ಹೊಸದಿಲ್ಲಿ: ತಂಡ ಹದಿಮೂರನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಯಲ್ಲಿ ಶುಭಾರಂಭ ಮಾಡಿದ್ದು ಮೊದಲ ನಾಲ್ಕು ಪಂದ್ಯಗಳಲ್ಲಿ ಮೂರು ಪಂದ್ಯಗಳನ್ನು ಗೆದ್ದು ಅಂಕಪಟ್ಟಿಯ ಮೊದಲೆರಡು ಸ್ಥಾನಗಳಲ್ಲಿ ಗುರುತಿಸಿಕೊಂಡಿದೆ. ಶನಿವಾರ ನಡೆದ ಡಬಲ್ ಹೆಡರ್ನ ಮೊದಲ ಪಂದ್ಯದಲ್ಲಿ ಭರ್ಜರಿ ಪ್ರದರ್ಶನ ನೀಡಿದ ಆರ್ಸಿಬಿ ರಾಜಸ್ಥಾನ್ ರಾಯಲ್ಸ್ ವಿರುದ್ಧ 8 ವಿಕೆಟ್ಗಳ ಅಧಿಕಾರಯುತ ಜಯ ದಾಖಲಿಸಿತು. ಚಾಲೆಂಜರ್ಸ್ ಪರ ಲೆಗ್ ಸ್ಪಿನ್ನರ್ ಯುಜ್ವೇಂದ್ರ ಚಹಲ್ 24ಕ್ಕೆ 3 ವಿಕೆಟ್ ಪಡೆದು ಮ್ಯಾಚ್ ವಿನ್ನರ್ ಎನಿಸಿದರೆ, ಓಪನರ್ ದೇವದತ್ ಪಡಿಕ್ಕಲ್ ಮತ್ತು ಕ್ಯಾಪ್ಟನ್ ತಲಾ ಅರ್ಧಶತಕಗಳೊಂದಿಗೆ ತಂಡವನ್ನು ಸುಲಭವಾಗಿ ಗುರಿ ಮುಟ್ಟುವಂತೆ ಮಾಡಿದರು. ತಂಡದ ಈ ಅಮೋಘ ಪ್ರದರ್ಶನದ ಬಗ್ಗೆ ಮಾತನಾಡಿದ ಕ್ಯಾಪ್ಟನ್ ವಿರಾಟ್ ಕೊಹ್ಲಿ, 20 ವರ್ಷದ ಯುವ ಎಡಗೈ ಬ್ಯಾಟ್ಸ್ಮನ್ ದೇವದತ್ ಪಡಿಕ್ಕಲ್ ಅವರ ಬ್ಯಾಟಿಂಗ್ ಪ್ರದರ್ಶನವನ್ನು ಕೊಂಡಾಡಿದ್ದಾರೆ. ಪಡಿಕ್ಕಲ್ ಈ ವರ್ಷ ಐಪಿಎಲ್ ಟೂರ್ನಿಗೆ ಪದಾರ್ಪಣೆ ಮಾಡಿದ್ದು, ಆಡಿದ ನಾಲ್ಕು ಪಂದ್ಯಗಳಲ್ಲಿ ಮೂರು ಅರ್ಧಶತಕಗಳನ್ನ ಬಾರಿಸಿದ್ದಾರೆ. ರಾಜಸ್ಥಾನ್ ರಾಯಲ್ಸ್ ಎದುರು ಕೇವಲ 34 ಎಸೆತಗಳಲ್ಲಿ ಹಾಫ್ ಸೆಂಚುರಿ ಸಿಡಿಸಿದ ಪಡಿಕ್ಕಲ್ ಸದ್ಯ ಐಪಿಎಲ್ 2020 ಟೂರ್ನಿಯಲ್ಲಿ ಒಟ್ಟು 174 ರನ್ಗಳೊಂದಿಗೆ ಅತಿ ಹೆಚ್ಚು ರನ್ ಗಳಿಸಿದ ಬ್ಯಾಟ್ಸ್ಮನ್ಗಳ ಪಟ್ಟಿಯಲ್ಲಿ ನಾಲ್ಕನೇ ಸ್ಥಾನಕ್ಕೇರಿದ್ದಾರೆ. "ಈತನ ಆಟ ಕಂಡು ಅದ್ಭುತವಾಗಿ ಆಡುತ್ತಿದ್ದಾನೆ ಎಂದು ಸೈಮ್ (ಕ್ಯಾಟಿಚ್) ಬಳಿ ಹೇಳಿದ್ದೆ. ಆತನಲ್ಲಿ ಗಂಭೀರ ರೀತಿಯ ಪ್ರತಿಭೆ ಅಡಗಿದೆ. ಚೆಂಡಿನ ಹತ್ತಿರ ಸುಲಭವಾಗಿ ತಲುಪುತ್ತಾರೆ, ಸಮತೋಲನ ಅದ್ಭುತವಾಗಿದೆ ಅವರ ಕಣ್ಣು ಚೆಂಡಿನ ಮೇಲೆ ನೆಲೆಸಿರುತ್ತದೆ. ಇನ್ನು ಅವರು ಎಡಗೈ ಬ್ಯಾಟ್ಸ್ಮನ್ ಆದ ಕಾರಣ ಬೌಲರ್ಗಳಿಗೆ ಒಂದೇ ರೀತಿಯ ನೇರ ಮತ್ತು ನಿಖರತೆ ಕಾಯ್ದುಕೊಳ್ಳುವುದು ಕೂಡ ಕಷ್ಟವಾಗುತ್ತದೆ. ಅಷ್ಟೇ ಉತ್ತಮವಾಗಿ ಆಡುತ್ತಾರೆ ಕೂಡ. ಅವರ ಎಲ್ಲಾ ಹೊಡೆತಗಳೂ ಪರಿಪೂರ್ಣವಾಗಿರುತ್ತದೆ. ಅಪಾಯ ತೆಗೆದುಕೊಂಡು ಯಾವುದೇ ಹೊಡೆತಗಳನ್ನು ಆಡುವುದಿಲ್ಲ," ಎಂದು ರಾಯಲ್ಸ್ ಪಂದ್ಯದ ಬಳಿಕ ಮಾತನಾಡಿದ ಕೊಹ್ಲಿ ತಮ್ಮ ಮನದಾಳ ಹಂಚಿಕೊಂಡಿದ್ದಾರೆ. ಪಂದ್ಯದಲ್ಲಿ 2ನೇ ವಿಕೆಟ್ಗೆ ದೇವದತ್ ಪಡಿಕ್ಕಲ್ ಮತ್ತು ವಿರಾಟ್ ಕೊಹ್ಲಿ 99 ರನ್ಗಳ ಅಮೋಘ ಜೊತೆಯಾಟವಾಡಿ ತಂಡವನ್ನು ಸುಲಭವಾಗಿ ಗುರಿ ಮುಟ್ಟುವಂತೆ ಮಾಡಿದರು. 46 ಎಸೆತಗಳಲ್ಲಿ 63 ರನ್ಗಳನ್ನು ಬಾರಿಸಿದ್ದ ಪಡಿಕ್ಕಲ್ ಕೊನೆಗೆ ಜೋಫ್ರ ಆರ್ಚರ್ ಬೌಲಿಂಗ್ನಲ್ಲಿ ಬೌಲ್ಡ್ ಆದರು. "ಜೊತೆಯಾಟದ ವೇಳೆ ಹೇಗೆ ಇನಿಂಗ್ಸ್ ಕಟ್ಟುವುದು ಎಂಬ ಬಗ್ಗೆ ಮಾತ್ರವೇ ನಾವು ಮಾತನಾಡುತ್ತಿದ್ದೆವು. ಅವರು ತಂಡದ ಪರ ದೀರ್ಘ ಕಾಲ ಬ್ಯಾಟಿಂಗ್ ಮಾಡಿದಷ್ಟೂ ನಮಗೆ ಲಾಭ. ಇಂದು ಅವರು 40-65ರವರೆಗೆ ಉತ್ತಮ ರೀತಿಯಲ್ಲಿ ತಮ್ಮನ್ನು ಕೊಂಡೊಯ್ದರು. ಆತ ಬುದ್ಧಿವಂತ. ಆಟವನ್ನು ಚೆನ್ನಾಗಿ ಅರಿತುಕೊಳ್ಳುತ್ತಾನೆ. ತನಗೆ ಸಿಗುವ ಸಲಹೆಗಳಿಗೆ ಉತ್ತಮ ರೀತಿಯಲ್ಲಿ ಸ್ಪಂದಿಸುತ್ತಾನೆ. ಅವರು ಕಲಿತಷ್ಟೂ ಆರ್ಸಿಬಿ ತಂಡಕ್ಕೆ ಒಳ್ಳೆಯದು," ಎಂದಿದ್ದಾರೆ. ಈ ಮಧ್ಯೆ ದೇವದತ್ ತಮ್ಮ ಅಧಿಕೃತ ಟ್ವಿಟರ್ ಖಾತೆಯಲ್ಲಿ ವಿಶೇಷ ಫೋಟೊ ಒಂದನ್ನು ಹಂಚಿಕೊಂಡಿದ್ದಾರೆ. ಅಂಡರ್ 16 ಆಟಗಾರರಾಗಿದ್ದಾಗ ದೇವದತ್ ಪಡಿಕ್ಕಲ್ ಅಂದು ಆರ್ಸಿಬಿ ಕ್ಯಾಪ್ಟನ್ ಕೊಹ್ಲಿ ಜೊತೆಗೆ ತೆಗೆಸಿಕೊಂಡಿರುವ ಫೋಟೊ ಮತ್ತು ಇಂದು ಕೊಹ್ಲಿ ಜೊತೆಗೆ ಜೊತೆಯಾಟ ಆಡಿದ ಫೋಟೊವನ್ನು ತಮ್ಮ ಸೋಷಿಯಲ್ ಮೀಡಿಯಾ ವೇದಿಕೆಗಳಲ್ಲಿ ಹಂಚಿಕೊಂಡಿದ್ದಾರೆ. ಇದನ್ನು ಆರ್ಸಿಬಿ ರೀ ಟ್ವೀಟ್ ಮಾಡಿದೆ. ಸಂಕ್ಷಿಪ್ತ ಸ್ಕೋರ್ ರಾಜಸ್ಥಾನ್ ರಾಯಲ್ಸ್: 20 ಓವರ್ಗಳಲ್ಲಿ 6 ವಿಕೆಟ್ಗೆ 154 (ಮಹಿಪಾಲ್ ಲೊಮ್ರೊರ್ 47, ರಾಹುಲ್ ತೆವಾಟಿಯಾ 24*, ಜೋಸ್ ಬಟ್ಲರ್ 22; ಯುಜ್ವೇಂದ್ರ ಚಹಲ್ 24ಕ್ಕೆ 3, ಇಸುರು ಉದಾನ 41ಕ್ಕೆ 2). ರಾಯಲ್ ಚಾಲೆಂಜರ್ಸ್ ಬೆಂಗಳೂರು: 19.5 ಓವರ್ಗಳಲ್ಲಿ 2 ವಿಕೆಟ್ಗೆ 158 ( 63, ವಿರಾಟ್ ಕೊಹ್ಲಿ 72*; ಜೋಫ್ರ ಆರ್ಚರ್ 18ಕ್ಕೆ 1, ಶ್ರೇಯಸ್ ಗೋಪಾಲ್ 27ಕ್ಕೆ 1).
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3nbQTfD
