ಒಪ್ಪಂದಕ್ಕೆ ಸಹಿ ಹಾಕಲು ಆಸಿಯನ್ ರಾಷ್ಟ್ರಗಳ ಮುಂದೆ ಭಾರತ ಇಟ್ಟಿದ್ದ ಪ್ರಮುಖ ಬೇಡಿಕೆಗಳಿವು 1. ಬೇಸ್ ವರ್ಷದ ವಿಸ್ತರಣೆ: 2013ರಲ್ಲಿಇದರ ಮಾತುಕತೆಗಳು ಆರಂಭವಾಗಿದ್ದವು. ಹೀಗಾಗಿ, ಸರಕು ದರಗಳಿಗೆ ಬೇಸ್ ವರ್ಷವಾಗಿ 2013ನ್ನು ಅಂಗೀಕರಿಸಲಾಗಿತ್ತು. ಆದರೆ, ಭಾರತಕ್ಕೆ ಇದು ಅನಾಹುತಕಾರಿ. ಯಾಕೆಂದರೆ ಆಗಿನ ಭಾರತದ ಸರಕು ದರಗಳು ತೀರಾ ಕಡಿಮೆಯಾಗಿದ್ದವು. ಆ ದರದಲ್ಲಿ ಈಗ ವ್ಯಾಪಾರ ಮಾಡುವುದರಿಂದ ನಷ್ಟವೇ ಅಧಿಕ. 2014ರ ನಂತರ ಕಸ್ಟಮ್ಸ್ ಸುಂಕವನ್ನು ಭಾರತ ಏರಿಸಿತ್ತು. ಹೀಗಾಗಿ, 2019ನ್ನು ಬೇಸ್ ವರ್ಷವಾಗಿ ಪರಿಗಣಿಸಬೇಕು ಎಂದು ಭಾರತ ಕೋರಿತ್ತು. 2014ರಿಂದೀಚೆಗೆ ಭಾರತದ ಜವಳಿ, ವಾಹನ ಬಿಡಿಭಾಗಗಳು, ಎಲೆಕ್ಟ್ರಾನಿಕ್ ಸರಕುಗಳ ದರಗಳು ಶೇ.17ರಷ್ಟು ಏರಿವೆ. 2. ಸ್ವ- ನಿಯಂತ್ರಣ ವ್ಯವಸ್ಥೆ: ಕೆಲವೊಮ್ಮೆ, ಸರಕುಗಳನ್ನು ಔದ್ಯಮಿಕ ಉತ್ಪನ್ನವಾಗಿ ಬೃಹತ್ ಪ್ರಮಾಣದಲ್ಲಿ ಸೃಷ್ಟಿಸುವ ದೇಶ, ಇನ್ನೊಂದು ದೇಶದತ್ತ ಅನಿಯಂತ್ರಿತ ಪ್ರಮಾಣದ ಸರಕುಗಳನ್ನು ರಫ್ತು ಮಾಡಿಬಿಡಬಹುದು. ಆದರೆ ಇದರಿಂದ ಆಮದು ದೇಶಕ್ಕೆ ಹಾನಿ ಹೆಚ್ಚು. ಇದನ್ನು ತಡೆಗಟ್ಟಲು ಎಲ್ಲದೇಶಗಳಲ್ಲಿ ಒಂದು ಬಗೆಯ ಸ್ವ ನಿಯಂತ್ರಣ ವ್ಯವಸ್ಥೆ, ಯಾವ ಸರಕು ತನಗೆ ಬೇಡವೆಂದು ನಿರ್ಧರಿಸುವ ವ್ಯವಸ್ಥೆ ಇರಬೇಕು ಎಂಬುದು ಭಾರತದ ಬೇಡಿಕೆಯಾಗಿತ್ತು. ಸದ್ಯ ಚೀನಾದಿಂದ ಆಟಿಕೆಗಳು, ಪಟಾಕಿಗಳು, ಎಲೆಕ್ಟ್ರಾನಿಕ್ ಉತ್ಪನ್ನಗಳು ಭಾರತಕ್ಕೆ ವಿಪುಲವಾಗಿ ಆಗಮಿಸುತ್ತಿದ್ದು, ಇಲ್ಲಿನ ಕೈಗಾರಿಕೆಗಳನ್ನು ಆತಂಕದಲ್ಲಿ ದೂಡಿವೆ. 