ನೆಲ್ಸನ್: 10 ರನ್ ಅಂತರದಲ್ಲಿ ಐದು ವಿಕೆಟುಗಳನ್ನು ಕಳೆದುಕೊಂಡಿರುವ ನಾಟಕೀಯ ಕುಸಿತ ಕಂಡಿದೆ. ಪರಿಣಾಮ ಮೂರನೇ ಟ್ವೆಂಟಿ-20 ಅಂತಾರಾಷ್ಟ್ರೀಯ ಪಂದ್ಯದಲ್ಲಿ ಆತಿಥೇಯ ತಂಡವು 14 ರನ್ ಅಂತರದ ರೋಚಕ ಗೆಲುವು ಬಾರಿಸಿದೆ. ಇದರೊಂದಿಗೆ ಐದು ಪಂದ್ಯಗಳ ಟಿ20 ಸರಣಿಯಲ್ಲಿ 2-1 ಅಂತರದ ಮಹತ್ವದ ಮುನ್ನಡೆ ದಾಖಲಿಸಿದೆ. ಕೇನ್ ವಿಲಿಯಮ್ಸನ್ ಅನುಪಸ್ಥಿತಿಯಲ್ಲೂ ಮೊದಲ ಪಂದ್ಯ ಸೋತರೂ ಬಳಿಕದ ಎರಡೂ ಪಂದ್ಯಗಳನ್ನು ಗೆಲ್ಲುವ ಮೂಲಕ ಟಿಮ್ ಸೌಥಿ ಪಡೆ ಸರಣಿ ಗೆಲುವಿನತ್ತ ಮುನ್ನಡೆದಿದೆ. ಸರಣಿ ಗೆಲ್ಲಲು ಇನ್ನೆರಡು ಪಂದ್ಯಗಳು ಬಾಕಿ ಉಳಿದಿರುವಂತೆಯೇ ಒಂದು ಪಂದ್ಯ ಗೆಲ್ಲಬೇಕಾದ ಅಗತ್ಯವಿದೆ. ಮೊದಲು ಬ್ಯಾಟಿಂಗ್ ನಡೆಸಿದ ನ್ಯೂಜಿಲೆಂಡ್ ಕಾಲಿನ್ ಗ್ರ್ಯಾಂಡ್ಹೋಮ್ (55) ಆಕರ್ಷಕ ಅರ್ಧಶತಕದ ನೆರವಿನಿಂದ ಏಳು ವಿಕೆಟ್ ನಷ್ಟಕ್ಕೆ 180 ರನ್ಗಳ ಸ್ಪರ್ಧಾತ್ಮಕ ಮೊತ್ತ ಪೇರಿಸಿತ್ತು. ಮಾರ್ಟಿನ್ ಗಪ್ಟಿಲ್ (33), ರಾಸ್ ಟೇಲರ್ (27) ಹಾಗೂ ಜೇಮ್ಸ್ ನೀಶಮ್ (20) ಉಪಯುಕ್ತ ಇನ್ನಿಂಗ್ಸ್ ಕಟ್ಟಿದರು. ಬಳಿಕ ಗುರಿ ಬೆನ್ನಟ್ಟಿದ ಇಂಗ್ಲೆಂಡ್ಗೆ ಆರಂಭಿಕ ಡೇವಿಡ್ ಮಲನ್ (55) ಹಾಗೂ ಜೇಮ್ಸ್ ವಿನ್ಸ್ (49) ಭದ್ರ ಅಡಿಪಾಯ ಹಾಕಿಕೊಟ್ಟರು. ಒಂದು ಹಂತದಲ್ಲಂತೂ 13.5 ಓವರ್ಗಳಲ್ಲಿ ಎರಡು ವಿಕೆಟ್ ನಷ್ಟಕ್ಕೆ 139 ರನ್ ಗಳಿಸಿ ಸುಸ್ಥಿತಿಯಲ್ಲಿತ್ತು. ಅಂದರೆ ಅಂತಿಮ 31 ಎಸೆತಗಳಲ್ಲಿ ಎಂಟು ವಿಕೆಟುಗಳು ಬಾಕಿ ಉಳಿದಿರುವಂತೆಯೇ ತಂಡದ ಗೆಲುವಿಗೆ 42 ರನ್ಗಳ ಅವಶ್ಯಕತೆಯಿತ್ತು. ಆದರೆ ಈ ಹಂತದಲ್ಲಿ ನಾಟಕೀಯ ರೀತಿಯಲ್ಲಿ ಕುಸಿತ ಕಂಡ ಆಂಗ್ಲರ ಪಡೆ 18 ಎಸೆತಗಳ ಅಂತರದಲ್ಲಿ 10 ರನ್ ಪೇರಿಸುವಷ್ಟರಲ್ಲಿ ಐದು ವಿಕೆಟುಗಳನ್ನು ಕಳೆದುಕೊಂಡು ಸಂಕಷ್ಟಕ್ಕೊಳಗಾಯಿತು. ಪರಿಣಾಮ 17.5 ಓವರ್ಗಳಲ್ಲಿ 149 ರನ್ನಿಗೆ ಏಳು ವಿಕೆಟ್ ನಷ್ಟಗೊಂಡು ಸೋಲಿನ ದವಡೆಗೆ ಸಿಲುಕಿತ್ತು. ಇಲ್ಲಿಂದ ಬಳಿಕ ಇಯಾನ್ ಮಾರ್ಗನ್ ಪಡೆ ಚೇತರಿಸಿಕೊಳ್ಳಲೇ ಇಲ್ಲ. ಅಂತಿಮವಾಗಿ ಏಳು ವಿಕೆಟ್ ನಷ್ಟಕ್ಕೆ 166 ರನ್ ಗಳಿಸಲಷ್ಟೇ ಸಾಧ್ಯವಾಯಿತು. ಪರಿಣಾಮ 14 ರನ್ ಅಂತರದ ಸೋಲಿಗೆ ಶರಣಾಯಿತು. ಇದರೊಂದಿಗೆ ಮಲನ್ ಹಾಗೂ ವಿನ್ಸ್ ಹೋರಾಟವು ವ್ಯರ್ಥವೆನಿಸಿತು. ಕಿವೀಸ್ ಪರ ಲೂಕಿ ಫೆರ್ಗ್ಯೂಸನ್ ಹಾಗೂ ಬ್ಲೇರ್ ಟಿಕ್ನರ್ ತಲಾ ಎರಡು ವಿಕೆಟುಗಳನ್ನು ಕಿತ್ತು ಮಿಂಚಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2qruQs5
