ಹೊಸದಿಲ್ಲಿ: ಕ್ರಿಕೆಟ್ ಜಗತ್ತಿನಲ್ಲಿ ಸದಾ ಹಸಿ ಬಿಸಿ ಚರ್ಚೆಗೆ ಕಾರಣವಾಗುವ '' ರನ್‌ಔಟ್‌ ಬಗ್ಗೆ ಇದೀಗ ದಕ್ಷಿಣ ಆಫ್ರಿಕಾದ ಸ್ಟಾರ್‌ ಸ್ಪಿನ್ನರ್‌ ತಬ್ರೇಝ್‌ ಶಾಮ್ಸಿ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ. ಕ್ರಿಕೆಟ್‌ನ ನಿಯಮಗಳ ಪ್ರಕಾರ ಬೌಲರ್‌ ಚೆಂಡನ್ನು ಎಸೆಯುವ ಮೊದಲು ನಾನ್‌ ಸ್ಟ್ರೈಕ್‌ನಲ್ಲಿರುವ ಬ್ಯಾಟ್ಸ್‌ಮನ್‌ ಯಾವುದೇ ಕಾರಣಕ್ಕೂ ಕ್ರೀಸ್‌ನಿಂದ ಹೊರಬರುವ ಹಾಗಿಲ್ಲ. ಹೀಗೆ ಬೌಲರ್‌ ಚೆಂಡನ್ನು ಎಸೆಯೋ ಮೊದಲೇ ರನ್‌ ಕದಿಯಲು ಮುಂದಾಗುವ ನಾನ್‌ ಸ್ಟ್ರೈಕರ್‌ನ ಬೌಲರ್‌ ರನ್‌ಔಟ್‌ ಮಾಡಬಹುದಾಗಿದೆ. ಕ್ರಿಕೆಟ್ ಜಗತ್ತಿನಲ್ಲಿ ಈ ರೀತಿಯ ರನ್‌ಔಟ್‌ಗಳ ಉದಾಹರಣೆ ಬಹಳಷ್ಟಿದೆ. ಭಾರತ ತಂಡ ಮಾಜಿ ನಾಯಕ ವಿನೂ ಮಂಕಡ್ ಅವರಿಂದ ಈ ರೀತಿಯ ರನ್‌ಔಟ್‌ ಹೆಚ್ಚು ಸುದ್ದಿ ಮಾಡಿದ ಹಿನ್ನೆಲೆಯಲ್ಲಿ ಇದಕ್ಕೆ ಮಂಕಡಿಂಗ್ ಎಂದೇ ಕರೆಯಲಾಗುತ್ತದೆ. ಇತ್ತೀಚಿನ ದಿನಳಲ್ಲಿ ಮಂಕಡಿಂಗ್ ಮೂಲಕ ರನ್‌ಔಟ್‌ ಮಾಡುವುದು ಕ್ರೀಡಾ ಸ್ಫೂರ್ತಿಗೆ ವಿರುದ್ಧವಾದದ್ದು ಎಂದು ಹಲವರು ವಾದಿಸಿದ್ದಾರೆ. ಆದರೆ ನಿಯಮಗಳನ್ನು ಗಮನಿಸಿದರೆ. ಇದು ನ್ಯಾಯ ಸಮ್ಮತವಾದುದ್ದಾಗಿದೆ. ಇಂದು ಬ್ಯಾಟ್ಸ್‌ಮನ್‌ ಸ್ನೇಹಿ ಆಗಿರುವ ಕ್ರಿಕೆಟ್‌ನಲ್ಲಿ ನಿಯಮ ಬದ್ಧವಾಗಿ ಮಂಕಡಿಂಗ್ ಮೂಲಕ ಔಟ್‌ ಮಾಡುವುದರಲ್ಲಿ ಯಾವುದೇ ತಪ್ಪಿಲ್ಲ ಎಂದು ಭಾರತ ತಂಡದ ಅನುಭವಿ ಆಫ್‌ ಸ್ಪಿನ್ನರ್‌ ಇತ್ತೀಚಿನ ದಿನಗಳಲ್ಲಿ ಬಲವಾಗಿ ವಾದಿಸುತ್ತಾ ಬಂದಿದ್ದಾರೆ. ಅಂದಹಾಗೆ 2019ರ ಐಪಿಎಲ್‌ ಟೂರ್ನಿಯಲ್ಲಿ ರಾಜಸ್ಥಾನ್‌ ರಾಯಲ್ಸ್‌ ತಂಡದ ಬ್ಯಾಟ್ಸ್‌ಮನ್‌ ಜೋಸ್‌ ಬಟ್ಲರ್‌ ಅವರನ್ನು ಆರ್‌ ಅಶ್ವಿನ್ ಇದೇ ರೀತಿಯಲ್ಲಿ ರನ್‌ಔಟ್‌ ಮಾಡಿದ್ದರು. ಅಂದು ರಾಯಲ್ಸ್‌ ತಂಡ ಇನ್ನೇನು ಬಟ್ಲರ್‌ ಆರ್ಭಟದ ಬಲದಿಂದ ಪಂದ್ಯ ಗೆಲ್ಲುವುದಿತ್ತು. ಆ ಸಂದರ್ಭದಲ್ಲಿ ಅಶ್ವಿನ್ ತಮ್ಮ ಸಮಯ ಪ್ರಜ್ಞೆಯ ಮೂಲಕ ಬಟ್ಲರ್‌ಗೆ ಮಂಕಡಿಂಗ್ ಮೂಲಕ ಪೆವಿಲಿಯನ್ ದಾರಿ ತೋರಿದ್ದರು. ಆದರೆ, ಇದು ಕ್ರಿಕೆಟ್ ಜಾಗತ್ತಿನಲ್ಲಿ ಇನ್ನಿಲ್ಲದ ಚರ್ಚೆಗೆ ಕಾರಣವಾಯಿತು. ಹಲವುರು ಇದು ಕ್ರೀಡಾ ಸ್ಫೂರ್ತಿಗೆ ವಿರುದ್ಧ ಎಂದು ವಾದಿಸಿದರೆ. ನಿಯಮಗಳ ಪ್ರಕಾರ ಇದು ಸರಿ. ಬ್ಯಾಟ್ಸ್‌ಮನ್‌ಗಳು ಮೊದಲೇ ಕ್ರೀಸ್‌ನಿಂದ ಹೊರಗುಳಿಯುವುದು ಮೋಸ ಮಾಡಿದಂತೆ ಎಂದು ಅಶ್ವಿನ್ ಪರವಾಗಿ ಹಲವರು ನಿಂತರು. ಇದೀಗ ಈ ಬಗ್ಗೆ ಚರ್ಚೆಗೆ ಇಳಿದಿರುವ ಹರಿಣ ಪಡೆಯ ಸ್ಟಾರ್‌ ಸ್ಪಿನ್ನರ್‌ ತಬ್ರೇಝ್‌ ಶಾಮ್ಸಿ, ಪ್ರತಿಯೊಬ್ಬ ಬೌಲರ್‌ ಕೂಡ ಇಂದು ಮಂಕಡ್ ಮಾಡುವ ಅಗತ್ಯವಿದೆ. ಇಲ್ಲಿ ಅಂಜಿಕೊಳ್ಳುವ ಪ್ರಶ್ನೆಯೇ ಎದುರಾಗಬಾರದು. ಇದು ನಿಯಮದಲ್ಲೇ ಇದೆ ಎಂದು ಟ್ವೀಟ್‌ ಮಾಡುವ ಮೂಲಕ ಅಶ್ವಿನ್ ಹೋರಾಟಕ್ಕೆ ಜೊತೆಯಾಗಿದ್ದಾರೆ. "ಆರ್‌ ಅಶ್ವಿನ್... ಎಲ್ಲಾ ಬೌಲರ್‌ಗಳು ಮಂಕಡ್ ಮಾಡಲು ಭಯಪಡದೇ ಮುಂದಾಗಬೇಕು. ಇದು ಆಟದ ನಿಯಮದಲ್ಲೇ ಇದೆ. ಅಲ್ಲಿ ಬ್ಯಾಟ್ಸ್‌ಮನ್‌ ಮೋಸ ಮಾಡುತ್ತಿರುವ ಸಂದರ್ಭದಲ್ಲಿ ಬೌಲರ್‌ ಮಂಕಡ್ ಮಾಡಿದ್ದಾರೆ. ಇದಕ್ಕೆ ಬೌಲರ್‌ ವಿರುದ್ಧ 'ಕ್ರೀಡಾ ಸ್ಫೂರ್ತಿ' ತೋರಿಲ್ಲ ಎಂದು ನಿಂದಿಸುವುದು ಏಕೆ?," ಎಂದು ಶಾಮ್ಸಿ ಟ್ವೀಟ್‌ ಮಾಡಿದ್ದಾರೆ. ಕೆಲ ದಿನಗಳ ಹಿಂದಷ್ಟೇ ಐಪಿಎಲ್‌ನಲ್ಲಿ ನಡೆದ ಘಟನೆ ಒಂದನ್ನು ಅಶ್ವಿನ್ ಬಹಿರಂಗ ಪಡಿಸಿದ್ದರು. 2019ರ ಐಪಿಎಲ್‌ ವೇಳೆ ಪಂಜಾಬ್‌ ಕಿಂಗ್ಸ್‌ ಪರ ಆಡುತ್ತಿದ್ದ ವೇಗಿ ಅಂಕಿತ್ ರಜಪೂತ್‌ ತಾವು ಮಂಕಡ್ ಮಾಡಿದರೆ ಎಲ್ಲರೂ ತಮ್ಮನ್ನು ಖಳ ನಾಯಕನ ರೀತಿ ಕಾಣುತ್ತಾರೆ ಎಂದು ಹೇಳಿಕೊಂಡಿದ್ದರು ಎಂಬ ವಿಚಾರವನ್ನು ಅಶ್ವಿನ್ ಹೊರಹಾಕಿದ್ದರು. ಮಂಕಡ್ ಮಾಡಿದರೆ ಬೌಲರ್‌ನ ವಿಲನ್‌ ರೀತಿ ಕಾಣುವುದರಿಂದ ಆತನ ಮೇಲೆ ಎದುರಾಗುವ ಮಾನಸಿಕ ಚಿತ್ರಹಿಂಸೆಯ ಬಗ್ಗೆ ಒಮ್ಮೆ ಆಲೋಚಿಸಿ. ಇದು ನಿಲ್ಲಬೇಕು, ನಿಯಮ ಬದ್ಧವಾಗಿರುವ ಮಂಕಡ್ ಮಾಡುವುದರಲ್ಲಿ ಯಾವುದೇ ತಪ್ಪಿಲ್ಲ ಎಂದು 34 ವರ್ಷದ ಆಫ್‌ ಸ್ಪಿನ್ನರ್‌ ಅಶ್ವಿನ್ ವಾದಿಸಿದ್ದರು. ಇದಕ್ಕೆ ಶಾಮ್ಸಿ ಇದೀಗ ಕೈ ಜೋಡಿಸಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3yQ8Aak
