ಬೆಂಗಳೂರು: ಕೋವಿಡ್‌ನ ಎರಡನೇ ಅಲೆಯ ದಳ್ಳುರಿಯಲ್ಲಿ ಬೇಯುತ್ತಿರುವ ನಗರದ ಜನತೆಗೆ ಬಸ್‌ ಪ್ರಯಾಣ ದರ ಹೆಚ್ಚಳದ ಬರೆ ಹಾಕಲು ರಾಜ್ಯ ಸರಕಾರ ಹೊರಟಿದೆ. ಸೋಂಕಿತ ಪ್ರಕರಣಗಳ ಸಂಖ್ಯೆಯಲ್ಲಿಇಳಿಕೆಯಾಗಿ ಲಾಕ್‌ಡೌನ್‌ ನಿರ್ಬಂಧ ತೆರವಾಗುತ್ತಿದ್ದಂತೆಯೇ ಟಿಕೆಟ್‌ ದರ ಏರಿಕೆಯಾಗುವ ಸಾಧ್ಯತೆಗಳಿವೆ. ಪೆಟ್ರೋಲ್‌, ಡೀಸೆಲ್‌, ಅಡುಗೆ ಅನಿಲ ಮತ್ತು ಅಗತ್ಯ ವಸ್ತುಗಳ ಬೆಲೆ ಏರಿಕೆಯಿಂದ ಕಂಗೆಟ್ಟಿರುವ ಸಾರ್ವಜನಿಕರಿಗೆ ಬಸ್‌ ಪ್ರಯಾಣ ದರ ಏರಿಕೆಯ ಬಿಸಿಯೂ ತಟ್ಟಲಿದೆ. ಬಿಎಂಟಿಸಿಯು ಜನವರಿ ತಿಂಗಳಿನಲ್ಲಿ ಶೇ 20ರಷ್ಟು ಪ್ರಯಾಣ ದರ ಹೆಚ್ಚಳಕ್ಕೆ ಅನುಮತಿ ಕೋರಿ ಸರಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಿತ್ತು. ಸಾರಿಗೆ ಸಚಿವ ಅವರು ದರ ಏರಿಕೆಯ ಸುಳಿವು ನೀಡಿದ್ದಾರೆ. ರಾಜ್ಯ ಸರಕಾರವು 2020ರ ಫೆ. 25ರ ಮಧ್ಯರಾತ್ರಿಯಿಂದಲೇ ಜಾರಿಗೆ ಬರುವಂತೆ ಕೆಎಸ್‌ಆರ್‌ಟಿಸಿ, ವಾಯುವ್ಯ ಮತ್ತು ಈಶಾನ್ಯ ಸಾರಿಗೆ ಸಂಸ್ಥೆಗಳ ಪ್ರಯಾಣ ದರವನ್ನು ಶೇ 12ರಷ್ಟು ಹೆಚ್ಚಳ ಮಾಡಿತ್ತು. ಆದರೆ, ಬಿಎಂಟಿಸಿ ಪ್ರಯಾಣ ದರ ಏರಿಕೆಗೆ ಒಪ್ಪಿಗೆ ಕೊಟ್ಟಿರಲಿಲ್ಲ. ಇದೀಗ ದರ ಏರಿಕೆ ಪ್ರಸ್ತಾವದ ಚೆಂಡು ಮುಖ್ಯಮಂತ್ರಿಗಳ ಅಂಗಳದಲ್ಲಿದ್ದು, ಅನುಮೋದನೆ ನೀಡುವ ಸಾಧ್ಯತೆಗಳು ದಟ್ಟವಾಗಿವೆ. 7 ವರ್ಷಗಳ ಬಳಿಕ ದರ ಏರಿಕೆ ? ಆರ್ಥಿಕ ಸಂಕಷ್ಟದಿಂದ ನಲುಗಿ ಹೋಗಿರುವ ಬಿಎಂಟಿಸಿಗೆ ಟಿಕೆಟ್‌ ದರ ಹೆಚ್ಚಳದ ಮೂಲಕ ಚೇತರಿಕೆ ನೀಡಲು ಉದ್ದೇಶಿಸಲಾಗಿದೆ. 