ಬೆಂಗಳೂರು: ರಾಜ್ಯದಲ್ಲಿ ನಾಯಕತ್ವ ಬದಲಾವಣೆ ಚರ್ಚೆ ಮತ್ತೆ ಮುನ್ನಲೆಗೆ ಬಂದಿದೆ. ಈ ಬಾರಿ ಈ ಚರ್ಚೆಗೆ ಆಹಾರವನ್ನು ನೀಡುತ್ತಿರುವವರು ಸಚಿವ ಸಿ.ಪಿ ಯೋಗೀಶ್ವರ್. ಸಿಪಿವೈ ದೆಹಲಿ ಭೇಟಿ ಹಾಗೂ ಬಿಎಸ್‌ವೈ ವಿರುದ್ಧದ ಬಹಿರಂಗ ಆಕ್ರೋಶ ಉರಿಯುವ ಬೆಂಕಿಗೆ ತುಪ್ಪ ಸುರಿದಂತಾಗಿದೆ. ಅಷ್ಟಕ್ಕೂ ಯಡಿಯೂರಪ್ಪ ಹಾಗೂ ವಿಜಯೇಂದ್ರ ವಿರುದ್ಧ ತಿರುಗಿ ಬೀಳಲು ಕಾರಣ ರಾಮನಗರದ ರಾಜಕೀಯವಂತೆ. ಹೌದು, ರಾಮನಗರದಲ್ಲಿ ರಾಜಕೀಯ ಅಸ್ಥಿತ್ವವನ್ನು ಉಳಿಸಿಕೊಳ್ಳಲು ಪ್ರಯತ್ನ ಪಡುತ್ತಿರುವ ಯೋಗೀಶ್ವರ್‌ಗೆ ಅಡ್ಡಗಾಲಾಗಿ ಮಾಜಿ ಸಿಎಂ ಎಚ್‌ಡಿ ಕುಮಾರಸ್ವಾಮಿ ಇದ್ದಾರೆ. ರಾಮನಗರದಲ್ಲಿ ಏನೇ ಬೆಳವಣಿಗೆ ಆಗಬೇಕಾದರೂ ಅಲ್ಲಿ ಸಚಿವ ಸಿ.ಪಿ ಯೋಗೀಶ್ವರ್‌ಗಿಂತ ಕುಮಾರಸ್ವಾಮಿ ಕೈ ಮೇಲಾಗುತ್ತದೆ. ಅಧಿಕಾರಿಗಳ ವರ್ಗಾವಣೆಯಿಂದ ಹಿಡಿದು ಮಹತ್ವದ ನಿರ್ಧಾರಗಳನ್ನು ಕೈಗೊಳ್ಳುವ ಸಂದರ್ಭದಲ್ಲಿ ಕೂಡಾ ಸಿ.ಪಿ ಯೋಗೀಶ್ವರ್‌ಗೆ ಹಿನ್ನಡೆಯಾಗುತ್ತಿದೆ. ಸಚಿವರಾಗಿದ್ದುಕೊಂಡೂ ಯಾವುದೇ ಪ್ರಯೋಜನ ಇಲ್ಲ ಎಂಬಂತ್ತಾಗಿದೆ ಎಂಬ ಪರಿಸ್ಥಿತಿ ಸಿಪಿ ಯೋಗೀಶ್ವರ್ ಅವರದ್ದು ಎನ್ನುತ್ತಿದೆ ಅವರ ಆಪ್ತ ಮೂಲಗಳು. ಈ ವಿಚಾರವನ್ನು ಸಿಎಂ ಬಿಎಸ್‌ ಯಡಿಯೂರಪ್ಪ ಅವರ ಗಮನಕ್ಕೆ ತಂದರೆ ಅದರಿಂದ ಯಾವುದೇ ಪ್ರಯೋಜನವಾಗುತ್ತಿಲ್ಲ. ಸಚಿವರ ಮಾತಿಗಿಂದ ವಿರೋಧ ಪಕ್ಷದಲ್ಲಿ ಇರುವವರ ಮಾತಿಗೆ ಹೆಚ್ಚಿನ ಮಹತ್ವ ಸಿಗುತ್ತಿದೆ ಎಂಬ ವಾತಾವರಣ ಸರ್ಕಾರದಲ್ಲಿದೆ. ಇದು ಸಿ.