ಅಹ್ಮದಾಬಾದ್‌: ಕಳೆದ ಆವೃತ್ತಿಯಲ್ಲಿ ಹೀನಾಯ ಪ್ರದರ್ಶನ ತೋರಿದ್ದ ಅವರು ಈಗಾಗಲೇ ಬಿಸಿಸಿಐ ಗುತ್ತಿಗೆ ಪಟ್ಟಿಯಲ್ಲಿ ಹಿನ್ನಡೆ ಅನುಭವಿಸಿದ್ದಾರೆ. ಇದೀಗ ನಡೆಯುತ್ತಿರುವ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿಯೂ ಅವರು ಇನ್ನೂ ಹೇಳಿಕೊಳ್ಳುವಂತಹ ಪ್ರದರ್ಶನ ತೊರಿಲ್ಲ. ಉತ್ತಮ ಪ್ರದರ್ಶನ ತೋರದ ಹೊರತಾಗಿಯೂ ಲೆಗ್‌ ಸ್ಪಿನ್ನರ್‌ ಯುಜ್ವೇಂದ್ರ ಚಹಲ್ ಅವರನ್ನು ಬೆಂಬಲಿಸಿರುವ ತಂಡದ ಮುಖ್ಯ ಕೋಚ್ , ಅವರು ತಂಡದ ಮುಖ್ಯ ಸ್ಪಿನ್ನರ್‌ ಆಗಿದ್ದು, ಅವರ ಸ್ಥಾನಕ್ಕೆ ಯಾವುದೇ ಭಂಗವಿಲ್ಲ ಎಂಬುದನ್ನು ಸ್ಪಷ್ಟಪಡಿಸಿದ್ದಾರೆ. ನಾಯಕ ವಿರಾಟ್‌ ಕೊಹ್ಲಿಯ ಅತ್ಯಂತ ನಂಬಿಕಸ್ಥ ಸ್ಪಿನ್ನರ್‌ ಆಗಿರುವ ಯುಜ್ವೇಂದ್ರ ಚಹಲ್ ಇತ್ತೀಚಿನ ಪಂದ್ಯಗಳಲ್ಲಿ ನಿರೀಕ್ಷಿತ ಪ್ರದರ್ಶನ ತೋರುವಲ್ಲಿ ವಿಫಲರಾಗುತ್ತಿದ್ದಾರೆ. ಅಲ್ಲದೆ, ಕಳೆದ ಆವೃತ್ತಿಯ ಕಳಪೆ ಪ್ರದರ್ಶನದಿಂದಾಗಿ ಚಹಲ್ ಅವರನ್ನು ಬಿಸಿಸಿಐ ತನ್ನ ಗುತ್ತಿಗೆ ಪಟ್ಟಿಯಲ್ಲಿಯೂ ಕೆಳ ದರ್ಜೆಗೆ ಇಳಿಸಿತ್ತು. ಇದೀಗ ನಡೆಯುತ್ತಿರುವ ಐಪಿಎಲ್ ಟೂರ್ನಿಯಲ್ಲಿ ಆಡಿರುವ 7 ಪಂದ್ಯಗಳಲ್ಲಿ ಚಹಲ್ ಪಡೆದಿರುವುದು ಕೇವಲ 4 ವಿಕೆಟ್‌ಗಳು ಮಾತ್ರ. ಹೀಗಿರುವಾಗ ಆತನನ್ನು ಆರ್‌ಸಿಬಿ ಮುಂದಿನ ಎಲ್ಲಾ ಪಂದ್ಯಗಳಿಗೂ ಆಡಿಸುವುದು ಕಷ್ಟದ ಕೆಲಸ. ಪಂಜಾಬ್ ಕಿಂಗ್ಸ್ ವಿರುದ್ಧ 34 ರನ್‌ಗಳ ಹೀನಾಯ ಸೋಲು ಅನುಭವಿಸಿದ ಬಳಿಕ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಸೈಮನ್ ಕ್ಯಾಟಿಚ್‌, "ಅವರ(ಚಹಲ್) ಆಯ್ಕೆಯು ಸ್ಕ್ಯಾನ್‌ ಅಡಿಯಲ್ಲಿದೆ ಎಂದು ನಾವು ಹೇಳುವುದಿಲ್ಲ. ನಮಗಿಂತ ಪಂಜಾಬ್ ಅತ್ಯುತ್ತಮ ಲೈನ್‌ ಅಂಡ್‌ ಲೆನ್ತ್‌ನಲ್ಲಿ ಬೌಲಿಂಗ್‌ ಮಾಡಿದೆ. ಅಲ್ಲದೆ, ನಾವು ಬ್ಯಾಟಿಂಗ್‌ಗೆ ಹೋದಾಗ ವಿಕೆಟ್‌ ಇನ್ನಷ್ಟು ನಿಧಾನಗತಿಯಿಂದ ಕೂಡಿತ್ತು. ಇದು ಗುಡ್‌ ಲೆನ್ತ್‌ ಹಾಕಲು ಬೌಲರ್‌ಗಳಿಗೆ ನೆರವಾಯಿತು. ಆದರೆ, ನಾವು ಬೌಲಿಂಗ್‌ನಲ್ಲಿ ಸ್ವಲ್ಪ ಎಡವಿದ್ದೇವೆ," ಎಂದರು. "ಗೇಲ್‌ಗೆ ಮೊದಲನೇ ಓವರ್‌ ಹಾಕಿದ ಬಳಿಕ ಚಹಲ್ ಎರಡನೇ ಬಾರಿ ಅತ್ಯುತ್ತಮವಾಗಿ ಕಮ್‌ಬ್ಯಾಕ್‌ ಮಾಡಿದರು. ಮೊದಲನೇ ಓವರ್‌ನಲ್ಲಿ ರನ್‌ ಹೊಡೆಸಿಕೊಂಡು ನಂತರ ಕಮ್‌ಬ್ಯಾಕ್‌ ಮಾಡುವುದು ಸುಲಭವಲ್ಲ. ಶಹಬಾಝ್‌ ಅಹ್ಮದ್‌ ಕೂಡ ಉತ್ತಮವಾಗಿ ಬೌಲಿಂಗ್‌ ಮಾಡಿದ್ದಾರೆಂದು ಭಾವಿಸುತ್ತೇನೆ. ಈ ವಿಕೆಟ್‌ನಲ್ಲಿ 180 ರನ್‌ ಸ್ವಲ್ಪ ಜಾಸ್ತಿಯಾಯಿತು," ಎಂದು ಸೈಮನ್ ಕ್ಯಾಟಿಚ್‌ ತಿಳಿಸಿದರು. "ನಿಸ್ಸಂಶಯವಾಗಿ ಇಂದು ನಮಗೆ ನೆಟ್‌ ರನ್‌ ರೇಟ್‌ ಸರಿಯಾಗಿ ಹೊಡೆದಿದೆ. ಪಂಜಾಬ್ ಕಿಂಗ್ಸ್ ತಂಡ ನಮಗಿಂತ ಮೀರಿದ ಪ್ರದರ್ಶನವನ್ನು ತೋರಿದೆ. ಪರಿಸ್ಥಿತಿಗಳಿಗೆ ತಕ್ಕಂತೆ ನಮಗಿಂತ ಅವರು ಉತ್ತಮ ಪ್ರದರ್ಶನ ತೋರಿದ್ದಾರೆ. ಬ್ಯಾಟಿಂಗ್‌ನಲ್ಲಿ ನಾವು ಆರಂಭದಲ್ಲಿ ಹೊಂದಿಕೊಂಡಿದ್ದೆವು, ಆದರೆ ಮಧ್ಯಮ ಓವರ್‌ಗಳಲ್ಲಿ ಪ್ರಮುಖ ವಿಕೆಟ್‌ ಕಳೆದುಕೊಂಡಿದ್ದರಿಂದ, ಡೆತ್‌ ಓವರ್‌ಗಳಲ್ಲಿ ಏನೂ ಮಾಡಲು ಸಾಧ್ಯವಾಗಲಿಲ್ಲ. ಇವತ್ತಿನ ಗೆಲುವಿಗೆ ಪಂಜಾಬ್ ತಂಡ ಅರ್ಹವಾಗಿದೆ," ಎಂದು ಸೈಮನ್ ಕ್ಯಾಟಿಚ್‌ ಎದುರಾಳಿ ತಂಡವನ್ನು ಶ್ಲಾಘಿಸಿದರು. "ಅಗ್ರ ಕ್ರಮಾಂಕದಲ್ಲಿ ಅಸಾಧಾರಣ ಪ್ರದರ್ಶನ ತೋರಿದ ಕೆ.ಎಲ್‌ ರಾಹುಲ್ ಪಂಜಾಬ್ ಕಿಂಗ್ಸ್ 179 ರನ್‌ ದಾಖಲಿಸಲು ನೆರವಾದರು. ನಂತರ, ಬೌಲಿಂಗ್‌ನಲ್ಲಿ ಪಂಜಾಬ್ ಬೌಲರ್‌ಗಳು ಪರಿಸ್ಥಿತಿಗಳಿಗೆ ಹೊಂದಿಕೊಂಡು ಬೌಲಿಂಗ್‌ ಮಾಡಿದರು. ನಮ್ಮ ತಂಡದ ಪ್ರದರ್ಶನ ಬೇಸರ ಮೂಡಿಸಿದೆ, ಆದರೆ, ನಮ್ಮವರು ಖಂಡಿತಾ ಕಮ್‌ಬ್ಯಾಕ್‌ ಮಾಡಲಿದ್ದಾರೆ. ಮುಂದಿನ ಸೋಮವಾರ ಕೋಲ್ಕತಾ ನೈಟ್‌ ರೈಡರ್ಸ್ ವಿರುದ್ಧ ನಮ್ಮ ಹುಡುಗರು ಉತ್ತಮ ಪ್ರದರ್ಶನ ತೋರಲಿದ್ದಾರೆಂಬ ನಿರೀಕ್ಷೆ ನನಗಿದೆ," ಎಂದು ಕ್ಯಾಟಿಚ್‌ ವಿಶ್ವಾಸ ವ್ಯಕ್ತಪಡಿಸಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3e8WroE
