ದೇಶದಲ್ಲಿ ಕೊರೊನಾ ನಿಗ್ರಹಿಸಲು ಲಕ್ಷಾಂತರ ವೈದ್ಯರು, ನರ್ಸ್‌ಗಳ ತುರ್ತು ಅಗತ್ಯತೆ ಇದೆ..! ಡಾ. ದೇವಿ ಶೆಟ್ಟಿ

ಬೆಂಗಳೂರು: ಕೊರೊನಾ ವೈರಸ್‌ನ 2ನೇ ಅಲೆ ದೇಶದಲ್ಲಿ ಮರಣ ಮೃದಂಗ ಬಾರಿಸುತ್ತಿರುವ ಇಂದಿನ ದಿನಗಳಲ್ಲಿ ಕರುನಾಡಿನ ಖ್ಯಾತ ಹೃದ್ರೋಗ ತಜ್ಞರಾದ ಡಾ. ದೇವಿ ಶೆಟ್ಟಿ ಅವರು, ಹೊಸದೊಂದು ಚಿಂತನೆಯನ್ನು ನಾಡಿನ ಜನರೆದುರು ಮಂಡಿಸಿದ್ದಾರೆ. ಕೊರೊನಾ ವೈರಸ್‌ನ ಕರಾಳತೆ, ಆಘಾತವನ್ನು ಎದುರಿಸಲು, ಈ ಸಂಕಟದಿಂದ ಹೊರಬರಲು ಧನಾತ್ಮಕ ಚಿಂತನೆಯ ಮೂಲಕ ಹಲವು ಉಪಾಯವನ್ನು ಅವರು ವಿವರಿಸಿದ್ದಾರೆ. ಭಾರತದ ಮೇಲೆ ಮೊದಲ ಬಾರಿ ಕೊರೊನಾ ವೈರಸ್ ದಾಳಿ ನಡೆಸಿದಾಗ ಯಾವುದೇ ಪಿಪಿಇ ಕಿಟ್ ಇರಲಿಲ್ಲ. ಕೇವಲ 30 ಸಾವಿರ ವೆಂಟಿಲೇಟರ್‌ಗಳಿದ್ದವು. ಆದ್ರೆ, ನಾವು ಕೇವಲ 8 ವಾರಗಳಲ್ಲೇ ಪಿಪಿಇ ಕಿಟ್‌ ಹಾಗೂ ವೆಂಟಿಲೇರ್‌ಗಳನ್ನು ರಫ್ತು ಮಾಡುವ ಮಟ್ಟಕ್ಕೆ ಬೆಳೆದು ನಿಂತೆವು..! ಇದು ಭಾರತದ ಶಕ್ತಿ. ಇದೀಗ ಆಕ್ಸಿಜನ್ ಸಮಸ್ಯೆ ಎದುರಾಗಿದೆ. ಆದ್ರೆ, ಈ ಸಮಸ್ಯೆಯನ್ನೂ ನಾವು ಕೆಲವೇ ದಿನಗಳಲ್ಲಿ ಮೆಟ್ಟಿ ನಿಲ್ಲುತ್ತೇವೆ. ಏಕೆಂದರೆ ಭಾರತವು ಯುವಕರೇ ಬಹುಸಂಖ್ಯಾತರಾಗಿರುವ ದೇಶ. ಈ ದೇಶ ಯುವಶಕ್ತಿ ಬಹುಬೇಗ ಸಮಸ್ಯೆಗಳನ್ನು ಮೆಟ್ಟಿನಿಲ್ಲಬಲ್ಲ ಸಾಮರ್ಥ್ಯ ಹೊಂದಿದೆ. ದೇಶದಲ್ಲಿ ಇರುವ ಉಕ್ಕಿನ ಕಾರ್ಖಾನೆಗಳು ದ್ರವ ಆಮ್ಲಜನಕ ಉತ್ಪಾದಿಸುವಲ್ಲಿ ಕೈಜೋಡಿಸಿವೆ. ದೇಶದ ಆಮ್ಲಜನಕ ಅಗತ್ಯತೆಗಳಿಗೆ ಅವು ಸ್ಪಂದಿಸುತ್ತಿವೆ.ಇಂದಿನ ಸ್ಥಿತಿಗತಿ ಬೇಸರ ತರಿಸುತ್ತಿದೆಯಾದರೂ, ಮಾನಸಿಕವಾಗಿ ಕುಗ್ಗುವ ಅಗತ್ಯತೆ ಇಲ್ಲ. ಆದ್ರೆ, ಆಕ್ಸಿಜನ್ ಕೊರತೆಯ ನಂತರ ಎದುರಾಗೋದು ನರ್ಸ್‌ ಹಾಗೂ ವೈದ್ಯರ ಕೊರತೆಯ ಸಮಸ್ಯೆ. ಏಕೆಂದರೆ, ಪಿಪಿಇ ಕಿಟ್, ವೆಂಟಿಲೇಟರ್ ರೀತಿಯಲ್ಲೇ ಆಮ್ಲಜನಕ ಕೊರತೆಯ ಸಮಸ್ಯೆಯನ್ನು ನಾವು ಬಹುಬೇಗ ಮೆಟ್ಟಿ ನಿಲ್ಲುತ್ತೇವೆ. ಆದ್ರೆ, ಐಸಿಯುಗಳಲ್ಲಿ ರೋಗಿಗಳು ಜೀವ ಕೈಚೆಲ್ಲದಂತೆ ಕಾಪಾಡುವ ಜವಾಬ್ದಾರಿ ನರ್ಸ್‌ ಹಾಗೂ ವೈದ್ಯರ ಮೇಲಿದೆ.

