ಕೋಲ್ಕತಾ: ಯಾಸ್ ಚಂಡಮಾರುತದಿಂದ ಉಂಟಾದ ಹಾನಿ ಸಂಬಂಧ ನಡೆದ ಪರಾಮರ್ಶನಾ ಸಭೆಗೆ ಗೈರು ಹಾಜರಾಗುವ ಮೂಲಕ ಕೇಂದ್ರ ಸರ್ಕಾರದ ಜತೆಗೆ ಮತ್ತೊಂದು ಸುತ್ತಿನ ಸಮರಕ್ಕೆ ಮುಂದಾಗಿರುವ ಮುಖ್ಯಮಂತ್ರಿ , ತಮ್ಮ ವಿರುದ್ಧ ಮಾಧ್ಯಮಗಳಿಗೆ ಸುಳ್ಳು ಸುದ್ದಿ ಹರಡುತ್ತಿದೆ ಎಂದು ಪ್ರಧಾನಿ ಮೋದಿ ಅವರ ಕಚೇರಿ ವಿರುದ್ಧ ಗುಡುಗಿದ್ದಾರೆ. 'ನನ್ನನ್ನು ಈ ರೀತಿ ಅವಮಾನಿಸಬೇಡಿ. ನಮಗೆ ಅಮೋಘ ದಿಗ್ವಿಜಯ ಸಿಕ್ಕಿದೆ ಎಂಬ ಕಾರಣಕ್ಕೆ ನೀವು ಈ ರೀತಿ ವರ್ತಿಸುತ್ತಿದ್ದೀರಾ? ನೀವು ಎಲ್ಲವನ್ನೂ ಪ್ರಯತ್ನಿಸಿಯೂ ಸೋತಿರಿ. ಪ್ರತಿದಿನವೂ ನಮ್ಮ ಜತೆ ಏಕೆ ಜಗಳವಾಡುತ್ತೀರಿ?' ಎಂದು ಸರ್ಕಾರದ ವಿರುದ್ಧ ದೀದಿ ಹರಿಹಾಯ್ದಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ ಕರೆದಿದ್ದ ಪರಾಮರ್ಶನಾ ಸಭೆಗೆ ಮಮತಾ ಗೈರಾಗಿದ್ದರು. ಅವರು ಕೂರಬೇಕಾದ ಸೀಟು ಖಾಲಿ ಇರುವ ಚಿತ್ರವನ್ನು ಮಾಧ್ಯಮಗಳಿಗೆ ಬಿಡುಗಡೆ ಮಾಡಲಾಗಿತ್ತು. ಮಮತಾ ಸರ್ಕಾರದ ವಿರುದ್ಧ ಅಸಮಾಧಾನಗೊಂಡಿದ್ದ ಕೇಂದ್ರ ಸರ್ಕಾರ, ಮುಖ್ಯ ಕಾರ್ಯದರ್ಶಿ ಆಲಾಪನ್ ಬಂಡೋಪಾಧ್ಯಾಯ ಅವರನ್ನು ಹಿಂದಕ್ಕೆ ಕರೆಸಿಕೊಳ್ಳುವಂತೆ ಆದೇಶಿಸಿತ್ತು. ಅದರ ಬೆನ್ನಲ್ಲೇ ಮಮತಾ ಕೇಂದ್ರದ ವಿರುದ್ಧ ಸಿಡಿದೆದ್ದಿದ್ದಾರೆ. ವಾಯುನೆಲೆಯಲ್ಲಿ ಮೋದಿ ಅವರನ್ನು ಕೇವಲ 15 ನಿಮಿಷ ಭೇಟಿ ಮಾಡಿದ್ದ ಮಮತಾ, ತಮ್ಮ ಅಂದಾಜು ಹಾನಿಯ ಬಗ್ಗೆ ವರದಿ ಸಲ್ಲಿಸಿ ಅಲ್ಲಿಂದ ತೆರಳಿದ್ದರು. ನಂತರ ನಡೆಯಬೇಕಿದ್ದ ಪರಾಮರ್ಶನಾ ಸಭೆಗೆ ಗೈರಾಗಿದ್ದರು. ಮೊದಲೇ ಕಾರ್ಯಕ್ರಮ ಸಿದ್ಧವಾಗಿತ್ತು 'ನಾನು ಚಂಡಮಾರುತದಿಂದ ಹಾನಿಯಾದ ಪ್ರದೇಶಗಳಿಗೆ ಭೇಟಿ ನೀಡಬೇಕಿತ್ತು. ಯಾಸ್ ಚಂಡಮಾರುತದಿಂದ ಉಂಟಾದ ಹಾನಿಯನ್ನು ಪರಿಶೀಲಿಸಲು ನಾನು ಸಾಗರ್ ಮತ್ತು ಡಿಘಾಗಳಿಗೆ ಪ್ರಯಾಣಿಸಬೇಕಿತ್ತು. ನನ್ನ ಎಲಲ್ ಯೋಜನೆಗಳನ್ನೂ ಸಿದ್ಧಮಾಡಿಯಾಗಿತ್ತು. ಇದ್ದಕ್ಕಿದ್ದಂತೆ ನಮಗೆ ಕರೆ ಬಂತು. ಪ್ರಧಾನಿ ಅವರು ಬಂಗಾಳಕ್ಕೆ ಬಂದು ಚಂಡಮಾರುತದ ಬಳಿಕ ಪರಿಸ್ಥಿತಿ ತಿಳಿಯಲು ಬಯಸಿದ್ದಾರೆ ಎಂದು ಹೇಳಲಾಯಿತು' ಎಂದು ಮಮತಾ ಹೇಳಿದ್ದಾರೆ. ತಮ್ಮ ರಾಜಕೀಯ ಕಾರ್ಯಗಳನ್ನು ನೆರವೇರಿಸುವ ಸಲುವಾಗಿಯಷ್ಟೇ ಮೋದಿ ಕರೆದಿದ್ದರು. ಬಿಜೆಪಿ ಸೇರಿದಂತೆ ವಿರೋಧಪಕ್ಷಗಳು ಹಾಗೂ ರಾಜ್ಯಪಾಲ ಜಗದೀಪ್ ಧಂಖರ್ ಅವರನ್ನು ಇದು ಒಳಗೊಂಡಿತ್ತು ಎಂದು ದೀದಿ ಆರೋಪಿಸಿದ್ದಾರೆ. ಪ್ರಧಾನಿ ಹಾಗೂ ರಾಜ್ಯಪಾಲರನ್ನು ತಾವು 30 ನಿಮಿಷ ಕಾಯಿಸಿದ್ದಾಗಿ ಕೇಂದ್ರ ಸರ್ಕಾರದ ಆರೋಪವನ್ನು ನಿರಾಕರಿಸಿದ ಮಮತಾ, ವಾಯುನೆಲೆಯಲ್ಲಿ ಪ್ರಧಾನಿ ಅವರಿಗಾಗಿ ತಾವು 20 ನಿಮಿಷ ಕಾದಿದ್ದಾಗಿ ತಿಳಿಸಿದ್ದಾರೆ. ಒಳ ಪ್ರವೇಶಿಸಲು ಅನುಮತಿ ನೀಡಲಿಲ್ಲ 'ಪ್ರಧಾನಿ-ಮುಖ್ಯಮಂತ್ರಿ ಸಭೆ ನಡೆಯಬೇಕಿದ್ದ ಸ್ಥಳಕ್ಕೆ ನಾವು ತಲುಪಿದಾಗ, ಪ್ರಧಾನಿ ಕೆಲವು ಸಮಯದ ಹಿಂದೆಯೇ ಬಂದಿರುವುದು ನಮಗೆ ಗೊತ್ತಾಯಿತು. ಅಲ್ಲಿ ಯಾವುದೋ ಸಭೆ ನಡೆಯುತ್ತಿತ್ತು. ಹೊರಗೆ ಕಾಯುವಂತೆ ನಮಗೆ ಸೂಚಿಸಲಾಯಿತು. ಸಭೆ ನಡೆಯುತ್ತಿರುವುದರಿಂದ ಒಳಗೆ ಪ್ರವೇಶ ಇಲ್ಲ ಎನ್ನಲಾಯಿತು. ಕೆಲ ಸಮಯ ತಾಳ್ಮೆಯಿಂದ ಕಾದೆವು. ಬಳಿಕ ಮತ್ತೆ ಪ್ರಶ್ನಿಸಿದಾಗ, ಮುಂದಿನ ಒಂದು ಗಂಟೆ ಯಾರೂ ಒಳ ಪ್ರವೇಶಿಸುವಂತಿಲ್ಲ ಎಂದು ತಿಳಿಸಿದರು' ಎಂಬುದಾಗಿ ಮಮತಾ ಹೇಳಿದ್ದಾರೆ. 