ಗಣೇಶ ಅರ್ಕಾಚಾರಿ ಬ್ಯಾಡಗಿ: ಏಪ್ರಿಲ್ ತಿಂಗಳ ಎರಡನೇ ವಾರದಲ್ಲಿ ಹಣ್ಣುಗಳ ರಾಜ ಮಾವು ಬ್ಯಾಡಗಿ ಮಾರುಕಟ್ಟೆಗೆ ಲಗ್ಗೆಯಿಟ್ಟಿದ್ದು, ವಿವಿಧ ತಳಿಯ ರುಚಿಯಾದ ಮಾವಿನ ಹಣ್ಣುಗಳು ಕಣ್ಮನ ಸೆಳೆದು ಗ್ರಾಹಕರನ್ನು ಕೈ ಬೀಸಿ ಕರೆಯುತ್ತಿವೆ. ತಾಲೂಕಿನಲ್ಲಿ ಅತ್ಯಲ್ಪ ಎಂಬಂತೆ ತಾಲೂಕಿನ ಶಿಡೆನೂರ, ಕಾಗಿನೆಲೆ ತಿಮಕಾಪುರ, ಮೊಟೇಬೆನ್ನೂರ ಛತ್ರ ಗ್ರಾಮ, ಬ್ಯಾಡಗಿ ಪಟ್ಟಣ ಸೇರಿದಂತೆ ಇನ್ನಿತರ ಗ್ರಾಮಗಳಲ್ಲಿ ಮಾವು ಬೆಳೆಯುತ್ತಾರೆ. ಪ್ರತಿ ವರ್ಷ ಯುಗಾದಿಯ ಮಾಗಿ ಛಳಿ ಬಳಿಕ ಮಾರುಕಟ್ಟೆಗೆ ಆಗಮಿಸುವ ವಿವಿಧ ತಳಿಯ ಮಾವಿನ ಹಣ್ಣುಗಳು ತನ್ನದೇ ಆದ ಬಣ್ಣ ಹಾಗೂ ರುಚಿ ಹೊಂದಿವೆ. ಮಕ್ಕಳು, ಯುವಕರು, ವೃದ್ಧರು, ಸೇರಿದಂತೆ ಎಲ್ಲ ವಯೋಮಾನದವರು ಇಷ್ಟ ಪಡುವ ಹಣ್ಣು ಇದಾಗಿದೆ. ಸದ್ಯ ಮಾರುಕಟ್ಟೆಯಲ್ಲಿ ಮಲ್ಲಿಕಾ, ಆಪೂಸ್ ತಳಿಯ ಮಾವಿನ ಹಣ್ಣುಗಳು ದೊರೆಯುತ್ತಿದ್ದು, ಬೇಸಿಗೆಯಲ್ಲಿ ಬಸವಳಿದ ದೇಹಕ್ಕೆ ಚೈತನ್ಯ ನೀಡಲು ತಯಾರಾಗಿವೆ. ಸದ್ಯ ಮಾರುಕಟ್ಟೆಯಲ್ಲಿ ಒಂದು ಡಜನ ಮಾವಿನಹಣ್ಣು 300 ರೂಪಾಯಿಗೆ ಮಾರಾಟವಾಗುತ್ತಿದೆ. ಮಾರುಕಟ್ಟೆಯಲ್ಲಿ ದೊರೆಯುವ ಸೇಬು, ಕಲ್ಲಂಗಡಿ, ಕರಬೂಜಿ, ಪಪ್ಪಾಯಿ ಹಣ್ಣುಗಳು ಸೇರಿದಂತೆ ವಿವಿಧ ಹಣ್ಣುಗಳು ತಮ್ಮಲ್ಲಿ ವಿವಿಧ ಪೋಷಕಾಂಶ ಹಾಗೂ ಖನಿಜಾಂಶ ಒಳಗೊಂಡಿವೆ. ಅದರಂತೆ ಮಾವು ಕೂಡ ಮನುಷ್ಯನ ದೇಹಕ್ಕೆ ಬೇಕಾದ ಜೀವಸತ್ವ, ಖನಿಜಾಂಶ, ಪೊಟ್ಯಾಸಿಯಂ, ಸೋಡಿಯಂ, ಕಾರ್ಬೊಹೈಡ್ರೆಟ್ ಸೇರಿದಂತೆ ಹಲವು ಪೋಷಕಾಂಶ ಹೊಂದಿದ್ದು, ಇವುಗಳು ಮನುಷ್ಯನ ಆರೋಗ್ಯ ಕಾಪಾಡುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ. ಪ್ರಸಕ್ತ ವರ್ಷ ಸೂಕ್ತ ಸಮಯದಲ್ಲಿ ಸಮರ್ಪಕ ಮಳೆ ಹಾಗೂ ತೇವಾಂಶದ ಕೊರತೆಯಿಂದಾಗಿ ಮಾವಿನ ಬೆಳೆ ಇಳುವರಿ ಕುಂಠಿತವಾದ ಕಾರಣ ದರದಲ್ಲಿ ಏರಿಕೆ ಕಂಡು ಬಂದಿದೆ.
from India & World News in Kannada | VK Polls https://ift.tt/3alI3XB