ಪಿ ಯೋಗೀಶ್ವರ್ ಅವರ ಅಸಮಾಧಾನಕ್ಕೆ ಕಾರಣ ಎನ್ನಲಾಗುತ್ತಿದೆ. ರಾಮನಗರದಲ್ಲಿ ಬಿಜೆಪಿ ರಾಜಕೀಯ ಅಸ್ಥಿತ್ವವನ್ನು ಉಳಿಸಿಕೊಳ್ಳಬೇಕಾದರೆ ಅಲ್ಲಿ ರಾಜಕೀಯ ಎದುರಾಳಿಗಳಾಗಿರುವ ಜೆಡಿಎಸ್‌ ಹಾಗೂ ಕಾಂಗ್ರೆಸ್‌ ವಿರುದ್ಧ ಹೋರಾಡಬೇಕು. ಆದರೆ ಎರಡೂ ಪಕ್ಷದ ನಾಯಕರ ಬಗ್ಗೆ ಸಿಎಂ ಬಿಎಸ್‌ವೈಗೆ ಮೃಧು ಧೋರಣೆ ಇದೆ. ಇದರ ಪರಿಣಾಮ ರಾಜಕೀಯವಾಗಿ ಜಿಲ್ಲೆಯಲ್ಲಿ ವಿರೋಧ ಪಕ್ಷಗಳ ಕೈ ಮೇಲಾಗುತ್ತಿದೆ. ಇಂತಹ ಸಂದರ್ಭದಲ್ಲಿ ತಮ್ಮ ಅಸ್ಥಿತ್ವವನ್ನು ಉಳಿಸಿಕೊಳ್ಳುವುದು ಹೇಗೆ ಎಂಬುವುದೇ ಇಲ್ಲಿ ಎದುರಾಗಿರುವ ಪ್ರಶ್ನೆಯಾಗಿದೆ. ಈ ಸಿಟ್ಟು ಬಿಎಸ್‌ ಯಡಿಯೂರಪ್ಪ ಹಾಗೂ ವಿಜಯೇಂದ್ರ ವಿರುದ್ಧ ಸಿಪಿ ಯೋಗೀಶ್ವರ್ ತಿರುಗಿ ಬೀಳಲು ಕಾರಣವಾಗಿದೆ ಎನ್ನುತ್ತಿವೆ ಮೂಲಗಳು. ಆದರೆ ಈ ಸಿಟ್ಟು ಮುಂದಿನ ದಿನಗಳಲ್ಲಿ ಯಾವ ತಿರುವು ಪಡೆದುಕೊಳ್ಳಲಿದೆ ಎಂಬುವುದು ಸದ್ಯಕ್ಕೆ ಸಾಕಷ್ಟು ಕುತೂಹಲ ಕೆರಳಿಸಿದೆ. ಈಗಾಗಲೇ ಯೋಗೀಶ್ವರ್ ಹೈಕಮಾಂಡ್ ಗಮನಕ್ಕೂ ಈ ವಿಚಾರವನ್ನು ತಂದಿದ್ದಾರೆ. ಆದರೆ ಹೈಕಮಾಂಡ್‌ನಿಂದ ಏನು ಉತ್ತರ ಸಿಕ್ಕಿದೆ ಎಂಬುವುದಕ್ಕೆ ಸ್ಪಷ್ಟತೆ ಇಲ್ಲ. ಸಚಿವರಲ್ಲಿ ಕಾಣಿಸಿಕೊಂಡಿರುವ ಸಿಟ್ಟಿಗೆ ಯಡಿಯೂರಪ್ಪ ಪರಿಹಾರ ನೀಡುತ್ತಾರಾ ಎಂಬ ಪ್ರಶ್ನೆಗೆ ಸದ್ಯಕ್ಕೆ ಉತ್ತರ ಸಿಗುತ್ತಿಲ್ಲ.
from India & World News in Kannada | VK Polls https://ift.tt/3vuInfn
