ವಾಶಿಂಗ್ಟನ್: ಚೀನಾದಲ್ಲಿ ಕೋವಿಡ್ ಸೋಂಕು ಅಧಿಕೃತವಾಗಿ ಪತ್ತೆಯಾಗುವುದಕ್ಕೂ ಮೊದಲು ವುಹಾನ್ ಲ್ಯಾಬ್ ನಲ್ಲಿರುವ ಸಂಶೋಧಕರಲ್ಲಿ ಅನಾರೋಗ್ಯ ಕಾಣಿಸಿಕೊಂಡಿತ್ತು ಎಂಬ ಕುತೂಹಲಕಾರಿ ಅಂಶ ಇದೀಗ ಬೆಳಕಿಗೆ ಬಂದಿದೆ. ಪ್ರತಿಷ್ಠಿತ ವಾಲ್ಸ್ಟ್ರೀಟ್ ಜರ್ನಲ್ ಈ ಕುರಿತಾಗಿ ವರದಿ ಪ್ರಕಟಿಸಿದ್ದು, ವುಹಾನ್ ಇನ್ಸ್ಟಿಟ್ಯೂಟ್ ಆಫ್ ವೈರಾಲಜಿ( ಡಬ್ಲ್ಯುಐವಿ) ಯಲ್ಲಿ ಕೆಲಸ ಮಾಡುವ ಮೂವರು ಸಂಶೋಧಕರು ಅನಾರೋಗ್ಯದಿಂದ ಆಸ್ಪತ್ರೆಗೆ ದಾಖಲಾಗಿದ್ದರು ಎಂಬ ವಿಚಾರವನ್ನು ಹೊರಗೆಳೆಯುವ ಮೂಲಕ ಕೋವಿಡ್ ಸೋಂಕು ಚೀನಾದ ವುಹಾನ್ ಪ್ರಯೋಗಾಲಯದಿಂದಲೇ ಹರಡಿರುವ ಸಾಧ್ಯತೆಗಳ ಬಗ್ಗೆ ವ್ಯಕ್ತವಾಗಿರುವ ಸಂಶಯಗಳಿಗೆ ಪುಷ್ಠಿಯನ್ನು ಒದಗಿಸಿದೆ. ಈ ವರದಿಯಲ್ಲಿ ಅನಾರೋಗ್ಯ ಪೀಡಿತ ಸಂಶೋಧಕರ ಸಂಖ್ಯೆ, ಅವರ ಅನಾರೋಗ್ಯದ ಸಮಯ ಮತ್ತು ಆಸ್ಪತ್ರೆ ಭೇಟಿಗಳ ಬಗ್ಗೆ ಹೊಸ ವಿವರಗಳನ್ನು ಬಹಿರಂಗಪಡಿಸಿದೆ. ಕೋವಿಡ್ ಮೂಲ ಪತ್ತೆಯ ನಿಟ್ಟಿನಲ್ಲಿ ವಿಶ್ವ ಆರೋಗ್ಯ ಸಂಸ್ಥೆ ನಡೆಸಲಿರುವ ಸಭೆಯ ಮುನ್ನಾ ದಿನವೇ ಈ ಸುದ್ದಿ ಬಹಿರಂಗೊಂಡಿದ್ದು ಸಾಕಷ್ಟು ಕುತೂಹಲ ಕೆರಳಿಸಿದೆ. ಅಲ್ಲದೆ ತನಿಖೆಗೂ ಈ ಮಾಹಿತಿ ಪೂರಕವಾಗಬಹುದು ಎಂಬ ನಿರೀಕ್ಷೆಯೂ ಇದೆ. ವಿಶ್ವವನ್ನೇ ಬೆಚ್ಚಿ ಬೀಳಿಸಿರುವ ಕೋವಿಡ್ ಸೋಂಕಿನ ಮೂಲ ಯಾವುದು ಎಂಬುವುದು ಇನ್ನೂ ಚರ್ಚೆಯಲ್ಲಿದೆ. ಚೀನಾದಲ್ಲಿ ಈ ಸೋಂಕು ಮೊದಲು ಕಂಡು ಬಂದ ಹಿನ್ನೆಲೆಯಲ್ಲಿ ವುಹಾನ್ ಪ್ರಯೋಗಾಲಯದ ಮೇಲೆ ಎಲ್ಲರ ಸಂಶಯದ ದೃಷ್ಟಿ ಇದೆ. ಆದರೆ ಕೋವಿಡ್ ತಮ್ಮ ಪ್ರಯೋಗಾಲಯದಿಂದ ಹರಡಿಲ್ಲ ಎಂದು ಚೀನಾ ತಮ್ಮ ಮೇಲಿರುವ ಆರೋಪವನ್ನು ನಿರಾಕರಣೆ ಮಾಡುತ್ತಿದೆ. ಈ ಬಗ್ಗೆ ತನಿಖೆಗಳು ಅಂತರಾಷ್ಟ್ರೀಯ ಮಟ್ಟದಲ್ಲಿ ನಡೆಯುತ್ತಿದ್ದು ಇದೀಗ ವುಹಾನ್ ಪ್ರಯೋಗಾಲಯದ ಸಿಬ್ಬಂದಿ ಕೋವಿಡ್ ಅಧಿಕೃತವಾಗಿ ಹರಡುವುದಕ್ಕೂ ಮೊದಲೇ ಅನಾರೋಗ್ಯಗೊಂಡು ಆಸ್ಪತ್ರೆಯಲ್ಲಿ ಚಿಕಿತ್ಸೆಗಾಗಿ ದಾಖಲಾಗಿದ್ದರು ಎಂಬ ಅಂಶ ಚೀನಾದ ಮೇಲಿನ ಮತ್ತಷ್ಟು ಅನುಮಾನಗಳಿಗೆ ಎಡೆಮಾಡಿಕೊಟ್ಟಿದೆ.
from India & World News in Kannada | VK Polls https://ift.tt/3ufYDPN
