ಮೈಸೂರು: ಮೈಸೂರಿನ ಸೈಯದ್ ಇಸಾಕ್ ಅವರ ಭಸ್ಮವಾದ ಗ್ರಂಥಾಲಯ ಮರು ನಿರ್ಮಾಣಕ್ಕೆ ಆರಂಭಿಸಲಾದ ಕ್ರೌಡ್ಫಂಡಿಂಗ್ನಲ್ಲಿ ಸಂಗ್ರಹವಾದ ಸುಮಾರು 29 ಲಕ್ಷ ರೂ.ಗಳನ್ನು ಮರಳಿ ದಾನಿಗಳ ಖಾತೆಗೆ ಜಮೆ ಮಾಡುವ ಕಾರ್ಯ ಆರಂಭವಾಗಿದೆ. ಇದೀಗ ಗ್ರಂಥಾಲಯ ನಿರ್ಮಾಣದ ಸಂಪೂರ್ಣ ಹೊಣೆ ಪಾಲಿಕೆ ಹಾಗೂ ಮುಡಾ ಹೆಗಲಿಗೆ ಬಿದ್ದಂತಾಗಿದೆ. ರಾಜೀವ್ ನಗರದ ನಿವಾಸಿ ಸೈಯದ್ ಇಸಾಕ್ ಅವರು ಸಂಗ್ರಹಿಸಿದ್ದ ಸುಮಾರು 11 ಸಾವಿರ ಪುಸ್ತಕಗಳಿದ್ದ ಗ್ರಂಥಾಲಯಕ್ಕೆ ಇತ್ತೀಚೆಗೆ ಬೆಂಕಿ ಬಿದ್ದು ಸಂಪೂರ್ಣ ಭಸ್ಮವಾಗಿತ್ತು. ಯಾರೋ ಕಿಡಿಗೇಡಿಗಳು ಈ ಕೃತ್ಯ ಎಸಗಿದ್ದಾರೆ ಎಂಬ ಆರೋಪದ ಹಿನ್ನೆಲೆಯಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಆಕ್ರೋಶ ವ್ಯಕ್ತವಾಗಿತ್ತು. ಅದೇ ಜಾಗದಲ್ಲಿ ಮತ್ತೆ ಕನ್ನಡ ಪುಸ್ತಕಗಳಿರುವ ಗ್ರಂಥಾಲಯವನ್ನು ಆರಂಭಿಸಬೇಕು ಎನ್ನುವ ಸಲಹೆಯೂ ಬಂತು. ಈ ಹಿನ್ನೆಲೆಯಲ್ಲಿ ಐಟಿ ಸಂಸ್ಥೆಯ ಉದ್ಯೋಗಿ ಫತಹೀನ್ ಮಿಸ್ಬಾ ಎಂಬ ಯುವತಿ ಕ್ರೌಡ್ ಫಂಡಿಂಗ್ ಸಂಸ್ಥೆ ಕಟ್ಟೋ ವೆಬ್ಸೈಟ್ನಲ್ಲಿ ಸೈಯದ್ ಇಸಾಕ್ ಅವರ ಗ್ರಂಥಾಲಯಕ್ಕೆ ನೆರವು ನೀಡುವಂತೆ ಮನವಿ ಮಾಡಿದ್ದರು. ಇದಕ್ಕೆ ನಿರೀಕ್ಷೆಗೂ ಮೀರಿ ಬೆಂಬಲ ವ್ಯಕ್ತವಾಗಿ ಸುಮಾರು 29 ಲಕ್ಷ ರೂ. ಸಂಗ್ರಹವಾಗಿದೆ. ಬದಲಾದ ನಿಲುವು: ಗ್ರಂಥಾಲಯಕ್ಕೆ ಯಾರೂ ಬೆಂಕಿ ಹಚ್ಚಲಿಲ್ಲ. ವ್ಯಕ್ತಿಯೊಬ್ಬ ಬೀಡಿ ಹತ್ತಿಸಿ ಎಸೆದ ಬೆಂಕಿ ಕಡ್ಡಿ ಕಸದ ರಾಶಿಗೆ ಬಿದ್ದು ಅನಾಹುತವಾಗಿರುವುದು ಪೊಲೀಸ್ ತನಿಖೆಯಲ್ಲಿ ಬಯಲಾಗಿತ್ತು. ಈ ವೇಳೆಗೆ ಮಧ್ಯ ಪ್ರವೇಶಿಸಿದ ನಗರಪಾಲಿಕೆ, ನಗರಾಭಿವೃದ್ಧಿ ಪ್ರಾಧಿಕಾರ ಹಾಗೂ ನಗರ ಗ್ರಂಥಾಲಯ ಪ್ರಾಧಿಕಾರ ಜಂಟಿ ಸಭೆ ನಡೆಸಿ ಅದೇ ಜಾಗದಲ್ಲಿ ಸಾರ್ವಜನಿಕ ಗ್ರಂಥಾಲಯ ಕಟ್ಟುವುದಾಗಿ ಹೇಳಿತು. ಮುಡಾ ಇದಕ್ಕಾಗಿ 5 ಸಾವಿರ ಚದರ ಅಡಿಯ ಜಾಗವನ್ನು ನೀಡಲು ಮುಂದೆ ಬಂದಿದೆ. ಸ್ವತಃ ಸೈಯದ್ ಇಸಾಕ್ ಕೂಡ ತನಗೆ ಬಂದಿರುವ ನೆರವಿನ ಮೊತ್ತವನ್ನು ಗ್ರಂಥಾಲಯಕ್ಕೆ ನೀಡುವುದಾಗಿ ಹೇಳಿದ್ದಾರೆ. ಈ ನಡುವೆ ಸಾರ್ವಜನಿಕ ಗ್ರಂಥಾಲಯಕ್ಕೆ ನಾವು ಏಕೆ ಹಣ ನೀಡಬೇಕು ಎಂದು ಕ್ರೌಡ್ಫಂಡಿಂಗ್ನಲ್ಲಿ ನೆರವು ನೀಡಿದ ದಾನಿಗಳು ಪ್ರಶ್ನೆ ಎತ್ತಿದ್ದಾರೆ. ನಾವು ನೀಡಿರುವುದು ಸೈಯದ್ ಇಸಾಕ್ ಅವರಿಗೆ. ಆದರೆ, ಸರಕಾರ ಗ್ರಂಥಾಲಯ ನಿರ್ಮಿಸುವುದಾದಲ್ಲಿಈ ಹಣದ ಅವಶ್ಯಕತೆ ಇಲ್ಲ ಎಂದು ಕೆಲವರು ಟ್ವೀಟ್ ಮಾಡಿದ್ದರು. ಇನ್ನು ಕೆಲವರು ತಮ್ಮ ಹಣವನ್ನು ಹಿಂತಿರುಗಿಸಿ ಎಂದು ಹೇಳಿದ್ದರು. ಹಣ ಮರಳಿಸಲು ಯುವತಿ ಮನವಿ: ಮುಡಾ, ನಗರ ಪಾಲಿಕೆ ಹಾಗೂ ನಗರ ಗ್ರಂಥಾಲಯ ಪ್ರಾಧಿಕಾರ ದಾನಿಗಳಿಂದ ಬಂದ ಹಣವನ್ನು ಬಳಸಿಕೊಳ್ಳಲು ನಿರ್ಧರಿಸಿ ಮಾಹಿತಿ ಪಡೆದುಕೊಂಡಿತ್ತು. ಆದರೆ, ಸರಕಾರಿ ವ್ಯವಸ್ಥೆಗೆ ಈ ಹಣ ನೀಡಲು ಸಾಧ್ಯವಿಲ್ಲ ಎನ್ನುವ ಕೆಲವರ ಅಭಿಪ್ರಾಯವನ್ನು ಸಮ್ಮತಿಸಿರುವ ಯುವತಿ ಫತಹೀನ್ ಮಿಸ್ಬಾ ಸುಮಾರು 29 ಲಕ್ಷ ರೂ.ಗಳನ್ನು ದಾನಿಗಳಿಗೆ ಹಿಂತಿರುಗಿಸುವಂತೆ ಕ್ರೌಡ್ಫಂಡಿಂಗ್ ನಡೆಸಿದ ಕೆಟ್ಟೋ ಸಂಸ್ಥೆಗೆ ಮನವಿ ಮಾಡಿದ್ದಾರೆ. ಇದಕ್ಕೆ ಒಪ್ಪಿರುವ ಸಂಸ್ಥೆ ಹಣ ಮರಳಿಸುತ್ತಿದೆ. 29 ಲಕ್ಷ ರೂ.ಗಳು ಗ್ರಂಥಾಲಯಕ್ಕೆ ಬಳಕೆಯಾಗದೆ ಹಿಂತಿರುಗುತ್ತಿದೆ.
from India & World News in Kannada | VK Polls https://ift.tt/32IhkjH
