ಹೊಸದಿಲ್ಲಿ: ಡೊಮಿನಿಕಾದಲ್ಲಿ ಸೆರೆ ಸಿಕ್ಕಿರುವ ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌ ಹಗರಣದ ಆರೋಪಿ ಶೀಘ್ರವೇ ಭಾರತಕ್ಕೆ ಹಸ್ತಾಂತರಗೊಳ್ಳುವ ಸಾಧ್ಯತೆ ಇದೆ. ''ವಿಳಂಬ ಮಾಡದೇ ಆತನನ್ನು ನೇರ ಭಾರತಕ್ಕೆ ಹಸ್ತಾಂತರ ಮಾಡಿ,'' ಎಂದು ಆಂಟಿಗುವಾ ಮತ್ತು ಬಾರ್ಬುಡ ಪ್ರಧಾನಿ ಗಸ್ಟೋನ್‌ ಬ್ರೌನ್‌ ತಮ್ಮ ನೆರೆ ರಾಷ್ಟ್ರಕ್ಕೆ ಸೂಚನೆ ನೀಡಿದ್ದಾರೆ. ಪಿಎನ್‌ಬಿ ಹಗರಣದ ಬಳಿಕ ತಪ್ಪಿಸಿಕೊಂಡಿದ್ದ ಚೋಕ್ಸಿ, ಆಂಟಿಗುವಾದಲ್ಲಿಆಶ್ರಯ ಪಡೆದಿದ್ದ. ಇತ್ತೀಚೆಗೆ ಆ ರಾಷ್ಟ್ರದ ಜತೆ ಭಾರತ ಉತ್ತಮ ಬಾಂಧವ್ಯ ಕುದುರಿಸಿ ಆತನ ಸೆರೆಗೆ ಪ್ರಯತ್ನಿಸಿತ್ತು. ಈ ಬಗ್ಗೆ ಸುಳಿವು ಪಡೆದ ಚೋಕ್ಸಿ , ಮೂಲಕ ಕ್ಯೂಬಾಕ್ಕೆ ಪರಾರಿಯಾಗಲು ಪ್ರಯತ್ನಿಸಿದ್ದ. ಮಾರ್ಗ ಮಧ್ಯೆ ಮಂಗಳವಾರ ಆತನನ್ನು ಡೊಮಿನಿಕಾ ಕ್ರೈಮ್‌ ಬ್ರಾಂಚ್‌ ಪೊಲೀಸರು ಸೆರೆ ಹಿಡಿದಿದ್ದರು. ''ಗಂಭೀರ ಅಪರಾಧ ಪ್ರಕರಣದಲ್ಲಿ ಭಾರತಕ್ಕೆ ಬೇಕಾಗಿರುವ ಚೋಕ್ಸಿಗೆ ಯಾವುದೇ ಕಾರಣಕ್ಕೂ ಆಶ್ರಯ ನೀಡಬಾರದು. ವಾಪಸ್‌ ಆಂಟಿಗುವಾಕ್ಕೂ ಕಳಿಸದೇ ನೇರವಾಗಿ ಆತನನ್ನು ಭಾರತಕ್ಕೆ ಹಸ್ತಾಂತರ ಮಾಡಬೇಕು. ಈ ಬಗ್ಗೆ ಡೊಮಿನಿಕಾ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದೇನೆ,'' ಎಂದು ಬ್ರೌನ್‌ ತಿಳಿಸಿದ್ದಾರೆ. 13,500 ಕೋಟಿ ರೂ. ಪಿಎನ್‌ಬಿ ಹಗರಣದ ಪ್ರಮುಖ ಆರೋಪಿಯಾಗಿರುವ ನೀರವ್‌ ಮೋದಿ, ಸದ್ಯ ಲಂಡನ್‌ ಜೈಲಿನಲ್ಲಿದ್ದು, ಭಾರತಕ್ಕೆ ತಮ್ಮನ್ನು ಹಸ್ತಾಂತರಿಸುವುದರ ವಿರುದ್ಧ ಕಾನೂನು ಹೋರಾಟ ನಡೆಸಿದ್ದಾರೆ. ನೀರವ್‌ ಸಂಬಂಧಿಯಾಗಿರುವ ಚೋಕ್ಸಿ, 2017ರಲ್ಲಿಯೇ ಆಂಟಿಗುವಾ ಮತ್ತು ಬಾರ್ಬುಡ ಪೌರತ್ವ ಪಡೆದಿದ್ದು, 2018ರಲ್ಲಿ ಭಾರತದಿಂದ ಪರಾರಿಯಾಗಿದ್ದ.
from India & World News in Kannada | VK Polls https://ift.tt/3hYJXST