2014ರ ಫೆ.2ರಂದು 2ನೇ ಹಂತದಲ್ಲಿ1 ರೂ. ಪ್ರಯಾಣ ದರ ಹೆಚ್ಚಳ ಮಾಡಿದ್ದ ಸಂಸ್ಥೆಯು, ಮರು ವರ್ಷವೇ 2015ರ ಜ. 10ರಂದು 15 ಹಂತಗಳಲ್ಲಿದರ ಇಳಿಕೆ ಮಾಡಿತ್ತು. ಆನಂತರ ಡೀಸೆಲ್‌, ಬಿಡಿಭಾಗಗಳ ಬೆಲೆ ಏರಿಕೆ, ಸಿಬ್ಬಂದಿ ವೆಚ್ಚ ಹೆಚ್ಚಳದಿಂದಾಗಿ ಬಿಎಂಟಿಸಿಯ ನಷ್ಟದ ಪ್ರಮಾಣ ಜಾಸ್ತಿಯಾಯಿತು. ಈ ಹಿನ್ನೆಲೆಯಲ್ಲಿ ಹಲವು ಸಲ ಟಿಕೆಟ್‌ ದರ ಹೆಚ್ಚಳಕ್ಕೆ ಅನುಮತಿ ಕೋರಿ ಪ್ರಸ್ತಾವನೆ ಸಲ್ಲಿಸಿದ್ದರೂ, ಹಿಂದಿನ ಸರಕಾರಗಳು ಸಮ್ಮತಿ ನೀಡದೆ ತಿರಸ್ಕರಿಸಿದ್ದವು. 2020ರ ಫೆಬ್ರವರಿಯಲ್ಲೂ ಅನುಮತಿ ನೀಡಿರಲಿಲ್ಲ. ಕೊರೊನಾ ಸೋಂಕಿನಿಂದ ಸಂಸ್ಥೆಯು, ಆರ್ಥಿಕವಾಗಿ ದಿವಾಳಿ ಅಂಚಿಗೆ ತಲುಪಿದೆ. ಹೀಗಾಗಿ, ಪ್ರಯಾಣ ದರ ಏರಿಸಲು ಚಿಂತನೆ ನಡೆದಿದೆ. ಕೊರೊನಾದಿಂದ 1000 ಕೋಟಿ ನಷ್ಟ: ಕೋವಿಡ್‌ ಪೂರ್ವದಲ್ಲಿ ಬಿಎಂಟಿಸಿಯು ಬಸ್‌ಗಳ ಕಾರ್ಯಾಚರಣೆಯಿಂದ ನಿತ್ಯ 5 ಕೋಟಿ ರೂ. ಆದಾಯ ಗಳಿಸುತ್ತಿತ್ತು. ಕೊರೊನಾ ಸೋಂಕು ಕಾಣಿಸಿಕೊಂಡ ಬಳಿಕ ಆದಾಯ ಕುಸಿದು, ನಷ್ಟ ಹೆಚ್ಚಿದೆ. ಕಳೆದ ವರ್ಷ ಲಾಕ್‌ಡೌನ್‌ ನಿರ್ಬಂಧ ತೆರವಾದ ಬಳಿಕ ಬಸ್‌ಗಳನ್ನು ಆಚರಣೆ ಮಾಡಿದರೂ ಮೊದಲಿನ ಸ್ಥಿತಿಗೆ ಮರಳಲು ಸಾಧ್ಯವಾಗಲೇ ಇಲ್ಲ. ಆನಂತರ ವೇತನ ಹೆಚ್ಚಳಕ್ಕೆ ಒತ್ತಾಯಿಸಿ ನೌಕರರು ಮುಷ್ಕರ ಹೂಡಿದ್ದರಿಂದ ಆದಾಯ ಶೂನ್ಯವಾಯಿತು. ಮುಷ್ಕರ ಸ್ಥಗಿತಗೊಂಡು ಬಸ್‌ ಸಂಚಾರ ಶುರುವಾಗುತ್ತಿದ್ದಂತೆಯೇ ಕೋವಿಡ್‌ನ ಎರಡನೇ ಅಲೆ ಅಪ್ಪಳಿಸಿತು. ಪರಿಣಾಮ, ನಷ್ಟ ಹೆಚ್ಚುತ್ತಲೇ ಇದೆ. ಕೋವಿಡ್‌ ಸೋಂಕು ಕಾಣಿಸಿಕೊಂಡಾಗಿನಿಂದ ಇಲ್ಲಿಯವರೆಗೆ ಸಂಸ್ಥೆಗೆ 1000 ಕೋಟಿ ರೂ. ನಷ್ಟವಾಗಿದೆ. ಕೋವಿಡ್‌ ಹಿನ್ನೆಲೆಯಲ್ಲಿ ಆದಾಯ ಖೋತಾ ಆಗಿರುವುದರಿಂದ ಕಳೆದ ಏಪ್ರಿಲ್‌ನಿಂದ ನವೆಂಬರ್‌ವರೆಗೆ ಸರಕಾರವೇ ಸಿಬ್ಬಂದಿಯ ವೇತನಕ್ಕೆ ಹಣ ಬಿಡುಗಡೆ ಮಾಡಿದೆ. ಅಲ್ಲಿಂದ ಮಾರ್ಚ್‌ವರೆಗೆ ಸಂಸ್ಥೆಯೇ ತನ್ನ ಸ್ವಂತ ಸಂಪನ್ಮೂಲದಲ್ಲಿ ವೇತನ ನೀಡಿತ್ತು. ಇದೀಗ ಏಪ್ರಿಲ್‌ ಮತ್ತು ಮೇ ತಿಂಗಳ ವೇತನಕ್ಕೂ ಸರಕಾರವೇ ಅನುದಾನ ಒದಗಿಸಿದೆ. ಬಿಎಂಟಿಸಿಯ ಆರ್ಥಿಕ ಅಧಃಪತನವು 2012-13ರಿಂದಲೇ ಶುರುವಾಯಿತು. ಸದ್ಯ ಒಟ್ಟು 1350 ಕೋಟಿ ರೂ. ಸಂಚಿತ ನಷ್ಟದ ಭಾರ ಹೊತ್ತುಕೊಂಡಿದೆ. 2019-20ರಲ್ಲಿ1807 ಕೋಟಿ ರೂ. ಆದಾಯ ಬಂದಿದ್ದು, 2669.31 ಕೋಟಿ ರೂ. ವೆಚ್ಚವಾಗಿದೆ. ದರ ಏರಿಕೆ ಪ್ರಸ್ತಾವನೆ ಪರಿಶೀಲನೆಯಲ್ಲಿಬಿಎಂಟಿಸಿಯು ಶೇ 20ರಷ್ಟು ಪ್ರಯಾಣ ದರ ಏರಿಕೆಗೆ ಅನುಮತಿ ಕೋರಿ ಪ್ರಸ್ತಾವನೆ ಸಲ್ಲಿಸಿದೆ. ಕೋವಿಡ್‌ನಿಂದ ಜನರು ಸಂಕಷ್ಟದಲ್ಲಿದ್ದು, ದರ ಏರಿಕೆ ಪ್ರಸ್ತಾವನೆಯನ್ನು ಪರಿಶೀಲಿಸಲಾಗುತ್ತಿದೆ ಎಂದು ಸಾರಿಗೆ ಸಚಿವ ಲಕ್ಷ್ಮಣ ಸವದಿ ತಿಳಿಸಿದರು. ಕಳೆದ ವರ್ಷ ಬಿಎಂಟಿಸಿ ಹೊರತುಪಡಿಸಿ ಉಳಿದ ಮೂರು ನಿಗಮಗಳ ಪ್ರಯಾಣ ದರವನ್ನು ಶೇ 12ರಷ್ಟು ಹೆಚ್ಚಳ ಮಾಡಲಾಗಿತ್ತು. ಆಗಿನ ಪರಿಸ್ಥಿತಿಯಲ್ಲಿ ಬಿಎಂಟಿಸಿ ಬಸ್‌ಗಳ ಮಾಡುವುದು ಸೂಕ್ತವಲ್ಲ ಎಂಬ ಅಭಿಪ್ರಾಯ ವ್ಯಕ್ತವಾದ ಹಿನ್ನೆಲೆಯಲ್ಲಿ ದರ ಹೆಚ್ಚಿಸಿರಲಿಲ್ಲ ಎಂದು ಹೇಳಿದರು. ಬಿಎಂಟಿಸಿ ನಷ್ಟದ ಸವಾರಿ:
| ವರ್ಷ | ನಷ್ಟದ ಪ್ರಮಾಣ (ಕೋಟಿಗಳಲ್ಲಿ) |
| 2016-17 | 260.91 |
| 2017-18 | 217.61 |
| 2018-19 | 349.48 |
| 2019-20 | 549.34 |
| 2020-21 | 400 (ಅಂದಾಜು) |
from India & World News in Kannada | VK Polls https://ift.tt/2RXktKM