ದೇಶದಲ್ಲಿ ಕೊರೊನಾ ವೈರಸ್ ಸ್ಥಿತಿಗತಿ ಈಗ ಹೇಗಿದೆ..? ಮುಂದೆ ಏನಾಗಬಹುದು..? ವೈದ್ಯಕೀಯ ಕ್ಷೇತ್ರದ ಮುಂದಿನ ಸವಾಲುಗಳೇನು..? ಇದಕ್ಕೆ ಸೂಕ್ತ ಪರಿಹಾರ ಇದೆಯೇ..? ಯಾವೆಲ್ಲಾ ಪರಿಹಾರ ಕ್ರಮಗಳನ್ನು ಕೈಗೊಳ್ಳಬೇಕು..? ಸರ್ಕಾರದ ಮುಂದಿರುವ ಮಾರ್ಗಗಳೇನು..? ಹೀಗೆ ಹಲವು ವಿಚಾರಗಳ ಬಗ್ಗೆ ಖ್ಯಾತ ವೈದ್ಯರಾದ ಡಾ. ದೇವಿ ಶೆಟ್ಟಿ ಅವರು ಸಿಂಬೋಸಿಸ್ ಗೋಲ್ಡನ್ ಭಾಷಣದಲ್ಲಿ ವಿವರಿಸಿದ್ದಾರೆ. ಅದರ ಪೂರ್ಣಪಾಠ ಇಲ್ಲಿದೆ:

ಬೆಂಗಳೂರು:

ಕೊರೊನಾ ವೈರಸ್‌ನ 2ನೇ ಅಲೆ ದೇಶದಲ್ಲಿ ಮರಣ ಮೃದಂಗ ಬಾರಿಸುತ್ತಿರುವ ಇಂದಿನ ದಿನಗಳಲ್ಲಿ ಕರುನಾಡಿನ ಖ್ಯಾತ ಹೃದ್ರೋಗ ತಜ್ಞರಾದ ಡಾ. ದೇವಿ ಶೆಟ್ಟಿ ಅವರು, ಹೊಸದೊಂದು ಚಿಂತನೆಯನ್ನು ನಾಡಿನ ಜನರೆದುರು ಮಂಡಿಸಿದ್ದಾರೆ. ಕೊರೊನಾ ವೈರಸ್‌ನ ಕರಾಳತೆ, ಆಘಾತವನ್ನು ಎದುರಿಸಲು, ಈ ಸಂಕಟದಿಂದ ಹೊರಬರಲು ಧನಾತ್ಮಕ ಚಿಂತನೆಯ ಮೂಲಕ ಹಲವು ಉಪಾಯವನ್ನು ಅವರು ವಿವರಿಸಿದ್ದಾರೆ.