'ಸಭೆಯನ್ನು ಕಾನ್ಫರೆನ್ಸ್ ಕೊಠಡಿಗೆ ಸ್ಥಳಾಂತರಿಸಲಾಗಿದೆ ಎಂದು ಒಬ್ಬರು ತಿಳಿಸಿದರು. ನಾನು ಮತ್ತು ಮುಖ್ಯ ಕಾರ್ಯದರ್ಶಿ ಅಲ್ಲಿಗೆ ತೆರಳಲು ನಿರ್ಧರಿಸಿದೆವು. ಅಲ್ಲಿ ಹೋದಾಗ, ಪ್ರಧಾನಿ ಅವರು ರಾಜ್ಯಪಾಲರು, ಕೇಂದ್ರ ನಾಯಕರು ಮತ್ತು ವಿರೋಧಪಕ್ಷದ ಕೆಲವು ಶಾಸಕರೊಂದಿಗೆ ಸಭೆ ನಡೆಸುತ್ತಿರುವುದು ಕಂಡುಬಂತು. ಇದು ಅವರು ಹೇಳಿದ್ದಕ್ಕಿಂತ ಸಂಪೂರ್ಣ ವಿರುದ್ಧವಾಗಿದೆ. ಇದು ಪಿಎಂ-ಸಿಎಂ ಸಭೆಯಷ್ಟೇ ಆಗಬೇಕಿತ್ತು. ನಾವು ಪ್ರಧಾನಿಗೆ ನಮ್ಮ ವರದಿ ಸಲ್ಲಿಸಬೇಕಿತ್ತು. ಬಳಿಕ ಪ್ರಧಾನಿ ಅನುಮತಿ ಪಡೆದು ಡಿಘಾಕ್ಕೆ ತೆರಳಿದೆವು. ನಾನು ಮೂರು ಬಾರಿ ಪ್ರಧಾನಿಯ ಅನುಮತಿ ಕೇಳಿದ್ದೆ' ಎಂದು ದೀದಿ ತಿಳಿಸಿದ್ದಾರೆ. ಕಾಲು ಸ್ಪರ್ಶಿಸಲೂ ಸಿದ್ಧ 'ಪ್ರಧಾನಿಯ ಅಹಂಕಾರ ಕಡಿಮೆಯಾಗಬಹುದು ಎಂದು ಅವರ ಪಾದ ಸ್ಪರ್ಶಿಸಲು ಬಯಸಿದ್ದೇನೆ. ಏಕೆಂದರೆ ನಾನು ಬಂಗಾಳದ ಜನತೆಗೆ ಅತ್ಯುತ್ತಮವಾಗಿದ್ದನ್ನು ಮಾಡಲು ಬಯಸಿದ್ದೇನೆ. ಮುಖ್ಯ ಕಾರ್ಯದರ್ಶಿಯ ವರ್ಗಾವಣೆ ಆದೇಶವನ್ನು ಹಿಂದಕ್ಕೆ ಪಡೆದುಕೊಳ್ಳಿ' ಎಂದು ಮನವಿ ಮಾಡಿರುವ ಮಮತಾ, ಇದು ದೇಶದೆಲ್ಲೆಗಿನ ಅಧಿಕಾರಿಗಳಿಗೆ ಮಾಡಿದ ಅವಮಾನ ಎಂದು ಟೀಕಿಸಿದ್ದಾರೆ.
from India & World News in Kannada | VK Polls https://ift.tt/2SAXJjO
