್ಸ್ ವಿರುದ್ಧ ಇದೇ ಅಂಗಳದಲ್ಲಿ ಆರ್‌ಸಿಬಿ ಮುಂದಿನ ಪಂದ್ಯವಾಡಲಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2PyjPlY
