ಹೊಸದಿಲ್ಲಿ: ಅರ್ಧಕ್ಕೆ ನಿಂತಿರುವ 2021ರ ಆವೃತ್ತಿಯ ಟೂರ್ನಿಯನ್ನು ಐಸಿಸಿ ಟಿ20 ವಿಶ್ವಕಪ್ ಟೂರ್ನಿಗೂ ಮುನ್ನ ಸೆಪ್ಟಂಬರ್ 15 ರಿಂದ ಅಕ್ಟೋಬರ್ 15ರ ವರೆಗೆ ಯುಎಇಯಲ್ಲಿ ಒಂದು ತಿಂಗಳ ಅವಧಿಯಲ್ಲಿ ಆಯೋಜಿಸಲು ಯೋಜನೆ ರೂಪಿಸುತ್ತಿದೆ ಎಂದು ಟೈಮ್ಸ್ ಆಫ್ ಇಂಡಿಯಾ ವರದಿ ಮಾಡಿದೆ. ಈ ಹಿನ್ನೆಲೆಯಲ್ಲಿ ಭಾರತ ಹಾಗೂ ಇಂಗ್ಲೆಂಡ್ ನಡುವಣ 2 ಮತ್ತು 3ನೇ ಟೆಸ್ಟ್ ಪಂದ್ಯಗಳ ನಡುವಿನ ಅಂತರವನ್ನು ಕಡಿಮೆ ಮಾಡುವ ಸಲುವಾಗಿ ಜೊತೆ ಬಿಸಿಸಿಐ ಮಾತುಕತೆ ನಡೆಸುತ್ತಿದೆ. ನಾಲ್ಕು ವಾರಾಂತ್ಯದಲ್ಲಿ ಎಂಟು ಡಬಲ್ ಹೆಡರ್ ಪಂದ್ಯಗಳನ್ನು ಒಳಗೊಂಡಂತೆ ಒಟ್ಟು 31 ಪಂದ್ಯಗಳನ್ನು 30 ದಿನಗಳಲ್ಲಿ ಮುಗಿಸುವುದು ಬಿಸಿಸಿಐ ಉದ್ದೇಶವಾಗಿದೆ. ಬಿಸಿಸಿಐ ಮೇ.29 ರಂದು ವಿಶೇಷ ಸಾಮಾನ್ಯ ಸಭೆ ಕರೆದಿದೆ. ಈ ಸಭೆಯಲ್ಲಿ ಹದಿನಾಲ್ಕನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಗೆ ಸಂಬಂಧಿಸಿದ ಯೋಜನೆಗಳನ್ನು ಪ್ರಕಟಿಸುವ ಸಾಧ್ಯತೆ ಇದೆ. ಐಸಿಸಿ ಟಿ20 ವಿಶ್ವಕಪ್ ಹಾಗೂ ಇಂಗ್ಲೆಂಡ್ ವಿರುದ್ಧ ಐದು ಪಂದ್ಯಗಳ ಟೆಸ್ಟ್ ಸರಣಿಯ ಆಧಾರದ ಮೇಲೆ ಬಿಸಿಸಿಐ ಮಹತ್ವದ ನಿರ್ಧಾರವನ್ನು ತೆಗೆದುಕೊಳ್ಳಲಿದೆ. ಅಕ್ಟೋಬರ್ 18 ರಿಂದ ಭಾರತದಲ್ಲಿ ಟಿ20 ವಿಶ್ವಕಪ್ ಟೂರ್ನಿ ಆಯೋಜಿಸಲು ನಿಗದಿ ಮಾಡಲಾಗಿದೆ. ಒಂದು ವೇಳೆ ಭಾರತದಲ್ಲಿ ಕೋವಿಡ್-19 ಸನ್ನಿವೇಶ ಮುಂದುವರಿದರೆ, ಮಹತ್ವದ ಟೂರ್ನಿಯನ್ನು ಯುಎಇಗೆ ಸ್ಥಳಾಂತರಿಸಬಹುದು. ಈ ಬಗ್ಗೆ ಐಸಿಸಿ ಜೂನ್ 2 ರಂದು ಎಜಿಎಂ ಜತೆ ಚರ್ಚೆ ನಡೆಸಲಿದೆ. ಆದರೂ, ಭಾರತದಲ್ಲಿಯೇ ಟೂರ್ನಿಯನ್ನು ಆಯೋಜಿಸಲು ಬಿಸಿಸಿಐ ಪ್ರಯತ್ನಿಸುತ್ತಿದೆ. ಹಾಗಾಗಿ ಯುಎಇಯಲ್ಲಿ ಐಪಿಎಲ್ ಟೂರ್ನಿಯ ಎರಡನೇ ಅವಧಿ ಮುಗಿಸಲು ಎದುರು ನೋಡುತ್ತಿದೆ. ಭಾರತ ಹಾಗೂ ಇಂಗ್ಲೆಂಡ್ ನಡುವಿನ ಐದು ಪಂದ್ಯಗಳ ಟೆಸ್ಟ್ ಸರಣಿ ಒಟ್ಟು 41 ದಿನಗಳು ತೆಗೆದುಕೊಳ್ಳಲಿದೆ. ಆದರೆ, 2 ಮತ್ತು 3 ನೇ ಟೆಸ್ಟ್ ಪಂದ್ಯಗಳ ನಡುವೆ 9 ದಿನಗಳ ಅಂತರವಿದೆ. ಎರಡನೇ ಟೆಸ್ಟ್ 12 ರಿಂದ 16ರವರೆಗೆ ನಡೆಯಲಿದೆ ಹಾಗೂ ಮೂರನೇ ಪಂದ್ಯ ಆಗಸ್ಟ್ 25 ರಿಂದ ಆರಂಭವಾಗಲಿದೆ. "ಭಾರತ ತಂಡದ ಇಂಗ್ಲೆಂಡ್ ಪ್ರವಾಸದಲ್ಲಿರುವ ಅಂತರವನ್ನು ಕಡಿಮೆಗೊಳಿಸಿ, ಅದರಿಂದ ಲಭ್ಯವಾಗುವ ದಿನಗಳನ್ನು ಐಪಿಎಲ್ ಟೂರ್ನಿಗೆ ಬಳಸಿಕೊಳ್ಳಲು ಬಿಸಿಸಿಐ ಎದುರು ನೋಡುತ್ತಿದೆ. ಒಂದು ವೇಳೆ 30 ದಿನಗಳಲ್ಲಿ ಟೆಸ್ಟ್ ಸರಣಿ ಮುಗಿಯದೇ ಇದ್ದರೆ, ಭಾರತ ಹಾಗೂ ಇಂಗ್ಲೆಂಡ್ ಆಟಗಾರರು ದಿನಪೂರ್ತಿ ಯುಕೆಯಿಂದ ಯುಎಇಗೆ ಪ್ರಯಾಣ ಮಾಡಬೇಕಾಗುತ್ತದೆ. ಜತೆಗೆ ನಾಕೌಟ್ ಪಂದ್ಯಗಳನ್ನು 5 ದಿನಗಳ ತಡವಾಗಿ ಆಯೋಜಿಸಲಾಗುತ್ತದೆ," ಎಂದು ಮೂಲಗಳು ಹೇಳಿರುವುದನ್ನು ಟಿಒಐ ವರದಿ ಮಾಡಿದೆ. "27 ಪಂದ್ಯಗಳನ್ನು ಮುಗಿಸಲು ಬಿಸಿಸಿಐ 24 ದಿನಗಳನ್ನು ತೆಗೆದುಕೊಳ್ಳಬಹುದು. ಈ ಅವಧಿಯಲ್ಲಿ ನಾಲ್ಕು ವಾರಾಂತ್ಯಗಳು ಲಭ್ಯವಾಗಲಿವೆ. ಆ ಮೂಲಕ ಶನಿವಾರ ಮತ್ತು ಭಾನುವಾರ ಡಬಲ್ ಹೆಡರ್ ಪಂದ್ಯಗಳನ್ನು ಆಯೋಜಿಸುವ ಮೂಲಕ ಒಟ್ಟು 16 ಪಂದ್ಯಗಳನ್ನು ಮುಗಿಸಬಹುದು. ಆಗ ಇನ್ನುಳಿದ 11 ಪಂದ್ಯಗಳಿಗೆ ಬಿಸಿಸಿಐಗೆ 19 ದಿನಗಳು ಲಭ್ಯವಾಗುತ್ತವೆ. ಇದರೊಂದಿಗೆ ಒಂದು ವಾರ ಹೆಚ್ಚುವರಿಯಾಗಿ ಲಭ್ಯವಾಗಲಿದೆ," ಎಂದು ಮೂಲಗಳು ಹೇಳಿವೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3vgFleA
