ಆನೇಕಲ್: ಆನೇಕಲ್ ತಾಲೂಕಿನಲ್ಲಿ ಸಿಲಿಂಡರ್ ಕಾಳಸಂತೆಯಲ್ಲಿ ಮಾರಾಟವಾಗುತ್ತಿರುವ ಆರೋಪಗಳು ಕೇಳಿಬಂದಿವೆ. 60 ಕೆ.ಜಿ. ತೂಕದ ಜಂಬೊ ಸಿಲಿಂಡರ್ಗೆ ಮಾರುಕಟ್ಟೆಯಲ್ಲಿ 1200 ರೂ. ನಿಂದ 1500 ರೂ.ವರೆಗೆ ದರವಿದ್ದು, ಕಾಳಸಂತೆಯಲ್ಲಿ ತಲಾ ಸಿಲಿಂಡರ್ ಒಂದಕ್ಕೆ 9000 ರೂಪಾಯಿಂತೆ ಮಾರಾಟ ಮಾಡಲಾಗುತ್ತಿದೆ ಎಂದು ವೈದ್ಯರೊಬ್ಬರು ಆರೋಪಿಸಿದ್ದಾರೆ. ಆಕ್ಸಿಜನ್ ಕೊರತೆಯಿಂದಾಗಿ ನಮಗೂ ಕಾಳಸಂತೆಯಲ್ಲಿ ಖರೀದಿಸುವ ಅನಿವಾರ್ಯತೆ ಸೃಷ್ಟಿಯಾಗುತ್ತಿದೆ. ಮಂಗಳವಾರ ಬೆಳಗ್ಗೆ 9000 ರೂ. ಕೊಟ್ಟು 10 ಸಿಲಿಂಡರ್ ಖರೀಸಿದ್ದೇವೆ ಎಂದು ಇಲ್ಲಿನ ಮಿತ್ರ ಆಸ್ಪತ್ರೆಯ ಡಾ. ಭರತ್ ಮಾಹಿತಿ ನೀಡಿದ್ದಾರೆ. ಕೊರೊನಾ ಎರಡನೇ ಅಲೆ ಅಬ್ಬರಿಸುವ ಮುನ್ನ ಖಾಸಗಿ ಹಾಗೂ ಸರಕಾರದ 20 ಆಸ್ಪತ್ರೆಗಳಿಗೆ ನಿತ್ಯ 60 ಕೆ.ಜಿ ತೂಕದ 200 ಸಿಲಿಂಡರ್ ಬೇಕಾಗುತ್ತಿತ್ತು. ಇದೀಗ ದಿನಕ್ಕೆ 600 ಸಿಲಿಂಡರ್ ಬೇಕಾಗುತ್ತಿದೆ. ಅಷ್ಟೊಂದು ಸಿಲಿಂಡರ್ ಪೂರೈಕೆಯಾಗುತ್ತಿಲ್ಲ ಎಂದು ಸಬ್ ಡೀಲರೊಬ್ಬರು ಮಾಹಿತಿ ನೀಡಿದ್ದಾರೆ. ಅಗತ್ಯವಿರುವಷ್ಟು ಸಿಲಿಂಡರ್ ವಿತರಿಸಲಾಗುವುದು ಎಂದು ಡಿಎಚ್ಒ ಭರವಸೆ ನೀಡಿದ ಹಿನ್ನೆಲೆಯಲ್ಲಿ 60 ಖಾಲಿ ಸಿಲಿಂಡರ್ಗಳನ್ನು ತೆಗೆದುಕೊಡು ಪೀಣ್ಯದ ಯೂನಿವರ್ಸಲ್ ಗ್ಯಾಸ್ ಪ್ಲ್ಯಾಂಟ್ಗೆ ತೆರಳಿದ್ದೆವು. ಆದರೆ, 30 ಸಿಲಿಂಡರ್ ಮಾತ್ರ ತುಂಬಿಸಿಕೊಟ್ಟರು ಎಂದು ಆನೇಕಲ್ ತಾಲೂಕು ಖಾಸಗಿ ಆಸ್ಪತ್ರೆಗಳ ಒಕ್ಕೂಟದ ಪ್ರತಿನಿಧಿ ತಿಳಿಸಿದ್ದಾರೆ. ಬೆಂಗಳೂರು ನಗರ ಜಿಲ್ಲಾ ಆರೋಗ್ಯಾಧಿಕಾರಿ ಶ್ರೀನಿವಾಸ್ ಈ ಬಗ್ಗೆ ಪ್ರತಿಕ್ರಿಯಿಸಿ ಖಾಸಗಿ ಆಸ್ಪತ್ರೆಗಳಲ್ಲಿ ಹೆಚ್ಚು ಸಿಲಿಂಡರ್ ಇಟ್ಟುಕೊಂಡಿರುವುದಿಲ್ಲ. ಇದರಿಂದ ಸಮಸ್ಯೆ ಆಗುತ್ತಿರಬಹುದು. ಅಗತ್ಯವಿರುವಷ್ಟು ಸಿಲಿಂಡರ್ಗಳನ್ನು ಭರ್ತಿ ಮಾಡಿಕೊಡುವ ವ್ಯವಸ್ಥೆ ರೂಪಿಸಲಾಗಿದೆ ಎಂದು ಹೇಳಿದ್ದಾರೆ.
from India & World News in Kannada | VK Polls https://ift.tt/3dCfaZy
