ಪ್ರವಾಸ ಕಥನ: ಸೀತಾ ಕೇಶವ ಸಿಡ್ನಿ: ದ್ರಾಕ್ಷಿ ತೋಟಗಳಿದ್ದು ವೈನರಿಗೆ ಹೆಸರುವಾಸಿಯಾಗಿರುವ ಆಸ್ಟ್ರೇಲಿಯಾದ ಪ್ರಮುಖ ಪ್ರವಾಸಿ ತಾಣ ’ಹಂಟರ್ ವ್ಯಾಲಿ ’ ಸಿಡ್ನಿ ಸಿ ಬಿ ಡಿ ನಿಂದ ಸುಮಾರು 172 ಕಿ ಮಿ ದೂರದಲ್ಲಿದೆ. ಇಸ್ಕಾನ್ (ಹರೇ ಕೃಷ್ಣ)ನಿಂದ ಸಣ್ಣ ಡೆಡಿಕೇಟೆಡ್ ತಂಡವು ಹರೇಕೃಷ್ಣ ಸಮುದಾಯವನ್ನು ಸ್ಥಾಪಿಸುವ ಗುರಿಯೊಂದಿಗೆ 1988ರಲ್ಲಿ 500 ಎಕರೆ ಭೂಮಿಯನ್ನು ಖರೀದಿಸಿ ’ನ್ಯೂಗೋಕುಲ’ ನಿರ್ಮಿಸಿ, ಸದ್ಯ ಶ್ರಿ ಶ್ರಿ ರಾಧಾಗೋಕುಲಾನಂದ್ ದೇವಾಲಯವಾಗಿ ಕಾರ್ಯ ನಿರ್ವಹಿಸುತ್ತಿದೆ. ಪಟ್ಟಣದ ಜನಜಂಗುಳಿ ಓಟದಿಂದ ಪಾರಾಗಲು ಹಂಬಲಿಸುವವರಿಗೆ ಇದು ಹೇಳಿ ಮಾಡಿಸಿದ ಪ್ರಶಾಂತ ಸ್ಥಳ. ಹರೇ ಕೃಷ್ಣ ಆಶ್ರಮಗಳಲ್ಲಿ ಕೃಷಿ ಬಗ್ಗೆ ಹೆಚ್ಚು ಮಹತ್ವವಾಗಿ ಆಶ್ರಮ ನಿವಾಸಿಗಳ ನೆಲೆಯಾಗಿದೆ. ಇಲ್ಲಿಗೆ ಪ್ರವಾಸಿಗರು ನಿಯಮಿತವಾಗಿ ಭೇಟಿ ನೀಡುತ್ತಾರೆ. ಇಲ್ಲಿ ಸರಳ ಆಶ್ರಮ ಶೈಲಿಯ ಸೌಕರ್ಯಗಳ ವ್ಯವಸ್ಥೆ ಇದ್ದು ಸ್ವಯಂಸೇವಕರಾಗಿ ಕೆಲಸ ಮಾಡಲು ಕೆಲವು ದಿನಗಳು ಅಥವಾ ವಾರಗಳನ್ನು ಕಳೆಯಲು ಅವಕಾಶವಿದೆ. ಮಾತ್ರವಲ್ಲದೇ ಪ್ರವಾಸಿಗರಿಗೆ ಕನಿಷ್ಟ ದರದ ವಸತಿ ಸೌಲಭ್ಯವೂ ಇದೆ. ಸೆಸ್ಸ್ನಾಕ್ ಗ್ರಾಮದಿಂದ ಇದು ಕೇವಲ 12ಕಿ ಮಿ ದೂರ. ಈಸ್ಟರ್ ರಜೆಯಲ್ಲಿ ಆಪ್ತ ಸ್ನೇಹಿತರು ಕರೆಮಾಡಿ ಎಲ್ಲರೂ ಜೊತೆಯಾಗಿ ನ್ಯೂಗೋಕುಲಕ್ಕೆ ಪ್ರವಾಸ ಕೈಗೊಂಡೆವು. ಹೆದ್ದಾರಿಯಾದ ನಂತರ ಸಣ್ಣಸಣ್ಣ ಗ್ರಾಮಗಳನ್ನು ಹಾದು ’ಲಗೂನ’ ಎನ್ನುವ ಗ್ರಾಮದಲ್ಲಿ ನಿಲ್ಲಿಸಿ ಅಲ್ಲಿಯ ಮಾರ್ಕೆಟ್ ಒಳಗೆ ಹೋದರೆ ಇದುವರೆಗೂ ಕೇಳಿ, ನೋಡದೇ ಇರುವ ಸೌತೇಕಾಯಿಗಳು ನಳನಳಿಸುತ್ತಿದ್ದವು. ನಾವು ತದೇಕಚಿತ್ತದಿಂದ ನೋಡುತ್ತಿರುವಾಗಲೇ ಮಾಲೀಕರು ಬಂದು ನಾವು ಇಲ್ಲಿಯೇ ಈ ಸೌತೆಕಾಯಿಗಳನ್ನು ಬೆಳೆಯುತ್ತೇವೆ. ಇದರ ಹೆಸರು ಕಿವಾನೊ, (The African Horned Melon)ಎಂದು , ಇನ್ನೊಂದು ಕಿವಿ ಹಣ್ಣಿನ ತರಹ ಹಸಿರು ಬಣ್ಣದ ಫಿಜೊಯ, ಆರ್ಟಿಕಲ್ ಹೀಗೆ ವಿಶೇಷವಾದ ತರಕಾರಿಗಳನ್ನು ನೋಡಿ ಕಣ್ತುಂಬಿಕ್ಕೊಂಡು ಮತ್ತೆ ನ್ಯೂಗೋಕುಲಕ್ಕೆ ಪ್ರಯಾಣ ಬೆಳೆಸಿದೆವು. ಹೊಸ ಗೋಕುಲವನ್ನು ಸುಮಾರು 12ಗಂಟೆ ಒಳಗೆ ತಲುಪಿ ಮಂದಿರದ ಒಳಗೆ ಹೋಗಿ ಕೆಲವು ನಿಮಿಷಗಳ ಕಾಲ ಕೂತು ಧ್ಯಾನ ಮಾಡಿದೆವು. ಅಷ್ಟರಲ್ಲೇ ಪರದೆಮುಚ್ಚಿ 12.30ಕ್ಕೆ ಆರತಿ ಬೆಳಗಿದರು, ನಾವು ಕೈಮುಗಿದೆವು. ನಂತರ ಗೋವುಗಳು, ಸುತ್ತಮುತ್ತಲಿನ ಪರಿಸರ, ನವಿಲುಗಳನ್ನು ನೋಡಿ ಕಣ್ಣುತುಂಬಿಕೊಂಡು ಭೋಜನವನ್ನು ಹೊರಗಡೆ ತಂಪಾದ ಮರದ ಕೆಳಗೆ ಕೂತು ಸವಿದೆವು. ಅಲ್ಲೇ ಇರುವ ಸರೋವರದ ಸುತ್ತಮುತ್ತ ಓಡಾಡಿ ಪೆಲಿಕನ್ಸ್ ಗಳೆಲ್ಲಾ ಕೂತಿದ್ದ ಜಾಗಕ್ಕೆ ಹೋಗಿ ಬಹಳ ಹತ್ತಿರದಿಂದ ಅವುಗಳ ವರ್ತನೆ, ಆಟ, ಚೇಷ್ಟೆ ನೋಡಿ, ನಾವು ನೀರಿಗೆ ಇಳಿದು ಹೊಸ ಅನುಭವದ ಮಜ ಕಂಡೆವು. ನಂತರ ಸುಮಾರು ದೂರ ಗೆಳೆಯರೊಂದಿಗೆ ನಡೆಯುತ್ತಾ, ಹರಟುತ್ತಾ ಈಸ್ಟರ್ ರಜೆಯ ಗೋಕುಲ ಪ್ರವಾಸ ಅನುಭವಿಸಿದೆವು.
from India & World News in Kannada | VK Polls https://ift.tt/2QudXtQ