3. ಬದಲಾವಣೆ ಸಾಧ್ಯವಾಗಬೇಕು: ಆರ್ಸಿಇಪಿ ಒಪ್ಪಂದದಲ್ಲಿ ಅಳವಡಿಸಲಾಗಿರುವ ಒಪ್ಪಂದ ಪರಿವರ್ತನೆ ನಿಷೇಧದಲ್ಲೂ ತನಗೆ ವಿನಾಯಿತಿ ನೀಡಬೇಕೆಂದು ಭಾರತ ಹೇಳುತ್ತಿದೆ. ರ್ಯಾಚೆಟ್ ಒಬ್ಲಿಗೇಷನ್ ಎಂದರೆ, ಒಂದು ಬಾರಿ ಒಂದು ದೇಶ ಇನ್ನೊಂದು ದೇಶದೊಂದಿಗೆ ಯಾವುದೇ ಸರಕಿನ ಆಮದು ಅಥವಾ ರಫ್ತಿನ ಕುರಿತು ಒಪ್ಪಂದ ಮಾಡಿಕೊಂಡ ಮೇಲೆ, ಅದರ ದರಗಳಲ್ಲಿ ಅಥವಾ ಒಪ್ಪಂದದ ನಿಯಮಾವಳಿಯಲ್ಲಿ ವ್ಯತ್ಯಾಸಗಳನ್ನು ಮಾಡಿಕೊಳ್ಳುವಂತಿಲ್ಲ ಎಂಬುದು. 4. ಡೇಟಾ ಸಂರಕ್ಷಣೆ ಹಕ್ಕು: ಡೇಟಾ ಸಂರಕ್ಷಣೆಯ ಹಕ್ಕುಗಳನ್ನು ದೇಶಗಳ ಬಳಿಯೇ ಉಳಿಸಬೇಕೆಂದು ಭಾರತ ಹೇಳಿತ್ತು. ಆಯಾ ದೇಶದ ಗ್ರಾಹಕರ ಡೇಟಾ ಆಯಾ ದೇಶಗಳಲ್ಲೇ ಉಳಿಯಬೇಕು; ರಾಷ್ಟ್ರೀಯ ಹಿತಾಸಕ್ತಿ, ಭದ್ರತಾ ಸ್ಥಿತಿಗತಿಗೆ ಧಕ್ಕೆ ಉಂಟಾಗುವ ಸಂದರ್ಭಗಳಲ್ಲಿ ಹಾಗೂ ಸಾರ್ವಜನಿಕ ಹಿತಾಸಕ್ತಿಯ ಪಾಲಿಸಿಗಳನ್ನು ರೂಪಿಸುವ ಸಂದರ್ಭದಲ್ಲಿ ಮಾತ್ರ ಇದನ್ನು ಹಂಚಿಕೊಳ್ಳಬಹುದು. ಇ-ಕಾಮರ್ಸ್ ಅಥವಾ ಆನ್ಲೈನ್ ವಾಣಿಜ್ಯಕ್ಕೆ ಸಂಬಂಧಿಸಿ ಇದು ಮಹತ್ವದ್ದಾಗಿದೆ. ಆರ್ಸಿಇಪಿಯಲ್ಲಿ ಆನ್ಲೈನ್ ಮಾರಾಟ ಕಂಪನಿಗಳನ್ನು, ದೇಶದ ಗ್ರಾಹಕರ ಮಾಹಿತಿಗಳನ್ನು ಹೊರಗೆ ಒಯ್ಯದಂತೆ ಭಾರತ ನಿರ್ಬಂಧಿಸುವಂತಿರಲಿಲ್ಲ. 5. ತಂತ್ರಜ್ಞಾನ ವರ್ಗಾವಣೆ: ಭಾರತದಲ್ಲಿ ಹೂಡಿಕೆ ಮಾಡುವ ವಿದೇಶಿ ಅಥವಾ ಬಹುರಾಷ್ಟ್ರೀಯ ಕಂಪನಿಗಳನ್ನು, ನಿಮ್ಮ ತಂತ್ರಜ್ಞಾನವನ್ನು ನಮಗೂ ಹಂಚಿ ಎಂದು ನಾವು ಒತ್ತಾಯಿಸಲು ಸಾಧ್ಯವಿದೆ. ಇಲ್ಲಿನವರಿಗೂ ತರಬೇತಿ ಹಾಗೂ ಕೌಶಲ್ಯಗಳನ್ನು ನೀಡುವಂತೆ ಒತ್ತಾಯಿಸಬಹುದು. ಆದರೆ ಆರ್ಸಿಇಪಿಗೆ ಸೇರಿದ್ದರೆ ಯಾವುದೇ ದೇಶ ಆ ಬಗೆಯಲ್ಲಿ ಕಂಪನಿಗಳನ್ನು ನಿರ್ಬಂಧಿಸುವಂತಿರಲಿಲ್ಲ. ತಂತ್ರಜ್ಞಾನ ವರ್ಗಾವಣೆಗೆ ಅವಕಾಶ ಇರಬೇಕೆಂದು ಭಾರತ ಪ್ರತಿಪಾದಿಸಿತ್ತು.
from India & World News in Kannada | VK Polls https://ift.tt/2NI4H0e