ಭಾರತದ ಮೇಲೆ ಮೊದಲ ಬಾರಿ ಕೊರೊನಾ ವೈರಸ್ ದಾಳಿ ನಡೆಸಿದಾಗ ಯಾವುದೇ ಪಿಪಿಇ ಕಿಟ್ ಇರಲಿಲ್ಲ. ಕೇವಲ 30 ಸಾವಿರ ವೆಂಟಿಲೇಟರ್‌ಗಳಿದ್ದವು. ಆದ್ರೆ, ನಾವು ಕೇವಲ 8 ವಾರಗಳಲ್ಲೇ ಪಿಪಿಇ ಕಿಟ್‌ ಹಾಗೂ ವೆಂಟಿಲೇರ್‌ಗಳನ್ನು ರಫ್ತು ಮಾಡುವ ಮಟ್ಟಕ್ಕೆ ಬೆಳೆದು ನಿಂತೆವು..! ಇದು ಭಾರತದ ಶಕ್ತಿ.

ಇದೀಗ ಆಕ್ಸಿಜನ್ ಸಮಸ್ಯೆ ಎದುರಾಗಿದೆ. ಆದ್ರೆ, ಈ ಸಮಸ್ಯೆಯನ್ನೂ ನಾವು ಕೆಲವೇ ದಿನಗಳಲ್ಲಿ ಮೆಟ್ಟಿ ನಿಲ್ಲುತ್ತೇವೆ. ಏಕೆಂದರೆ ಭಾರತವು ಯುವಕರೇ ಬಹುಸಂಖ್ಯಾತರಾಗಿರುವ ದೇಶ. ಈ ದೇಶ ಯುವಶಕ್ತಿ ಬಹುಬೇಗ ಸಮಸ್ಯೆಗಳನ್ನು ಮೆಟ್ಟಿನಿಲ್ಲಬಲ್ಲ ಸಾಮರ್ಥ್ಯ ಹೊಂದಿದೆ. ದೇಶದಲ್ಲಿ ಇರುವ ಉಕ್ಕಿನ ಕಾರ್ಖಾನೆಗಳು ದ್ರವ ಆಮ್ಲಜನಕ ಉತ್ಪಾದಿಸುವಲ್ಲಿ ಕೈಜೋಡಿಸಿವೆ. ದೇಶದ ಆಮ್ಲಜನಕ ಅಗತ್ಯತೆಗಳಿಗೆ ಅವು ಸ್ಪಂದಿಸುತ್ತಿವೆ.

ಇಂದಿನ ಸ್ಥಿತಿಗತಿ ಬೇಸರ ತರಿಸುತ್ತಿದೆಯಾದರೂ, ಮಾನಸಿಕವಾಗಿ ಕುಗ್ಗುವ ಅಗತ್ಯತೆ ಇಲ್ಲ. ಆದ್ರೆ, ಆಕ್ಸಿಜನ್ ಕೊರತೆಯ ನಂತರ ಎದುರಾಗೋದು ನರ್ಸ್‌ ಹಾಗೂ ವೈದ್ಯರ ಕೊರತೆಯ ಸಮಸ್ಯೆ. ಏಕೆಂದರೆ, ಪಿಪಿಇ ಕಿಟ್, ವೆಂಟಿಲೇಟರ್ ರೀತಿಯಲ್ಲೇ ಆಮ್ಲಜನಕ ಕೊರತೆಯ ಸಮಸ್ಯೆಯನ್ನು ನಾವು ಬಹುಬೇಗ ಮೆಟ್ಟಿ ನಿಲ್ಲುತ್ತೇವೆ. ಆದ್ರೆ, ಐಸಿಯುಗಳಲ್ಲಿ ರೋಗಿಗಳು ಜೀವ ಕೈಚೆಲ್ಲದಂತೆ ಕಾಪಾಡುವ ಜವಾಬ್ದಾರಿ ನರ್ಸ್‌ ಹಾಗೂ ವೈದ್ಯರ ಮೇಲಿದೆ.

ಈ ಲೆಕ್ಕಾಚಾರಗಳನ್ನು ಗಮನಿಸಿ.. ಗಾಬರಿಯಾಗೋದು ಖಚಿತ..!

ದೇಶದಲ್ಲಿ 15 ರಿಂದ 20 ಲಕ್ಷ ಜನರು ಪ್ರತಿದಿನ ಸೋಂಕಿತರಾಗುತ್ತಿದ್ದಾರೆ. ಈ ಪೈಕಿ ಶೇ. 5ರಷ್ಟು ಜನರು ಐಸಿಯುಗೆ ದಾಖಲಾಗುವ ಅಗತ್ಯತೆ ಬರಬಹುದು. ಅಂದರೆ ನಮಗೆ ಪ್ರತಿದಿನ 80 ಸಾವಿರ ಐಸಿಯು ಬೆಡ್ ಬೇಕಾಗುತ್ತದೆ. ಆದ್ರೆ, ಭಾರತದಲ್ಲಿ 75 ಸಾವಿರದಿಂದ 90 ಸಾವಿರ ಐಸಿಯು ಬೆಡ್‌ಗಳು ಮಾತ್ರ ಇವೆ. ಈಗಾಗಲೇ ಇವೆಲ್ಲವೂ ಭರ್ತಿಯಾಗಿವೆ. ಆಘಾತಕಾರಿ ವಿಚಾರವೆಂದರೆ ದೇಶದಲ್ಲಿ ಕೊರೊನಾ ಇನ್ನೂ ಉಚ್ಛ್ರಾಯ ಸ್ಥಿತಿ ತಲುಪಿಲ್ಲ. ಆಗ ಎಷ್ಟು ಐಸಿಯು ಬೆಡ್‌ಗಳು ಬೇಕಾಗಬಹುದು. ಒಬ್ಬ ರೋಗಿ ಕನಿಷ್ಟ 10 ದಿನಗಳಾದ್ರೂ ಐಸಿಯು ಬೆಡ್‌ನಲ್ಲಿ ಇರಬೇಕಾಗುತ್ತೆ. ಪರಿಸ್ಥಿತಿ ಹೀಗಿರುವಾಗ ಮುಂದಿನ ಚಿತ್ರಣ ಏನಾಗಬಹುದು..?

​ನಾವೀಗ ಮಾಡಬೇಕಾದ್ದು ಏನು..?

ನಾವು ಮುಂದಿನ ಕೆಲವೇ ವಾರಗಳಲ್ಲಿ ದೇಶಾದ್ಯಂತ ಕನಿಷ್ಟ 5 ಲಕ್ಷ ಐಸಿಯು ಬೆಡ್‌ಗಳನ್ನು ಸೃಷ್ಟಿ ಮಾಡಬೇಕಿದೆ. ದುರಂತವೆಂದರೆ, ಕೇವಲ ಐಸಿಯು ಬೆಡ್‌ಗಳು ರೋಗಿಗಳಿಗೆ ಚಿಕಿತ್ಸೆ ನೀಡೋದಿಲ್ಲ. ಅದಕ್ಕೆ ವೈದ್ಯರು ಹಾಗೂ ನರ್ಸ್‌ಗಳು ಬೇಕು. ಹಾಗೆ ನೋಡಿದ್ರೆ ಐಸಿಯುಗಳಲ್ಲಿ ವೈದ್ಯರಿಗಿಂತಾ ನರ್ಸ್‌ಗಳು ಪ್ರಮುಖ ಪಾತ್ರ ವಹಿಸುತ್ತಾರೆ. ಆದ್ರೆ, ದೇಶಾದ್ಯಂತ ಸರ್ಕಾರಿ ಆಸ್ಪತ್ರೆಗಳಲ್ಲಿ ವೈದ್ಯಕೀಯ ಸಿಬ್ಬಂದಿ ಕೊರತೆ ಶೇ. 78ರಷ್ಟಿದೆ.

ಮುಂದಿವೆ ಸವಾಲಿನ ದಿನಗಳು..!

