ಅಹ್ಮದಾಬಾದ್‌: ರಾಯಲ್‌ ಚಾಲೆಂಜರ್ಸ್ ಬೆಂಗಳೂರು ವಿರುದ್ಧ ಡೆಲ್ಲಿ ಕ್ಯಾಪಿಟಲ್ಸ್ ಕೇವಲ ಒಂದು ರನ್‌ ಸೋಲಿನ ಆಘಾತದ ಬಳಿಕ ಅವರೊಂದಿಗೆ ಕ್ರೀಡಾ ಸ್ಪೂರ್ತಿ ಮೆರೆದ ಆರ್‌ಸಿಬಿ ನಾಯಕ ಹಾಗೂ ವೇಗಿ ಮೊಹಮ್ಮದ್ ಸಿರಾಜ್‌ ಅವರನ್ನು ಅಭಿಮಾನಿಗಳು ಮುಕ್ತಕಂಠದಿಂದ ಗುಣಗಾನ ಮಾಡಿದ್ದಾರೆ. ಇಲ್ಲಿನ ನರೇಂದ್ರ ಮೋದಿ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆದಿದ್ದ 2021ರ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಟೂರ್ನಿಯ 22ನೇ ಪಂದ್ಯದಲ್ಲಿ ಆರ್‌ಸಿಬಿ ಹಾಗೂ ಡಿಸಿ ನಡುವೆ ಕಠಿಣ ಪೈಪೋಟಿ ನಡೆದಿತ್ತು. ಆದರೆ, ಅಂತಿಮವಾಗಿ ಆರ್‌ಸಿಬಿ ಕೊನೆಯ ಓವರ್‌ನಲ್ಲಿ ಗೆಲುವು ತನ್ನದಾಗಿಸಿಕೊಂಡಿತು. ಆದರೆ ಪಂದ್ಯದ ಬಳಿಕ ಎರಡೂ ತಂಡಗಳ ಆಟಗಾರರು ನಡೆದುಕೊಂಡ ರೀತಿ ನಿಜಕ್ಕೂ ಕ್ರಿಕೆಟ್ ಪರಿಪೂರ್ಣ ವ್ಯಕ್ತಿಗಳ ಆಟ ಎಂಬುದನ್ನು ಸಾಬೀತುಪಡಿಸಿತು 172 ರನ್‌ಗಳ ಗುರಿ ಹಿಂಬಾಲಿಸಿದ್ದ ಡೆಲ್ಲಿ ಕ್ಯಾಪಿಟಲ್ಸ್ ತಂಡಕ್ಕೆ ಕೊನೆಯ ಓವರ್‌ನಲ್ಲಿ 14 ರನ್‌ಗಳ ಅಗತ್ಯವಿತ್ತು. ಈ ವೇಳೆ ಕ್ರೀಸ್‌ನಲ್ಲಿ ರಿಷಭ್‌ ಪಂತ್ ಹಾಗೂ ಶಿಮ್ರಾನ್ ಹೆಟ್ಮಾಯೆರ್‌ ಇದ್ದರು. ಟಿ20 ಕ್ರಿಕೆಟ್‌ನಲ್ಲಿ ಅದ್ಭುತ ಬೌಲರ್‌ ಆಗಿ ಸುಧಾರಣೆ ಕಂಡಿರುವ ಅವರು ಕೊನೆಯ ಓವರ್‌ ಬೌಲಿಂಗ್‌ ಮಾಡುವ ಜವಾಬ್ದಾರಿಯನ್ನು ಪಡೆದರು. ಮೊದಲ ಮೂರು ಎಸೆತಗಳಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಕೇವಲ ಎರಡು ರನ್‌ ಗಳಿಸಿತು. ಈ ವೇಳೆ ಕೊನೆಯ ಮೂರು ಎಸೆತಗಳಲ್ಲಿ ಸಿಕ್ಸ್ ಬಾರಿಸಬೇಕೆಂಬ ಒತ್ತಡ ಪಂತ್ ಅವರ ಮೇಲೆ ಬಿತ್ತು. ಆದರೆ, ನಾಯಕ ರಿಷಭ್‌ ಪಂತ್, ಡಬಲ್‌ ರನ್‌ ಹಾಗೂ ಎರಡು ಬೌಂಡರಿ ಸಿಡಿಸಲಷ್ಟೇ ಸೀಮಿತರಾದರು. ಆ ಮೂಲಕ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಕೇವಲ ಒಂದು ರನ್‌ನಿಂದ ಸೋಲು ಅನುಭವಿಸಿತು. ತಲಾ ಅರ್ಧಶತಕಗಳನ್ನು ಸಿಡಿಸಿದ ಹೊರತಾಗಿಯೂ ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ಗೆಲ್ಲಿಸಲು ಸಾಧ್ಯವಾಗದ್ದಕ್ಕೆ ರಿಷಭ್‌ ಪಂತ್ ಹಾಗೂ ಶಿಮ್ರನ್ ಹೆಟ್ಮಾಯೆರ್‌ ಅವರು ತುಂಬಾ ಬೇಸರಕ್ಕೆ ಒಳಗಾದರು. ಈ ವೇಳೆ ವಿರಾಟ್‌ ಕೊಹ್ಲಿ ಒಬ್ಬ ಹಿರಿಯ ಆಟಗಾರನಾಗಿ ಪಂತ್ ಬಳಿ ಬಂದು ಅವರ ತಲೆ ಸ್ಪರ್ಶಿಸಿ ಸಮಾಧಾನ ಮಾಡಿದರು. ಕೊಹ್ಲಿ ಇಲ್ಲಿಗೆ ನಿಲ್ಲಿಸಲಿಲ್ಲ. ನಂತರ ಅವರು ಮತ್ತು ಗ್ಲೆನ್‌ ಮ್ಯಾಕ್ಸ್‌ವೆಲ್‌ ಮತ್ತೊಂದು ತುದಿಯಲ್ಲಿ ಬೇಸರದೊಂದಿಗೆ ಕುಳಿತಿದ್ದ ಶಿಮ್ರಾನ್ ಹೆಟ್ಮಾಯೆರ್‌ ಅವರನ್ನು ಸ್ಫೋಟಕ ಇನಿಂಗ್ಸ್ ಆಡಿದ್ದಕ್ಕೆ ಅಭಿನಂದನೆ ಸಲ್ಲಿಸಿ, ಸೋಲಿಗೆ ಸಮಾಧಾನ ಹೇಳಿದರು. ಕೊನೆಯ ಓವರ್‌ನಲ್ಲಿ 13 ರನ್‌ಗಳಿಗೆ ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ನಿಯಂತ್ರಿಸಿದ್ದ ಆರ್‌ಸಿಬಿ ವೇಗಿ ಮೊಹಮ್ಮದ್ ಸಿರಾಜ್‌ ಅವರು ಕೂಡ ಪಂತ್ ಹಾಗೂ ಹೆಟ್ಮಾಯೆರ್‌ ಅವರನ್ನು ಅಪ್ಪಿಕೊಂಡರು. ಆ ಮೂಲಕ ಪೆವಿಲಿಯನ್‌ಗೆ ಹೆಜ್ಜೆ ಹಾಕಿದರು. ಪಂದ್ಯ ಮುಗಿದ ಬಳಿಕ ಆರ್‌ಸಿಬಿ ಹಾಗೂ ಡಿಸಿ ತಂಡಗಳ ಆಟಗಾರರು ಮಾತುಕತೆ ಮುಂದುವರಿಸಿದರು. ಪೋಸ್ಟ್ ಮ್ಯಾಚ್‌ ಪ್ರೆಸೆಂಟೇಷನ್‌ಗೂ ಮುನ್ನ ವಿರಾಟ್‌ ಕೊಹ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ನಾಯಕ ರಿಷಭ್‌ ಪಂತ್ ಅವರೊಂದಿಗೆ ಜೋರಾಗಿ ನಗುತ್ತಾ ಮಾತುಕತೆ ನಡೆಸಿದರು. ಈ ವೇಳೆ ಸಿರಾಜ್‌ ಹಾಗೂ ಆವೇಶ್‌ ಖಾನ್‌ ಕೂಡ ಸೇರ್ಪಡೆಯಾದರು. ಈ ವಿಡಿಯೋವನ್ನು ಐಪಿಎಲ್‌ ತನ್ನ ಅಧಿಕೃತ ಟ್ವಟರ್‌ನಲ್ಲಿ ಶೇರ್‌ ಮಾಡಿದೆ. ನಂತರ ಈ ವಿಡಿಯೋವನ್ನು ಆರ್‌ಸಿಬಿ ಹಾಗೂ ಡೆಲ್ಲಿ ಎರಡೂ ತಂಡಗಳು ತಮ್ಮ-ತಮ್ಮ ಅಧಿಕೃತ ಟ್ವಿಟರ್‌ ಖಾತೆಯಲ್ಲಿ ಶೇರ್‌ ಮಾಡಿದ್ದವು. ಈ ಪಂದ್ಯದಲ್ಲಿ ಆರ್‌ಸಿಬಿ ಗೆದ್ದಿರಬಹುದು. ಆದರೆ, ಈ ವಿಡಿಯೋ ನೋಡುತ್ತಿದ್ದರೆ ಕ್ರಿಕೆಟ್ ಆಟ ಗೆದ್ದಿದೆ ಎಂದು ಹೇಳಬಹುದು. ಈ ವಿಡಿಯೋ ನೋಡಿದ ಸಾವಿರಾರು ಅಭಿಮಾನಿಗಳು ವಿರಾಟ್‌ ಕೊಹ್ಲಿ ಹಾಗೂ ಮೊಹಮ್ಮದ್ ಸಿರಾಜ್‌ ಅವರು ನಡೆದುಕೊಂಡ ಸದ್ಭಾವನೆಯನ್ನು ಮುಕ್ತಕಂಠದಿಂದ ಗುಣಗಾನ ಮಾಡಿದ್ದಾರೆ. ಪಂದ್ಯದ ಬಳಿಕ ಮಾತನಾಡಿದ ವಿರಾಟ್‌ ಕೊಹ್ಲಿ, "ಒಂದು ಹಂತದಲ್ಲಿ ನಾವು ಪಂದ್ಯವನ್ನು ಕಳೆದುಕೊಳ್ಳುವ ಪರಿಸ್ಥಿತಿಯಲ್ಲಿ ಇದ್ದೆವು. ಆದರೆ, ಮೊಹಮ್ಮದ್ ಸಿರಾಜ್‌ ಕೊನೆಯ ಓವರ್‌ ನಮಗೆ ವಿಶ್ವಾಸವನ್ನು ತುಂಬಿತು ಹಾಗೂ ಅವರು ತಂಡಕ್ಕಾಗಿ ವೃತ್ತಿಪರ ಕೆಲಸ ಮಾಡುತ್ತಾರೆಂದು ನಾವು ಭಾವಿಸಿದ್ದೆವು. ಒಂದು ವೇಳೆ ನಾವು ಫೀಲ್ಡಿಂಗ್‌ನಲ್ಲಿ ಕಳಪೆ ಪ್ರದರ್ಶನ ತೋರದೇ ಇದ್ದಿದ್ದರೆ ಇಷ್ಟೊಂದು ತಿಣುಕಾಡಿ ಗೆಲ್ಲುತ್ತಿರಲಿಲ್ಲ," ಎಂದು ಹೇಳಿದರು. "ಪ್ರತಿಯೊಂದು ಪಂದ್ಯದಲ್ಲಿಯೂ ಫ್ರೆಶ್‌ ಆಗಿ ಕಾಣುವುದು ತುಂಬಾ ಮುಖ್ಯ. ಮನೆಯಲ್ಲಿದ್ದಾಗ ಹಾಗೂ ಹೋಟೆಲ್‌ ರೂಂನಲ್ಲಿ ಕ್ವಾರಂಟೈನ್‌ನಲ್ಲಿದ್ದಾಗ ನಾನು ಸಾಕಷ್ಟು ವರ್ಕ್‌ಔಟ್‌ ಮಾಡಿದ್ದೇನೆ ಹಾಗೂ ಟೂರ್ನಿಯುದ್ದಕ್ಕೂ ನಮ್ಮನ್ನು ನಾವು ನಿರ್ವಹಿಸುವುದು ತುಂಬಾನೇ ಮುಖ್ಯ ಮತ್ತು ನೀವು ಪಂದ್ಯ ಆಡಲು ಕಣಕ್ಕೆ ಇಳಿದಾಗ ಫ್ರೆಶ್‌ ಆಗಿ ಕಾಣಬೇಕು," ಎಂದು ವಿರಾಟ್‌ ತಿಳಿಸಿದರು. ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಗೆಲುವು ಸಾಧಿಸಿದ ಬಳಿಕ ವಿರಾಟ್‌ ಕೊಹ್ಲಿ ನಾಯಕತ್ವದ ರಾಯಲ್‌ ಚಾಲೆಂಜರ್ಸ್ ಬೆಂಗಳೂರು ತಂಡ ಮತ್ತೊಮ್ಮೆ ಪಾಯಿಂಟ್ಸ್‌ ಟೇಬಲ್‌ನಲ್ಲಿ ಅಗ್ರ ಸ್ಥಾನಕ್ಕೇರಿತು. ವೇಗಿ ಹರ್ಷಲ್‌ ಪಟೇಲ್‌ ಪರ್ಪಲ್‌ ಕ್ಯಾಪ್‌ ಅನ್ನು ತನ್ನಲ್ಲಿಯೇ ಉಳಿಸಿಕೊಂಡರು. ಆರ್‌ಸಿಬಿ ಏ.30 ರಂದು ಇದೇ ಅಂಗಳದಲ್ಲಿ ಪಂಜಾಬ್‌ ಕಿಂಗ್ಸ್ ವಿರುದ್ಧ ಮುಂದಿನ ಪಂದ್ಯವಾಡಲಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3voWQZF
