ಹೊಸದಿಲ್ಲಿ: ಮೂರು ಬಾರಿ ಚಾಂಪಿಯನ್ಸ್ ಚೆನ್ನೈ ಸೂಪರ್‌ ಕಿಂಗ್ಸ್ ವಿರುದ್ಧ 2021ರ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಟೂರ್ನಿಯ ಪಂದ್ಯದ ಗೆಲುವಿನಲ್ಲಿ ಮಹತ್ತರ ಪಾತ್ರವಹಿಸಿದ ಅವರನ್ನು ನಾಯಕ ಮುಕ್ತಕಂಠದಿಂದ ಗುಣಗಾನ ಮಾಡಿದ್ದಾರೆ. ಇಲ್ಲಿನ ಅರುಣ್ ಜೆಟ್ಲಿ ಕ್ರೀಡಾಂಗಣದಲ್ಲಿ ಸಿಎಸ್‌ಕೆ ನೀಡಿದ್ದ 219 ರನ್ ಗುರಿ ಹಿಂಬಾಲಿಸಿದ ಮುಂಬೈ ಇಂಡಿಯನ್ಸ್ ತಂಡ ಕೊನೆಯ ಓವರ್‌ ಕೊನೆಯ ಎಸೆತದಲ್ಲಿ ಗೆಲುವಿನ ದಡ ಸೇರಿತು. ಮುಂಬೈ ಗೆಲುವಿನಲ್ಲಿ ಮಹತ್ವದ ಪಾತ್ರವಹಿಸಿದ ಕೈರೊನ್‌ ಪೊಲಾರ್ಡ್ ಕೇವಲ 34 ಎಸೆತಗಳಲ್ಲಿ 87 ರನ್ ಚೆಚ್ಚುವ ಮೂಲಕ ಪಂದ್ಯ ಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು. ಪಂದ್ಯದ ಬಳಿಕ ಪೋಸ್ಟ್ ಮ್ಯಾಚ್‌ ಪ್ರೆಸೆಂಟೇಷನ್‌ನಲ್ಲಿ ಮಾತನಾಡಿದ ರೋಹಿತ್ ಶರ್ಮಾ, "ಅತ್ಯುತ್ತಮ ಟಿ20 ಪಂದ್ಯಗಳಲ್ಲಿ ಇದು ಒಂದಾಗಿದೆ. ನನ್ನ ಜೀವನದಲ್ಲಿಯೇ ಈ ತರಹದ ಚೇಸಿಂಗ್‌ ನಾನು ನೋಡಿಯೇ ಇಲ್ಲ. ಪೊಲಾರ್ಡ್ ಅವರ ಅತ್ಯುತ್ತಮ ಇನಿಂಗ್ಸ್‌ಗಳಲ್ಲಿ ಇದು ಒಂದಾಗಿದೆ. ಹೊರಗಡೆಯಿಂದ ನೋಡುವುದು ಅದ್ಭುತವಾಗಿದೆ," ಎಂದು ಸಹ ಆಟಗಾರನನ್ನು ಗುಣಗಾನ ಮಾಡಿದರು. "ಇದು ಒಳ್ಳೆಯ ಪಿಚ್ ಹಾಗೂ ಚಿಕ್ಕ ಮೈದಾನ. ಹಾಗಾಗಿ, ಓವರ್‌ಗಳನ್ನು ಒಮ್ಮೆ ಮುಗಿಸಿದ ಬಳಿಕ ನಾವು ಧನಾತ್ಮಕವಾಗಿರುತ್ತೇವೆ. ನಾವು ಯೋಗ್ಯ ಆರಂಭವನ್ನು ಕಂಡಿದ್ದೆವು ಹಾಗೂ ಆ ಮೇಲೆ ಏನಾಯಿತು ಎಂಬುದು ನಾವು ನೋಡಿದೆವು. ನಾವು ಅಲ್ಲಿಗೆ ಹೋಗಿ ನಮ್ಮನ್ನು ನಾವು ವ್ಯಕ್ತಪಡಿಸಬೇಕು. ಅಗ್ರ ಕ್ರಮಾಂಕದಲ್ಲಿ ಅದ್ಭುತ ಜೊತೆಯಾಟ ಹಾಗೂ ಕೈಣಾಲ್‌ ಹಾಗೂ ಪೊಲಾರ್ಡ್ ಅವರ ಜೊತೆಯಾಟ ಕೂಡ ನಿರ್ಣಾಯಕವಾಗಿದೆ," ಎಂದು ರೋಹಿತ್ ಶರ್ಮಾ ತಿಳಿಸಿದರು. ಆರಂಭಿಕನಾಗಿ ಕಣಕ್ಕೆ ಇಳಿದಿದ್ದ ರೋಹಿತ್ ಶರ್ಮಾ 24 ಎಸೆತಗಳಲ್ಲಿ 35 ರನ್ ಗಳಿಸಿದರು ಹಾಗೂ ಕ್ವಿಂಟನ್ ಡಿ ಕಾಕ್‌ ಅವರೊಂದಿಗೆ ಮುರಿಯದ ಮೊದಲನೇ ವಿಕೆಟ್‌ಗೆ 71 ರನ್ ಗಳಿಸಿ ತಂಡಕ್ಕೆ ಅತ್ಯುತ್ತಮ ಆರಂಭವನ್ನು ದೊರಕಿಸಿಕೊಟ್ಟರು. ಕ್ವಿಂಟನ್ ಡಿ ಕಾಕ್‌ ಅವರು 38 ರನ್ ಗಳಿಸಿದರೆ,ಕೃಣಾಲ್‌ ಪಾಂಡ್ಯ ಕೂಡ 32 ರನ್ ಗಳಿಸಿದರು. "ನೀವು ಬೃಹತ್‌ ಮೊತ್ತವನ್ನು ಚೇಸ್ ಮಾಡುತ್ತಿದ್ದರೆ, ಆಗ ಪವರ್‌ ಹಿಟ್ಟರ್‌ಗಳು ಸಾಧ್ಯವಾದಷ್ಟು ಹೆಚ್ಚಿನ ಎಸೆತಗಳಾಡಲು ಅವಕಾಶ ನೀಡಬೇಕು. ಆದರೆ, ಕೃಣಾಲ್‌ ಪಂಡ್ಯ ಅವರು ಕಾರ್ಯವನ್ನು ನಾವು ಬೆಂಬಲಿಸುತ್ತೇವೆ. ಇಲ್ಲಿನ ಪಿಚ್ ನಮ್ಮ ಶೈಲಿಗೆ ಹೋಲಿಕೆಯಾಗುತ್ತದೆ. ಒಮ್ಮೆ ಕೆಲಸ ಮುಗಿದ ಬಳಿಕ ನಿಮ್ಮ ಬೌಲರ್‌ಗಳನ್ನು ಬೆಂಬಲಿಸಬೇಕು,' ಎಂದರು. " ಬೌಲರ್‌ಗಳು ರಾಜಸ್ಥಾನ್‌ ರಾಯಲ್ಸ್ ವಿರುದ್ಧದ ಪಂದ್ಯದಲ್ಲಿ ನಮಗೆ ಟರ್ನಿಂಗ್‌ ಪಾಯಿಂಟ್‌ ತಂದುಕೊಟ್ಟಿದ್ದರು. ನಮ್ಮ ಪ್ರಮುಖ ಬೌಲರ್‌ಗಳ ಗುಂಪನ್ನು ಬೆಂಬಲಿಸುವುದು ಮತ್ತು ಅವರು ಕೆಲಸವನ್ನು ಹೆಚ್ಚಾಗಿ ಮಾಡುತ್ತಾರೆ ಎಂದು ನನಗೆ ಖಾತ್ರಿಯಿದೆ," ಎಂದು