ಸದ್ಯದ ಪರಿಸ್ಥಿತಿಯಲ್ಲಿ ದೇಶಾದ್ಯಂತ ಕನಿಷ್ಟ 2 ಲಕ್ಷ ನರ್ಸ್‌ ಹಾಗೂ 1.5 ಲಕ್ಷ ವೈದ್ಯರ ಅಗತ್ಯತೆ ಇದೆ. ಅದೂ ಕೂಡಾ ಕೆಲವೇ ವಾರಗಳಲ್ಲಿ. ಇಷ್ಟೂ ಪ್ರಮಾಣದ ಸಿಬ್ಬಂದಿ ಮುಂದಿನ 1 ವರ್ಷಗಳ ಕಾಲ ಕೊರೊನಾ ನಿರ್ವಹಣೆ ಮಾಡಬೇಕಿದೆ. ಏಕೆಂದರೆ, ಸದ್ಯದ ಕೊರೊನಾ ಅಲೆ ಕನಿಷ್ಟ ಪಕ್ಷ 4 ರಿಂದ 5 ತಿಂಗಳು ಇರುವ ಸಾಧ್ಯತೆ ಇದೆ. ಅಷ್ಟೇ ಅಲ್ಲ, ಸಂಭಾವ್ಯ 3ನೇ ಅಲೆಗೂ ಸಿದ್ದವಿರಬೇಕಿದೆ. ಅಮೆರಿಕ, ಇಂಗ್ಲೆಂಡ್‌ಗಳಲ್ಲಿ ವೈರಸ್‌ ಹೇಗೆ ವರ್ತಿಸಿದೆ ಎಂಬುದನ್ನು ನೋಡಿಕೊಂಡು ನಾವು ಈ ಅಂದಾಜು ಮಾಡಬೇಕಿದೆ. ಅಮೆರಿಕದಲ್ಲಿ ಕೊರೊನಾ ವೈರಸ್‌ ವರ್ತಿಸುವುದಕ್ಕಿಂತಾ ಭಿನ್ನವಾಗೇನೂ ಭಾರತದಲ್ಲಿ ವರ್ತಿಸುತ್ತಿಲ್ಲ. ನಮ್ಮ ವಂಶವಾಹಿ ವ್ಯತ್ಯಾಸಗಳು ಅಷ್ಟೇನೂ ವೈರಸ್ ಮೇಲೆ ಪರಿಣಾಮ ಬೀರಿಲ್ಲ.

2 ಲಕ್ಷ ನರ್ಸ್‌, 1.5 ಲಕ್ಷ ಡಾಕ್ಟರ್‌ಗಳ ಸೃಷ್ಟಿ ಹೇಗೆ..?

ಕೆಲವೇ ವಾರಗಳಲ್ಲಿ ಇಷ್ಟು ಪ್ರಮಾಣದ ಮಾನವ ಸಂಪನ್ಮೂಲ ಸೃಷ್ಟಿ ಭಾರತದಿಂದ ಮಾತ್ರ ಸಾಧ್ಯ. ಏಕೆಂದರೆ ಭಾರತದಾದ್ಯಂತ ನರ್ಸಿಂಗ್ ಕಾಲೇಜುಗಳಲ್ಲಿ ಬಿಎಸ್‌ಸಿ ಹಾಗೂ ಜಿಎನ್‌ಎಂ ಕೋರ್ಸ್‌ನ ಅಂತಿಮ ವರ್ಷದ ವಿದ್ಯಾರ್ಥಿಗಳ ಸಂಖ್ಯೆ ಒಟ್ಟು 2 ಲಕ್ಷದ 20 ಸಾವಿರದಷ್ಟಿದೆ. ಈ ವಿದ್ಯಾರ್ಥಿಗಳು ಈಗ ಪರೀಕ್ಷೆಗಾಗಿ ಕಾದು ಕುಳಿತಿದ್ದಾರೆ. ಇವರೆಲ್ಲರೂ ಪ್ರಾಯೋಗಿಕ ತರಬೇತಿ ಪಡೆದಿದ್ದಾರೆ. ಆದ್ರೆ, ಪರೀಕ್ಷೆಯನ್ನು ಎದುರಿಸಿಲ್ಲ ಅಷ್ಟೇ. ಇವರನ್ನು ಆರೋಗ್ಯ ಇಲಾಖೆಯು ನೇರವಾಗಿ ಕೆಲಸಕ್ಕೆ ಆಹ್ವಾನಿಸಬೇಕಿದೆ. 1 ವರ್ಷಗಳ ಕಾಲ ಕೊರೊನಾ ವೈರಸ್ ರೋಗಿಗಳಿಗೆ ಐಸಿಯುಗಳಲ್ಲಿ ಚಿಕಿತ್ಸೆ ನೀಡಿದರೆ ನಿಮಗೆ ಪದವಿ ಪ್ರಮಾಣ ಪತ್ರ ನೀಡುತ್ತೇವೆ ಎಂದು ಹೇಳಿದರೆ ಸಾಕಷ್ಟು ಮಾನವ ಸಂಪನ್ಮೂಲ ಲಭ್ಯವಾಗುತ್ತದೆ.

