ಸಿಂಗಾಪುರ: ಇತ್ತೀಚೆಗಷ್ಟೇ ಇಲ್ಲಿನ ಒಂದು ಆಸ್ಪತ್ರೆಯ ನರ್ಸ್ ಕೊರೊನಾ ಸೋಂಕು ಹೊಂದಿರುವ ಬಗ್ಗೆ ವರದಿಯಾಯಿತು. ಅದರ ಬೆನ್ನಿಗೆ ಓರ್ವ ವೈದ್ಯ ಹಾಗೂ ಮೂವರು ಇತರೆ ರೋಗಿಗಳಿಗೂ ಹರಡಿರುವುದು ಧೃಢವಾಯಿತು. ಅದುವರೆಗೆ ಒಂದೋ ಎರಡೋ ಪ್ರಕರಣಗಳು ಸಮುದಾಯದಲ್ಲಿ ಕಾಣಿಸಿಕೊಳ್ಳುತಿತ್ತು. ವಿದೇಶದಿಂದ ಆಗಮಿಸುವವರನ್ನು ಹೊರತುಪಡಿಸಿ ದೇಶವಾಸಿಗಳಲ್ಲಿ ಸೋಂಕು ಹೆಚ್ಚು ಹರಡಿರಲಿಲ್ಲ. ಯಾಕೆಂದರೆ ಇಲ್ಲಿ ವಿದೇಶದಿಂದ ಬಂದ ಯಾರಿಗೇ ಆದರೂ ಕ್ವಾರಂಟೈನ್ ಹಾಗೂ ಕೋವಿಡ್ ಪರೀಕ್ಷೆ ಕಡ್ಡಾಯವಾಗಿದೆ. ಹಾಗಾಗಿ ಸಮುದಾಯದಲ್ಲಿ ಸೋಂಕಿತರ ಸಂಖ್ಯೆ ಏರಿಕೆ ಕಂಡಿರಲಿಲ್ಲ. ಹೀಗಿದ್ದರೂ ತನ್ನ ಕಾನೂನುಗಳನ್ನು ಸಂಪೂರ್ಣವಾಗಿ ಸಡಿಲಿಸಿರಲಿಲ್ಲ. ಎಲ್ಲೋ ಅಲ್ಲೊಂದು ಇಲ್ಲೊಂದು ಬದಲಾವಣೆ ಮಾಡಿತ್ತು ಅಷ್ಟೇ. ಆದರೆ, ಈಗ ಏಕಾಏಕೀ ಸಮುದಾಯದಲ್ಲಿ ಮತ್ತೆ ಪ್ರಕರಣಗಳು ಏರಿಕೆ ಕಂಡಿವೆ. ಆದರೆ ಆ ನರ್ಸ್ ಈಗಾಗಲೇ ಕೋವಿಡ್ ಲಸಿಕೆ ಪಡೆದಿದ್ದರು ಎಂಬ ವರದಿಯೂ ಇದೆ. ಇವರ ಸಂಪರ್ಕದಿಂದಾಗಿ ಈ ಆಸ್ಪತ್ರೆಯಲ್ಲಿ ಇದುವರೆಗೆ 13 ಪ್ರಕರಣಗಳು ವರದಿಯಾಗಿವೆ. ಹೀಗಾಗಿ ಅವರು ಓಡಾಡಿದ ವಾರ್ಡ್ ಸ್ವಚ್ಛತಾ ಕಾರ್ಯಕ್ಕೆ ಲಾಕ್‌ಡೌನ್ ಮಾಡಲಾಗಿದೆ. ಆ ವಾರ್ಡ್‌ಗಳಲ್ಲಿರುವ ರೋಗಿಗಳು, ಭೇಟಿ ನೀಡುತ್ತಿದ್ದ ಸಂದರ್ಶಕರು ಮತ್ತು ಸಿಬ್ಬಂದಿ ಸೇರಿದಂತೆ ಗುರುತಿಸಲಾದ ಪ್ರಕರಣಗಳ ಎಲ್ಲಾ ನಿಕಟ ಸಂಪರ್ಕಗಳನ್ನು ಕ್ವಾರಂಟೈನ್ ಗೆ ಒಳಪಡಿಸಲಾಗಿದೆ. ಇದು ಸಮುದಾಯದ ಒಳಗಿನ ಸದ್ಯದ ಬಿಸಿಬಿಸಿ ನ್ಯೂಸ್. ಕರೊನಾ ಬಗ್ಗೆ ಇರುವ ಭಯವೇ ಸಿಂಗಾಪುರ ಸರ್ಕಾರದ ಇಷ್ಟೆಲ್ಲಾ ಮುನ್ನೆಚ್ಚರಿಕಾ ಕ್ರಮ. ಕಾನೂನನ್ನು ಕೂಡ ಕೊಂಚ ಬಿಗಿಗೊಳಿಸಿದೆ. ಇನ್ನು ಮುಂದೆ ಹೊರಗಿನಿಂದ ಮನೆಗೆ ಬರುವ ಅತಿಥಿಗಳಲ್ಲಿ ದಿನವೊಂದಕ್ಕೆ ಕೇವಲ ಇಬ್ಬರಿಗೆ ಮಾತ್ರ ಅವಕಾಶ ನೀಡಲಾಗಿದೆ. ಇದುವರೆಗೆ ಅದು 8 ಮಂದಿಗೆ ವಿಸ್ತರಿಸಲಾಗಿತ್ತು. ಆದರೆ ಹಿಂದಿನ ನಿಯಮದಂತೆ ಹೊರಗಡೆ 8 ಮಂದಿ ಒಟ್ಟಿಗೆ ಸೇರುವ ಅವಕಾಶವಿದೆ. ಆಕರ್ಷಣೀಯ ಸ್ಥಳಗಳು, ದೊಡ್ಡ ದೊಡ್ಡ ಮಾಲ್ ಗಳಿಗೂ ಇಂತಿಷ್ಟೇ ಜನರಿಗೆ ಪ್ರವೇಶ ಪಡೆಯಬೇಕೆಂಬ ಮೊದಲಿದ್ದ ನಿಯಮಗಳು ಮತ್ತೆ ಜಾರಿಯಾಗಿವೆ. ಇನ್ನೂ ಸಿಂಗಾಪುರ ದೇಶಕ್ಕೆ ಪ್ರವೇಶ ಮಾಡುವವರಿಗೂ ಕಡಿವಾಣ ಬಿದ್ದಿವೆ. ಭಾರತ ಸೇರಿದಂತೆ ಬಾಂಗ್ಲಾದೇಶ, ನೇಪಾಳ, ಪಾಕಿಸ್ತಾನ ಹಾಗೂ ಶ್ರೀಲಂಕಾದಿಂದ ಸಿಂಗಾಪುರಕ್ಕೆ ಆಗಮಿಸುವ ದೀರ್ಘ ಕಾಲದ ಪಾಸ್ ಹೊಂದಿದವರು ಹಾಗೂ ಅಲ್ಪಾವಧಿಗೆ ಆಗಮಿಸುವ ಸಂದರ್ಶಕರಿಗೆ ಪ್ರವೇಶ ನಿರ್ಬಂಧಿಸಲಾಗಿದೆ. ಸಿಂಗಾಪುರ ಪ್ರವೇಶ ಪಡೆಯುವ ಸಮಯದ 14 ದಿನಗಳವರೆಗೆ ಇವಿಷ್ಟು ದೇಶಗಳಲ್ಲಿ ನೆಲೆಸಿದ್ದರೆ ಈ ಕಾನೂನು ಅನ್ವಯವಾಗುತ್ತದೆ. ಈಗಾಗಲೇ ಆಗಮಿಸಿದ್ದರೆ ಅಂತವರಿಗೆ ಹೆಚ್ಚುವರಿಯಾಗಿ 7 ದಿನ ಕ್ವಾರಂಟೈನ್ ಅವಧಿ ಮುಂದುವರಿಯುತ್ತದೆ. ಸೋಂಕಿತರ ಸಂಖ್ಯೆಯಲ್ಲಿ ಏರಿಕೆಯಾಗುತ್ತಿದ್ದಂತೆ ಕಾನೂನು ಉಲ್ಲಂಘಿಸುವವರ ವಿರುದ್ಧ ಸಮರ ಸಾರಲು ಸಂಬಂಧಪಟ್ಟ ಅಧಿಕಾರಿಗಳು ಸನ್ನದ್ಧರಾಗಿದ್ದಾರೆ. ಸಾರ್ವಜನಿಕ ಸ್ಥಳಗಳಲ್ಲಿ ಮಾಸ್ಕ್ ಬಳಕೆ , ಅಂತರ ಕಾಪಾಡುವಿಕೆ, ಗುಂಪು ನಿಯಂತ್ರಣ ಹೀಗೆ ಸರ್ಕಾರದ ಪ್ರತಿಯೊಂದು ಕಾನೂನುಗಳ ಬಗ್ಗೆಯೂ ತಪ್ಪಿತಸ್ಥರಿಗೆ ಬಿಸಿ ಮುಟ್ಟಿಸಲಿದ್ದಾರೆ. ಇತ್ತೀಚೆಗಿನ ವರದಿ ಪ್ರಕಾರ ನಿಯಮಗಳನ್ನು ಪಾಲಿಸದ ಇಲ್ಲಿನ 10 ಆಹಾರ ಮತ್ತು ಪಾನೀಯ ಮಳಿಗೆಗಳನ್ನು ಮುಚ್ಚಲು ಆದೇಶ ನೀಡಲಾಗಿದೆ. ಸುರಕ್ಷತಾ ಕ್ರಮವನ್ನು ಅನುಸರಿಸದ ಸುಮಾರು 57 ಮಂದಿಗೆ ತಲಾ 300 ಡಾಲರ್‌ನಂತೆ (ಅಂದರೆ 16.7 ಸಾವಿರ ರೂಪಾಯಿ) ದಂಡ ವಿಧಿಸಲಾಗಿದೆ. ಸಿಂಗಾಪುರದಲ್ಲಿ ಏಪ್ರಿಲ್ 30ವರೆಗಿನ ವರದಿ ಪ್ರಕಾರ ಒಟ್ಟು ಕೋವಿಡ್ ಪ್ರಕರಣಗಳ ಸಂಖ್ಯೆ 61, 145. ಇದುವರೆಗೆ ಗುಣಮುಖರಾದವರು 60, 736. ಸಾವಿನ ಸಂಖ್ಯೆ 30. ಇದರಲ್ಲಿ 15 ಮಂದಿಗೆ ಇತರೆ ಆರೋಗ್ಯ ಸಮಸ್ಯೆ ಕೂಡ ಕಾರಣವಾಗಿತ್ತು.
from India & World News in Kannada | VK Polls https://ift.tt/3eKy7se