ಚೆನ್ನೈ ಸೂಪರ್‌ ಕಿಂಗ್ಸ್ ವಿರುದ್ಧ ದುಬಾರಿಯಾದರೂ ಬೌಲಿಂಗ್‌ ವಿಭಾಗವನ್ನು ರೋಹಿತ್ ಶರ್ಮಾ ಸಮರ್ಥಿಸಿಕೊಂಡರು. ಮುಂಬೈ ಇಂಡಿಯನ್ಸ್ 219 ರನ್‌ಗಳನ್ನು ಕೊನೆಯ ಓವರ್‌ ಕೊನೆಯ ಎಸೆತದಲ್ಲಿ ಚೇಸ್ ಮಾಡಿತು. ಆ ಮೂಲಕ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಇತಿಹಾಸದಲ್ಲಿಯೇ ಮುಂಬೈ ಇಂಡಿಯನ್ಸ್ ಚೇಸ್ ಮಾಡಿದ ಅತಿ ಹೆಚ್ಚು ರನ್ ಎಂಬ ಹೊಸ ದಾಖಲೆಯನ್ನು ಮಾಡಿತು. ಈ ಐತಿಹಾಸಿಕ ಪಂದ್ಯಕ್ಕೆ ಪ್ರಮುಖ ಕಾರಣವಾಗಿದ್ದು, ಒಂದು ದಶಕದಿಂದ ಮುಂಬೈ ಇಂಡಿಯನ್ಸ್ ಪರ ಆಡುತ್ತಿರುವ ಕೈರೊನ್‌ ಪೊಲಾರ್ಡ್. ಪೊಲಾರ್ಡ್ 68 ರನ್ ಗಳಿಸಿ ಆಡುತ್ತಿದ್ದ ವೇಳೆ ಫಾಫ್‌ ಡು ಪ್ಲೆಸಿಸ್‌ ಅವರ ಸುಲಭ ಕ್ಯಾಚ್‌ ಅನ್ನು ಕೈ ಚೆಲ್ಲಿದ್ದರು. ಮಾಡಿದ ಒಂದೇ ಒಂದು ತಪ್ಪಿನಿಂಡ ಚೆನ್ನೈ ಸೂಪರ್‌ ಕಿಂಗ್ಸ್ ದುಬಾರಿ ಬೆಲೆ ಕಟ್ಟಬೇಕಾಯಿತು. ಪಂದ್ಯದ ಗೆಲುವಿನೊಂದಿಗೆ ಮುಂಬೈ ಇಂಡಿಯನ್ಸ್ ತಂಡ ಪಾಯಿಂಟ್ಸ್ ಟೇಬಲ್‌ನಲ್ಲಿ 8 ಅಂಕಗಳೊಂದಿಗೆ ನಾಲ್ಕನೇ ಸ್ಥಾನವನ್ನು ಇನ್ನಷ್ಟು ಗಟ್ಟಿ ಮಾಡಿಕೊಂಡಿದೆ. ಇನ್ನು ಮೇ.4 ರಂದು ಸನ್‌ರೈಸರ್ಸ್ ಹೈದರಾಬಾದ್‌ ವಿರುದ್ಧ ಇದೇ ಅಂಗಳದಲ್ಲಿ ಸೆಣಸಲಿದೆ. ಇನ್ನು ಸೋತರೂ ಚೆನ್ನೈ ಸೂಪರ್‌ ಕಿಂಗ್ಸ್ 10 ಅಂಕಗಳೊಂದಿಗೆ ಹಾಗೂ ಅತ್ಯುತ್ತಮ ರನ್‌ರೇಟ್‌ನೊಂದಿಗೆ ಅಗ್ರ ಸ್ಥಾನದಲ್ಲಿಯೇ ಉಳಿದಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2SbzcS6
