,ಅಹ್ಮದಾಬಾದ್‌: ವಿರುದ್ಧ ಐದು ವಿಕೆಟ್‌ಗಳ ಸೋಲು ಅನುಭವಿಸಿದ ಬಳಿಕ ಬೇಸರ ವ್ಯಕ್ತಪಡಿಸಿದ ನಾಯಕ , ನಮ್ಮ ಕಡೆಯಿಂದ ಹೀನಾಯ ಪ್ರದರ್ಶನ ಮೂಡಿಬಂದಿದ್ದು, ಹೊಸ ಪಿಚ್‌ಗೆ ನಾವು ಬಹುಬೇಗ ಹೊಂದಿಕೊಳ್ಳುವಲ್ಲಿ ವಿಫಲರಾಗಿದ್ದೇವೆಂದು ಹೇಳಿದ್ದಾರೆ. ಇಲ್ಲಿನ ನರೇಂದ್ರ ಮೋದಿ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ಕೇವಲ 124 ರನ್‌ ಗುರಿ ಹಿಂಬಾಲಿಸಿದ ಕೋಲ್ಕತಾ ನೈಟ್‌ ರೈಡರ್ಸ್ ತಂಡ 16.4 ಓವರ್‌ಗಳಿಗೆ 5 ವಿಕೆಟ್‌ಗಳ ಗೆಲುವಿನ ನಗೆ ಬೀರಿತು. ಆ ಮೂಲಕ ಕೆಕೆಆರ್‌ ಪ್ರಸಕ್ತ ಟೂರ್ನಿಯಲ್ಲಿ ಎರಡನೇ ಗೆಲುವು ಪಡೆದು ಪಾಯಿಂಟ್ಸ್‌ ಟೇಬಲ್‌ನಲ್ಲಿ 5ನೇ ಸ್ಥಾನಕ್ಕೇರಿತು. ಇನ್ನು ಅಷ್ಟೇ ಪಂದ್ಯಗಳನ್ನು ಗೆದ್ದಿರುವ ಪಂಜಾಬ್ ಕಿಂಗ್ಸ್ ರನ್‌ರೇಟ್‌ ಕಡಿಮೆ ಇರುವ ಹಿನ್ನೆಲೆಯಲ್ಲ 6ನೇ ಸ್ಥಾನದಲ್ಲಿದೆ. ಪಂದ್ಯದ ಬಳಿಕ ಮಾತನಾಡಿದ ಪಂಜಾಬ್ ಕಿಂಗ್ಸ್ ನಾಯಕ ಕೆ.ಎಲ್ ರಾಹುಲ್, ಕೋಲ್ಕತಾ ನೈಟ್‌ ರೈಡರ್ಸ್ ವಿರುದ್ಧ ನಾವು ಹೀನಾಯ ಪ್ರದರ್ಶನ ತೋರಿದ್ದೇವೆ ಹಾಗೂ ಇಲ್ಲಿನ ಹೊಸ ಪಿಚ್‌ಗೆ ಹೊಂದಿಕೊಳ್ಳುವಲ್ಲಿ ವಿಫಲರಾಗಿದ್ದೇವೆ. ಒಟ್ಟಾರೆ ಕೆಕೆಆರ್‌ ಎಲ್ಲಾ ವಿಭಾಗಗಳಲ್ಲಿಯೂ ನಮಗಿಂತ ಅತ್ಯುತ್ತಮ ಪ್ರದರ್ಶನ ತೋರಿದೆ ಎಂಬುದನ್ನು ಅವರು ಒಪ್ಪಿಕೊಂಡರು. "ನಿಜವಾಗಲೂ ನಾನು ಏನು ಹೇಳಬೇಕೋ ಗೊತ್ತಾಗುತ್ತಿಲ್ಲ, ಆದರೆ ಇದು ನಮ್ಮ ಕಡೆಯಿಂದ ಅತ್ಯಂತ ಕೆಟ್ಟ ಪ್ರದರ್ಶನವಾಗಿದೆ. ಹೊಸ ಪಿಚ್‌ಗೆ ನಾವು ಬಹುಬೇಗ ಹೊಂದಿಕೊಳ್ಳಬೇಕಾಗಿತ್ತು. ಅದರಂತೆ ಬ್ಯಾಟಿಂಗ್‌ನಲ್ಲಿ ನಾವು ಇನ್ನಷ್ಟು ಉತ್ತಮ ಪ್ರದರ್ಶನ ತೋರುವ ಮೂಲಕ 20 ರಿಂದ 30 ರನ್‌ ಹೆಚ್ಚುವರಿಯಾಗಿ ಸೇರಿಸಬೇಕಾಗಿತ್ತು," ಎಂದು ಪೋಸ್ಟ್ ಮ್ಯಾಚ್‌ ಪ್ರೆಸೆಂಟೇಷನ್‌ನಲ್ಲಿ ರಾಹುಲ್ ತಿಳಿಸಿದರು. "ಹೌದು.. ಇಲ್ಲಿನ ವಿಕೆಟ್‌ ಸ್ವಲ್ಪ ನಿಧಾನಗತಿಯಿಂದ ಕೂಡಿತ್ತು. ಆದರೆ 120 ಅಥವಾ 130 ರನ್‌ಗಳಿಗೆ ದ್ವಿತೀಯ ಇನಿಂಗ್ಸ್‌ನಲ್ಲಿ ಎದುರಾಳಿ ತಂಡವನ್ನು ಕಟ್ಟಿ ಹಾಕುವುದು ಸಾಧ್ಯವಿಲ್ಲ. ನಮ್ಮ ಕೆಲ ಸಾಫ್ಟ್ ಔಟ್‌ಗಳು ತಂಡದ ಮೇಲೆ ಗಂಭೀರ ಪರಿಣಾಮ ಬೀರಿದೆ. ಪಿಚ್ ಎರಡೂ ರೀತಿ ವರ್ತಿಸುತ್ತಿತ್ತು. ಆದರೆ, ನಾವು ಅದಕ್ಕೆ ಹೊಂದಿಕೊಂಡು ಬ್ಯಾಟಿಂಗ್‌ ಮಾಡಬೇಕಾಗಿತ್ತು," ಎಂದು ಹೇಳಿದರು. "ಆರಂಭಿಕ 6 ಓವರ್‌ಗಳಲ್ಲಿ ಒಳ್ಳೆಯ ಶಾಟ್‌ಗಳನ್ನು ಆಡುವ ಬಗ್ಗೆ ಅರ್ಥ ಮಾಡಿಕೊಳ್ಳುವುದು ತುಂಬಾ ಕಷ್ಟವಾಗಿತ್ತು. ಹೊಸ ಪಿಚ್ ಬಗ್ಗೆ ನಿಮಗೆ ಹೆಚ್ಚು ಗೊತ್ತಿರದ ಕಾರಣ ಮೊದಲು ಬ್ಯಾಟಿಂಗ್‌ ಮಾಡುವುದು ಕಠಿಣವಾಗಿತ್ತದೆ. ಆದರೆ, ನೀವು ಬಹುಬೇಗ ಪಿಚ್‌ನ ಪರಿಸ್ಥಿತಿಗೆ ಹೊಂದಿಕೊಳ್ಳುವ ಅಗತ್ಯವಿದೆ. ಇದು ನಮ್ಮಿಂದ ಸಾಧ್ಯವಾಗಲಿಲ್ಲ. ಇನ್ನು ನಮಗೆ ಪಂದ್ಯಗಳಿವೆ ಹಾಗಾಗಿ ತಪ್ಪುಗಳಿಂದ ಕಲಿಯುತ್ತೇವೆ," ಎಂದು ಕೆ.ಎಲ್ ರಾಹುಲ್ ಭರವಸೆ ನೀಡಿದರು. ಕೋಲ್ಕತಾ ನೈಟ್‌ ರೈಡರ್ಸ್ ಇನಿಂಗ್ಸ್‌ನ ಮೂರನೇ ಓವರ್‌ನಲ್ಲಿ ಸುನೀಲ್‌ ನರೇನ್‌ ಅವರ ಕ್ಯಾಚ್‌ ಅನ್ನು ರವಿ ಬಿಷ್ಣೋಯ್‌ ಅದ್ಭುತವಾಗಿ ಹಿಡಿದ್ದರು. ಈ ಬಗ್ಗೆ ಪ್ರತಿಕ್ರಿಯಿಸಿದ ರಾಹುಲ್, ಮೈದಾನದಲ್ಲಿ ಬಿಷ್ನೋಯ್‌ ಅವರಿಂದ ಇದು ಅಸಾಧಾರಣ ಪ್ರಯತ್ನವಾಗಿದ್ದು, ಇದರ ಶ್ರೇಯ ಫೀಲ್ಡಿಂಗ್ ಕೋಚ್‌ ಜಾಂಟಿ ರೋಡ್ಸ್‌ಗೆ ಸಲ್ಲಬೇಕು ಎಂದರು. "ಅದು ನಿಜಕ್ಕೂ ಸ್ಟನ್ನಿಂಗ್‌ ಕ್ಯಾಚ್‌. ನಮ್ಮದು ಅತ್ಯುತ್ತಮ ಫೀಲ್ಡಿಂಗ್ ತಂಡವಾಗಿದೆ. ಪ್ರತಿಯೊಂದು ತರಬೇತಿ ಸೆಷನ್‌ನಲ್ಲಿ ನಮ್ಮನ್ನು ಜಾಂಟಿ ರೋಡ್ಸ್‌ ಅತ್ಯುತ್ತಮವಾಗಿ ಸಜ್ಜಗೊಳಿಸುತ್ತಾರೆ. ಅವರು ಕಠಿಣ ಟಾಸ್ಕ್ ಮಾಸ್ಟರ್ ಮತ್ತು ಎಲ್ಲರನ್ನೂ ಪರೀಕ್ಷೆಗೆ ಒಳಪಡಿಸುತ್ತಾರೆ. ಅವರು ಮೈದಾನದಿಂದ ಹೆಚ್ಚಿನ ಶಕ್ತಿಯನ್ನು ಹೊಂದಿದ್ದು, ಅದು ಆಟಗಾರರ ಮೇಲೆ ಪ್ರಭಾವ ಬೀರುತ್ತದೆ, " ಎಂದು ರಾಹುಲ್ ಹೇಳಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2Pot3Rw