ಅಷ್ಟೇ ಅಲ್ಲ, ಮುಂದಿನ ದಿನಗಳಲ್ಲಿ ಸರ್ಕಾರಿ ಕೆಲಸಕ್ಕೆ ನೇಮಕ ಮಾಡಿಕೊಳ್ಳುವ ವೇಳೆ ಕೋವಿಡ್ ಐಸಿಯುಗಳಲ್ಲಿ 1 ವರ್ಷಗಳ ಕಾಲ ಕಾರ್ಯನಿರ್ವಹಿಸಿದವರಿಗೆ ಮೊದಲ ಪ್ರಾಶಸ್ತ್ಯ ನೀಡೋದಾಗಿ ಭರವಸೆ ನೀಡಿ ಕೆಲಸ ಕ್ಕೆ ಕರೆದುಕೊಳ್ಳಬೇಕಿದೆ. ಏಕೆಂದರೆ, ಕೊರೊನಾ ವಿರುದ್ಧದ ಸಮರವನ್ನು ನರ್ಸ್‌ ಹಾಗೂ ವೈದ್ಯರಿಲ್ಲದೆ ಹೋರಾಡಲು ಸಾಧ್ಯವಿಲ್ಲ. ಹಾಗೂ ಹಿರಿಯ ವಯಸ್ಸಿನ ವೈದ್ಯರು ಕೊರೊನಾ ವಿರುದ್ಧದ ಸಮರದಲ್ಲಿ ಭಾಗಿಯಾಗಲು ಸಾಧ್ಯವಿಲ್ಲ. ಲಸಿಕೆ ಪಡೆದ ಯುವಕರು ಈ ಸಮರದಲ್ಲಿ ಭಾಗಿಯಾಗಲು ಯೋಗ್ಯರು.

​ವೈದ್ಯರ ಕೊರತೆಗೂ ಇಲ್ಲಿದೆ ಪರಿಹಾರ..!

ನರ್ಸ್‌ ಸಮಸ್ಯೆಯನ್ನು ಒಂದು ಹಂತದಲ್ಲಿ ಬಗೆಹರಿಸಿದ ಬಳಿಕ ವೈದ್ಯರ ಕೊರತೆ ಸಮಸ್ಯೆ ಬಗೆಹರಿಸೋದು ಹೇಗೆ..? ದೇಶದ ಹಲವು ಮೆಡಿಕಲ್ ಕಾಲೇಜುಗಳಲ್ಲಿ ಎಂಬಿಬಿಎಸ್‌ ಮುಗಿಸಿದ ವೈದ್ಯರು ನೀಟ್ ಪರೀಕ್ಷೆ ಎದುರಿಸಲು ಸಜ್ಜಾಗುತ್ತಿದ್ದಾರೆ. ಇವರ ಸಂಖ್ಯೆ 1 ಲಕ್ಷ 30 ಸಾವಿರದಷ್ಟಿದೆ. ಇವರೆಲ್ಲರೂ ಈಗ ಸ್ನಾತಕೋತ್ತರ ಪದವಿ ಪಡೆಯಲು ಪ್ರವೇಶ ಪರೀಕ್ಷೆಗೆ ತಯಾರಾಗುತ್ತಿದ್ದಾರೆ.

