ಅಮೆರಿಕದಲ್ಲಿ ಕಪ್ಪು ವರ್ಣೀಯ ಜಾಜರ್ಜ್ ಫ್ಲಾಯ್ಡ್ ಕ್ರೂರ ಹತ್ಯೆ ಮತ್ತೊಂದು ಬೃಹತ್ ಸಾಮಾಜಿಕ ಚಳುವಳಿಗೆ ಮುನ್ನುಡಿ ಬರೆಯುತ್ತಿದೆ. 21ನೇ ಶತಮಾನದಲ್ಲೂ ವರ್ಣಭೇದ ನೀತಿ ಉಸಿರಾಡುತ್ತಿರುವುದನ್ನು ಕಂಡು ಉದಾರವಾದಿ ಸಮಾಜ ಬೆಚ್ಚಿ ಬಿದ್ದಿದೆ. ಮೈ ಬಣ್ಣದ ಮೇಲೆ ವ್ಯಕ್ತಿಯ ಸಾಮಾಜಿಕ ಸ್ಥಾನಮಾನ ಅಳೆಯುವ ಮನಸ್ಥಿತಿ ಬದಲಾಗದಿರುವವರೆಗೂ ಈ ಹೋರಾಟ ಹೀಗೆಯೇ ಮುಂದುವರೆಯಲಿದೆ. ವೈಟ್ ಸುಪ್ರಮಸಿ(ಶ್ವೇತ ಪ್ರಾಬಲ್ಯ)ದ ಗುಂಗಿನಲ್ಲಿರುವವರನ್ನು ಅಮೆರಿಕವೂ ಸೇರಿದಂತೆ ವಿಶ್ವದಾದ್ಯಂತ ನಡೆಯುತ್ತಿರುವ ಜನಾಂಗೀಯ ಪ್ರತಿಭಟನೆ ಬಡಿದೆಬ್ಬಿಸಲಿದೆ. ನಾಗರಿಕ ಹಕ್ಕುಗಳ ಮುಂದೆ ಯಾರೂ ಮೇಲು-ಕೀಳರಲ್ಲ ಎಂಬ ಸಂದೇಶ ಮತ್ತೊಮ್ಮೆ ಜಗತ್ತಿಗೆ ರವಾನೆಯಾಗಲಿದೆ. ಅದರಂತೆ ಕಪ್ಪು ವರ್ಣೀಯ ಜಾರ್ಜ್ ಫ್ಲಾಯ್ಡ್ ಕ್ರೂರ ಹತ್ಯೆ ಖಂಡಿಸಿ ಅಮೆರಿಕದಲ್ಲಿ ನಡೆಯುತ್ತಿರುವ ಜನಾಂಗೀಯ ಪ್ರತಿಭಟನೆ ವಿಶ್ವದಾದ್ಯಂತ ಚಳುವಳಿಯಾಗಿ ಮಾರ್ಪಡುತ್ತಿದೆ. ಇನ್ನು ಶ್ವೇತಭವನದ ಮುಂದೆ ಪ್ರತಿಭಟನೆ ಮಾಡುತ್ತಿದ್ದ ಪ್ರತಿಭಟನಾಕಾರರ ಮೇಲೆ ಪೊಲೀಸರು ಲಾಠಿ ಪ್ರಹಾರ ಹಾಗೂ ಅಶ್ರುವಾಯು ಪ್ರಯೋಗಿಸಿದ ಘಟನಡಗಡ ಸಂಬಂಧಿಸಿದಂತೆ, ನಾಗರಿಕ ಹಕ್ಕುಗಳ ಹೋರಾಟಗಾರರು ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ವಿರುದ್ಧ ನ್ಯಾಯಾಲಯದಲ್ಲಿ ಮೊಕದ್ದಮೆ ಹೂಡಿದ್ದಾರೆ. ಹಾಗಾದರೆ ಅಮೆರಿಕದಲ್ಲಿ ನಡೆಯುತ್ತಿರುವ ಜನಾಂಗೀಯ ಪ್ರತಿಭಟನೆಗಳ ಬೆಳವಣಿಗೆಯತ್ತ ಗಮನಹರಿಸುವುದಾದರೆ...ಕಪ್ಪು ವರ್ಣೀಯ ಜಾರ್ಜ್ ಫ್ಲಾಯ್ಡ್ ಹತ್ಯ ಖಂಡಿಸಿ ಸಾವಿರಾರು ಜನ ಅಮೆರಿಕದ ಅಧ್ಯಕ್ಷರ ಅಧಿಕೃತ ಕಚೇರಿ ಶ್ವೇತಭವನದ ಮುಂದೆ ಪ್ರತಿಭಟನೆ ನಡೆಸುತ್ತಿದ್ದರು. ಈ ವೇಳೆ ಹಿಂಸಾತ್ಮಕ ಪ್ರತಿಭಟನೆ ವೇಳೆ ಹಾನಿಗೊಳಗಾಗದ ಶ್ವೇತಭವನದ ಸಮೀಪದಲ್ಲೇ ಇರುವ ಚರ್ಚ್ವೊಂದಕ್ಕೆ ಡೊನಾಲ್ಡ್ ಟ್ರಂಪ್ ಭೇಟಿ ನೀಡುವವರಿದ್ದರು.
ಟ್ರಂಪ್ ಮಾರ್ಗ ಸುಗಮಗೊಳಿಸಲು ಪೊಲೀಸರು ಪ್ರತಿಭಟನಾಕಾರರ ಮೇಲೆ ಲಾಠಿ ಬೀಸಿದರಲ್ಲದೇ, ಅಶ್ರುವಾಯುವನ್ನೂ ಪ್ರಯೋಗಿಸಿದ್ದರು. ಈ ಘಟನೆಗೆ ವಿಶ್ವದಾದ್ಯಂತ ಆಕ್ರೋಶ ವ್ಯಕ್ತವಾಗಿತ್ತು. ಶ್ವೇತಭವನದ ಮುಂದೆ ಪೊಲೀಸ್ ಬಲಪ್ರಯೋಗ ನಾಗರಿಕ ಹಕ್ಕುಗಳ ಉಲ್ಲಂಘನೆ ಎಂದೇ ಹೋರಾಟಗಾರರು ಆರೋಪಿಸಿದ್ದರು.
ನಮ್ಮನ್ನು ಕ್ಷಮಿಸಿ: ಗಾಂಧಿ ಪ್ರತಿಮೆ ಧ್ವಂಸಕ್ಕೆ ಭಾರತೀಯರ ಕ್ಷಮೆ ಕೋರಿದ ಅಮೆರಿಕ!
ಇದೀಗ ಈ ಘಟನೆಗೆ ಸಂಬಂಧಿಸಿದಂತೆ ಅಮೆರಿಕದ ನಾಗರಿಕ ಹಕ್ಕುಗಳ ಹೋರಾಟಗಾರರು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ವಿರುದ್ಧ ನ್ಯಾಯಾಲಯದಲ್ಲಿ ಪ್ರಕರಣ ದಾಖಲಿಸಿದ್ದಾರೆ. ಪ್ರತಿಭಟನಾಕಾರರ ಸಾಂವಿಧಾನಿಕ ಹಕ್ಕುಗಳನ್ನು ಟ್ರಂಪ್ ಆಡಳಿತ ಉಲ್ಲಂಘಿಸಿದೆ ಎಂಬ ಆರೋಪದ ಮೇಲೆ ಅಧ್ಯಕ್ಷರ ವಿರುದ್ಧ ನ್ಯಾಯಾಲಯದಲ್ಲಿ ದಾವೆ ಹೂಡಲಾಗಿದೆ.
ಇನ್ನು ಪೊಲೀಸರ ಕ್ರೂರ ದಾಳಿಗೆ ಬಲಿಯಾದ ಕಪ್ಪು ವರ್ಣಿಯ ಜಾರ್ಜ್ ಫ್ಲಾಯ್ಡ್ಗಾಗಿ ಶ್ರದ್ಧಾಂಜಲಿ ಸಭೆ ಏರ್ಪಡಿಸಲಾಗಿತ್ತು. ಮಿನ್ನಿಯಾಪೊಲೀಸ್ನಲ್ಲಿ ಏರ್ಪಡಿಸಲಾಗಿದ್ದ ಶ್ರದ್ಧಾಂಜಲಿ ಸಭೆಯಲ್ಲಿ ಸಾವಿರಾರು ನಾಗರಿಕರು ಪಾಲ್ಗೊಂಡಿದ್ದರು.
ಪೋಲಿಸರಿಂದ ಹತ್ಯೆಗೀಡಾದ ಕಪ್ಪುವರ್ಣೀಯ ಜಾರ್ಜ್ಗಿತ್ತು ಕೊರೊನಾ, ಮರಣೋತ್ತರ ವರದಿ!
ಈ ವೇಳೆ ಮಾತನಾಡಿದ ನಾಗರಿಕ ಹಕ್ಕುಗಳ ಹೋರಾಟಗಾರ ಅಲ್ ಶಾರ್ಪ್ಟನ್, ಜಾರ್ಜ್ ಫ್ಲಾಯ್ಡ್ ಹುತಾತ್ಮನಾಗುವ ಮೂಲಕ ಜಗತ್ತಿನ ಬದಲಾವಣೆಗೆ ನಾಂದಿ ಹಾಡಿದ್ದಾನೆ ಎಂದು ಅಭಿಪ್ರಾಯಪಟ್ಟರು. ಅಲ್ ಶಾರ್ಪ್ಟನ್ ಶ್ರದ್ಧಾಂಜಲಿ ನುಡಿಗಳಿಗೆ ಕಣ್ಣೀರಿಟ್ಟ ಈ ಸಭೆ, ಜಾರ್ಜ್ ಫ್ಲಾಯ್ಡ್ಗೆ ನ್ಯಾಯ ದೊರಕಿಸಿ ಕೊಡುವ ಒಕ್ಕೊರಲಿನ ನಿರ್ಣಯ ಕೈಗೊಂಡಿದೆ.
