ಪ್ರಮೋದ ಹರಿಕಾಂತ: ಸಾಮಾನ್ಯವಾಗಿ ಕೈದಿಗಳು ಪೆರೋಲ್ ಮೇಲೆ ಹೊರ ಹೋಗುವುದಕ್ಕೆ ಕಾಯುತ್ತಿರುತ್ತಾರೆ. ಆದರೆ, ಬೆಳಗಾವಿಯ ಹಿಂಡಲಗಾ ಕಾರಾಗೃಹದ ಕೆಲ ಕೈದಿಗಳು ಪೆರೋಲ್ ಪಡೆಯಲು ಬಯಸದೇ ಬಂದಿರುವ ಅವಕಾಶವನ್ನೂ ಬಳಸಿಕೊಳ್ಳಲು ಮನಸ್ಸು ಮಾಡುತ್ತಿಲ್ಲ. ಕಾರಣ, ಕೋವಿಡ್‌! ಹೌದು. ಕೊರೊನಾ ಹಿನ್ನೆಲೆಯಲ್ಲಿ ಆಯ್ದ ಕೈದಿಗಳಿಗೆ ಪೆರೋಲ್ ಮೇಲೆ ಕಳುಹಿಸಲು ಅವಕಾಶ ನೀಡಲಾಗಿದೆ. ಅದರಂತೆ ಹಿಂಡಲಗಾ ಜೈಲಿನ ಕೈದಿಗಳಲ್ಲೂ ಅನೇಕರನ್ನು ಪೆರೋಲ್ ಮೇಲೆ ಕಳುಹಿಸಲು ಆಯ್ಕೆ ಮಾಡಲಾಗಿತ್ತು. ಆದರೆ, ಕೆಲವರು ಜೈಲಿನಲ್ಲಿಯೇ ಇರಲು ಬಯಸಿದ್ದಾರೆ. ಸದ್ಯದ ಸಂದರ್ಭದಲ್ಲಿ ಮನೆಗಳಿಗೆ ಹೋದರೂ ಲಾಕ್‌ಡೌನ್‌ನಿಂದ ಎಲ್ಲಿಗೂ ಹೋಗುವಂತಿಲ್ಲ. ಕೋವಿಡ್‌ ಸೋಂಕಿಗೆ ಒಳಗಾದರೆ ಅದು ಇನ್ನೂ ಅಪಾಯ ಎನ್ನುವ ಕಾರಣಕ್ಕೆ ಶಿಕ್ಷೆ ಮುಗಿಯುವವರೆಗೆ ಜೈಲಿನಲ್ಲಿಯೇ ಉಳಿಯಲು ಬಯಸಿದ್ದಾರೆ. ಇನ್ನು, ಪೆರೋಲ್ ಮೇಲೆ ಹೊರಗೆ ಹೋಗುವ ಕೈದಿಗಳು ಒಳಗೆ ಬರುವಾಗ ಮತ್ತು ಹೊಸ ಕೈದಿಗಳು ಜೈಲಿಗೆ ಬಂದರೆ ಅಂಥವರಿಗಾಗಿ ಕ್ವಾರಂಟೈನ್‌ ವ್ಯವಸ್ಥೆ ಮಾಡಲಾಗಿದೆ. ಕೈದಿಗಳು ಮೂರು ಹಂತದಲ್ಲಿ ಕ್ವಾರಂಟೈನ್‌ ಆದ ಬಳಿಕವೇ ಅವರನ್ನು ಸಾಮಾನ್ಯ ಜೈಲಿಗೆ ಕಳುಹಿಸಲಾಗುತ್ತಿದೆ. ಉಪ್ಪು, ಬಿಸಿ ನೀರು, ಶುಂಠಿ ಟೀ: ಕೊರೊನಾ ಮುನ್ನೆಚ್ಚರಿಕೆ ಕ್ರಮವಾಗಿ ಕಾರಾಗೃಹದ ಕೈದಿಗಳಿಗೆ ನಿತ್ಯ ಉಪ್ಪು, ಬಿಸಿ ನೀರು ಮತ್ತು ಶುಂಠಿ ಚಹಾ ನೀಡಲಾಗುತ್ತಿದೆ. ಪ್ರತಿ ದಿನ ಬೆಳಗ್ಗೆ ಕೈದಿಗಳಿಗೆ ಬಾಯಿ ಮುಕ್ಕಳಿಸುವ ಸಲುವಾಗಿ ಸ್ವಲ್ಪ ಉಪ್ಪು ಮತ್ತು ಬಿಸಿ ನೀರು ಕೊಡಲಾಗುತ್ತದೆ. ಅದರ ಬಳಿಕ ಶುಂಠಿ ಬಳಸಿದ ಆಹಾರ ಮತ್ತು ಚಹಾ ಕೊಡಲಾಗುತ್ತಿದೆ. ವ್ಯಾಕ್ಸಿನೇಶನ್‌: ಜತೆಗೆ ಕೈದಿಗಳಿಗೆ ಕೊರೊನಾ ವ್ಯಾಕ್ಸಿನೇಶನ್‌ ಕೂಡ ನಡೆಯುತ್ತಿದೆ. ಕಾರಾಗೃಹದಲ್ಲಿ ಸುಮಾರು 800 ಕೈದಿಗಳು ಇದ್ದಾರೆ. ಅದರಲ್ಲಿ ಶೇ. 75 ರಷ್ಟು ಕೈದಿಗಳಿಗೆ ವ್ಯಾಕ್ಸಿನೇಶನ್‌ ಮಾಡಿಸಲಾಗಿದೆ. ಜೈಲು ಸಿಬ್ಬಂದಿಗೂ ವ್ಯಾಕ್ಸಿನ್‌ ನಡೆಯುತ್ತಿದೆ. ಎಲ್ಲರಿಗೂ ಮಾಸ್ಕ್‌ ಕಡ್ಡಾಯ ಮಾಡಲಾಗಿದೆ. ಕಳೆದ ವರ್ಷ ತಯಾರಿಸಿದ್ದ ಸುಮಾರು 20 ಸಾವಿರ ಮಾಸ್ಕ್‌ಗಳು ಇವೆ. ಅದರಲ್ಲಿ ಪ್ರತಿ ಕೈದಿಗೆ ವಾರಕ್ಕೆ ಎರಡು ಮಾಸ್ಕ್‌ಗಳನ್ನು ಕೊಡಲಾಗುತ್ತಿದೆ. 'ಇದುವರೆಗೆ ಜೈಲಿನಲ್ಲಿ ಇರುವ ಹಳೆ ಕೈದಿಗಳಿಗೆ ಒಬ್ಬರಿಗೂ ಕೊರೊನಾ ಎರಡನೇ ಅಲೆಯ ಸೋಂಕು ತಗುಲಿಲ್ಲ. ಇತ್ತೀಚೆಗೆ ಜೈಲಿಗೆ ಕರೆತಂದಿದ್ದ ಇಬ್ಬರು ಹೊಸ ಕೈದಿಗಳ ಪೈಕಿ ಒಬ್ಬರಿಗೆ ಸೋಂಕು ತಗುಲಿತ್ತು. ಮತ್ತೊಬ್ಬರನ್ನು ಕ್ವಾರಂಟೈನ್‌ನಲ್ಲಿಇಡಲಾಗಿದೆ' ಎಂದು ಜೈಲು ಮುಖ್ಯ ಅಧೀಕ್ಷಕ ಕೃಷ್ಣಕುಮಾರ ತಿಳಿಸಿದ್ದಾರೆ.
from India & World News in Kannada | VK Polls https://ift.tt/3wC93uM