ರಾಷ್ಟ್ರೀಯ ಪರೀಕ್ಷಾ ಪ್ರಾಧಿಕಾರವು ಇವರಿಗೆ ಆದಷ್ಟು ಬೇಗ ಆನ್‌ಲೈನ್ ನೀಟ್ ಪರೀಕ್ಷೆ ನೀಡಬೇಕಿದೆ. ಕೆಲವೇ ದಿನಗಳಲ್ಲಿ ಪರೀಕ್ಷೆ ನಡೆಸಿ ಫಲಿತಾಂಶವೂ ಬರಬೇಕಿದೆ. ದೇಶಾದ್ಯಂತ 35 ಸಾವಿರ ಸ್ನಾತಕೋತ್ತರ ಪದವಿ ಸೀಟ್‌ಗಳಿವೆ. ಅಲ್ಲಿಗೆ ಕಲಿಯಲು 1 ಲಕ್ಷ ವಿದ್ಯಾರ್ಥಿಗಳು ಸೇರ್ಪಡೆಯಾದರೆ, ಸೀಟ್ ಸಿಗದ 1 ಲಕ್ಷ ವಿದ್ಯಾರ್ಥಿಗಳು ಸೇವೆಗೆ ಲಭ್ಯರಾಗುತ್ತಾರೆ. ಅವರು ಮುಂದಿನ ವರ್ಷ ನೀಟ್ ಪರೀಕ್ಷೆ ಎದುರಿಸುವ ಸಂದರ್ಭದಲ್ಲಿ ಅವರಿಗೆ ಭಾರೀ ಪ್ರಮಾಣದ ಗ್ರೇಸ್ ಅಂಕಗಳನ್ನು ಕೊಡುತ್ತೇವೆ ಎಂದು ಅವರನ್ನು ಒಂದು ವರ್ಷಗಳ ಕಾಲ ಕೋವಿಡ್ ಐಸಿಯುನಲ್ಲಿ ಸೇವೆಗೆ ನೇಮಿಸಬಹುದಾಗಿದೆ. ಇದನ್ನು ನಿರ್ವಹಿಸಲು ಸರ್ಕಾರವು ಪ್ರತ್ಯೇಕ ಇಲಾಖೆಯನ್ನು ತೆರೆಯಬೇಕಿದೆ.

ಟೈರ್ 2, 3 ಸಿಟಿಗಳ ಕಥೆ ಏನಾಗಬಹುದು..?

ಇನ್ನು ನಾವು ಕೊರೊನಾ ಸ್ಥಿತಿಯನ್ನು ಕೇವಲ ದಿಲ್ಲಿ, ಬೆಂಗಳೂರು, ಪುಣೆಯಂಥಾ ನಗರಗಳನ್ನು ನೋಡಿ ಅವಲೋಕಿಸುತ್ತಿದ್ದೇವೆ. ಟೈರ್ 2, 3 ನಗರಗಳ ಕಥೆ ಏನು..? ಸದ್ಯ ಈ ನಗರಗಳಲ್ಲಿ ಕೋವಿಡ್ ರೋಗಿಗಳ ಸಂಖ್ಯೆ ಕಡಿಮೆ ಇದೆ. ಆದ್ರೆ, ಆ ನಗರಗಳಲ್ಲೂ ಬೆಂಗಳೂರಿನಂಥಾ ಸ್ಥಿತಿಯೇ ಎದುರಾದರೂ ಅಚ್ಚರಿ ಇಲ್ಲ. ಕೋವಿಡ್ ಯಾರನ್ನೂ ಬಿಡೋದಿಲ್ಲ. ಆದ್ರೆ, ಆ ನಗರಗಳಲ್ಲಿ ದೊಡ್ಡ ಮಟ್ಟದ ಖಾಸಗಿ ಆಸ್ಪತ್ರೆಗಳೂ ಇಲ್ಲ, ಸರ್ಕಾರಿ ಆಸ್ಪತ್ರೆಗಳಲ್ಲಿ ಮೂಲ ಸೌಕರ್ಯವೂ ಇಲ್ಲ.

ಪಿಜಿ ವೈದ್ಯರು ಪರೀಕ್ಷೆಗೆ ಬದಲು ಐಸಿಯುಗೆ ಬರಲಿ..!

ಇನ್ನೊಂದೆಡೆ ಸ್ನಾತಕೋತ್ತರ ಪದವಿ ಮುಗಿಸಿದ 25 ಸಾವಿರ ವೈದ್ಯರು ಇದೀಗ ಪರೀಕ್ಷೆಗಾಗಿ ಎದುರು ನೋಡ್ತಿದ್ದಾರೆ. ಅವರೂ ಕೂಡಾ ಕೋವಿಡ್ ಐಸಿಯುಗಳಲ್ಲಿ ಕಾರ್ಯನಿರ್ವಹಿಸಬಹುದು. ಅವರು ಪರೀಕ್ಷೆ ಬರೆಯದೇ ಕೋವಿಡ್ ಐಸಿಯುಗಳಲ್ಲಿ ಒಂದು ವರ್ಷ ಕಾರ್ಯನಿರ್ವಹಿಸಿದರೆ ಪದವಿ ಪ್ರಮಾಣ ಪತ್ರ ನೀಡಿ. ಹಾಗೆ ನೋಡಿದ್ರೆ, 90 ಸಾವಿರದಿಂದ 1 ಲಕ್ಷ ಭಾರತೀಯ ವೈದ್ಯರು ವಿದೇಶಗಳಲ್ಲೂ ಪದವಿ ವ್ಯಾಸಂಗ ಮುಗಿಸಿದ್ದಾರೆ. ಅವರಲ್ಲಿ ಪ್ರತಿಭಾಶಾಲಿಗಳನ್ನೂ ಗುರ್ತಿಸಿ ಕೋವಿಡ್ ಐಸಿಯುಗಳಲ್ಲಿ 1 ವರ್ಷ ಕಾರ್ಯನಿರ್ವಹಿಸುವಂತೆ ಹೇಳಬಹುದು.