ಇನ್ನು ಕಪ್ಪು ವರ್ಣೀಯ ಜಾರ್ಜ್ ಫ್ಲಾಯ್ಡ್ ಸಾವಿಗೆ ಕಂಬನಿ ಮಿಡಿದಿರುವ ಬ್ರಟನ್ ಮಾಜಿ ಯುವರಾಜ ಪ್ರಿನ್ಸ್ ಹ್ಯಾರಿ ಪತ್ನಿ ಮೇಘನ್ ಮಾರ್ಕೆಲ್, ಅನ್ಯಾಯದ ವಿರುದ್ಧ ಏನೂ ಹೇಳದಿರುವುದೇ ನಮ್ಮ ತಪ್ಪಾಗಿದೆ ಎಂದು ಕಪ್ಪು ಜನಾಂಗವನ್ನು ಉದ್ದೇಶಿಸಿ ಹೇಳಿದ್ದಾರೆ.
ಮೇಘನ್ ಮಾರ್ಕೆಲ್ ತಾಯಿ ಕೂಡ ಕಪ್ಪು ಜನಾಂಗದವರಾಗಿದ್ದು, ಈ ಹಿಂದೆ ತಾವೂ ಅನೇಕ ಬಾರಿ ಜನಾಂಗೀಯ ನಿಂದನೆಗೆ ಗುರಿಯಾಗಿರುವುದಾಗಿ ಮೇಘನ್ ಹೇಳಿದ್ದಾರೆ.
ಕಪ್ಪು ವರ್ಣೀಯನ ಹತ್ಯೆ ಖಂಡಿಸಿದ ಟ್ರಂಪ್ ಪುತ್ರಿ: ಪ್ರತಿಭಟನೆಗೆ ಬೆಂಬಲ ಸೂಚಿಸಿ ಅಚ್ಚರಿ!
ಇದೇ ವೇಳೆ ಅಮೆರಿಕದ ಪೊಲೀಸರಿಂದ ಹತ್ಯೆಗೊಳಗಾದ ಆಫ್ರಿಕನ್ ಅಮೆರಿಕನ್ನರ ಹೆಸರುಗಳನ್ನು ಪಟ್ಟಿ ಮಾಡಿರುವ ಮೇಘನ್ ಮಾರ್ಕೆಲ್, ಇವರೆಲ್ಲರಿಗೂ ಶ್ರದ್ಧಾಂಜಲಿ ಸಲ್ಲಿಸುವುದಾಗಿ ಹೇಳಿದ್ದಾರೆ.
ಇನ್ನು ಕಪ್ಪು ವರ್ಣೀಯ ಜಾರ್ಜ್ ಫ್ಲಾಯ್ಡ್ ಹತ್ಯೆ ಖಂಡಿಸಿ ಅಮೆರಿಕದಾದ್ಯಂತ ಪ್ರತಿಭಟನೆ ಮುಂದುವರೆದಿದೆ. ಬಹುತೇಕ ಕಡೆ ಶಾಂತಿಯುತ ಪ್ರತಿಭಟನೆ ನಡೆಯುತ್ತಿದ್ದರೂ, ಅಲ್ಲಲ್ಲಿ ಹಿಂಸಾಚಾರ ಭುಗಿದ್ದಿರುವ ಕುರಿತೂ ವರದಿಯಾಗಿದೆ. ಇದೇ ಕಾರಣಕ್ಕೆ 40ಕ್ಕೂ ಹೆಚ್ಚು ಪ್ರಮುಖ ನಗರಗಳಲ್ಲಿ ಕರ್ಫ್ಯೂ ಹೇರಿಕೆಯನ್ನು ಮುಂದುವರೆಸಲಾಗಿದೆ.
‘ನನಗೆ ಉಸಿರಾಡಲಾಗುತ್ತಿಲ್ಲ’ ಅಮೆರಿಕಾ ಜನಾಂಗೀಯ ಸಂಘರ್ಷದ ಸುತ್ತಮುತ್ತ!
ಅಮೆರಿಕದ ಜನಾಂಗೀಯ ಪ್ರತಿಭಟನೆ ಚಳುವಳಿಯ ರೂಪ ಪಡೆಯುತ್ತಿದ್ದು, ವಿಶ್ವದಾದ್ಯಂತ ಪಸರಿಸಿರುವುದು ವಿಶೇಷವಾಗಿದೆ. ಜಾರ್ಜ್ ಫ್ಲಾಯ್ಡ್ ಹತ್ಯೆ ಖಂಡಿಸಿ ವಿಶ್ವದ ಇತರ ಭಾಗಗಳಲ್ಲೂ ಪ್ರತಿಭಟನೆ ನಡೆಯುತ್ತಿದ್ದು, 'ಬ್ಲ್ಯಾಕ್ ಲೈವ್ಸ್ ಮ್ಯಾಟರ್ಸ್' ಎಂಬ ಹೆಸರಿನಲ್ಲಿ ಚಳುವಳಿ ಆರಂಭಿಸಲಾಗಿದೆ.
from India & World News in Kannada | VK Polls https://vijaykarnataka.com/news/world/case-filed-against-donald-trump-over-police-charge-outside-white-house/articleshow/76207609.cms
