ಹೊಸದಿಲ್ಲಿ: ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ದೊಡ್ಡ ಸಾಧನೆ ಮಾಡಬೇಕೆಂಬ ಹಂಬಲದಿಂದ ಹಲವು ಪ್ರತಿಭಾವಂತ ಆಟಗಾರರು ಕ್ಲಬ್ ಹಂತದಲ್ಲಿ ಮೊದಲು ಕ್ರಿಕೆಟ್ ಆರಂಭಿಸುತ್ತಾರೆ. ಆದರೆ, ಆರಂಭಿಕ ಹಂತದಲ್ಲಿ ಕೆಲವರಿಗೆ ಹಣಕಾಸಿನ ಅಭಾವದಿಂದ ಬ್ಯಾಟ್, ಶೂ ಸೇರಿದಂತೆ ಕ್ರಿಕೆಟ್ ಪರಿಕರಣಗಳನ್ನು ತೆಗೆದುಕೊಳ್ಳುವ ಸಾಮರ್ಥ್ಯ ಇರುವುದಿಲ್ಲ. ಇಂತಹ ಪರಿಸ್ಥಿತಿಗಳಲ್ಲಿಯೂ ಎದೆಗುಂದದೆ ಕಠಿಣ ಪರಿಶ್ರಮ ಪಟ್ಟು ಬಡ-ಮಧ್ಯಮದ ಆಟಗಾರರು ರಾಜ್ಯ ಹಾಗೂ ತಮ್ಮ ರಾಷ್ಟ್ರೀಯ ತಂಡಕ್ಕೆ ಅವಕಾಶ ಗಿಟ್ಟಿಸಿಕೊಳ್ಳುತ್ತಾರೆ. ಆ ಮೂಲಕ ಅವರ ಹಣಕಾಸಿನ ಸಮಸ್ಯೆ ಪರಿಹಾರವಾಗುತ್ತದೆ. ಈ ಹಂತದಲ್ಲಿ ಅವರಿಗೆ ಬ್ಯಾಟ್, ಶೂ ಸೇರಿದಂತೆ ಕ್ರಿಕೆಟ್ ಪರಿಕರಣಗಳನ್ನು ನೀಡಲು ಪ್ರಾಯೋಜಕರು ಮುಂದೆ ಬರುತ್ತಾರೆ. ಆದರೆ, ಜಿಂಬಾಬ್ವೆಯಲ್ಲಿ ಈ ಪರಿಸ್ಥಿತಿ ಇನ್ನೂ ಸುಧಾರಿಸಿಲ್ಲ ಎಂದೇ ಹೇಳಬಹುದು. ಜಿಂಬಾಂಬ್ವೆ ತಂಡವನ್ನು ಪ್ರತಿನಿಧಿಸುತ್ತಿರುವ ಆಟಗಾರರಿಗೆ ಯಾವುದೇ ಪ್ರಾಯೋಜಕರಿಲ್ಲದೇ ಇರುವುದು ಬೇಸರದ ಸಂಗತಿಯಾಗಿದೆ. ಜಿಂಬಾಬ್ವೆ ಆಟಗಾರ ರಿಯಾನ್ ಬರ್ಲ್ ಅವರು ಶನಿವಾರ ತಮ್ಮ ಶೂಗೆ ಅಂಟು ಹಾಕುತ್ತಿರುವ ಚಿತ್ರವನ್ನು ಟ್ವಿಟರ್ನಲ್ಲಿ ಪೋಸ್ಟ್ ಮಾಡಿ ಭಾವನಾತ್ಮಕ ಶೀರ್ಷಿಕೆ ಬರೆದಿರುವುದು ಇದಕ್ಕೆ ಉತ್ತಮ ಸಾಕ್ಷಿ. "ನಾವು ಪ್ರಾಯೋಜಕರನ್ನು ಪಡೆಯುವ ಅವಕಾಶವಿದೆಯೇ? ಏಕೆಂದರೆ ಪ್ರತಿಯೊಂದು ಸರಣಿಗೂ ಶೂ ರಿಪೇರಿ ಮಾಡಲು ನಮ್ಮ ಬಳಿ ಅಂಟು ಇಲ್ಲ," ಎಂದು ರಿಯಾನ ಬರ್ಲ್ ಭಾವನಾತ್ಮಕ ಟ್ವೀಟ್ ಮಾಡಿದ್ದರು. ಇದಾದ ಕೆಲವೇ ಗಂಟೆಗಳಲ್ಲಿ ಇವರ ಟ್ವೀಟ್ ಸಿಕ್ಕಾಪಟ್ಟೆ ವೈರಲ್ ಆಯಿತು. ಇದರ ಪರಿಣಾಮವಾಗಿ ಪೂಮಾ ಸಂಸ್ಥೆಯು ರಿಯಾನ್ ಬರ್ಲ್ಗೆ ಪ್ರಾಯೋಜಕ್ವ ನೀಡಲು ಮುಂದಾಯಿತು. "ನೀವು ಅಂಟನ್ನು ದೂರ ಇಡುವ ಸಮಯ ಬಂದಿದೆ, ನಾವು ನಿಮ್ಮನ್ನು ಆವರಿಸಿದ್ದೇವೆ ," ಎಂದು ಪೂಮಾ ಕ್ರಿಕೆಟ್ ಅಧಿಕಾರಿಯೊಬ್ಬರು ಟ್ವೀಟ್ ಮಾಡಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿದ ರಿಯಾನ್ ಕರ್ಲ್, "ಪೂಮಾ ಕ್ರಿಕೆಟ್ ತಂಡಕ್ಕೆ ಸೇರ್ಪಡೆಯಾಗಲು ಎದುರು ನೋಡುತ್ತಿದ್ದೇನೆ. ಇದು ನಿಮಗೆ ತಲುಪಿದ್ದಕ್ಕೆ ತುಂಬಾ ಧನ್ಯವಾದ," ಎಂದು ಮತ್ತೊಂದು ಟ್ವೀಟ್ ಮಾಡಿದ್ದಾರೆ. ಇದಾದ ಕೆಲವೇ ಕೆಲವು ನಿಮಿಷಗಳಲ್ಲಿ ಪೂಮಾ ಕ್ರಿಕೆಟ್ ಅಧಿಕೃತವಾಗಿ ರಿಯಾನ್ ಕರ್ಲ್ ಅವರಿಗೆ ಪ್ರಾಯೋಕತ್ವ ನೀಡಿದ ಬಳಿಕ ಜಿಂಬಾಂಬ್ವೆ ಆಟಗಾರ ಮತ್ತೊಂದು ಟ್ವೀಟ್ ಮಾಡಿ ಅಭಿಮಾನಿಗಳಿಗೆ ಧನ್ಯವಾದ ಅರ್ಪಿಸಿದರು. "ಪೂಮಾ ಕ್ರಿಕೆಟ್ ತಂಡಕ್ಕೆ ಸೇರ್ಪಡೆಯಾಗುತ್ತಿರುವ ವಿಷಯವನ್ನು ಘೋಷಿಸಲು ತುಂಬಾ ಹೆಮ್ಮೆಯಾಗುತ್ತಿದೆ. ಕೇವಲ 24 ಗಂಟೆಗಳಲ್ಲಿ ಅಭಿಮಾನಿಗಳು ನೀಡಿದ ಬೆಂಬಲವೇ ಇದಕ್ಕೆ ಕಾರಣ. ನಾನು ನಿಮ್ಮೆಲ್ಲರಿಗೂ ಹೆಚ್ಚು ಕೃತಜ್ಞನಾಗಲು ಸಾಧ್ಯವಿಲ್ಲ. ತುಂಬಾ ಧನ್ಯವಾದ." ಎಂದು ಬರ್ಲ್ ಟ್ವೀಟ್ ಮಾಡಿದರು. ಹೆಥ್ ಸ್ಟ್ರೀಕ್, ಅಲ್ಸ್ಟೈರ್ ಕ್ಯಾಂಪ್ಬೆಲ್, ತತೆಂಡಾ ತೈಬು, ಹೆನ್ರಿ ಒಲಂಗಾ, ಫ್ಲವರ್ ಸಹೋದರರು ಸೇರಿದಂತೆ ಹಲವು ಆಟಗಾರರಿಂದ ಜಿಂಬಾಬ್ವೆ 1990 ಹಾಗೂ 2000 ದಶಕಗಳಲ್ಲಿ ಬಲಿಷ್ಠವಾಗಿತ್ತು. ಆದರೆ, ಈ ದಿಗ್ಗಜರು ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ವಿದಾಯ ಘೋಷಿಸಿದ ಬಳಿಕ ಜಿಂಬಾಬ್ವೆ ತಂಡದ ಪ್ರಾಬಲ್ಯ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಕುಸಿಯಿತು. 2010 ರಿಂದ ಜಿಂಬಾಂಬ್ವೆ ತಂಡ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಹೆಣಗಾಡುತ್ತಿದೆ. ಈ ಅವಧಿಯಲ್ಲಿ ಆಡಿದ್ದ ಆರು ಓಡಿಐ ಸರಣಿಗಳಲ್ಲಿ ಮಾತ್ರ ಗೆಲುವು ಪಡೆದಿತ್ತು. ಇದರಲ್ಲಿ ಕೆಲವು ಬಾಂಗ್ಲಾದೇಶ ಮತ್ತು ಶ್ರೀಲಂಕಾ ತಂಡಗಳ ವಿರುದ್ಧ ಎನ್ನುವುದು ಗಮನಾರ್ಹ ಸಂಗತಿ. ಇನ್ನು 2011ರಲ್ಲಿ ಒಂದೇ ಒಂದು ಟೆಸ್ಟ್ ಸರಣಿ ಗೆದ್ದಿದ್ದು, ನಾಲ್ಕು ಸರಣಿಗಳಲ್ಲಿ ಸೋಲು ಅನುಭವಿಸಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3fHOPZO
