ಅಹ್ಮದಾಬಾದ್‌: ಪ್ರಸಕ್ತ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ರಾಯಲ್‌ ಚಾಲೆಂಜರ್ಸ ಬೆಂಗಳೂರು ವಿರುದ್ಧ ಕೊನೆಯ ಎಸೆತದವರೆಗೆ ಕಠಿಣ ಹೋರಾಟ ನಡೆಸಿದ ಹೊರತಾಗಿಯೂ ಸೋಲು ಅನುಭವಿಸಿದ್ದಕ್ಕೆ ನಾಯಕ ಬೇಸರ ವ್ಯಕ್ತಪಡಿಸಿದರು. ಇಲ್ಲಿನ ನರೇಂದ್ರ ಮೋದಿ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ಮಂಗಳವಾರ ಆರ್‌ಸಿಬಿ ನೀಡಿದ್ದ 172 ರನ್‌ಗಳ ಗುರಿ ಹಿಂಬಾಲಿಸಿದ್ದ ಡೆಲ್ಲಿ ಕ್ಯಾಪಿಟಲ್ಸ್‌ಗೆ ಕೊನೆಯ ಓವರ್‌ನಲ್ಲಿ 14 ರನ್‌ ಅಗತ್ಯವಿತ್ತು. ಕೊನೆಯ ಓವರ್‌ ಬೌಲಿಂಗ್‌ ಮಾಡುವ ಜವಾಬ್ದಾರಿಯನ್ನು ಮೊಹಮ್ಮದ್‌ ಸಿರಾಜ್‌ ತೆಗೆದುಕೊಂಡರು. ಮೊದಲ ಮೂರು ಎಸೆತಗಳಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಕೇವಲ ಎರಡು ರನ್‌ ಗಳಿಸಿತು. ಈ ವೇಳೆ ಕೊನೆಯ ಮೂರು ಎಸೆತಗಳಲ್ಲಿ ಸಿಕ್ಸ್ ಬಾರಿಸಬೇಕೆಂಬ ಒತ್ತಡ ಪಂತ್‌ ಅವರ ಮೇಲೆ ಬಿತ್ತು. ಆದರೆ, ನಾಯಕ ರಿಷಭ್‌ ಪಂತ್‌, ಡಬಲ್‌ ರನ್‌ ಹಾಗೂ ಎರಡು ಬೌಂಡರಿ ಸಿಡಿಸಲಷ್ಟೇ ಸೀಮಿತರಾದರು. ಆ ಮೂಲಕ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಕೇವಲ ಒಂದು ರನ್‌ನಿಂದ ಸೋಲು ಅನುಭವಿಸಿತು. ಪಂದ್ಯದ ಬಳಿಕ ಪೋಸ್ಟ್‌ ಮ್ಯಾಚ್‌ ಪ್ರೆಸೆಂಟೇಷನ್‌ನಲ್ಲಿ ಮಾತನಾಡಿದ ರಿಷಭ್‌ ಪಂತ್‌, ಫೈನಲ್‌ ಓವರ್‌ನಲ್ಲಿ ಸಹ ಆಟಗಾರ ಶಿಮ್ರಾನ್‌ ಹೆಟ್ಮಾಯೆರ್ ಅವರೊಂದಿಗೆ ರೂಪಿಸಿದ್ದ ಗೇಮ್‌ ಪ್ಲ್ಯಾನ್‌ ಅನ್ನು ರಿವೀಲ್‌ ಮಾಡಿದರು. "ಪಂದ್ಯದಲ್ಲಿ ಸೋಲು ಅನುಭವಿಸಿದ್ದಕ್ಕೆ ತುಂಬಾ ಬೇಸರವಾಗುತ್ತಿದೆ. ಆದರೆ, ರಾಯಲ್‌ ಚಾಲೆಂಜರ್ಸ್ ಬೆಂಗಳೂರು ತಂಡ ಈ ವಿಕೆಟ್‌ನಲ್ಲಿ 10 ರಿಂದ 15 ರನ್‌ಗಳನ್ನು ಹೆಚ್ಚುವರಿಯಾಗಿ ಗಳಿಸಿದೆ," ಎಂದು ಪಂತ್‌ ಹೇಳಿದರು. "ಶಿಮ್ರಾನ್‌ ಹೆಟ್ಮಾಯೆರ್ ಅದ್ಭುತ ಇನಿಂಗ್ಸ್ ಆಡಿದರು. ಅವರು ಈ ರೀತಿ ಬ್ಯಾಟಿಂಗ್‌ ಮಾಡಿದ ಕಾರಣದಿಂದಲೇ ನಾವು ಈ ಪಂದ್ಯದಲ್ಲಿ ಅಂತಿಮ ಎಸೆತದವರೆಗೂ ಗೆಲುವಿಗಾಗಿ ಹೋರಾಟ ನಡೆಸಲು ಸಾಧ್ಯವಾಯಿತು. ಕೊನೆಯ ಓವರ್‌ನಲ್ಲಿ ಯಾರು ಸ್ಟ್ರೈಕ್‌ಗೆ ಹೋದರು ತಂಡವನ್ನು ಗೆಲ್ಲಿಸಬೇಕೆಂಬ ಯೋಜನೆಯನ್ನು ನಾನು ಮತ್ತು ಹೆಟ್ಮಾಯೆರ್ ರೂಪಿಸಿದ್ದೆವು," ಎಂದು ತಿಳಿಸಿದರು. ಇನ್ನು ಮೊದಲನೇ ಇನಿಂಗ್ಸ್‌ನಲ್ಲಿ ಎಬಿ ಡಿವಿಲಿಯರ್ಸ್ ವಿರುದ್ಧ ಕೊನೆಯ ಓವರ್‌ ಅನ್ನು ಮಾರ್ಕಸ್‌ ಸ್ಟೋಯ್ನಿಸ್‌ಗೆ ಬೌಲಿಂಗ್‌ ನೀಡಿದ ಕಾರಣವನ್ನು ಇದೇ ವೇಳೆ ರಿಷಭ್‌ ಪಂತ್‌ ಬಹಿರಂಗಪಡಿಸಿದರು. "ಓವರ್‌ಗಳನ್ನು ನಾವು ಸರಿಯಾಗಿ ಲೆಕ್ಕ ಹಾಕುತ್ತಿದ್ದೆವು ಹಾಗೂ ಇಲ್ಲಿನ ಪಿಚ್‌ ಸ್ಪಿನ್ನರ್‌ಗಳಿಗೆ ನೆರವಾಗುತ್ತಿಲ್ಲ ಎಂಬುದು ನಮಗೆ ಗೊತ್ತಿತ್ತು. ಈ ಕಾರಣದಿಂದ ಸ್ಟೋಯ್ನಿಸ್‌ಗೆ ಕೊನೆಯ ಓವರ್‌ ನೀಡಬೇಕಾಯಿತು," ಎಂದರು. "ಎಲ್ಲಾ ಪಂದ್ಯಗಳನ್ನು ನಾವು ಸಕಾರಾತ್ಮಕವಾಗಿ ತೆಗೆದುಕೊಂಡಿರುವುದು ಅದ್ಭುತ ಭಾವನೆಯನ್ನು ಮೂಡಿಸುತ್ತಿದೆ. ನಮ್ಮದು ಇನ್ನೂ ಯುವ ತಂಡವಾಗಿದ್ದು, ಪ್ರತಿಯೊಂದು ಪಂದ್ಯ ಹಾಗೂ ಪ್ರತಿಯೊಂದು ದಿನದಲ್ಲೂ ನಾವು ಕಲಿತು ಆಟವನ್ನು ಸುಧಾರಿಸಬೇಕಾಗಿದೆ," ಎಂದು ರಿಷಭ್‌ ಪಂತ್‌ ಮಾತು ಮುಗಿಸಿದರು. ಪಂದ್ಯದ ಸೋಲಿನೊಂದಿಗೆ ಡೆಲ್ಲಿ ಕ್ಯಾಪಿಟಲ್ಸ್ ತಂಡ 2021ರ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಟೂರ್ನಿಯ ಪಾಯಿಂಟ್ಸ್ ಟೇಬಲ್‌ನಲ್ಲಿ ಮೂರನೇ ಸ್ಥಾನಕ್ಕೆ ಇಳಿಯಿತು. ಇನ್ನು ವಿರಾಟ್‌ ಕೊಹ್ಲಿ ನಾಯಕತ್ವದ ಆರ್‌ಸಿಬಿ ಅಗ್ರ ಸ್ಥಾನವನ್ನು ಮತ್ತೆ ಅಲಂಕರಿಸಿತು. ಗುರುವಾರ ಇದೇ ಅಂಗಳದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಕೋಲ್ಕತಾ ನೈಟ್‌ ರೈಡರ್ಸ್ ವಿರುದ್ಧ ತನ್ನ ಮುಂದಿನ ಪಂದ್ಯವಾಡಲಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3dV0UuX