ಈ ಎಲ್ಲವನ್ನೂ ಕೆಲವೇ ವಾರಗಳಲ್ಲಿ ಮಾಡಿದರೆ ಕೋವಿಡ್ ವಿರುದ್ಧದ ಸಮರದಲ್ಲಿ ನಾವು ಮೇಲುಗೈ ಸಾಧಿಸಬಹುದು. ಇಲ್ಲವಾದ್ರೆ, ಈ ಪರಿಸ್ಥಿತಿ ಇನ್ನಷ್ಟು ಗಂಭೀರ ಆಗಬಹುದು. ಏಕೆಂದರೆ, ಐಸಿಯುಗೆ ದಾಖಲಾಗುವ ರೋಗಿಗಳಿಗೆ ಆಮ್ಲಜನಕ ನೀಡಿದಾಕ್ಷಣ ಅವರು ಗುಣಮುಖ ಆಗೋದಿಲ್ಲ. ಅವರನ್ನು ಗಮನಿಸಲು ವೈದ್ಯರು ಹಾಗೂ ನರ್ಸ್‌ಗಳು ಬೇಕು.

ಸರ್ಕಾರ ಈಗ ತ್ವರಿತವಾಗಿ ತೀರ್ಮಾನ ತೆಗೆದುಕೊಳ್ಳಬೇಕು..!

ಮೇ ತಿಂಗಳ ಬಿಸಿಲಿನಲ್ಲಿ ಗಂಟೆಗಟ್ಟಲೆ ಪಿಪಿಇ ಕಿಟ್ ಧರಿಸಿ ಕಾರ್ಯನಿರ್ವಹಿಸೋದು ಸುಲಭದ ಕೆಲಸವಲ್ಲ. ಈಗಾಗಲೇ 1 ವರ್ಷದಿಂದ ಈ ಕೆಲಸ ಮಾಡುತ್ತಿರುವ ವೈದ್ಯರು, ನರ್ಸ್‌ಗಳ ಕಾರ್ಯ ಶ್ಲಾಘನೀಯ. ಆದ್ರೆ, ಅವರು ಸುಸ್ತಾಗಿದ್ದಾರೆ. ಹಲವರು ಸೋಂಕಿತರಾಗಿದ್ದಾರೆ. ಹೀಗಾಗಿ, ಪರ್ಯಾಯಗಳನ್ನು ನಾವು ಹುಡುಕಬೇಕು. ಪ್ರಧಾನಿ ನರೇಂದ್ರ ಮೋದಿ ಅವರ ಸಾರಥ್ಯದ ಕೇಂದ್ರ ಸರ್ಕಾರವು ಈ ಸವಾಲನ್ನು ಸಮರ್ಥವಾಗಿ ಎದುರಿಸುತ್ತದೆ. ಒಂದು ಹಂತದಲ್ಲಿ ನಾನು ಅಂದಾಜಿಸಿರುವ ಕೋವಿಡ್ ರೋಗಿಗಳ ಸಂಖ್ಯೆ ಹಾಗೂ ಅಗತ್ಯವಿರುವ ಐಸಿಯುಗಳ ಸಂಖ್ಯೆ ತಪ್ಪಾಗಬಹುದು. ಆದ್ರೆ, ನಾನು ಹೇಳಿದಂತೆಯೇ ಆದರೆ ಏನು ಮಾಡೋದು..? ಈಗಾಗಲೇ ತಡವಾಗಿದೆ. ನಾವು ಸುಮ್ಮನೆ ನೋಡುತ್ತಾ ಕೂರೋದು ಸಾಧ್ಯವೇ ಇಲ್ಲ..!

from India & World News in Kannada | VK Polls https://ift.tt/3xrkFBY