ಕೆ. ಎಚ್‌. ರುದ್ರಯ್ಯ : ಕೋವಿಡ್‌ ನಿಯಂತ್ರಣಕ್ಕಾಗಿ ಗ್ರಾಮೀಣ ಭಾಗದಲ್ಲಿ ಆರೋಗ್ಯ ಇಲಾಖೆ ಕೋವಿಡ್‌ ಸಂಚಾರಿ ನಡೆಸುತ್ತಿದೆ. ಆದರೆ, ಆರೋಗ್ಯದ ಅರಿವಿನ ಕೊರತೆ, ಕೊರೊನಾ ಭಯ, ದುಡಿಮೆಯ ಧಾವಂತ ಮತ್ತಿತರ ಕಾರಣದಿಂದ ಜನ ಕೋವಿಡ್‌ ಪರೀಕ್ಷೆಗೆ ಚಕ್ಕರ್‌ ಹಾಕುತ್ತಿದ್ದಾರೆ. ಜಿಲ್ಲೆಯ ಗ್ರಾಮೀಣ ಭಾಗದಲ್ಲಿ ಕೊರೊನಾ ಸೋಂಕು ವ್ಯಾಪಕವಾಗಿ ಹರಡುತ್ತಿದ್ದು, ಇದರ ನಿಯಂತ್ರಣಕ್ಕಾಗಿ ಆಯಾ ಹೋಬಳಿ ಮಟ್ಟದಲ್ಲಿ ಸೆಕ್ಟರ್‌ ಮ್ಯಾಜಿಸ್ಪ್ರೇಟ್‌, ಕಂದಾಯ ನಿರೀಕ್ಷಕ, ಆಯಾ ಪಿಡಿಒ, ಪ್ರಾಥಮಿಕ ಆರೋಗ್ಯ ಕೇಂದ್ರದ ದಾದಿಯರು, ಆಶಾ ಮತ್ತಿತರೆ ಸಿಬ್ಬಂದಿ ಕೋವಿಡ್‌ ಪ್ರಕರಣಗಳು ಪತ್ತೆಯಾದ ಗ್ರಾಮಗಳಿಗೆ ತೆರಳಿ ಪರೀಕ್ಷೆ ಮಾಡುತ್ತಿದ್ದಾರೆ. ಪರೀಕ್ಷೆಗೂ ಮುನ್ನ ದಿನ ಪಂಚಾಯಿತಿ ಸಿಬ್ಬಂದಿ ಊರಲ್ಲಿ ಟಾಂಟಾಂ ಹೊಡೆಸಿ ನಾಳೆ ಗ್ರಾಮಕ್ಕೆ ಕೋವಿಡ್‌ ಟೆಸ್ಟಿಗೆ ಬರಲಿದ್ದಾರೆ ಎಲ್ಲ ಮನೆಯಲ್ಲಿರಿ ಎಂದು ಹೇಳುತ್ತಿದ್ದಾರೆ. ಆದಾಗ್ಯೂ ಜನ ಪರೀಕ್ಷೆಗೆ ಚಕ್ಕರ್‌ ಹೊಡೆದು ದುಡಿಮೆಗೆ ಹೋಗುತ್ತಿದ್ದಾರೆ. ಮತ್ತೆ ಕೆಲವರು ಮನೆಯಲ್ಲೇ ಗಪ್‌ಚುಪ್ಪಾಗಿ ಕುಳಿತು ಕಾಲ ಕಳೆಯುತ್ತಿದ್ದಾರೆ. ಮನೆಮದ್ದಿಗೆ ಮೊರೆ: ಆರೋಗ್ಯದ ಬಗ್ಗೆ ಗ್ರಾಮೀಣ ಜನರಲ್ಲಿ ಅರಿವಿನ ಕೊರತೆ, ಪರೀಕ್ಷೆಯಲ್ಲಿ ಪಾಸಿಟಿವ್‌ ಬಂದೀತು ಎಂಬ ಭಯ, ಜ್ವರ, ಶೀತ, ನೆಗಡಿ ಬಂದಲ್ಲಿ ಜೀರಿಗೆ ಮೆಣಸಿನ ಕಾಯಿ ಚಟ್ನಿ, ಮೆಣಸಿನ ಸಾಂಬರ್‌ ಮತ್ತಿತರೆ ಮನೆ ಮದ್ದು ಮಾಡಿಕೊಳ್ಳುವ ಜನರಿಂದ ಸೋಂಕು ಮುಗುಮ್ಮಾಗಿ ಹಬ್ಬುತ್ತದೆ. ಕೋವಿಡ್‌ ಗುಣಲಕ್ಷಣಗಳು ಕಂಡುಬಂದರೂ ಟೆಸ್ಟಿಂಗ್‌ನಿಂದ ದೂರ ಉಳಿಯುತ್ತಿರುವುದರಿಂದ ಗ್ರಾಮೀಣ ಭಾಗದಲ್ಲಿ ಸದ್ದಿಲ್ಲದೆ ಕೊರೊನಾ ಪ್ರಕರಣಗಳು ನಿರಂತರವಾಗಿ ಪತ್ತೆಯಾಗುತ್ತಿವೆ. ತಾಲೂಕಿನ ವಸ್ತಾರೆ ಹೋಬಳಿಯಲ್ಲಿ ಕಳೆದ ಒಂದು ವಾರದಿಂದ ಹಳ್ಳಿ ಹಳ್ಳಿಗಳಲ್ಲೂ ಕೋವಿಡ್‌ ಪರೀಕ್ಷೆ ಮಾಡಲಾಗುತ್ತಿದೆ. ಕೊರೊನಾ ಪ್ರಕರಣಗಳು ಹೆಚ್ಚು ಪತ್ತೆಯಾಗಿದ್ದ ಉಳುವಾಗಿಲು, ತೋರಣಮಾವು ಗ್ರಾಮಗಳು ಬಿಟ್ಟರೆ ಉಳಿದ ಹಳ್ಳಿಗಳಲ್ಲಿ ಬೆರಳೆಣಿಕೆಯ ಜನ ಪರೀಕ್ಷೆಗೆ ಹಾಜರಾಗಿದ್ದಾರೆ. ತಾಲೂಕಿನ ಗಡಬನಹಳ್ಳಿ, ನೆರಡಿ, ಕೂದುವಳ್ಳಿ, ಚನ್ನಗೊಂಡನಹಳ್ಳಿ, ಮಾರಿಗುಡಿ, ಕಟ್ರುಮನೆ ಮತ್ತಿತರೆ ಗ್ರಾಮಗಳಲ್ಲಿ ಕೋವಿಡ್‌ ಮೊಬೈಲ್‌ ಟೆಸ್ಟಿಂಗ್‌ ಮಾಡಲಾಗಿದೆ. ಆದರೆ, ನಿರೀಕ್ಷೆಗೆ ತಕ್ಕಂತೆ ಜನ ಬಂದಿಲ್ಲ. ಆದರೆ, ರೋಗದ ಗುಣಲಕ್ಷಣ ಇದ್ದವರೂ ಪರೀಕ್ಷೆಗೆ ಹಿಂದೇಟು ಹಾಕುತ್ತಿರುವುದು ಆರೋಗ್ಯವಂತ ಜನರ ನಿದ್ದೆಗೆಡಿಸಿದೆ. ಚಿಕ್ಕಮಗಳೂರು ಜಿಲ್ಲೆಯಲ್ಲಿ ಮೇ 26ರಂದು ಒಟ್ಟು 2,429 ಜನರ ಗಂಟಲು ಮತ್ತು ಮೂಗಿನ ದ್ರವ ಸಂಗ್ರಹಿಸಲಾಗಿದೆ. ಇದರಲ್ಲಿ 1,508 ನೆಗೆಟಿವ್‌ ವರದಿ ಬಂದರೆ 585 ಪಾಸಿಟಿವ್‌ ಫಲಿತಾಂಶ ಬಂದಿದೆ. ಕಡೂರು 502, ಚಿಕ್ಕಮಗಳೂರು 1,145, ಕೊಪ್ಪ 145, ಮೂಡಿಗೆರೆ 191, ಶೃಂಗೇರಿ 92, ಅಜ್ಜಂಪುರ 47, ತರೀಕೆರೆ ತಾಲೂಕಿನಲ್ಲಿ307 ಮಾದರಿಗಳನ್ನು ಸಂಗ್ರಹಿಸಲಾಗಿದೆ. ಕೂದುವಳ್ಳಿಯಲ್ಲಿ ಸುಮಾರು 150 ಮನೆಗಳಿದ್ದು, ಅಲ್ಲಿಗೆ ಅಧಿಕಾರಿ ತಂಡ ಮತ್ತು ಆರೋಗ್ಯ ಇಲಾಖೆ ಸಿಬ್ಬಂದಿ ಬುಧವಾರ ಪರೀಕ್ಷೆಗೆ ಹೋದರೆ ಅಲ್ಲಿ ಓರ್ವ ಮಹಿಳೆ ಮಾತ್ರ ಟೆಸ್ಟ್‌ ಮಾಡಿಸಿಕೊಂಡರು. ಪಕ್ಕದ ಮಹಜಿದ್‌ ಗ್ರಾಮದಲ್ಲಿ ಮಾಡಿದ ಆಂಟಿಜನ್ ಟೆಸ್ಟ್‌ನಲ್ಲಿಇಬ್ಬರಿಗೆ ಪಾಸಿಟಿವ್‌ ಬಂದ ಹಿನ್ನೆಲೆಯಲ್ಲಿ ಆ ಊರಿನ ಎಲ್ಲ ಜನ ಪರೀಕ್ಷೆಗೆ ಒಳಪಟ್ಟರು. ದುರಾದೃಷ್ಟ ಯಾರಿಗೂ ಪಾಸಿಟಿವ್‌ ಬರಲಿಲ್ಲ. ಹೀಗೆ ಅಧಿಕಾರಿ, ಸಿಬ್ಬಂದಿ ಬಹಳ ಕಾಳಜಿಯಿಂದ ಕೊರೊನಾ ಕಟ್ಟಿಹಾಕುವ ಕೆಲಸದಲ್ಲಿ ತೊಡಗಿಕೊಂಡಿದ್ದರೂ ಜನ ಮಾತ್ರ ನಮಗೂ, ಕೊರೊನಾಕ್ಕೂ ಸಂಬಂಧವೇ ಇಲ್ಲ ಎಂದು ನಿರಾಸಕ್ತಿ ತೋರುತ್ತಿರುವುದು ಸಂಭವನೀಯ ಅಪಾಯದ ಕರೆ ಗಂಟೆಯಾಗಿ ಪರಿಣಮಿಸಿದೆ. 'ಕಾಯಿಲೆ ಗುಣಲಕ್ಷಣ ಇದ್ದವರು, ಇಲ್ಲದವರು ಎಲ್ಲರನ್ನೂ ಕೋವಿಡ್‌ ಮೊಬೈಲ್‌ ಟೆಸ್ಟಿಂಗ್‌ ಮಾಡುತ್ತಿದ್ದೇವೆ. ಕೆಲವು ಗ್ರಾಮಗಳಲ್ಲಿ ಜನ ಬಹಳ ಉತ್ಸಾಹದಿಂದ ಪರೀಕ್ಷೆ ಮಾಡಿಸಿಕೊಂಡು ಪಾಸಿಟಿವ್‌ ಬಂದರೆ ಸಲಹೆ, ಮಾರ್ಗದರ್ಶನ, ಚಿಕಿತ್ಸೆ ಪಡೆದು ಗುಣಮುಖರಾಗುತ್ತಿದ್ದಾರೆ. ಆದರೆ, ಕೆಲವು ಗ್ರಾಮಗಳಲ್ಲಿ ಪರೀಕ್ಷೆಗೆ ಬರುತ್ತಿಲ್ಲ. ನಾವು ಬರುತ್ತೇವೆ ಎಂದು ಗೊತ್ತಿದ್ದರೂ ಕೂಲಿ, ಕೃಷಿ ಕೆಲಸಕ್ಕೆ ಹೋಗುತ್ತಿದ್ದಾರೆ. ಗುಣ ಲಕ್ಷಣ ಇರುವಂತಹ ಎಲ್ಲರೂ ಪರೀಕ್ಷೆ ಮಾಡಿಸಿಕೊಳ್ಳುವುದು ಒಳ್ಳೆಯದು' ಎನ್ನುತ್ತಾರೆ, ವಸ್ತಾರೆ ಪ್ರಾಥಮಿಕ ಆರೋಗ್ಯ ಕೇಂದ್ರದ ನರ್ಸ್‌ ಹೇಮ 'ಪೊಲೀಸ್‌ ಮೂಲಕ ಗ್ರಾಮೀಣ ಭಾಗಕ್ಕೆ ತೆರಳಿ ಕಡ್ಡಾಯವಾಗಿ ಕೋವಿಡ್‌ ಟೆಸ್ಟ್‌ ಮಾಡಿಸುವಂತೆ ಜಿಲ್ಲಾಡಳಿತ ಸೂಚಿಸಿದರೆ ಸೋಂಕು ನಿಯಂತ್ರಿಸಲು ಸಾಧ್ಯವಾಗಬಹುದು' ಎಂದು ಕೂದುವಳ್ಳಿ ಗ್ರಾ. ಪಂ. ಸದಸ್ಯ ಅರವಿಂದ್‌ ಅಭಿಪ್ರಾಯಪಟ್ಟರು.
from India & World News in Kannada | VK Polls https://ift.tt/3p0oOsF
