ಮಂಗಳೂರು/ವಿಟ್ಲ: ಸುಮಾರು ಎರಡು ದಶಕಗಳಿಂದ ಕ್ಷೇತ್ರದಲ್ಲಿ ಅಜೇಯನಾಗಿ ಪಾರುಪತ್ಯ ಮೆರೆದ ಹ್ಯಾಟ್ರಿಕ್ ವೀರ '' ಎಂದು ಬಿರುದು ಪಡೆದ ಕಂಬಳ ಪ್ರಿಯರ ಅಚ್ಚುಮೆಚ್ಚಿನ ಕೋಣ ಸೋಮವಾರ ವಯೋಸಹಜ ಅನಾರೋಗ್ಯಕ್ಕೆ ತುತ್ತಾಗಿ ಇಹಲೋಕ ತ್ಯಜಿಸಿದೆ. 28 ವರ್ಷದ ಕಾಟಿ ಕಳೆದ 20 ವರ್ಷಗಳಿಂದ ಬೋಳಂತೂರು ಮನೆಯಲ್ಲಿದ್ದು, ಕಳೆದ ಕೆಲವು ವರ್ಷಗಳಿಂದ ಕಂಬಳ ಸ್ಪರ್ಧೆಗಳಿಂದ ವಿಶ್ರಾಂತಿ ಪಡೆದಿತ್ತು. ಹಗ್ಗ ಕಿರಿಯ, ಹಗ್ಗ ಹಿರಿಯ ವಿಭಾಗದಲ್ಲಿ ಪದಕಗಳನ್ನು ಬಾಚುತ್ತಾ ಅಪ್ರತಿಮನಾದ 'ಬೋಳಂತೂರು ಕಾಟಿ' ಸುಮಾರು 100ಕ್ಕೂ ಅಧಿಕ ಪದಕಗಳನ್ನು ತನ್ನದಾಗಿಸಿಕೊಂಡಿದ್ದಾನೆ. ಉಡುಪಿ ದೇವದಾಸ್ ಗಡಿಯಾರ ಅವರ ಗರಡಿಯಲ್ಲಿ ಪಳಗಿದ ಕಾಟಿ ಶಿರ್ವ ವಿಶ್ವನಾಥ ಪ್ರಭು ಅವರ ಗರಡಿಯಲ್ಲಿ ನೇಗಿಲು ಕಿರಿಯ ವಿಭಾಗದಲ್ಲಿ ಚಿನ್ನದ ಪದಕ ಅಲಂಕರಿಸಿತ್ತು. ಆ ಬಳಿಕ ಪಾರುಪತ್ಯ ಮೆರೆದಿದ್ದಾನೆ. ಉಡುಪಿಯ ಸಾಂಪ್ರದಾಯಿಕ ಕಂಬಳದ ಹಗ್ಗ ಕಿರಿಯ ವಿಭಾಗದಲ್ಲಿ ದಶಕಗಳ ಕಾಲ ಪದಕಗಳನ್ನು ಬಾಚುತ್ತಾ ರಾಜನಾಗಿ ಮೆರೆದಿದ್ದಾನೆ. ಆ ಬಳಿಕ ಬಾರ್ಕೂರು ಶಾಂತಾರಾಮ ಶೆಟ್ಟಿಯವರು ಕಾಟಿಯನ್ನು ಖರೀದಿಸಿದ್ದು, ಹಗ್ಗ ಕಿರಿಯ ವಿಭಾಗದಲ್ಲಿ ಹಲವು ಪದಕಗಳನ್ನು ಬಾಚಿಕೊಂಡಿದ್ದಾನೆ. ಬಳಿಕ ಬೆಳುವಾಯಿ ಸದಾನಂದ ಶೆಟ್ಟಿಯವರ ಮನೆಗೆ ಬಂದ ಕಾಟಿ ಹಗ್ಗ ಹಿರಿಯ ವಿಭಾಗದಲ್ಲಿ ಸ್ಪರ್ಧೆ ಮುಂದುವರಿಸಿದ. ಇದಾದ ನಂತರ ಬೋಳಂತೂರು ಗಂಗಾಧರ ರೈಗಳು ಕಾಟಿಯನ್ನು ಖರೀದಿಸಿ, ಹಗ್ಗ ಹಿರಿಯ ವಿಭಾಗದಲ್ಲಿ ಓಡಿಸಿದರು. ಅಲ್ಲೇ ಜೀವಮಾನದ ಕೊನೇ ದಿನವರೆಗೂ ಕಾಟಿ ಅದೇ ಮನೆಯಲ್ಲೇ ಇದ್ದ. 8 ವರ್ಷಗಳಿಂದ ನಾರ್ನಕೊಡಿ ಅನಿಫ್ ಅವರು ಕಾಟಿಯನ್ನು ಆರೈಕೆ ಮಾಡಿದ್ದಾರೆ. ಹ್ಯಾಟ್ರಿಕ್ ಸರದಾರ! ಪುತ್ತೂರು ಕೋಟಿ-ಚೆನ್ನಯ ಕಂಬಳದಲ್ಲಿ 2001ರಿಂದ ಹಗ್ಗ ಹಿರಿಯ ವಿಭಾಗದಲ್ಲಿ ಸತತ ಮೂರು ವರ್ಷ ಚಿನ್ನದ ಪದಕ ಪಡೆದು ಹ್ಯಾಟ್ರಿಕ್ ಮಾಡಿದ ಹಿರಿಮೆ ಕಾಟಿಯದ್ದು. ಈ ದಾಖಲೆಯನ್ನು ಯಾವ ಕೋಣಗಳಿಗೂ ಅಳಿಸಲು ಸಾಧ್ಯವಾಗಿಲ್ಲ. 5 ವರ್ಷಗಳ ಕಾಲ ಸರಣಿಶ್ರೇಷ್ಠನಾಗಿ ಮಿಂಚಿ, ಕಂಬಳ ಕ್ಷೇತ್ರದ ಸಾಮ್ರಾಟನಾಗಿ ಮೆರೆದಿದ್ದಾನೆ. ಗಂತಿನಲ್ಲಿ ಶಿಸ್ತಿನ ಸಿಪಾಯಿ! ಕಂಬಳ ಓಟಕ್ಕೆ ತಕ್ಕುದಾದ ಮೈಕಟ್ಟು ಹೊಂದಿರುವ ಕಾಟಿ ಕಂಬಳ ಕರೆಗಿಳಿದರೆ ಶಿಸ್ತಿನ ಸಿಪಾಯಿ. ಸ್ಪರ್ಧೆಯ ಗಂತಿನಲ್ಲಿ ಯಾವುದೇ ಕಿರಿಕಿರಿಯಿಲ್ಲದೆ ಸ್ಪರ್ಧೆಗೆ ಅಣಿಯಾಗಿ ನಿಲ್ಲುತ್ತಾನೆ. ಒಮ್ಮೆ ಸ್ಪರ್ಧೆಗೆ ನಿಂತರೆ ತನ್ನ ಗುರಿಯೆಡೆಗೆ ಮಾತ್ರ ದೃಷ್ಟಿ. ಓಟ ಆರಂಭಿಸಿದರೆ ತನ್ನ ಜತೆಗಾರ ಯಾವುದೇ ಕೋಣವಿದ್ದರೂ ಮುಂದಡಿಯಿಟ್ಟು ಶರವೇಗದಲ್ಲಿ ಗುರಿ ಮುಟ್ಟ ಬಲ್ಲ ಸಾಮ್ರಾಟ. ಈ ರೀತಿ ಸಾಧನೆ ಮಾಡಿದ ಕಾಟಿ ಅಸೌಖ್ಯದಿಂದ ಸೋಮವಾರ ಮೃತಪಟ್ಟಿದ್ದಾನೆ. ಗೌರವಯುತ ಅಂತ್ಯಸಂಸ್ಕಾರ! ಸೋಮವಾರ ಕಾಟಿ ಮೃತಪಟ್ಟಿದ್ದು, ಕಂಬಳ ಕೋಣದ ಓಟದ ರೀತಿಯಲ್ಲೇ ಪಾವಡೆ, ನೆತ್ತಿ ಬಲ್ಲು ಹಾಕಿ ಅಲಂಕಾರಗೊಳಿಸಿ, ಅಂತ್ಯಸಂಸ್ಕಾರ ನಡೆಸಲಾಯಿತು. ಕಂಬಳ ಕೋಣದ ಯಜಮಾನ ಕುಟುಂಬಸ್ಥರು, ಕಂಬಳಾಭಿಮಾನಿಗಳು ಕಾಟಿಗೆ ನೋವಿನ ವಿದಾಯ ಹೇಳಿದರು.
from India & World News in Kannada | VK Polls https://ift.tt/3n3JvDh
