ಬೆಂಗಳೂರು: ಶೀಘ್ರದಲ್ಲೇ ನಾಯಕತ್ವದ ಹಂಚಿಕೆಗೆ ಸಾಕ್ಷಿಯಾಗಲಿದೆ ಎಂದು ಭಾರತ ತಂಡದ ಮಾಜಿ ವಿಕೆಟ್‌ಕೀಪರ್‌ ಬ್ಯಾಟ್ಸ್‌ಮನ್‌ ಭವಿಷ್ಯ ನುಡಿದಿದ್ದಾರೆ. ಬಿಡುವಿಲ್ಲದ ಅಂತಾರಾಷ್ಟ್ರೀಯ ಕ್ರಿಕೆಟ್‌ನ ಒತ್ತಡ ನಿಭಾಯಿಸುವ ಉದ್ದೇಶದಿಂದ ಇಂದು ಬಹುತೇಕ ಎಲ್ಲ ತಂಡಗಳು ಕೂಡ ನಾಯಕತ್ವ ಹಂಚಿಕೆ ತಂತ್ರದ ಮೊರೆ ಹೋಗಿ ಆಗಿದೆ. ಕೇವಲ ಭಾರತ ಮತ್ತು ನ್ಯೂಜಿಲೆಂಡ್‌ (ಕೇನ್ ವಿಲಿಯಮ್ಸನ್) ತಂಡದಲ್ಲಿ ಮಾತ್ರ ಎಲ್ಲಾ ಮಾದರಿಗೆ ಒಬ್ಬ ನಾಯಕ ಉಳಿದುಕೊಂಡಿರುವುದು. ಈ ಕುರಿತಾಗಿ ತಮ್ಮ ಅಭಿಪ್ರಾಯ ಹಂಚಿಕೊಂಡಿರುವ ಕಿರಣ್ ಮೋರೆ, ಶೀಘ್ರದಲ್ಲೇ ರೋಹಿತ್‌ ಶರ್ಮಾ ಅವರಿಗೆ ಒಂದು ಮಾದರಿಯ ಕ್ರಿಕೆಟ್‌ನಲ್ಲಿ ನಾಯಕತ್ವ ಲಭ್ಯವಾಗಲಿದೆ ಎಂಬ ವಿಶ್ವಾಸ ಹೊರಹಾಕಿದ್ದಾರೆ. ಇತ್ತೀಚಿನ ದಿನಗಳಲ್ಲಿ ಕ್ಯಾಪ್ಟನ್ಸಿ ಹಂಚಿಕೆ ವಿಚಾರ ಕ್ರಿಕೆಟ್ ಜಗತ್ತಿನಲ್ಲಿ ಭಾರಿ ಚರ್ಚೆಯಾಗುತ್ತಿದೆ. ವಿರಾಟ್‌ ಕೊಹ್ಲಿ ಭಾರತ ಟೆಸ್ಟ್‌ ತಂಡದ ನಾಯಕತ್ವ ವಹಿಸಿಕೊಂಡು, ಸೀಮಿತ ಓವರ್‌ಗಳ ಕ್ರಿಕೆಟ್‌ನಲ್ಲಿ ನಾಯಕತ್ವವನ್ನು ರೋಹಿತ್‌ ಶರ್ಮಾ ಅವರಿಗೆ ಬಿಟ್ಟುಕೊಡಬೇಕು ಎಂದು ಹಲವು ಕ್ರಿಕೆಟ್ ಪಂಡಿತರು ಅಭಿಪ್ರಾಯ ಪಟ್ಟಿದ್ದರು. ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ರೋಹಿತ್‌ ಶರ್ಮಾ ಸಾರ್ವಕಾಲಿಕ ಅತ್ಯಂತ ಯಶಸ್ವಿ ನಾಯಕನಾಗಿದ್ದು, ಮುಂಬೈ ಇಂಡಿಯನ್ಸ್‌ ತಂಡಕ್ಕೆ ದಾಖಲೆಯ 5 ಬಾರಿ ಪ್ರಶಸ್ತಿ ಗೆದ್ದು ಕೊಟ್ಟಿದ್ದಾರೆ. ಅಂದಹಾಗೆ ನಾಯಕನಾಗಿ ಕೊಹ್ಲಿ ಸಾಧನೆಯು ಕೂಡ ಉತ್ತಮವಾಗೇ ಇದೆ. ಆದರೆ, ಒತ್ತಡದ ಸಂದರ್ಭಗಳಲ್ಲಿ ವಿರಾಟ್‌ ತೆಗೆದುಕೊಂಡ ಕೆಲ ನಿರ್ಧಾರಗಳನ್ನು ಹಲವು ಬಾರಿ ಟೀಕಿಸಲಾಗಿದೆ. "ರೋಹಿತ್‌ ಶರ್ಮಾ ಅವರಿಗೆ ಶೀಘ್ರವೇ ನಾಯಕತ್ವ ಲಭ್ಯವಾಗಲಿದೆ ಎಂಬುದು ನನ್ನ ಅನಿಸಿಕೆ. ಎಂಎಸ್‌ ಧೋನಿ ಆಡುವ ಸಂದರ್ಭದಲ್ಲಿ ಕೊಹ್ಲಿ ಕೂಡ ನಾಯಕತ್ವ ಹಂಚಿಕೊಂಡಿದ್ದರು. ಇನ್ನು ಎಷ್ಟು ದಿನಗಳು ಅವರು ಒಡಿಐ ಮತ್ತು ಟಿ20 ತಂಡಗಳಿಗೆ ನಾಯಕರಾಗಿ ಉಳಿಯಬಲ್ಲರು. ಅವರು ಕೂಡ ಈ ಬಗ್ಗೆ ಆಲೋಚನೆ ಮಾಡಲಿದ್ದಾರೆ. ಇಂಗ್ಲೆಂಡ್ ಪ್ರವಾಸದ ಬಳಿಕ ಕೊಹ್ಲಿ ಈ ಬಗ್ಗೆ ಅಂತಿಮ ನಿರ್ಧಾರ ತೆಗೆದುಕೊಳ್ಳುವ ಸಾಧ್ಯತೆ ಇದೆ," ಎಂದು ಇಂಡಿಯಾ ಟಿವಿ ಸಂದರ್ಶನದಲ್ಲಿ ಮೋರೆ ಹೇಳಿದ್ದಾರೆ. 'ವಿರಾಟ್‌ ಖುದ್ದಾಗಿ ಬಿಟ್ಟುಕೊಡಲಿದ್ದಾರೆ'ತಂಡದ ಭವಿಷ್ಯವನ್ನು ಗಮನದಲ್ಲಿಟ್ಟು ಹೇಳುವುದಾದರೆ ಟೀಮ್ ಇಂಡಿಯಾದಲ್ಲಿ ನಾಯಕತ್ವದ ಹಂಚಿಕೆಯ ಅಗತ್ಯವಿದೆ. ಸ್ವತಃ ವಿರಾಟ್‌ ಕೊಹ್ಲಿ ಒಂದು ಮಾದರಿಯ ಕ್ರಿಕೆಟ್‌ನಲ್ಲಿ ರೋಹಿತ್‌ಗೆ ನಾಯಕತ್ವ ಬಿಟ್ಟುಕೊಡಲಿದ್ದಾರೆ ಎಂದು 59 ವರ್ಷದ ಮಾಜಿ ಕ್ರಿಕೆಟಿಗ ಹೇಳಿದ್ದಾರೆ. "ನಾಯಕತ್ವದ ಹಂಚಿಕೆ ಟೀಮ್ ಇಂಡಿಯಾದಲ್ಲಿ ಖಂಡಿತಾ ಕೆಲಸ ಮಾಡಲಿದೆ. ಹಿರಿಯ ಆಟಗಾರರು ತಂಡದ ಭವಿಷ್ಯದ ಬಗ್ಗೆ ಗಮನ ನೀಡುತ್ತಾರೆ. ಮೂರೂ ಮಾದರಿಯ ನಾಯಕನಾಗಿ ಆಟದಲ್ಲೂ ಸ್ಥಿರ ಪ್ರದರ್ಶನ ಕಾಯ್ದುಕೊಳ್ಳುವುದು ಕೊಹ್ಲಿಗೆ ಕಷ್ಟವಾಗಲಿದೆ. ನಾಯಕತ್ವದ ಜೊತೆಗೆ ಇಷ್ಟು ದಿನ ಸ್ಥಿರ ಪ್ರದರ್ಶನ ಕಾಯ್ದುಕೊಂಡಿರುವುದು ನಿಜಕ್ಕೂ ಅದ್ಭುತವೇ ಸರಿ. ಆದರೆ, ಇದು ಸಾಕಾಗಿದೆ. ಇನ್ನು ರೋಹಿತ್‌ಗೆ ಅವಕಾಶ ಸಿಗಲಿ ಎಂದು ಖುದ್ದಾಗಿ ವಿರಾಟ್‌ ಒಂದು ಮಾದರಿಯಲ್ಲಿ ನಾಯಕತ್ವ ಬಿಟ್ಟುಕೊಡಲಿದ್ದಾರೆ," ಎಂದು ಮೋರೆ ಭವಿಷ್ಯ ನುಡಿದಿದ್ದಾರೆ. ಭಾರತ ತಂಡ ಜೂನ್ 2ರಂದು ಇಂಗ್ಲೆಂಡ್ ಪ್ರವಾಸ ಕೈಗೊಳ್ಳಲಿದ್ದು, ಮೊದಲಿಗೆ ನ್ಯೂಜಿಲೆಂಡ್‌ ಎದುರು ಐಸಿಸಿ ವಿಶ್ವ ಟೆಸ್ಟ್‌ ಚಾಂಪಿಯನ್‌ಷಿಪ್‌ ಟೂರ್ನಿಯ ಫೈನಲ್‌ ಪಂದ್ಯವನ್ನು ಆಡಲಿದ್ದು, ನಂತರ ಆತಿಥೇಯ ಇಂಗ್ಲೆಂಡ್ ಎದುರು 5 ಪಂದ್ಯಗಳ ಟೆಸ್ಟ್‌ ಸರಣಿಯಲ್ಲಿ ಪೈಪೋಟಿ ನಡೆಸಲಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3vwEhTW
